Teē Ngán Israel gə̄ 37

Sandúkə madə̄ naā

1Gō tə́ anī Besalel rāā sandúkə kə kāgə̄ akasiya. Ngālən i kíl jōó kə núsə ō, laan i kíĺ kógə̄ḿ kə núsə ō, ngālən kə́ kə̄ dɔɔ́ i kíĺ kógə̄ḿ kə núsə ō. 2Rāā lɔ́ŕ kə́ *unjə̄ njáý njáý kemeé ō, gidə tə́ ō, rāā bɔ̄gə̄ tan gə̄ kə lɔ́rɔ́ adə̄ gīr̄ gidə əla ta naā tə́ ō. 3Rāā nə̄ngá lɔ́r gə̄ sɔ́ tə́lá kílən gə̄ tə́ nja tə́ nang tə́: Jōó dām̄ kógə̄ḿ tə́ ō, jōó dām̄ kə́rēý tə́ ō. 4Tə́gā sáā kāgə̄ akasiya gə̄ jōó rāā lɔ́r gidə tə́, 5tə́la kum nə̄ngá gə̄ kə́ kadə sandúkə́ ní tə́ yā kətōń.

6Gō tə́ anī rāā yá̰a̰ ta sandúkə́ ní kə lɔ́ŕ kə́ *unjə̄ njáý njáý. Ngālən i kíl jōó kə núsə ō, laan i kíĺ kógə̄ḿ kə núsə ō. 7Rāā *de kə́ dɔ rā̰ tə́ kə́ ngé ngɔ̄m̄ loo gə̄ jōó kə lɔ́ŕ kə́ kənda kə mōó dɔ yá̰a̰ ta sandúkə́ ní tə́. Rāādə́ i bɔ̄gə̄ tan gə̄ tə́ dām̄ jōó, 8kógə̄ḿ dām̄ tan kə́rēý tə́ ō, kə́ ko̰ jōó dām̄ tan kə́ noó tə́ ō. Rāādə́ i kə lɔ́ŕ kə́ kógə̄ḿ beē ń rāań yá̰a̰ ta sandúkə́ ní. 9De kə́ dɔ rā̰ tə́ gə̄ ní tūrə̄n̄ kumdə́ kə̄ rɔ̄ naā tə́ a̰a̰n̄neé loo kum kə̄ dɔ ta sandúkə́ ń jā̰n̄ bɔ̄gə̄də́ utə̄n̄neé dɔ ní tə́.

Tábəl kəndā mápá kə́ ndējə̄

10Gō tə́ anī rāā tábəl kə kāgə̄ akasiya. Ngālən i kíl jōó ō, laan i kíĺ kógə̄ḿ ō, ngālən kə́ kə̄ dɔɔ́ i kíĺ kógə̄ḿ kə núsə ō. 11Rāā gidə kə lɔ́ŕ kə́ *unjə̄ njáý njáý ō, bɔ̄gə̄ tan gə̄ kə lɔ́rɔ́ adə̄ gīr̄ gidə əla ta naā tə́ ō. 12Tə́ndā kāgə̄ kə́ laa asə kə da jī deé gə̄ bɔ̄gə̄ tan kə́ sɔ́ gə̄ tə́ ō, tə́ndā yá̰á̰ súūn kə́ rāā kə lɔ́rɔ́ gə̄ dɔ tə́ adə̄ gīr̄ gidə əla ta naā tə́ ō. 13Rāā nə̄ngá lɔ́r gə̄ sɔ́ tə́lá kílən gə̄ tə́ kadə njan kə́ sɔ́ gə̄ tə́ ngɔr. 14Nə̄ngá gə̄ ní ran̄ i kadə kāgə̄ kə́ laa asə kə da jī deé gə̄ ní tə́ ngɔr, kadə̄ tə́lá sáā kāgə̄ gə̄ ní kum tə́ yā kətōń tábəl ní. 15Tə́gā sáā kāgə̄ akasiya gə̄ jōó, rāā lɔ́r gidə tə́, yā kətōń tábəl ní. 16Rāā ngáń gájə́ yá̰a̰ rāā kəla gə̄ kə́ dɔ tə́: Səmbē kə́ laa gə̄, kə bay gə̄, kə kópə gə̄, kə bay gíŕ ɗénjéńg gə̄, kə́ yā tə́teń kasə *nduú kə́ ndējə̄ gə̄. Rāā yá̰a̰ gə̄ ń noō malang i kə lɔ́ŕ kə́ *unjə̄ njáý njáý.

Ɗəra hor kə́ ta jīn gə̄ tɔ̄ɔ̄ sīrí

17Gō tə́ anī rāā ɗəra hor kə lɔ́ŕ kə́ *unjə̄ njáý njáý kə́ kənda kə mōó. Rāā nja ɗəra hor ní ō, ta jīn gə̄ ō, bay gə̄ kə́ gíŕ hútə̄n gə̄ tə́ ō, kəron gə̄ ō, hútə̄n gə̄ ō, i tū lɔ́ŕ kə́ kógə̄ḿ beē tə́. 18Ta jīn gə̄ tɔ̄ɔ̄n̄ mehḛ́ tū kāgən kə́ danaá tə́, mətá dām̄ kógə̄ḿ tə́ ō, mətá dām̄ kə́rēý tə́ ō. 19Ta jīn kə́ mehḛ́ gə̄ ní, bay kə́ tū tə́ gə̄ i mətá mətá kə dɔdə́ gēé. Bay gə̄ ní ton̄ i tītə̄ kan̄ kāgə̄ amand gə̄, gíŕdə́ tə́nī kəro ba tadə́ hútə̄. 20Kāgən kə́ danaá nəkɔ́ tá bay kə́ tū tə́ gə̄ i sɔ́. Gír bay gə̄ ní tə́nī kəro ō, tadə́ hútə̄ ō. 21Gír loo gə̄ ń ta jī ɗəra hor gə̄ ní tɔ̄ɔ̄n̄ tū tə́ dām̄ jōó jōó ní tə́nī kəro malang ō. 22Kəron gə̄ kə ta jīn gə̄ kə gotə rɔ̄n gə̄ malang ní, rāā i tū lɔ́ŕ kə́ kógə̄ḿ beē tə́. Lɔ́ŕ ní i lɔ́ŕ kə́ *unjə̄ njáý njáý kə́ kənda kə mōó. 23Rāā bay hor kə́ sīrí gə̄ ō, yá̰a̰ kūsə́ ta kəlā hor gə̄ ō, yá̰a̰ kɔy bū hor gə̄ ō, kə lɔ́ŕ kə́ *unjə̄ njáý njáý. 24Rāā ɗəra hor ní ō, yá̰a̰ rāā kəla kə́ dɔ tə́ gə̄ ō, kə lɔ́ŕ kə́ kɔȳn i kəlōo kutə mətá.

Loo róō ndujə̄ yá̰á̰ kə́ kotə majə

25Gō tə́ anī rāā *loo róō ndújə̄ yá̰á̰ kə́ kotə majə kə kāgə̄ akasiya. Ngālən i kíĺ kógə̄ḿ ō, laan i kíĺ kógə̄ḿ ō. Ngālən gē laan gē asən̄ naā, ba ngālən kə́ kə̄ dɔɔ́ i kíl jōó. Rāā gajən gə̄ ta tə́ dɔɔ́, adə̄ gajən gē kāgə̄ rɔ̄n gē əhɔn̄ ta naā. 26Rāā gidə kə lɔ́ŕ kə́ *unjə̄ njáý njáý, dɔ tə́ ō, tū gajən gə̄ tə́ ō, dām̄ kadən kə́ sɔ́ gə̄ tə́ ō, rāā bɔ̄gə̄ tan gə̄ kə lɔ́rɔ́ adə̄ gīr̄ gidə əla ta naā tə́ ō. 27Rāā nə̄ngá lɔ́r gə̄ jōó tə́la kadən gə̄ tə́ dām̄ jōó gír bɔ̄gə̄ tan gə̄ ní tə́. Tə́lá sáā kāgə̄ gə̄ kum nə̄ngá gə̄ ní tə́ yā kətōń *loo róō ndujə̄ yá̰á̰ ní. 28Tə́gā kāgə̄ akasiya gə̄ rāā sáā kāgə̄ gə̄ ní tə́ ō, rāā lɔ́r gidə tə́ ō. 29Rāā yibə̄ kə́ *táĺ ń a rāān̄neé kəla ndɔ̄ kəndā deē kem kəla tun̄ yá̰á̰ tə́ ní ō, rāā ndujə̄ yá̰á̰ kə́ *unjə̄ njáý njáý kə́ yā róō horoó dɔ *loo róō ndujə̄ yá̰á̰ tə́ ō, i kəla rāā nge rāā yá̰á̰ kə́ kotə majə.

Currently Selected:

Teē Ngán Israel gə̄ 37: BS

Highlight

Compare

Copy