Teē Ngán Israel gə̄ 33

Nə́ɓā əda Moijə najə̄ kɔr̄də́ dɔɔ́

1Kɔ́ɔ̄ɓē əda Moijə na kə ḭḭn̄ loo ń noō tə́ kɔ̄ɔ́, nəkɔ́ gə̄gē ngán *Israel gə̄ ń teē sedə́ kem ɓē kə́ Ejiptə tə́ kɔ̄ɔ́ ní gə̄gē, kə aw̄n̄ dɔ nang ń na n-ənī ndūn n-adə̄ Abəraham ō, Isaak ō, Jakob ō, yā kadə̄ ngán kaadə́ gə̄ ní tə́. 2Na n-a n-əla deē yān kə́ dɔ rā̰ tə́ kété nodə́ tə́ ō,, na n-a n-tə̄ɓā Kanaan gə̄ ō, *Amor gə̄ ō, Het gə̄ ō, Periji gə̄ ō, Hibi gə̄ ō, Yebus gə̄ ō kɔ̄ɔ́. 3Kə aw̄n̄ dɔ nang ń mba ō, yibə̄ tejə ō, na i ngá̰ý tū tə́ ní tə́. Ba na n-a n-njə̄rā dɔ dáńdə́ tə́ yā kaw̄ń sedə́ alé. Ré na n-njə̄rā dɔ dáńdə́ tə́ anī, na n-a n-tɔ̄l̄də́ róbó kɔ̄ɔ́ malang, tɔdɔ̄ nin̄ na i gír de kə́ dɔdə́ na ngan̄g ngá̰ý gə̄. 4Dan ń ngán *Israel gə̄ oōn̄ najə̄ kə́ majaĺ ń noō anī, əhɔn̄ ndoō. Deē tə́lá yá̰á̰ súū rɔ̄ gə̄ rɔ̄n tə́ alé. 5Kɔ́ɔ̄ɓē əda Moijə na kə əda ngán Israel gə̄ na nin̄ na i de kə́ dɔdə́ na ngan̄g ngá̰ý gə̄. Ré na n-udə dandə́ tə́ bang anī, n-a n-nujə sedə́ kɔ̄ɔ́ malang. Adə̄ kə ró̰ȳn̄ yá̰á̰ súū rɔ̄ kə́ rɔ̄də́ tə́ gə̄ kɔ̄ɔ́ malang. Tāa ń noō n-a n-ger̄ yá̰á̰ kə́ yā rāā sedə́ ɓáý. 6Adə̄ ngán Israel gə̄ əlan̄ gíŕ ró̰ȳ yá̰á̰ súū rɔ̄ gə̄ kə́ rɔ̄də́ tə́ i mbal̄ *Horeb tə́.

Kújə kənge naā

7Moijə aw̄ kə kújə tandāá udə gidə ɓē tə́ sa̰y, ba əndā rīn na i *kújə kənge naā. Adə̄ de gə̄ ń a sāān̄ koō ta Kɔ́ɔ̄ɓē ní a aw̄n̄ i gidə ɓē tə́, loo ń kújə i tū tə́ ní tə́. 8Dan ń Moijə teē a aw̄ kə̄ kem kújə tandā ní tə́ anī, ngán *Israel gə̄ malang ḭḭ a ran̄ i kə njadə́ kə́ dɔɔ́ ta kújə tandā yādə́ gə̄ tə́, a̰a̰n̄neé gōn kadə̄ aw̄ udəń kem kújə tandā ní tə́. 9Dan ń ni-aw̄ udə kem kújə́ ní tə́ ɓáa, kil̄ man̄ kə́ ngāl̄ ɓururu reē ra ta kújə tandā tə́, anī Kɔ́ɔ̄ɓē ɔr̄ najə̄ seneé. 10Ngán Israel gə̄ ń a̰a̰n̄ kil̄ man̄ ní ḭḭ ɔsən̄ nodə́ nang tə́ malang kə̄ ta kújə tandā yādə́ gə̄ tə́. 11Dan ń Kɔ́ɔ̄ɓē a ɔr̄ najə̄ kə Moijə ní, tadə́ a̰a̰ i naā tītə̄ ń deē a ɔrə̄ń najə̄ kə madə̄neé ní beē. Loo ń ɔrə̄n̄ najə̄ kə naá oy anī, Moijə tél a aw̄ i gogə́ kem ɓēé, ba nge kɔsə kílən kə́ balsáá kə́ ngōn̄ Nun ń i Jojue ní tá ndɔ́tə̄ loo alé, ni a ndi i gotən tə́ kem kújə tandāá.

Kɔ́ɔ̄ɓē ɔr̄ najə̄ kə Moijə

12Moijə əda Kɔ́ɔ̄ɓē na kə a̰a̰, na nəkɔ́ na ədan na kə n-ɔr no gír de gə̄ ń noō, ba na ɔjən kə deē ń na a əlan kadə̄ aw̄ seneé ní alé. Tá na i nəkɔ́ n na əda na n-gerə̄n ni Moijə ō, na n-rāā kem majə seneé ō ní. 13Adə̄ dan ń kemən na i kə́ majə seneé ɓá ní, kə ɔjən yá̰a̰ gə̄ ń na núm̄ yā rāā ní kadə̄ n-ger̄. Na i tītə̄ ń noō n n-a n-gerə̄nneé kə́ rɔ̄kum tə́ ō, na n-gerə̄ń kadə̄ na a rāā kem majə seneé mámák ō ní. Gír de gə̄ ń noō na i gír deē yān gə̄ ní kadə̄ dɔn kə ndígə̄nal alé. 14Kɔ́ɔ̄ɓē dəjen na ké i nəkɔ́ n kə n-aw̄ sedə́ bátə́ kadə̄ əngen̄neé loo ndidə́ ní wa. 15Moijə tél ədan na ré nəkɔ́ Kɔ́ɔ̄ɓē na aw̄ sedə́ aĺ ɓáa kadə̄ kə n-ndɔ́tə̄n̄ loo ń noō tə́ alé. 16Tɔdɔ̄ ré na aw̄ sedə́ aĺ anī ké a gerə̄n̄ kadə̄ na rāā kem majə kə gír deē yān gēé ō, seneé ní Moijə ō, ké i ba̰ý wa. Na i ndin ni Kɔ́ɔ̄ɓē dɔ dáńdə́ tə́ ngóy n na a ɔjə kadə̄ nin̄ na i gír de gə̄ kə́ na n-ton̄ tītə̄ gotə gír de kə́ dɔ nang tə́ laā gə̄ aĺ ní. 17Kɔ́ɔ̄ɓē tél ədan na n-a n-rāā yá̰á̰ ń na əda ngɔr toó, tɔdɔ̄ na n-rāā kem majə seneé ō, na n-gerə̄n kə rīneé ō.

18Moijə əda Kɔ́ɔ̄ɓē na kə ɔjən *kɔsə gɔn yān kadə̄ kə n-a̰a̰. 19Anī Kɔ́ɔ̄ɓē ədan na n-a n-mān̄ non tə́ yā kɔjən kem majə yān gə̄ malang. N-a n-ənī mbēr̄ non tə́ kə rīneé na: Kɔ́ɔ̄ɓē. Deē ń na n-ndigə rāā kem majə kə kɔ́ɔ̄ɔ́ ní n-a n-rāā kem majə kə kɔ́ɔ̄ɔ́ ō, deē ń na n-ndigə kadə̄ kumən o̰o̰n kə kɔ́ɔ̄ɔ́ ní, kumən na a o̰o̰n kə kɔ́ɔ̄ɔ́ ō. 20Ɓá tā ba Moijə na a asə ka̰a̰ ta kumən alé, tɔdɔ̄ deē ndul kə́ kadə̄ a̰a̰ kumən ō, ndi kə kumneé ō na gətóo. 21Kɔ́ɔ̄ɓē ədan na kə a̰a̰ loo ń na to kadən tə́ ngɔr noó, kə al̄ kə ra loo ń noō tə́ dɔ mbal̄ tə́. 22Adə̄ dan ń na n-a n-mān̄ kə *kɔsə gɔn yānneé ní ɓáa, na n-a n-ɓɔ̄ɔ̄n bəlo mbal̄ ní tə́ ō, na n-a n-ənī jīn dɔn tə́ yā kutə̄ń dɔn ō, bátə́ kadə̄ n-mānəń. 23Tāa ń noō na n-a n-un jīn dɔn tə́ kɔ̄ɔ́ ɓáý, adə̄ na a a̰a̰ na i gidən ngóy, tɔdɔ̄ deē na asə ka̰a̰ kumən alé.

Currently Selected:

Teē Ngán Israel gə̄ 33: BS

Highlight

Compare

Copy