Teē Ngán Israel gə̄ 40

Kɔ́ɔ̄ɓē əda Moijə na kə udə kújə tandā ba kə ɔr̄ kamə̄n tayā

1Kɔ́ɔ̄ɓē əda Moijə na:

2Kem nāā kə́ ta kəga dɔ tə́, kə ndɔ̄ nāā kə́ ta kəga dɔɔ́ anī, ā údə́ kújə ndi yāḿ ń i *kújə kənge naā ní. 3Ā ə̄ndā *sandúkə ndū najə̄ gidə kūbə̄ ń gāngə̄n̄neé kem kújə ní tə́ kadə̄ deē a̰a̰ alé. 4Ā ī-reē kə tábəl ba ā ī-tə́ndā mápa gə̄ ń ndējə̄mə̄n̄ ní dɔ tə́. Ā ī-reē kə ɗəra hor ń bay hor gə̄ i ta tə́ ní yā kəndā hor ta tə́.

5Ā ə̄ndā *loo róō ndujə̄ yá̰á̰ kə́ kotə majə kə́ rāā kə lɔ́rɔ́ no *sandúkə ndū najə̄ tə́, ba ā ī-do̰ō̰ kūbə̄ ta róbə́ tə́. 6Ā ə̄ndā *loo tun̄ yá̰á̰ kə́ kadə̄ róōn̄ dā̰ kə́ tun̄ gə̄ dɔ tə́ ta kújə ndi yāḿ ń i *kújə kənge naā ní tə́. 7Ā ə̄ndā bay kə́ yā ɓōkə́nń man̄ tə́go rɔ̄ dɔ dáń kújə kənge naā tə́ kə *loo tun̄ yá̰á̰ yā ɓōkə́ man̄ kemeé. 8Ā ī-gān̄g gíŕ ndágə loo kə́ gīr̄ gidə *kújə yā Kɔ́ɔ̄ɓē kə ndogə̄ kūbūú kadə̄ gīr̄ gidə əla ta naā tə́ ō, ā ī-do̰ō̰ kūbə̄ ta róbə ndogə̄ tə́ ō.

9Ā ún *yibə̄ kə́ táĺ yā kur dɔ *kújə ndi yāḿ tə́ ō, dɔ yá̰á̰ kə́ kemeé gə̄ tə́ malang ō. Ā ɔ̄r̄ kam̄ kújə ndi yāḿ ō, kam̄ yá̰a̰ rāā kəla kə́ kemeé gə̄ malang ō, i tītə̄ ń noō, kadə̄ kum mbang ń noō tə́ kújə ndi yāḿ a téĺ kújə kə́ *táĺ. 10Ā úr yibə̄ ní dɔ *loo tun̄ yá̰á̰ kə́ yā róoń dā̰ kə́ tun̄ gə̄ tə́ ō, dɔ yá̰a̰ rāā kəla kə́ dɔ tə́ gə̄ tə́ ō malang. Ā ɔ̄r̄ kamə̄n tayā kadə̄ téĺ yá̰á̰ kə́ *táĺ ngá̰ý i tītə̄ ń noō. 11Ā úr yibə̄ ní dɔ bay kə́ yā ɓōkə́nń man̄ tə́go rɔ̄ tə́ ō, dɔ nja bay ní tə́ ō, yā kɔrə̄ń kamə̄n tayā.

12Ā āw̄ kə *Aaro̰ nin̄ kə ngánən gēé ta *kújə kənge naā tə́ yā ndogə̄də́ man̄. 13Gō tə́ anī ā ī-tə́la kūbə̄ kə́ yā ɓōĺ gidə gə̄ yā Aaro̰ rɔ̄n tə́ ō, ā úr yibə̄ ní dɔn tə́ yā kəndānneé kem kəla *tun̄ yá̰a̰ yāḿ tə́ ō. 14Ā ə́dá ngán Aaro̰ gə̄ kadə̄ ndɔ́tə̄n̄ kə̄ kété, kadə̄ ī-tə́la kūbə̄ ngāl̄ yādə́ gə̄ rɔ̄də́ tə́. 15Ā úr yibə̄ ní dɔdə́ tə́ tītə̄ ń úrəń dɔ bɔbə̄də́ tə́ ní yā kəndāńdə́ kem kəla *tun̄ yá̰a̰ yāḿ tə́. Yibə̄ ń ā úr dɔdə́ tə́ noō a rāā kadə̄ nin̄ gə̄gē, ngáńdə́ gə̄gē, a ndin̄ i kem kəla *tun̄ yá̰a̰ yāḿ tə́ ngándáńg.

Moijə udə kújə ndi Kɔ́ɔ̄ɓē

16Moijə udə rɔ̄ kəla tə́, rāā yá̰á̰ ń Kɔ́ɔ̄ɓē ədan ní kə gōó, 17adə̄ udən̄ *kújə ndi Kɔ́ɔ̄ɓē dɔɔ́ i kə ndɔ̄ kə́ ta kəga dɔ yā nāā kə́ ta kəga dɔɔ́, kem ɓāl̄ kə́ nge ko̰ jōó tə́, gō teē ngán *Israel gə̄ kɔ̄ɔ́ kem ɓē kə́ Ejiptə tə́. 18Moijə udə kújə ndi Kɔ́ɔ̄ɓē dɔɔ́. Ni-túdə̄ bir̄ njan gə̄ ō, tə́la kāgən kə́ laa gə̄ ō, tə́la bagétə́ kə́ tū tə́ gə̄ ō, túdə̄ kāgə̄ kə́ kemeé gə̄ kə́ yā gāngəń kem ō, túdə̄ kāgə̄ gə̄ kə́ ta róbə́ tə́ ō. 19Ənī tandā dɔ kújə́ ní tə́ ō, tə́nī yá̰a̰ gə̄ kə́ yā kutə̄ń dɔ tandā ní dɔ tə́ ō, tītə̄ ń Kɔ́ɔ̄ɓē ədanneé ní. 20Ɔy bar mbal̄ gə̄ ń ndangən̄ ndū najə̄ kə́ kutə gə̄ gidə tə́ ní ɓōkə́də́ kem sandúkú. Tə́lá sáā kāgə̄ gə̄ kadə sandúkə́ ní tə́, ba əndā yá̰a̰ tan ta tə́. 21Aw̄ kə sandúkə́ ní əndā kem kújə ndi Kɔ́ɔ̄ɓē tə́, ba do̰ō̰ kūbə̄ gān̄g gír loo gāngəń gír kɔ̄ɔ́, ɔgə̄ń de gə̄ ka̰a̰, tītə̄ ń Kɔ́ɔ̄ɓē ədanneé ní. 22Əndā tábəl kem *kújə kənge naā tə́ dām̄, mbɔ́r ɓē kə́ geleé tə́, no kūbə̄ ń gāngəń gír loo tə́ ní. 23Ɓōkə́ mápá kə́ ndējə̄ gə̄ dɔ tə́ kə ta naá tītə̄ ń Kɔ́ɔ̄ɓē ədanneé ní. 24Udə ɗəra hor ń bay hor gə̄ i ta tə́ ní kem *kújə kənge naā tə́, dām̄ mbɔ́r ɓē kə́ geleé tə́, adə̄ ra sɔɔ̄ ta tábəl. 25Əndā hor ta bay gə̄ ní tə́ ta kum Kɔ́ɔ̄ɓē tə́, tītə̄ ń Kɔ́ɔ̄ɓē ədanneé ní. 26Əndā *loo róō ndujə̄ yá̰á̰ kə́ kotə majə kə́ rāā kə lɔ́rɔ́ kem *kújə kənge naā tə́, no kūbə̄ gān̄g gír loo tə́, 27ba róō ndujə̄ yá̰á̰ kə́ kotə majə dɔ tə́, tītə̄ ń Kɔ́ɔ̄ɓē ədanneé ní.

28Do̰ō̰ kūbə̄ ta róbə́ *kújə ndi Kɔ́ɔ̄ɓē tə́. 29Əndā *loo tun̄ yá̰á̰ ń kadə̄ róōn̄ yá̰á̰ kə́ tun̄ gə̄ dɔ tə́ ní ta róbə́ kújə́ tə́ ndágá, ba ndējə̄ *yá̰a̰ tun̄ kə́ róō ō, kōō ō, dɔ tə́, tītə̄ ń Kɔ́ɔ̄ɓē ədanneé ní. 30Əndā bay kə́ yā ɓōkə́nń man̄ tə́go rɔ̄ dɔ dáń *kújə kənge naā tə́ kə *loo tun̄ yá̰á̰, ba ɓōkə́ man̄ tə́go rɔ̄ kemeé. 31Moijə ō, *Aaro̰ ō, ngán Aaro̰ gə̄ ō, a tə́gon̄ jīdə́ gē njadə́ gē i kə man̄ ń noō. 32Dan ń a rāān̄ yā kudə kə̄ *kem kújə kənge naā tə́ aláa yā kaw̄ kə̄ *loo tun̄ yá̰á̰ tə́, anī a tə́gon̄ jīdə́ gē njadə́ gē tītə̄ ń Kɔ́ɔ̄ɓē ədań Moijə ní.

33Moijə ənī ndogə̄ kūbə̄ gāngəń gíŕ ndágə loo kə́ gīr̄ gidə *kújə yā Kɔ́ɔ̄ɓē kə́ gidə *kújə ndi Kɔ́ɔ̄ɓē tə́ ō, *loo tun̄ yá̰á̰ tə́ ō, ba do̰ō̰ kūbə̄ ta róbə ndogə̄ tə́. Gān̄g gír kəla gə̄ malang i tītə̄ ń noō.

Yá̰á̰ kə́ to kɔsə gɔn yā Kɔ́ɔ̄ɓē taā kem kújə ndi yān

34Kil̄ man̄ reē utə̄ dɔ kújə kənge naā malang ō, *kɔsə gɔn yā Kɔ́ɔ̄ɓē reē taā kem kújə yān malang ō. 35Moijə asə kudə kem *kújə kənge naā tə́ alé, tɔdɔ̄ kil̄ man̄ utə̄ dɔ ō, *kɔsə gɔn yā Kɔ́ɔ̄ɓē taā kem malang ō.

36Dan ń kil̄ man̄ ḭḭ kɔ̄ɔ́ dɔ *kújə ndi Kɔ́ɔ̄ɓē tə́ anī, ngán *Israel gə̄ ḭḭ a əsōn̄ i róbó. 37Ba ré kil̄ man̄ ní ḭḭ aĺ anī, ndɔ́tə̄n̄ loo alé yā ngóoń ndɔ̄ ń a ḭḭ ń kɔ̄ɔ́ dɔ *kújə ndi Kɔ́ɔ̄ɓē tə́ ní. 38Tɔdɔ̄ kadaá anī kil̄ man̄ yā Kɔ́ɔ̄ɓē i dɔ kújə ndin tə́, ba ndɔ̄ɔ́ anī hor i tū kil̄ man̄ ní tə́, adə̄ ngán *Israel gə̄ malang a̰a̰n̄. Yá̰á̰ ní to i tītə̄ ń noō bátə́ kadə̄ gír njə̄rā mbā yādə́ gāngəń.

Currently Selected:

Teē Ngán Israel gə̄ 40: BS

Highlight

Compare

Copy