Teē Ngán Israel gə̄ 39

Kūbə̄ gə̄ yā ngé tun̄ yá̰a̰ gə̄: Epod

1Əjōn̄ kūbə̄ ngol gə̄ kə́ yā rāań kəla kem *loo kə́ táĺ tə́ ō, əjōn̄ kūbə̄ kə́ yā ɓōĺ gidə gə̄ yā *Aaro̰ ō, kə kəlā *bḭḭ̄ batə̄ kə́ ndul gusə gusuú ō, kə́ kərē bḭḭ́ ō, kə́ kərē pírírí ō, tītə̄ ń Kɔ́ɔ̄ɓē ədań Moijə ní.

2Əjōn̄ epod kə kəlā *lḛ́ḛ́ kə́ ngan̄g gēé. Tə́lan̄ kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, dan kəlā *lḛ́ḛ gə̄ ní tə́. Rāān̄ yá̰á̰ súūn gə̄ tū tə́ kə kəlā lɔ́rɔ́. 3Kɔdə̄ gə̄ tə̄ndān̄ lɔ́r kə mōó adə̄ laa mbé mbé, tə́jān̄ adə̄ dūú dūú, ba tə́lan̄ dan kəlā *bḭḭ̄ batə̄ kə́ ndul gusə gusə tə́ ō, kə́ kərē bḭḭ tə́ ō, kə́ kərē pírírí tə́ ō, dan kəlā *lḛ́ḛ gə̄ ní tə́ ō. 4Urə̄n̄ kəlā dɔ bɔ̄gə̄ epod ní tə́ dām̄ jōó kadə̄ deē əlań rɔ̄n tə́. 5Kəlā ń deē əla epod rɔ̄n tə́ oy anī a do̰ō̰ dɔ tə́ ní, əjōn̄ i kə yá̰a̰ gə̄ ń əjōn̄neé epod ní, adə̄ i kə lɔ́r ō, kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, kəlā *lḛ́ḛ́ kə́ ngan̄g gə̄ ō, tītə̄ ń Kɔ́ɔ̄ɓē ədań Moijə ní. 6Tə́lan̄ mbal̄ beril#39.6 Mbal̄ beril: Á̰a̰ī Mbal̄ gə̄ kə́ gātādə́ i ngá̰ý tū «Kum Najə̄ kə́ Ngón̄g Ngón̄g gə̄» tə́. gə̄ jōó kem kārə̄n gə̄ kə́ rāā kə lɔ́rɔ́ tə́. Ndangən̄ rī ngán Jakob gə̄ dɔ tə́ tītə̄ loo ndang rī deē tū *tambō̰o̰ tə́ beē. 7Tə́ndān̄ mbal̄ gə̄ ní dɔ kəlā gə̄ ń urə̄n̄ dām̄ jōó dɔ bɔ̄gə̄ epod tə́ ní. Mbal̄ gə̄ ní rāān̄ rɔ̄də́ i yá̰a̰ gə̄ kə́ kadə̄ əgań kem Kɔ́ɔ̄ɓē dɔ ngán *Israel gə̄ tə́, tītə̄ ń Kɔ́ɔ̄ɓē ədań Moijə ní.

Pekətoral

8Gō tə́ anī kɔdə̄ gə̄ əjōn̄ pekətoral tītə̄ ń əjōn̄neé epod ní. Əjōn̄ i kə kəlā *lḛ́ḛ́ kə́ ngan̄g gēé, tə́lan̄ kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, dan kəlā *lḛ́ḛ gə̄ ní tə́, rāān̄ yá̰á̰ súūn gə̄ tū tə́ kə lɔ́rɔ́. 9Pekətoral ní i ta kūbə̄ kə́ udə̄n̄ kum naā tə́ adə̄ téĺ pósə́ kə́ ngālən gē laan gē asən̄ naā. Ngālən asə da jī deē mətá ō, laan asə da jī deē mətá ō. 10Tə́lan̄ *mbal̄ gə̄ kə́ gātə̄də́ i ngá̰ý gə̄ tū tə́ kə ta naā gír loo sɔ́. Gírən kə́ ta kəga dɔ i mbal̄ sarduan ō, *topajə ō, *emerodə ō. 11Gírən kə́ nge ko̰ jōó i mbal̄ esəkarbukəl ō, lajulitə ō, *jaspə.

12Gírən kə́ nge ko̰ mətá i mbal̄ *kalsedəwan ō, *kornalin ō, ametist ō. 13Gírən kə́ nge ko̰ sɔ́ i mbal̄ kərijolit ō, *beril ō, onikəs ō. Tə́lan̄ ngán mbal̄ gə̄ ní kógə̄ḿ kógə̄ḿ kem kār̄də́ gə̄ kə́ rāā kə lɔ́rɔ́ tə́. 14Ndangən̄ rī ngán *Israel kə́ kutə gidə i jōó gə̄ ní gidə ngán mbal̄ gə̄ ní tə́ kógə̄ḿ kógə̄ḿ, tītə̄ ń deē a ndangəń rīn tū *tambō̰o̰ yān tə́ noō. Ngán mbal̄ kə́ kutə gidə i jōó gə̄ ní ɔsən̄ i kum gotə gír ɓē kə́ kutə gidə i jōó gə̄ yā ngán Israel gə̄.

15Rāān̄ ngáń sén gə̄ jōó, kə́ səren̄ tītə̄ loo səre kəlā kə́ karī tām̄ yā pekətoral tə́, kə lɔ́ŕ kə́ *unjə̄ njáý njáý. 16Rāān̄ kār̄ mbal̄ gə̄ jōó kə lɔ́rɔ́ tām̄ yā pekətoral tə́ ō, rāān̄ nə̄ngá lɔ́r gə̄ jōó ō tə́lan̄ kíl pekətoral kə́ jōó gə̄ tə́ ta tə́ dɔɔ́. 17Tə́lan̄ ta kəlā sén gə̄ kə́ dām̄ kógə̄ḿ tə́ ta nə̄ngá gə̄ ń tə́lan̄ kíl pekətoral gə̄ tə́ ní ō, 18tə́lan̄ tan kə́ dām̄ kə́rēý tə́ tū kār̄ mbal̄ gə̄ kə́ dɔ bɔ̄gə̄ tə́ ń rāān̄ kə lɔ́rɔ́ tə́ ní ō, adə̄ pekətoral ní to i no tə́ kété. 19Rāān̄ nə̄ngá lɔ́ŕ kə́ rang gə̄ jōó, tə́lan̄ kíl pekətoral kə́ jōó gə̄ kə́ gírí nang tə́ tə́. Tə́lan̄ i no kem pekətoral ń tūr̄ kum kə̄ rɔ̄ epod tə́ ní. 20Rāān̄ nə̄ngá lɔ́ŕ kə́ rang gə̄ jōó ɓáý to̰, tə́lan̄ gír kəlā gə̄ kə́ dɔ bɔ̄gə̄ epod tə́ dām̄ kə́ kété no tə́, loo ń urə̄n̄ kəlā gə̄ ní tū tə́ ní tə́. Nə̄ngá gə̄ ní ndin̄ i dɔ kəlā epod ń a do̰ō̰n̄neé ɓōdə̄də́ ní tə́. 21Nə̄ngá gə̄ kə́ tū pekətoral tə́ ō, kə́ tū epod tə́ ō ní, əhɔn̄də́ ta naā tə́ i kə kəlā kə́ ndul gusə gusuú yā kadə̄ pekətoral toń dɔ kəlā ń əhɔn̄neé dɔ epod ní tə́ gotə kógə̄ḿ kanjə̄ wél̄ kə̄ loo gə̄ tə́ dɔ epod tə́, tītə̄ ń Kɔ́ɔ̄ɓē ədań Moijə ní.

Kūbə̄ kə́ rang gə̄ yā ngé tun̄ yá̰a̰ gə̄

22Əjōn̄ kūbə̄ ngāl̄ ń *Aaro̰ a əla epod#39.15, 20, 22 Epod ō, pekətoral ō: Á̰a̰ī Teē 28.6-30 dɔ tə́ ní i kə kəlā *bḭḭ̄ batə̄ kə́ ndul gusə gusuú malang. 23Rāān̄ míndən kə́ yā kadə̄ deē əlań dɔn i danaá bang. Nge kəjō kūbə̄ əndā kūbə̄ ta míndən ní tə́ adə̄ nder̄ na sōgə́ rə̄yā̰. 24Rāān̄ kan̄ kāgə̄ gərenadə gə̄ kə kəlā bḭḭ̄ batə̄ kə́ ndul gusə gusuú ō, kə́ kərē bḭḭ́ ō, kə́ kərē pírírí ō, kə kəlā *lḛ́ḛ́ kə́ ngan̄g gēé ō, tə́lan̄ ta nja kūbə̄ ngāl̄ ní tə́ adə̄ gīr̄ gidə əla ta naā tə́. 25Tə́lan̄ ngán ɓɔ gə̄ kə́ rāān̄ kə lɔ́ŕ kə́ *unjə̄ njáý njáý ta nja kūbə̄ ngāl̄ ní tə́ dan kan̄ kāgə̄ gərenadə gə̄ ní tə́, adə̄ gīr̄ gidə əla ta naā tə́. 26Əlan̄ kan̄ kāgə̄ gərenadə ní kógə̄ḿ ō, ngōn̄ ɓɔ kógə̄ḿ ō, kan̄ kāgə̄ gərenadə ní kógə̄ḿ ō, ngōn̄ ɓɔ kógə̄ḿ ō, ta nja kūbə̄ ngāl̄ ní tə́ adə̄ gīr̄ gidə əla ta naā tə́, yā rāań kəla kem *loo kə́ táĺ tə́, tītə̄ ń Kɔ́ɔ̄ɓē ədań Moijə ní. 27Gō tə́ anī əjōn̄ kūbə̄ *lḛ́ḛ gə̄ tām̄ yā *Aaro̰ tə́ ō, tām̄ yā ngánən gə̄ tə́ ō. 28Əjōn̄ kūbə̄ kə́ yā kəndań dɔ ō, kə́ yā rāań jākā gə̄ ō, kə́ yā kəla gíŕ tə́ ō, kə kəlā *lḛ́ḛ́ kə́ ngan̄g gēé. 29Əjōn̄ kəlā kəhɔ dɔ kūbə̄ kə kəlā *lḛ́ḛ́ kə́ ngan̄g gēé kə́ tə́lan̄ kəlā bḭḭ̄ batə̄ kə́ ndul gusə gusə ō kə́ kərē bḭḭ ō kə́ kərē pírírí ō danaá, tītə̄ ń Kɔ́ɔ̄ɓē ədań Moijə ní.

30Gō tə́ anī rāān̄ yá̰á̰ súū rɔ̄ ń ɔjə kadə̄ *Aaro̰ i de kə́ ɔrə̄n̄ kamə̄n tayā ní kə lɔ́ŕ kə́ *unjə̄ njáý njáý, adə̄ to tītə̄ hútə̄ kāgə̄ beé. Ndangən̄ najə̄ ń na i kə́ kɔr̄ kam̄ tām̄ yā Kɔ́ɔ̄ɓē tə́ ní dɔ tə́, tītə̄ loo ndang rī deē tū *tambō̰o̰ tə́ beē. 31Əndān̄ yá̰á̰ súū rɔ̄ ní tū kūbə̄ kənda dɔ tə́ kété no tə́ i kə kəlā kə́ ndul gusə gusuú, tītə̄ ń Kɔ́ɔ̄ɓē ədań Moijə ní.

Reēn̄ kə kəla gə̄ ń rāān̄ oy ní no Moijə tə́

32Gír kəla *kújə kənge naā ń i kújə ndi Kɔ́ɔ̄ɓē ní gān̄g i tītə̄ ń noō. Ngán Israel gə̄ rāān̄ yá̰á̰ ń Kɔ́ɔ̄ɓē əda Moijə ní kə gōó malang. 33Ngán Israel gə̄ aw̄n̄ kə yá̰a̰ gə̄ ń rāān̄neé kújə ndi Kɔ́ɔ̄ɓē ní rɔ̄ Moijə tə́ malang:

Tandā ō, yá̰a̰ rāā kəla kə́ tū tə́ gə̄ ō, adə̄ i nə̄ngá kəhɔ yá̰a̰ gə̄ ō, kāgə̄ kə́ laa gə̄ ō, bagétə gə̄ ō, kāgə̄ gə̄ kə́ tītə̄ kāgə̄ nga dan kújə gə̄ ō, bir̄ nja kāgə̄ gə̄ ō,

34- ndāŕ batə̄ kə́ kərē kə́ yā kənī dɔ kújə tandā tə́ dɔɔ́ ō, ngə̄rā dā̰ kə́ ngan̄g kə́ yā kənī dɔ tə́ ō, kūbə̄ gān̄g gír loo ō,

35- *sandúkə ndū najə̄ kə sáā kāgə̄ gə̄ kə́ tū tə́ gə̄ ō, yá̰a̰ tan ō,

36- tábəl ō, yá̰a̰ rāā kəla kə́ dɔ tə́ gə̄ ō, mápá kə́ ndējə̄ gə̄ ō,

37- ɗəra hor kə́ rāā kə lɔ́ŕ kə́ *unjə̄ njáý njáý ō, bay hor kə́ ta tə́ gə̄ ō, yá̰a̰ rāā kəla kə́ tū tə́ gə̄ ō, yibə̄ hor ō,

38- *loo róō ndujə̄ yá̰á̰ kə́ kotə majə kə́ rāā kə lɔ́rɔ́ ō, *yibə̄ kə́ táĺ ō, yibə̄ kə́ kotə majə kə́ yā róō horoó ō, kūbə̄ kə́ ta róbə́ kújə tandā tə́ ō,

39- *loo tun̄ yá̰á̰ kə́ rāā kə gində̄ nə̄ngá kasaá ō, yengəre kə́ tū tə́ kə́ rāān̄ kə gində̄ nə̄ngá kasaá ō, sáa kāgə̄ kə́ tū tə́ gə̄ ō, yá̰a̰ rāā kəla kə́ tū tə́ gə̄ malang ō.

- bay kə́ yā ɓōkə́nń man̄ tə́go rɔ̄ ō, nja bay ní ō,

40- ndogə̄ kūbə̄ gə̄ kə́ yā gāngəń gíŕ ndágə loo kə́ gīr̄ gidə *kújə yā Kɔ́ɔ̄ɓē ō, kāgə̄ ndogə̄ gə̄ ní ō, bir̄ njadə́ gə̄ ō, kūbə̄ kə́ ta róbə ndogə̄ tə́ ō, kəlān gə̄ ō, bēlə̄n gə̄ kə́ yā kənda nang tə́ ō, ngáń gájə́ yá̰a̰ rāā kəla gə̄ malang kə́ kem kújə ndi Kɔ́ɔ̄ɓē tə́ ń i *kújə kənge naā ní ō,

41- kūbə̄ gə̄ kə́ yā rāań kəla kem *loo kə́ táĺ tə́ ō, kūbə̄ kə́ yā ɓōĺ gidə gə̄ yā *Aaro̰ *nge tun̄ yá̰a̰ ō, kūbə̄ gə̄ ń kadə̄ ngánən gə̄ əlan̄ rɔ̄də́ tə́ rāānəń kəla tun̄ yá̰á̰ ní ō.

42Ngán Israel gə̄ rāān̄ yá̰a̰ gə̄ ń Kɔ́ɔ̄ɓē ɔjə Moijə kadə̄ rāā ní kə gōó malang. 43Dan ń Moijə a̰a̰ kadə̄ yá̰a̰ gə̄ i kə́ rāā kə gō ń Kɔ́ɔ̄ɓē ɔjənneé ní malang anī, tɔ́r̄ tan dɔ ngán *Israel gə̄ tə́.

Currently Selected:

Teē Ngán Israel gə̄ 39: BS

Highlight

Compare

Copy