Teē Ngán Israel gə̄ 38

Loo tun̄ yá̰a̰ ō, bay kə́ yā ɓōkə́nń man̄ tə́go rɔ̄ ō

1Gō tə́ anī rāā *loo tun̄ yá̰á̰ kə́ kadə̄ róōn̄ yá̰á̰ kə́ tun̄ gə̄ dɔ tə́ kə kāgə̄ akasiyaá. Ngālən i kíĺ mí ō, laan i kíĺ mí ō, ngālən gē laan gē asən̄ naā, ba ngālən kə́ kə̄ dɔɔ́ tá i kíl mətá. 2Rāā gajən gə̄ ta kílən kə́ sɔ́ gə̄ tə́, adə̄ gajən gē rɔ̄ rɔ̄n gē əhɔn̄ ta naā. Rāā gidə kə gində̄ nə̄ngá kasaá. 3Rāā ngán gájə́ yá̰a̰ rāā kəla gə̄ kə́ dɔ *loo tun̄ yá̰á̰ tə́ i kə gində̄ nə̄ngá kasaá malang: Yá̰a̰ kɔy kúl dā̰ gə̄ ō, pél gə̄ ō, səmbē gə̄ ō, yá̰á̰ tɔ́sə̄ dā̰ dɔ hor tə́ gə̄ ō, ganán gə̄ ō. 4Rāā yengəre kə gində̄ nə̄ngá kasaá, əla gír *loo tun̄ yá̰á̰ ní tə́ adə̄ reē ugə̄ kə ɓōdə̄ gə̄ tə́, loo ń kāgə̄ kə́ ta teē kə̄ ndágá i tū tə́ ní tə́. 5Rāā nə̄ngá gə̄ sɔ́ tə́lá kíl yengəre kə́ sɔ́ gə̄ ní tə́ ba tə́lá sáā kāgə̄ gə̄ kum tə́. 6Tə́gā sáā kāgə̄ akasiya gə̄ jōó, rāā gində̄ nə̄ngá kasə gidə tə́. 7Tə́lá sáā kāgə̄ gə̄ ní kum nə̄ngá gə̄ ń ran̄ kadə *loo tun̄ yá̰á̰ tə́ dām̄ jōó ní tə́ yā kətōń. Rāā *loo tun̄ yá̰á̰ ní i kə kāgə̄ kə́ laa gēé adə̄ kemən to.

8Rāā bay kə́ yā ɓōkə́nń man̄ tə́go rɔ̄n ō, njan ō, i kə gində̄ nə̄ngá kasaá. Rāā i kə kútə́ram#38.8 Kútə́ram: Dan ń noō tə́ ní rāān̄ kútə́ram gə̄ i kə gində̄ nə̄ngá kasaá. yā dəyá̰ gə̄ ń a rāān̄ kəla ta *kújə kənge naā tə́ ní.

Ndogə̄ kūbə̄ gə̄ kə́ yā gāngəń gíŕ ndágə loo

9Gān̄g gíŕ ndágə loo kə́ gīr̄ gidə *kújə yā Kɔ́ɔ̄ɓē i kə ndogə̄ kūbūú. Əjō kūbə̄ gə̄ ní i kə kəlā *lḛ́ḛ́ kə́ ngangá. Ndogə̄ kūbə̄ ń gāngəń gíŕ ndágə loo dām̄ mbɔ́r ɓē kə́ geleé tə́ ní, ngālən i kíĺ ɓú kógə̄ḿ. 10Kāgə̄ ndogə̄ gə̄ ní i kutə jōó. Rāā bir̄ njadə́ kə́ kutə jōó gə̄ i kə gində̄ nə̄ngá kasaá. Rāā nə̄ngá kəhɔ kūbə̄ gə̄ ō, kəlā gində̄ kə́ tū tə́ gə̄ ō, i kə gində̄ arjā̰a̰á̰. 11Ndogə̄ kūbə̄ ń gāngəń gíŕ ndágə loo kə́ dām̄ mbɔ́r ɓē kə́ ko̰ó̰ tə́ ní, ngālən i tītə̄ ń noō ō, əhɔn tū kāgə̄ ndogə̄ gə̄ tə́ i tītə̄ ń noō ō. 12Laa ndágə loo ní kə́ dām̄ kə́ no ɓē tə́ un i ndogə̄ kūbə̄ kə́ ngālən i kíl kutə mí. Kāgə̄ ndogə̄ kə́ tū tə́ gə̄ i kutə kógə̄ḿ ō, bir̄ njadə́ gə̄ i kutə kógə̄ḿ ō, rāā nə̄ngá kəhɔ kūbə̄ gə̄ ō, kəlā gində̄ kə́ tū tə́ gə̄ ō, i kə gində̄ arjā̰a̰á̰. 13Laa ndágə loo ní kə́ dām̄ kə́ gír ɓē tə́ i kíl kutə mí. Ta róbə kə́ yā kudəń kə̄ kem *loo kə́ táĺ tə́ i dām̄ ń noō tə́. 14-15Ré deē ra ta róbə ndogə̄ tə́ anī, ndogə̄ gə̄ ń gāngəń gíŕ ndágə loo kə́ gīr̄ gidə *kújə yā Kɔ́ɔ̄ɓē á ran̄ dɔ jī jōó ní, ngāl̄də́ i kíl kutə gidə i mí ō, kāgə̄ ndogə̄ kə́ tū tə́ gə̄ i mətá mətá ō, bir̄ njadə́ gə̄ i mətá mətá ō. 16Ndogə̄ kūbə̄ gə̄ ń gāngəń gíŕ ndágə loo ní, rāā i kə kūbə̄ *lḛ́ḛ́ kə́ ngangá. 17Rāā bir̄ nja kāgə̄ ndogə̄ gə̄ ní i kə gində̄ nə̄ngá kasaá, ba rāā nə̄ngá gə̄ ō, kəlā gində̄ gə̄ ō, i kə gində̄ arjā̰a̰á̰. Dɔ kāgə̄ ndogə̄ ń rāā adə̄ laa ní, rāā gində̄ arjā̰a̰ gidə tə́. Tó̰ō̰ kəlā gində̄ gə̄ tū kāgə̄ ndogə̄ gə̄ ní tə́ malang əhɔńdə́ kə̄ rɔ̄ naā tə́. Rāā kəlā gində̄ gə̄ ní i kə gində̄ arjā̰a̰á̰. 18Ngé kəjō kūbə̄ gə̄ əjōn̄ kə́ ta róbə ndogə̄ tə́ i kə kəlā *lḛ́ḛ́ kə́ ngan̄g gēé, tə́lan̄ kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, dan kəlā *lḛ́ḛ gə̄ ní tə́. Ngāl̄ kūbə̄ kə́ ta róbə ndogə̄ tə́ i kíl kutə jōó, ba ngālən kə́ kə̄ dɔɔ́ i kíĺ mí, tītə̄ yā ndogə̄ kūbə̄ gə̄ ń gāngə̄n̄neé gíŕ ndágə loo kə́ gīr̄ gidə *kújə yā Kɔ́ɔ̄ɓē ní. 19Do̰ō̰n̄ kūbə̄ ní i tū kāgə̄ kə́ sɔ́ gə̄ tə́. Rāān̄ bir̄ nja kāgə̄ kə́ sɔ́ gə̄ ní i kə gində̄ nə̄ngá kasaá. Rāān̄ nə̄ngá gə̄ ō, dɔ kāgə̄ ndogə̄ gə̄ ń rāān̄ adə̄ laa ní ō, kəlā gində̄ gə̄ ō, i kə gində̄ arjā̰a̰á̰. 20Rāān̄ bēl̄#38.20 Bēl̄: Á̰a̰ī Teē 27.19 gə̄ kə́ yā kənda nang tə́ do̰ō̰ń kəlā *kújə ndi Kɔ́ɔ̄ɓē ō, kəlā ndogə̄ kūbə̄ gə̄ ō, i kə gində̄ nə̄ngá kasaá.

Gində̄ gə̄ ń rāān̄neé kəla malang ní

21Gində̄ gə̄ malang ń rāān̄neé *kújə ndi Kɔ́ɔ̄ɓē yā kəndā sandúkə ndū najə̄ kemeé ní n toó. I Moijə n mēr̄ *ngán Lebi gə̄ mbɔ̄jə́ kɔȳn ní. Deē ń ɔr no *ngán Lebi gə̄ loo mbɔ̄jə́ kɔȳn tə́ ní i Itamar ngōn̄ *Aaro̰ nge tun̄ yá̰a̰. 22Besalel ngōn̄ Uri kə́ ngōn̄ Hur ń i de kə́ gír ɓē yā Juda tə́ ní, rāā yá̰a̰ gə̄ ń Kɔ́ɔ̄ɓē əda Moijə kadə̄ rāā ní malang. 23Deē ń rāā kəla ń noō seneé ní i Oholiab ngōn̄ Ahisamak kə́ gír ɓē yā Dan tə́. Oholiab i de kə́ ger̄ tɔ́sə̄ kadə ngán *mbal̄ gə̄ kə́ gātə̄də́ i ngá̰ý gə̄ ō, ger̄ rāā yá̰á̰ súū yá̰a̰ gə̄ ō, ger̄ rāā yá̰á̰ súū yá̰á̰ kə́ rāā kə kəlā *bḭḭ̄ batə̄ kə́ ndul gusə gusuú ō, kə́ kərē bḭḭ́ ō, kə́ kərē pírírí ō, ger̄ rāā yá̰á̰ súū yá̰á̰ kə́ rāā kə *lḛ́ḛ ō.

24Lɔ́ŕ ń ngán *Israel gə̄ adə̄n̄ á rāān̄neé kəla kə́ kem *loo kə́ táĺ tə́ malang ní, kɔȳn i kəlōo 877 kə ngán kəlōo kə́ dɔ tə́ gə̄ 300. Mbɔ̄jə́n̄ kɔȳ lɔ́ŕ ní i kə yá̰a̰ mbɔ̄jə́ kɔȳ yá̰á̰ kə́ kem *loo kə́ táĺ tə́.

25Gində̄ arjā̰a̰ ń ngán Israel kə́ tə́dan̄ kutədə́ gə̄ adə̄n̄ malang ní, kɔȳn i kəlōo 3017 kə ngán kəlōo kə́ dɔ tə́ gə̄ 750. Mbɔ̄jə́n̄ kɔȳ gində̄ arjā̰a̰ ní i kə yá̰a̰ mbɔ̄jə́ kɔȳ yá̰á̰ kə́ kem *loo kə́ táĺ tə́. 26Kutə ngán Israel gə̄ malang ń əlan̄ gíŕ tə́dádə́ i dɔ de kə́ ɓāl̄ kutə jōó gə̄ tə́ ní i dūbú ɓú mehḛ́ kə dūbú mətá kə ɓú mí kə kutə mí. Ré deē a̰a̰ kɔȳ gində̄ arjā̰a̰ ń adə̄n̄ ní malang ɓáa, deē kógə̄ḿ adə̄ i gində̄ arjā̰a̰ kə́ kɔȳn i ngán kəlōo mí. 27Gində̄ arjā̰a̰ ń nōn̄ horoó á rāān̄neé bir̄ nja kāgə̄ kə́ ɓú gə̄ ō, bir̄ nja kāgə̄ gə̄ ń do̰ō̰n̄ kūbə̄ gān̄g gír loo tū tə́ ō, kem *loo kə́ táĺ tə́ ní, kɔȳn malang i kəlōo dūbú mətá, adə̄ gində̄ arjā̰a̰ ń rāān̄neé bir̄ nja kāgə̄ kógə̄ḿ ní kɔȳn i kəlōo 30. 28Gotən ń na̰y á kɔȳn i kəlōo 17 kə ngánən kə́ dɔ tə́ gə̄ ɓú sīrí kutə mí ní, rāān̄neé nə̄ngá gə̄ kə́ yā kəhɔń yá̰a̰ tū kāgə̄ ndogə̄ gə̄ tə́ ō, rāān̄ gidə dɔ kāgə̄ ndogə̄ kə́ laa gə̄ tə́ ō, rāān̄neé kəlā gində̄ gə̄ kə́ yā do̰ō̰ tū kāgə̄ ndogə̄ gə̄ tə́ ō.

29Gində̄ nə̄ngá kasə ń ngán *Israel gə̄ reēn̄neé malang ní kɔȳn i kəlōo dūbú jōó kə ɓú kógə̄ḿ kə kutə jōó kə kalən kə́ sɔ́. 30Bir̄ nja kāgə̄ gə̄ kə́ ta róbə́ *kújə kənge naā tə́ ō, *loo tun̄ yá̰á̰ kə́ rāā kə gində̄ nə̄ngá kasaá ō, yengəre kə́ rāā kə gində̄ nə̄ngá kasaá ō, yá̰a̰ rāā kəla gə̄ kə́ dɔ *loo tun̄ yá̰á̰ tə́ malang ō, 31bir̄ nja kāgə̄ ndogə̄ gə̄ ō, bir̄ nja ngé kə́ ta róbə́ tə́ gə̄ ō, bēl̄ gə̄ kə́ yā kənda nang tə́ do̰ō̰ń kəlā kújə ndi Kɔ́ɔ̄ɓē ō, kəlā ndogə̄ kūbə̄ gə̄ ō ní, rāān̄ i kə gində̄ nə̄ngá kasə ngeé ń noō.

Currently Selected:

Teē Ngán Israel gə̄ 38: BS

Highlight

Compare

Copy