Teē Ngán Israel gə̄ 36

1Besalel ō, Oholiab ō, gotə kɔdə̄ gə̄ ń Kɔ́ɔ̄ɓē adə̄də́ kum kedə̄ ō, dɔ kə́ un yá̰á̰ láẃ ngá̰ý ō, yā rāań yá̰a̰ gə̄ kə́ tām̄ yā kəla kə́ kem *loo kə́ táĺ tə́ ní, a rāān̄ yá̰a̰ gə̄ malang kə gō ń Kɔ́ɔ̄ɓē ɔjəń ní.

2Moijə ɓāŕ Besalel ō, Oholiab ō, gotə kɔdə̄ gə̄ ń Kɔ́ɔ̄ɓē adə̄də́ kum kedə̄ ngá̰ý á nin̄ malang ndigən̄ kəndā rɔ̄də́ ta kəla gə̄ tə́ yā rāā ní ō. 3Ni-adə̄də́ dɔ yá̰á̰ kə́ kɔr̄ gə̄ ń ngán *Israel gə̄ reēn̄neé tām̄ yā rāań *loo kə́ táĺ ní. Banī kə dɔ ndɔ̄ gə̄ dəloí de gə̄ reē a adə̄n̄ kadə̄ karī yādə́ gə̄ ɓáý na i mbée a 4kɔdə̄ gə̄ malang ń əndān̄ rɔ̄də́ ta kəla gə̄ tə́ yā rāań *loo kə́ táĺ ní əya̰n̄ ta kəla yādə́ gə̄ kógə̄ḿ kógə̄ḿ, 5ba aw̄ ədan̄ Moijə na yá̰a̰ rāā kəla gə̄ ń de gə̄ na reēn̄neé ní na mān̄ dɔ kəla gə̄ ń Kɔ́ɔ̄ɓē na mēr̄ rāā ní kɔ̄ɔ́. 6Anī Moijə mēr̄ kənī mbēr̄ kem ɓēé ɔgə̄ń dəngam gē dəyá̰ gē reē kə kadə̄ karīí tām̄ yā *loo kə́ táĺ tə́. Tāa ń noō asə de gə̄ reē kə kadə̄ karī gēé tā, 7tɔdɔ̄ dɔ yá̰á̰ kə́ kɔr̄ gə̄ ń reēn̄neé ní asə rāā kəla kɔ̄ɔ́, gotə na̰y ɓáý gə̄gē.

Kújə ndi Kɔ́ɔ̄ɓē

8Kɔdə̄ kə́ kumdə́ edə̄ ngá̰ý gə̄ rāān̄ *kújə ndi Kɔ́ɔ̄ɓē kə ta kūbə̄ kutə kógə̄ḿ kə́ əjōn̄ kə kəlā *lḛ́ḛ́ kə́ ngan̄g gēé. Tə́lan̄ kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, dan kəlā *lḛ́ḛ gə̄ ní tə́ rāān̄neé *de kə́ dɔ rā̰ tə́ kə́ ngé ngɔ̄m̄ loo gə̄ tū kūbə̄ gə̄ ní tə́. 9Ngāl̄ ta kūbə̄ kógə̄ḿ asə kíl deē kutə jōó gidə i sɔ́sɔ́ ō, laan asə kíĺ deē sɔ́ ō. Ngāl̄də́ ō, laadə́ ō, asən̄ naā malang. 10Urə̄n̄ kə́ mí gə̄ ta naā tə́ pá tá tél urə̄n̄ kə́ mí gə̄ ta naā tə́ ɓáý to̰. 11Kə́ mí gə̄ ń urə̄n̄ ta naā tə́ ta kəga dɔ ní, udə̄n̄ kəlā kə́ ndul gusə gusə gə̄ kum naā tə́ tə́lan̄ ta nge ń urə̄n̄ ta madə̄ gə̄ tə́ gō gogə́ ní ō, kə́ mí gə̄ ń urə̄n̄ ta naā tə́ gō gogə́ ní, udə̄n̄ kəlā kə́ ndul gusə gusə gə̄ kum naā tə́ tə́lan̄ ta nge kə́ kété tə́ ō, 12adə̄ kəlā kə́ ndul gusə gusə kə́ kudə̄ kum naā tə́ gə̄ ní i kutə mí ta kūbə̄ kə́ kété tə́ ō, i kutə mí ta kūbə̄ kə́ nge ko̰ jōó tə́ ō. Kəlā gə̄ ní ran̄ tadə́ sɔɔ̄ naā jōó jōó. 13Rāān̄ nə̄ngá lɔ́r gə̄ kutə mí tə́lan̄ kum kəlā gə̄ ní tə́ əhɔn̄neé kūbə̄ gə̄ ní ta naā tə́ adə̄ télən̄ tandā kə́ kógə̄ḿ beē.

14Gō tə́ anī əjōn̄ kūbə̄ bḭḭ̄ bə̄yā̰ kutə gidə i kógə̄ḿ rāān̄neé tandā kə́ nge ko̰ jōó yā kutə̄ń dɔ *kújə ndi Kɔ́ɔ̄ɓē. 15Ngāl̄də́ i kíl kutə mətá ō, laadə́ i kíĺ sɔ́ ō. Ngāl̄də́ ō, laadə́ ō asən̄ naā malang. 16Urə̄n̄ kə́ mí gə̄ ta naā tə́ pá tá urə̄n̄ kə́ mehḛ́ gə̄ ta naā tə́ ɓáý. 17Kūbə̄ gə̄ ń urə̄n̄də́ ta naā tə́ kété ní, tə́lan̄ kəlā kə́ kudə̄ kum naā tə́ gə̄ kutə mí ta tə́ ō, kūbə̄ gə̄ ń urə̄n̄də́ ta naā tə́ gō gogə́ ní, tə́lan̄ kəlā kə́ kudə̄ kum naā tə́ gə̄ kutə mí ta tə́ ō. 18Rāān̄ nə̄ngá gə̄ kutə mí kə gində̄ nə̄ngá kasaá əhɔn̄neé kūbə̄ gə̄ ní ta naā tə́ adə̄ télən̄ i tandā kə́ kógə̄ḿ beē. 19Utə̄n̄ gidə kūbə̄ bḭḭ̄ bə̄yā̰ ní kə ndāŕ batə̄ kə́ kərē ō, ənīn̄ ngə̄rā kə́ ngan̄g dɔ ndāŕ batə̄ ní tə́ ō.

20Sān̄ kāgə̄ akasiya kə́ laa gə̄ túdə̄n̄ kə nja kə́ dɔɔ́ əhɔn̄neé *kújə ndi Kɔ́ɔ̄ɓē kə̄ dɔɔ́. 21-22Kāgə̄ gə̄ ní ton̄ tītə̄ naā malang: Ngāl̄də́ i kíl kutə kógə̄ḿ ō, laadə́ i kíĺ kógə̄ḿ kə́ núsə ō, rāān̄ mɔtədə́ gə̄ kadə naā tə́ jōó jōó tadə́ gə̄ tə́ ō. 23Sān̄ kāgə̄ gə̄ ní kutə jōó tām̄ yā kadə *kújə ndi Kɔ́ɔ̄ɓē kə́ dām̄ mbɔ́r ɓē kə́ geleé tə́ ō, 24rāān̄ bir̄ njadə́ gə̄ kutə sɔ́ kə gində̄ arjā̰a̰á̰ yā tə́la tū tə́ ō. Kāgə̄ kógə̄ḿ i kə bir̄ njan gə̄ jōó tām̄ yā mɔtən kə́ jōó gə̄ tə́. 25Sān̄ kāgə̄ ní kutə jōó tām̄ yā kadə kújə ndi Kɔ́ɔ̄ɓē kə́ dām̄ mbɔ́r ɓē kə́ ko̰ó̰ tə́ ō, 26rāān̄ bir̄ njadə́ gə̄ kutə sɔ́ kə gində̄ arjā̰a̰á̰ ō. Bir̄ njadə́ gə̄ ní i jōó jōó kə dɔdə́ gēé. 27Sān̄ kāgə̄ gə̄ mehḛ́ tām̄ yā gə́lé *kújə ndi Kɔ́ɔ̄ɓē kə́ dām̄ kə́ no ɓē tə́ ō, 28sāān̄ kə́ rang gə̄ jōó tām̄ yā kílən gə̄ tə́ ō. 29Kə́ jōó gə̄ ní, njadə́ kə́ nang tə́ i kə́ teē ba tadə́ kə́ dɔɔ́ i kə́ do̰ō̰ kə nə̄ngáá. Kāgə̄ kə́ kíĺ tə́ kə́ jōó gə̄ ní ton̄ i tītə̄ ń noō. 30Adə̄ kāgə̄ kə́ gə́lé *kújə ndi Kɔ́ɔ̄ɓē tə́ gə̄ malang i sɔ́sɔ́ kə bir̄ njadə́ gə̄ kutə gidə i mehḛ́ kə́ rāā kə gində̄ arjā̰a̰á̰. Bir̄ njadə́ gə̄ ní i jōó jōó kə dɔdə́ gēé.

31Gō tə́ anī njárə̄n̄ kāgə̄ akasiya gə̄ rāān̄ bagétə́ tə́: Bagétə́ mí tām̄ yā kāgə̄ gə̄ kə́ kadə kújə ndi Kɔ́ɔ̄ɓē tə́ kə́ dām̄ kógə̄ḿ tə́ ō, 32bagétə́ mí tām̄ yā kāgə̄ gə̄ kə́ kadə *kújə ndi Kɔ́ɔ̄ɓē tə́ kə́ dām̄ kə́rēý tə́ ō, bagétə́ mí tām̄ yā kāgə̄ gə̄ kə́ gə́lé kújə ndi Kɔ́ɔ̄ɓē tə́ kə́ dām̄ kə́ no ɓē tə́ ō. 33Bagétə́ kə́ danaá ḭḭ dām̄ kógə̄ḿ tə́ ugə̄ dām̄ kə́rēý tə́, do̰ō̰nən̄ ɓōdə̄ kāgə̄ gə̄ ní tə́. 34Nin̄-rāān̄ lɔ́r gidə kāgə̄ kə́ laa gə̄ ní tə́ ō, gidə bagétə́ gə̄ ní tə́ ō, rāān̄ nə̄ngá lɔ́r gə̄ tə́lan̄ bagétə gə̄ ní tū tə́ ō.

35Gō tə́ anī əjōn̄ kūbə̄ kə́ yā gāngəń gír loo kə kəlā *lḛ́ḛ́ kə́ ngan̄g gēé, tə́lan̄ kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, dan kəlā *lḛ́ḛ gə̄ ní tə́ yā rāań *de kə́ dɔ rā̰ tə́ kə́ ngé ngɔ̄m̄ loo gə̄ tū kūbə̄ ní tə́. 36Tə́gān̄ kāgə̄ akasiya gə̄ sɔ́ yā do̰ō̰ kūbə̄ kə́ yā gāngəń gír loo tū tə́. A do̰ō̰n̄ kūbə̄ ní tū kāgə̄ gə̄ ní tə́ i kə máyá̰ lɔ́r gēé. Rāān̄ lɔ́r gidə kāgə̄ gə̄ ní tə́, ba nōn̄ gində̄ arjā̰a̰ rāān̄ bir̄ nja kāgə̄ gə̄ ní tə́. Bir̄ nja kāgə̄ gə̄ ní i sɔ́.

37Gō tə́ anī əjōn̄ kūbə̄ kə́ rang tām̄ yā ta róbə́ kújə tandā ní tə́ kə kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, kə kəlā *lḛ́ḛ́ kə́ ngan̄g gēé danaá. 38Sān̄ kāgə̄ gə̄ mí yā do̰ō̰ kūbə̄ ní tū tə́ ō, rāān̄ máyá̰ gə̄ kə́ yā do̰ō̰ń kūbə̄ ní ō, rāān̄ yá̰á̰ kə́ laa kə́ yā kəla dɔ kāgə̄ gə̄ ní tə́ ō, kəlā gində̄ kə́ rāā lɔ́r gidə tə́ yā kəhɔń kūbə̄ ní dɔɔ́ ō, rāān̄ bir̄ nja kāgə̄ gə̄ ní kə gində̄ nə̄ngá kasaá ō.

Currently Selected:

Teē Ngán Israel gə̄ 36: BS

Highlight

Compare

Copy