Teē Ngán Israel gə̄ 35

Ngán Israel gə̄ rāān̄ kújə ndi Kɔ́ɔ̄ɓē

(35-40)

Sabat i ndɔ̄ kɔr̄ koō

1Moijə kán̄ ngán *Israel gə̄ malang, ədadə́ na:

Najə̄ ń Kɔ́ɔ̄ɓē əda ní n toó: 2Ā ī-rāāī kəla ndɔ̄ mehḛ́, ba ndɔ̄ kə́ nge ko̰ sīrí anī yá̰á̰ kə́ kadə̄ ī-ɓōlíī gidə a to, yá̰á̰ ní i *sabat, i kɔr̄ koō yā Kɔ́ɔ̄ɓē. Deē ń a rāā kəla ndɔ̄ ń noō tə́ ní a tɔ̄l̄nən̄ kɔ̄ɔ́. 3Ká ī-ndiī i loo kə́ rá tə́ gə̄gē anī, ā ī-rāāī hor ndɔ̄ *sabat tə́ alé.

Ngán Israel gə̄ reēn̄ kə yá̰á̰ kə́ yā kɔsə dɔ naā tə́

4Moijə əda ngán *Israel gə̄ malang na yá̰á̰ ń Kɔ́ɔ̄ɓē əda ní n toó:

5Ɔ̄rī dɔ yá̰a̰ yāsí gə̄ tām̄ yā Kɔ́ɔ̄ɓē tə́. De gə̄ malang ń a adə̄n̄ kə kemdə́ kə́ majaá ní, a reēn̄neé yā kadə̄ Kɔ́ɔ̄ɓē. Yá̰a̰ gə̄ ń a reēn̄neé ní n toó: Lɔ́r ō, gində̄ arjā̰a̰ ō, gində̄ nə̄ngá kasə ō, 6*bḭḭ̄ batə̄ kə́ kəla kum man̄ yá̰á̰ kə́ ndul gusə gusə tə́ ō, kə́ kərē bḭḭ tə́ ō, kə́ kərē pírírí tə́ ō, *lḛ́ḛ ō, bḭḭ̄ bə̄yā̰ ō, 7ndāŕ batə̄ kə́ kəla kum man̄ yá̰á̰ kə́ kərē tə́ ō, ngə̄rā kə́ ngan̄g ō, kāgə̄ akasiya ō, 8yibə̄ hor ō, yá̰á̰ kə́ kotə majə gə̄ kə́ yā rāań *yibə̄ kə́ táĺ kə́ yā róō horoó ō, 9mbal̄ *beril ō, *mbal̄ kə́ gātə̄də́ i ngá̰ý kə́ rang gə̄ kə́ yā tə́la tū epod tə́ ō, tū pekətoral#35.9 Epod ō, pekətoral ō: Á̰a̰ī Teē 28.6-30 tə́ ō. 10Ādə̄ kɔdə̄ gə̄ malang kə́ dɔ dáńsí tə́ ń kumdə́ edə̄ ngá̰ý ní reē rāān̄ yá̰a̰ gə̄ ń Kɔ́ɔ̄ɓē əda ní malang: 11Kújə ndi yān kə tandā kə́ dɔ tə́ ō, yá̰a̰ kutə̄ dɔn ō, nə̄ngá gə̄ ō, kāgə̄ kə́ laa gə̄ ō, bagétə gə̄ ō, kāgə̄ kə́ tītə̄ kāgə̄ nga dan kújə gə̄ ō, bir̄ nja kāgə̄ gə̄ ní ō, 12*sandúkə madə̄ naā tə́ kə sáā kāgə̄ gə̄ kə́ yā kətōń ō, yá̰a̰ tan ō, kūbə̄ kə́ yā gāngəń gír *loo kə́ táĺ ngá̰ý ō, 13tábəl naā tə́ kə sáā kāgə̄ yān gēé ō, yá̰a̰ rāā kəla gə̄ kə́ dɔ tə́ ō, mápá kə́ ndējə̄ Nə́ɓā ō, 14ɗəra hor naā tə́ kə yá̰a̰ rāā kəla gə̄ kə́ dɔ tə́ ō, bay hor gə̄ kə́ ta tə́ ō, yibə̄ hor kə́ yā ka̰a̰ń loo ō, 15*loo róō ndujə̄ yá̰á̰ kə́ kotə majə ō, sáā kāgə̄ kə́ tū tə́ gə̄ ō, *yibə̄ kə́ táĺ ō, ndujə̄ yá̰á̰ kə́ kotə majə kə́ yā róō horoó ō, kūbə̄ kə́ ta róbə́ *kújə yā Kɔ́ɔ̄ɓē tə́ ō, 16*loo tun̄ yá̰a̰ naā tə́ kə yengəre kə́ tū tə́ kə́ rāā kə gində̄ nə̄ngá kasaá ō, sáā kāgə̄ kə́ tū tə́ gə̄ ō, yá̰a̰ rāā kəla kə́ dɔ tə́ gə̄ malang ō, bay kə́ yā ɓōkə́nń man̄ tə́go rɔ̄ naā tə́ kə njaneé ō, 17ndogə̄ kūbə̄ gə̄ kə́ yā gāngəń gíŕ ndágə loo kə́ gīr̄ gidə *kújə yā Kɔ́ɔ̄ɓē ō, kāgə̄ ndogə̄ kūbə̄ gə̄ ní ō, bir̄ nja kāgə̄ ndogə̄ gə̄ ní ō, kūbə̄ kə́ ta róbə ndogə̄ tə́ ō, 18bēl̄#35.18 Bēl̄: Á̰a̰ī Teē 27.19 gə̄ kə́ yā tṵ́ṵ̄ kəlā kújə tandā yā Kɔ́ɔ̄ɓē tū tə́ gə̄ ō, kə́ yā tṵ́ṵ̄ kəlā ndogə̄ kūbə̄ tū tə́ gə̄ ō, naā tə́ kə kəlādə́ gēé, 19kūbə̄ gə̄ kə́ yā rāań kəla kem *loo kə́ táĺ tə́ ō, kūbə̄ kə́ yā ɓōĺ gidə gə̄ yā *Aaro̰ *nge tun̄ yá̰a̰ ō, kūbə̄ gə̄ ń kadə̄ ngánən gə̄ əlan̄ rɔ̄də́ tə́ yā rāań kəla tun̄ yá̰á̰ ní ō.

20Ngán Israel gə̄ malang əya̰n̄ Moijə ba ɔtə aw̄n̄ 21Gō tə́ anī de gə̄ malang ń kemdə́ ndigə rāā yá̰a̰ tām̄ yā Kɔ́ɔ̄ɓē tə́ ō, ndíĺdə́ ndigə kadə̄ yá̰á̰ ngá̰ý ō ní, reēn̄ kə dɔ yá̰a̰ yādə́ gə̄ ń ɔrə̄n̄ ní adə̄n̄ Kɔ́ɔ̄ɓē tām̄ yā *kújə kənge naā tə́ ō, tām̄ yā kəla malang kə́ kemeé tə́ ō, tām̄ yā kūbə̄ kə́ yā ɓōĺ gidə gə̄ tə́ ō. 22Dəngam gə̄ kə dəyá̰ gə̄ ń kemdə́ ndigə kadə̄ yá̰á̰ ngá̰ý ní reēn̄ kə yá̰á̰ súū rɔ̄ kə́ dáńg dáńg gə̄ kə́ rāān̄ kə lɔ́rɔ́: Yá̰á̰ kə́ yā kəhɔń nənga dɔ gə̄ ō, yá̰a̰ ta mbī gə̄ ō, nə̄ngá gə̄ ō, məde gə̄ ō. Reē ndējə̄n̄ Kɔ́ɔ̄ɓē yá̰a̰ gə̄ ń noō kə gō looneé#35.22 Ndējə̄n̄ Kɔ́ɔ̄ɓē kə gō looneé: Loo ndējə̄ yá̰á̰ ní n toó: Nge tun̄ yá̰a̰ a əla kum kə̄ kété (kumən na adə̄ i Nə́ɓā), gō tə́ anī téləń kum kə̄ rɔ̄n tə́ (kumən na Nə́ɓā tél adə̄n).. 23Ngé gə̄ ń aw̄n̄ kə *bḭḭ̄ batə̄ kə́ kəla kum man̄ yá̰á̰ kə́ ndul gusə gusə tə́ ō, kə́ kərē bḭḭ tə́ ō, kə́ kərē pírírí tə́ ō, kə *lḛ́ḛ ō, kə bḭḭ̄ bə̄yā̰ ō, kə ndāŕ batə̄ kə́ kəla kum man̄ yá̰á̰ kə́ kərē tə́, aláa kə ngə̄rā dā̰ kə́ ngangá ní, reēn̄neé malang. 24Ngé gə̄ ń ɔrə̄n̄ dɔ gində̄ arjā̰a̰, aláa gində̄ nə̄ngá kasə tām̄ yā Kɔ́ɔ̄ɓē tə́ ní reēn̄neé ō, ngé gə̄ ń aw̄n̄ kə kāgə̄ akasiya kə́ to rāań kəla ní reēn̄neé ō. 25Dəyá̰ gə̄ malang ń kumdə́ edə̄ ngá̰ý ní reēn̄ kə kəlā gə̄ kə́ nin̄ kɔ́ gə̄ əndan̄ kə jīdə́: Kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, kəlā *lḛ́ḛ ō. 26Dəyá̰ kə́ rang gə̄ malang ń kumdə́ edə̄ ngá̰ý ní əndan̄ kəlā bḭḭ̄ bə̄yā̰ gə̄ reēn̄neé ō. 27Ngār gə̄ yā ngán *Israel gə̄ reēn̄ kə mbal̄ *beril gə̄ ō, kə *mbal̄ kə́ gātə̄də́ i ngá̰ý kə́ rang gə̄ ō, yā tə́la tū epod tə́ ō, tū pekətoral#35.27 Epod ō, pekətoral ō: Á̰a̰ī Teē 25.7 ō 28.6-30 ō. tə́ ō. 28Reēn̄ kə man̄ yá̰á̰ kə́ kotə majə gə̄ ō, yibə̄ hor ō, *yibə̄ kə́ táĺ ō, ndujə̄ yá̰á̰ kə́ kotə majə kə́ yā róō horoó ō. 29Ngán Israel gə̄ malang, dəyá̰ gē, dəngam gē, adə̄n̄ yá̰a̰ kə gō kem ndigə yādə́ yā rāań kəla ń Kɔ́ɔ̄ɓē ɔjə Moijə kadə̄ rāā ní i beé.

Besalel ō, Oholiab ō, udən̄ rɔ̄ kəla tə́

30Moijə əda ngán *Israel gə̄ na:

Á̰a̰ī, Kɔ́ɔ̄ɓē gə̄rā Besalel ngōn̄ Uri kə́ ngōn̄ Hur ń i de kə́ gír ɓē yā *Juda tə́ ní. 31Rāā adə̄ Ndíĺ Nə́ɓā rosə kemən adə̄ kumən edə̄ ngá̰ý ō, dɔn un yá̰á̰ láẃ ngá̰ý ō, ger̄ yá̰á̰ ngá̰ý ō, ger̄ loo rāā kəla gə̄ malang ō. 32Ger̄ núm̄ kəla tá rāā ō, ger̄ rāā kəla lɔ́r ō, kəla arjā̰a̰ ō, kəla gində̄ nə̄ngá kasə ō, 33ger̄ loo tɔ́sə̄ kadə *mbal̄ gə̄ kə́ gātə̄də́ i ngá̰ý gə̄ ō, ger̄ loo tə́ládə́ kem kār̄də́ gə̄ tə́ ō, ger̄ kəla tɔ́sə̄ kāgə̄ ō, ni ger̄ rāā yá̰a̰ malang. 34Kɔ́ɔ̄ɓē rāā adə̄ ni ger̄ loo kɔjə de gə̄ yá̰a̰ ō, tītə̄ ń rāań adə̄ Oholiab kə́ ngōn̄ Ahisamak kə́ gír ɓē yā Dan tə́ gerə̄ń loo kɔjə de gə̄ yá̰á̰ ní. 35Ni-adə̄də́ kum kedə̄ kadə̄ rāān̄neé kəla yā nge tɔ́sə̄ *mbal̄ gə̄ kə́ gātə̄də́ i ngá̰ý ō, yā nge rāā yá̰á̰ súū yá̰a̰ ō, yā nge súū kūbə̄ kə kəlā *bḭḭ̄ batə̄ kə́ ndul gusə gusuú ō, kə́ kərē bḭḭ́ ō, kə́ kərē pírírí ō, kə kəlā *lḛ́ḛ́ ō. Ni-rāā adə̄ gerə̄n̄ rāā kəla yā nge kəjō kūbə̄ ō, yā ngé rāā kəla kə́ dáńg dáńg gə̄ ō, yā kɔdə̄ gə̄ ō.

Currently Selected:

Teē Ngán Israel gə̄ 35: BS

Highlight

Compare

Copy