Teē Ngán Israel gə̄ 32

Ngán Israel gə̄ nujən̄ madə̄ naā ń Nə́ɓā əhɔ sedə́ ní

(32-34)

Ngōn̄ man̄g kə́ rāā kə lɔ́rɔ́

1Dan ń ngán *Israel gə̄ a̰a̰n̄ kadə̄ Moijə risə dɔ mbalá láẃ aĺ anī, kánə̄n̄ naā rɔ̄ *Aaro̰ tə́, ədanən̄ na kə rāā nə́ɓā kə́ kadə̄ njə̄rā kété nodə́ tə́ kə adə̄də́, tɔdɔ̄ yá̰á̰ ń na rāā Moijə, nge teē sedə́ kem ɓē kə́ Ejiptə tə́ kɔ̄ɔ́ ní na n-gerə̄n̄ alé. 2Anī Aaro̰ tél ədadə́ na kə ró̰ȳn̄ nə̄ngá lɔ́ŕ gə̄ kə́ mbī nə̄yá̰də́ gə̄ tə́ ō, kə́ mbī ngáńdə́ kə́ dəngam gə̄ tə́ ō, kə́ dəyá̰ gə̄ tə́ ō, kə reēn̄neé kə adə̄nən̄. 3Ngán Israel gə̄ malang ró̰ȳn̄ nə̄ngá lɔ́ŕ kə́ mbīdə́ gə̄ tə́ reēn̄neé adə̄nən̄. 4Aaro̰ taā nō horoó rāā ngōn̄ man̄g tə́. Anī ngán *Israel gə̄ ədan̄ na: Á̰a̰ī nə́ɓā yājí ń teē sejí kem ɓē kə́ Ejiptə tə́ kɔ̄ɔ́ ní n toó.

5Dan ń Aaro̰ a̰a̰ beé anī, rāā *loo tun̄ yá̰a̰ adə̄ ra sɔɔ̄ no ngōn̄ man̄g ní, ba ənī mbēr̄ əda na bírí na i nāā yā Kɔ́ɔ̄ɓē. 6Teē bírí anī ngán *Israel gə̄ ḭḭn̄ dɔɔ́ kə gír looí ɓatə, ndējə̄n̄ *yá̰a̰ tun̄ gə̄ kə́ yā róō horoó ō, *yá̰a̰ tun̄ gə̄ kə́ tām̄ yā kem kógə̄ḿ tə́ ō. Gō tə́ anī tél ndin̄ nang tə́ əsan̄ yá̰a̰ ō, a̰ȳn̄ ō, ḭḭn̄ dɔɔ́ kógə̄n̄ naā ō. 7Anī Kɔ́ɔ̄ɓē əda Moijə na kə risə nang tə́ láẃ, tɔdɔ̄ ngán Israel gə̄ ń na teē sedə́ kem ɓē kə́ Ejiptə tə́ kɔ̄ɔ́ ní na rāān̄ yá̰á̰ kə́ majaĺ ngá̰ý, 8na tɔ̄ɔ̄n̄ láẃ ngá̰ý bā̰ā̰ loo tɔ̄ɔ̄ tə́ kɔ̄ɔ́ dɔ róbə́ ń na n-ɔjədə́ tə́ ní. Na rāān̄ ngōn̄ man̄g tām̄ yādə́ tə́ kə lɔ́ŕ kə́ nō horoó. Na ɔsən̄ nodə́ nang tə́ non tə́ ō, na tunə̄n̄ yá̰a̰ adə̄nən̄ ō. Tá ədan̄ na i nə́ɓā yādə́ ń na teē sedə́ kem ɓē kə́ Ejiptə tə́ kɔ̄ɔ́ ní n noó ō. 9Kɔ́ɔ̄ɓē əda Moijə na n-a̰a̰ kadə̄ ngán Israel gə̄ na i de kə́ ngé dɔ ngan̄g gə̄. 10Ní kə əya̰n kadə̄ wōn̄g yān kə rāān dɔdə́ tə́, na n-a n-nujədə́ kɔ̄ɔ́ malang ba n-a n-rāā kadə̄ Moijə tél gír de kə́ ngá̰ý gə̄.

11Banī Moijə rāā Kɔ́ɔ̄ɓē Nə́ɓā yān ɓɔ́ kadə̄ wōn̄g yān kə tetə, ədan na ké gír de gə̄ ń noō i gír deē yān gə̄ ń nəkɔ́ na ɔydə́ teē sedə́ dɔ nang kə́ Ejiptə tə́ kɔ̄ɔ́ kə jīneé ō, kə tɔ́gən kə́ ngá̰ý ō ní aĺ wa. 12Ní dan ń na a rāā wōn̄g tītə̄ ń noō sedə́ ní, ké bírí a de kə́ Ejiptə gə̄ a ədan̄ na i rí wa? A ədan̄ na ɔr̄də́ na teē sedə́ na i yā ndāngə́nń sedə́ loo kem ndul tə́, yā tɔ̄l̄də́ dɔ mbal̄ gə̄ tə́ ō, yā tɔ̄ɔ̄ kōōdə́ malang kɔ̄ɔ́ dɔ nang tə́ ō aĺ wa. Ní kadə̄ wōn̄g yān kə tetə ō, kə loo rāā yá̰á̰ kə́ majaĺ kə gír deē yān gēé ō. 13Kadə̄ kə əga kemən dɔ ngé kəla yān gə̄ tə́: Abəraham ō, Isaak ō, Jakob ō, ń nəkɔ́ túbə̄ kə rɔ̄neé ənīń ndūn adə̄də́#32.13 K.12: Nə́ɓā ənī míndən adə̄ Abəraham i kem makətūbə̄ Tkg. 12.2-3, 15.4-5, 22.17-18, 26.3 tə́. Ní ənī míndən adə̄ Jakob i kem makətūbə̄ Tkg. 28.1-3 tə́. əda na ngán kaadə́ gə̄ na a rosən̄ loo tītə̄ tə́yō̰ gə̄ kə́ dɔ rā̰ tə́ ō, ədadə́ na dɔ nang ń na ɔr̄ najə̄n sedə́ ní na a adə̄ ngán kaadə́ gə̄ kadə̄ tél yá̰a̰ yādə́ kə́ kə́ njɔ́ḿ gə̄ tə́ gə̄ tə́ ní ō. 14Dan ń Kɔ́ɔ̄ɓē oō beé anī, lōō gír yá̰á̰ ń əda na n-a n-rāā kə gír deē yān gēé ní tə́ kɔ̄ɔ́.

15Moijə tél dɔ tə́, risə dɔ mbalá kə bar mbal̄ kə́ jōó gēé jīn tə́. *Ndū najə̄ gə̄ yā Nə́ɓā i kə́ ndang dām̄ jōó tū bar mbal̄ gə̄ ní tə́. Ndangən̄ kem gē gidə gē. 16I Nə́ɓā nəkɔ́ n rāā bar mbal̄ gə̄ ní ō, ndang yá̰a̰ gidə tə́ kə jīneé ō ní. 17Dan ń Jojue oō kōō kɔŕ ń ngán *Israel gə̄ a əgan̄ ní anī, əda Moijə na i kɔŕ rɔ̄ɔ̄ n a ɓār̄ kem ɓēé noō. 18Anī Moijə tél ədan na i ngé tetə rɔ̄ɔ̄ gə̄ n a əgan̄ kɔŕ noō aĺ ō, i de kə́ rɔ̄ɔ̄ rāādə́ gə̄ n a sɔ̄ḿ noō aĺ ō. Yá̰á̰ ń na n-oō noó na i de gə̄ n a ənīn̄ pā noó.

19Dan ń reē əndān̄ dɔ ɓē ngɔr anī, Moijə a̰a̰ ngōn̄ man̄g ní ō, a̰a̰ ngán *Israel gə̄ loo ndām̄ naā tə́ ō. Wōn̄g rāān adə̄ tə́nī bar mbal̄ gə̄ kə́ jīn tə́ nja mbal̄ tə́ tə́nī tɔ̄ɔ̄ kɔ̄ɔ́, 20ba un ngōn̄ man̄g ń rāān̄ ní ənī horoó, rúndə̄ kúlən ɓōkə́ kum man̄ tə́ adə̄ ngán Israel gə̄ a̰ȳn̄.

21Tā anī dəje *Aaro̰ na ké gír de gə̄ ń noō rāān i rí seneé áké ndɔ́r̄də́ aw̄ sedə́ kum majaĺ kə́ bo kasə naā beé tə́ wa. 22Aaro̰ tél ədan na n-rāān ɓɔ́ ba kə loo rāā wōn̄g, na nəkɔ́ Moijə na ger̄ kadə̄ gír de gə̄ ń noō i gír de gə̄ kə́ əndān̄ daw dɔ rāā majaĺ tə́ alé gə̄. 23Na reē ədanən̄ na kə n-rāā nə́ɓā kə́ njə̄rā nodə́ tə́ kə n-adə̄də́, tɔdɔ̄ Moijə deē ń na teē sedə́ kem ɓē kə́ Ejiptə tə́ kɔ̄ɔ́ ní na n-gerə̄n̄ yá̰á̰ ń na rāān ní alé. 24Na n-dəjedə́ n-əda na ké i náā n ké lɔ́r yān to noó ní wa. Anī na ró̰ȳn̄ nə̄ngá lɔ́ŕ kə́ ta mbīdə́ gə̄ tə́, kə̄ ta jī gə̄ tə́ noō na adə̄nən̄. Na n-nō nə̄ngá gə̄ ní horoó adə̄ na teē ngōn̄ man̄g ń noō.

Kem tə́ngā yā ngán Lebi gə̄ kə́ tām̄ yā Kɔ́ɔ̄ɓē tə́

25Moijə a̰a̰ kadə̄ *Aaro̰ əya̰ ngán *Israel gə̄ adə̄ rāān̄ yá̰á̰ kə́ kemdə́ ndigə kadə̄ madə̄ ba̰ā̰də́ gə̄ əgōn̄də́. 26Anī aw̄ ra ta róbə́ kə́ yā kudəń kə̄ kem ɓēé tə́ ba əda na kə deē yā Kɔ́ɔ̄ɓē gə̄ kə reēn̄ rɔ̄n tə́. De gə̄ kə́ gír ɓē yā Lebi tə́ gə̄ malang ɔtə aw̄n̄ rɔ̄n tə́, 27anī ədadə́ na najə̄ ń Kɔ́ɔ̄ɓē Nə́ɓā yā Israel əda ní n toó, na kə ɔyn̄ kaskar gə̄ jīdə́ tə́ kə dɔdə́ gēé, kə əndan̄neé kem ɓē kə gāngə̄n̄, kə aw̄n̄ dām̄ kə́rēý tə́ ō, kə tél kə ənda gāngə̄n̄ kə aw̄n̄ dām̄ kə́ noō tə́ ō, kə tɔ̄lə̄n̄ ngákó̰ó̰də́ gə̄, kə madə̄ tadə́ gə̄, kə madə̄ ɓēdə́ gə̄. 28*Ngán Lebi gə̄ rāān̄ yá̰á̰ ń Moijə ədadə́ ní, adə̄ ndɔ̄ ń noō tə́ de gə̄ dūbú mətá oyn̄ dan ngán Israel gə̄ tə́. 29Gō tə́ anī Moijə əda *ngán Lebi gə̄ na nin̄ na i de kə́ kɔr̄ kam̄ tayā gə̄ ndɔ̄ ń noō tə́ tām̄ kəla yā Kɔ́ɔ̄ɓē tə́, tɔdɔ̄ na ɔrən̄ bā̰ā̰ loo tɔ̄l̄ ngáńdə́ gə̄ tə́ aĺ ō, loo tɔ̄l̄ ngákó̰ó̰də́ gə̄ tə́ aĺ ō. Ní kadə̄ Kɔ́ɔ̄ɓē kə rāā majə sedə́ kem ndɔ̄ ń noō tə́.

Moijə rāā Nə́ɓā ɓɔ́ kadə̄ mā̰ȳ rɔ̄n dɔ ngán Israel gə̄ tə́

30Teē gō tə́ anī Moijə əda ngán *Israel gə̄ na rāān̄ na i majaĺ kə́ bo ngá̰ý ba ń toō n-a n-tél yā kal̄ dɔɔ́ gogə́ rɔ̄ Kɔ́ɔ̄ɓē tə́ dɔ mbalá. Majanī na a ndigə gōn tə́ kadə̄ mā̰ȳ rɔ̄n dɔ majaĺ yādə́ tə́. 31Adə̄ Moijə tél aw̄ gogə́ rɔ̄ Kɔ́ɔ̄ɓē tə́ ədan na kə́ rɔ̄kum gə̄ tə́ gír de gə̄ ń noō na rāān̄ majaĺ kə́ bo ngá̰ý, na rāān̄ nə́ɓā kə́ kə lɔ́rɔ́ tām̄ yādə́ tə́. 32Ba na n-rāān ɓɔ́, kə mā̰ȳ rɔ̄n dɔdə́ tə́. Ré na mā̰ȳ rɔ̄n dɔdə́ tə́ aĺ anī, kə kūsə́ rīn ń na ndang kem makətūbūú ní kɔ̄ɔ́. 33Kɔ́ɔ̄ɓē tél ədan na i de gə̄ ń na rāān̄ majaĺ seneé ní ngóy n n-a n-kūsə́ rīdə́ kem makətūbə̄ yān tə́ kɔ̄ɔ́ ní. 34Ń toō kə aw̄ kə ɔr no ngán *Israel gə̄ kə aw̄ sedə́ loo ń na n-ɔjən tə́ ní. Na *deē yān kə́ dɔ rā̰ tə́ na a njə̄rā kété nodə́ tə́. Ba na ndɔ̄ ń nəkɔ́ n-a n-udə danaá tə́ anī, n-a n-əndadə́ tām̄ majaĺ yādə́ tə́. 35Adə̄ Kɔ́ɔ̄ɓē ənda ngán Israel gə̄ tām̄ ngōn̄ man̄g ń mērə̄n̄ Aaro̰ rāā tə́ ní.

Currently Selected:

Teē Ngán Israel gə̄ 32: BS

Highlight

Compare

Copy