Teē Ngán Israel gə̄ 31

Ngé rāā loo kə́ táĺ

1Kɔ́ɔ̄ɓē əda Moijə na:

2Á̰a̰ā̰, m̄-gə̄rā Besalel ngōn̄ Uri. Ni i ngōn̄ kaa Hur ō, i de kə́ gír ɓē yā Juda tə́ ō. 3m̄-rāā adə̄ Ndílə́ḿ rosə kemən, kadə̄ kumən edə̄ ngá̰ý ō, kadə̄ dɔn un yá̰á̰ láẃ ngá̰ý ō, kadə̄ ger̄ yá̰á̰ ngá̰ý ō, kadə̄ ger̄ loo rāā kəla gə̄ malang ō. 4Ger̄ núm̄ kəla tá rāā ō, ger̄ rāā kəla lɔ́r ō, kəla arjā̰a̰ ō, kəla gində̄ nə̄ngá kasə ō, 5ger̄ tɔ́sə̄ kadə *mbal̄ gə̄ kə́ gātə̄də́ i ngá̰ý gə̄ ō, ger̄ loo tə́ládə́ kem kār̄də́ gə̄ tə́ ō, ger̄ kəla tɔ́sə̄ kāgə̄ ō. Ni-ger̄ rāā yá̰a̰ malang. 6M-ə̄ndā Oholiab ngōn̄ Ahisamak kə́ gír ɓē yā Dan tə́ kadən tə́ ō, m-ādə̄ kɔdə̄ gə̄ kum kedə̄ ngá̰ý kə dɔdə́ gēé ō, adə̄ a rāān̄ yá̰a̰ gə̄ ń m-ɔ́jiī ní malang. 7A rāān̄ *kújə kənge naā ō, *sandúkə ndū najə̄ gə̄ ō, yá̰a̰ ta sandúkə́ ní ō, ngáń gájə́ yá̰a̰ rāā kəla gə̄ malang kə́ kem kújə́ ní tə́ ō, 8tábəl ō, yá̰a̰ rāā kəla gə̄ kə́ dɔ tə́ ō, ɗəra hor kə́ rāā kə lɔ́ŕ kə́ *unjə̄ njáý njáý ō, yá̰a̰ rāā kəla gə̄ dɔ tə́ ō, *loo róō ndujə̄ yá̰á̰ kə́ kotə majə ō, 9*loo tun̄ yá̰á̰ kə́ yā róō dā̰ kə́ ndējə̄ gə̄ dɔ tə́ ō, yá̰a̰ rāā kəla kə́ dɔ tə́ gə̄ ō, bay kə́ yā ɓōkə́nń man̄ tə́go rɔ̄ ō, nja bay ní ō, 10kūbə̄ gə̄ kə́ yā rāań kəla kem *loo kə́ táĺ tə́ ō, kūbə̄ kə́ yā ɓōĺ gidə gə̄ yā *Aaro̰ *nge tun̄ yá̰a̰ ō, kūbə̄ gə̄ ń kadə̄ ngán Aaro̰ gə̄ əlan̄ rɔ̄də́ tə́ yā rāań kəla tun̄ yá̰á̰ ní ō, 11*yibə̄ kə́ táĺ ō, ndujə̄ yá̰á̰ kə́ kotə majə kə́ yā róō kem *loo kə́ táĺ tə́ ō. A rāān̄ i tītə̄ ń m-ɔ́jiīneé noō.

Ndɔ̄ sabat

12Kɔ́ɔ̄ɓē əda Moijə na 13kə ɔr̄ najə̄ kə ngán *Israel gēé tītə̄ ń toó beé:

Ā ī-ɓōlíī ndɔ̄ *sabat yāḿ gə̄, tɔdɔ̄ i yá̰á̰ kə́ to mbo̰ō̰ḿ mā tə́ sesí kə dɔ ɓāl̄ gə̄, yā kadə̄ de gə̄ gerə̄n̄neé kadə̄ i mā Kɔ́ɔ̄ɓē n m-ɔ̄r̄ kam̄sí tayā ní. 14Ā ī-ɓōlíī ndɔ̄ *sabat tɔdɔ̄ i ndɔ̄ kə́ yā ɓōĺ gidə tām̄ yāsí tə́. Deē ń a rāā ndɔ̄ ń noō ndɔ̄ kə́ karī tə́ ní, a tɔ̄l̄nən̄ kɔ̄ɔ́. A̰á̰ā̰, deē ń a rāā kəla ndɔ̄ ń noō tə́ ní a ɔrə̄n̄ kɔ́ɔ̄ dan ngán Israel gə̄ tə́ kɔ̄ɔ́. 15Ndɔ̄ kə́ mehḛ́ gə̄ i yā rāań kəla, ba ndɔ̄ kə́ nge ko̰ sīrí i ndɔ̄ *sabat. I ndɔ̄ kə́ kɔr̄ kam̄ tayā tām̄ yā Kɔ́ɔ̄ɓē tə́. Deē ń a rāā sabat tə́ ní a tɔ̄lə̄n̄ kɔ́ɔ̄ kɔ̄ɔ́. 16Ngán Israel gə̄ a ɓōlə́n̄ ndɔ̄ *sabat, nin̄ gē ngáńdə́ gē ngán kaadə́ gē, tɔdɔ̄ i yá̰á̰ kə́ ɓoojí naā tə́ kə́ a to ngándáńg. 17Ndɔ̄ ń noō i ndɔ̄ kə́ ɔ́jə dɔ ɓoo naā yāḿ mā Kɔ́ɔ̄ɓē kə ngán *Israel gēé kə́ a to ngándáńg. I yá̰á̰ kə́ ɔjə kadə̄ m̄-rāā dɔ rā̰ ō, dɔ nang ō, i kem ndɔ̄ mehḛ́, ba kə ndɔ̄ kə́ nge ko̰ sīrí anī m-ɔ̄r̄ koō.

18Dan ń Kɔ́ɔ̄ɓē ɔr̄ najə̄ kə Moijə dɔ mbal̄ *Sinai tə́ oy anī adə̄n bar mbal̄ kə́ jōó gə̄ ń nəkɔ́ ndang ndū najə̄ gə̄ gidə tə́ ní.

Currently Selected:

Teē Ngán Israel gə̄ 31: BS

Highlight

Compare

Copy