Ta Kəla gír yá̰a̰ gə̄ 26

Isaak nin̄ kə Abimelek

1Ɓō əsō kem ɓēé, utə̄ gō ɓō ń rāā de gə̄ ɓāl̄ yā Abəraham tə́ ní. Adə̄ Isaak ḭḭ a aw̄ kə̄ Gerar ɓē Abimelek mban̄g yā Pilistin gə̄ tə́. 2Anī Kɔ́ɔ̄ɓē ndɔ̄bə̄n ədan na:

Ī-lōō kaw̄ Ejiptə tə́, ba ī-ndi dɔ nang ń m-ā m-ɔ́jiī tə́ ní. 3Ī-ndi kem ɓē ń toō tə́. M-ā m̄-ndi seí ō, m-ā m̄-rāā majə seí ō, tɔdɔ̄ m-ā m-ādī ḭ̄ ō, ngání gə̄ ō, ngán kaaí gə̄ ō, dɔ nang ń toō malang, yā kadə̄ ndūḿ ń m-ə̄nī m-ādə̄ bɔbí Abəraham ní reē udəń gíŕ kə́ rɔ̄ tə́. 4M-ā m̄-rāā kadə̄ ngání gə̄ ō, ngán kaaí gə̄ ō, a bəlan̄ tītə̄ tə́yō̰ gə̄ kə́ dɔ rā̰ tə́ ō, m-ā m-ādə̄də́ dɔ nang ń toō malang ō. M-ā m̄-rāā majə kə nápar de kə́ dɔ nang tə́ gə̄ malang sɔɔ̄ńdə́ nin̄, 5tɔdɔ̄ Abəraham oō taḿ ō, rāā yá̰á̰ ń m-ə́dan na kə rāā ní ō, yá̰á̰ ń m-ə̄ndā dɔn tə́ kadə̄ rāā ní ni-rāā ō, yá̰a̰ gə̄ ń m̄-ndang kadə̄ yā rāā ní ni-rāā ō, ni ngɔ̄m̄ ndū najə̄ yāḿ gə̄ ō.

6Isaak ndi i Gerar. 7Dan ń de kə́ Gerar gə̄ dəjenən̄ najə̄ kə́ dɔ nə̄yá̰n tə́ anī, ədadə́ na i ngōkó̰o̰n kə́ dəyá̰. Ni-ɓōĺ kədadə́ na i nə̄yá̰n najə̄ kadə̄ tɔ̄l̄nən̄, tɔdɔ̄ Rebeka mandə ngá̰ý.

8Isaak ndi noó dan i ngá̰ý. Ndɔ̄ kógə̄ḿ tə́ Abimelek, mban̄g yā Pilistin gə̄, a̰a̰ loo ko̰rō̰ kújə́ tə́ anī, a̰a̰ Isaak loo kógə̄ naā tə́ kə nə̄yá̰n Rebekaá. 9Anī Abimelek adə̄ ɓārə́n̄ Isaak adə̄nən̄. Ni-ədan na:

Rebeka i nə̄yá̰í rɔ̄kum. Əda na ni na i ngōkó̰ó̰í kə́ dəyá̰ i tām̄ rí tə́? Isaak tél ədan na:

I tɔdɔ̄ m̄-ɓōĺ kadə̄ tɔ̄l̄mə̄n̄ najə̄ yān tə́.

10Ba Abimelek əda na:

I rí kə́ beé n ī-rāā sejí toó? Nə́ngē tə́ najə̄ a əsō dɔjí tə́, tɔdɔ̄ na̰y i sḛ́ý beē kadə̄ deē kógə̄ḿ kə́ dan gír de gə̄ ń toō tə́ taā nə̄yá̰í.

11Abimelek tāā gír de gə̄ ní malang, əda na:

Deē ń a ɔdə rɔ̄ dəngam ń toō, aláa a ɔdə rɔ̄ nə̄yá̰n anī, a tɔ̄l̄nən̄ kɔ̄ɔ́.

Isaak əhɔn̄ madə̄ naā kə Abimelek

12Kem ɓāl̄ ngeé ń noō tə́, Isaak dubə̄ kōō anī ənge ngá̰ý, kum kōō kógə̄ḿ ojə madə̄ i ɓú, tɔdɔ̄ Kɔ́ɔ̄ɓē rāā majə seneé. 13Yá̰a̰ kənge yān aw̄ kum i kə̄ kété kété, adə̄ ni-tél de kə́ nge kənge yá̰á̰ ngá̰ý. 14Ni-ənge batə̄ gə̄ ō, bə̄yā̰ gə̄ ō, man̄g gə̄ ō, ngé rāā kəla gə̄ ngá̰ý ō, adə̄ Pilistin gə̄ əndānən̄ ni ngá̰ý. 15Bəlo man̄ gə̄ ń ngé kəla yā bɔbə̄n Abəraham gə̄ ndērə̄n̄ dan ń ni ndiń kə kumneé ɓáý tə́ ní, Pilistin gə̄ ɔyn̄ nán̄g tə́lanə̄ń ta malang adə̄ rosə. 16Abimelek əda Isaak na:

Ī-teē kɔ̄ɔ́ kem ɓē yājí tə́, tɔdɔ̄ tɔ́gí i ngá̰ý tɔȳ yājí.

17Isaak ḭḭ aw̄ əhɔ loo wól loo kə́ Gerar tə́ ndi tū tə́. 18Bəlo man̄ gə̄ ń ndērə̄n̄ ɓāl̄ yā bɔbə̄n Abəraham tə́ ní, Isaak tél ɔr̄ gír ba tə́ndā rī gə̄ ń bɔbə̄n tə́ndā dɔ tə́ kété ní gogə́.

19Ndɔ̄ kógə̄ḿ tə́ ngé kəla yā Isaak gə̄ ndērə̄n̄ bəlo man̄ kum wól loo tə́ anī, əngen̄ man̄ kə́ a əɓa. 20Anī ngé kul̄ yá̰á̰ kə́ Gerar tə́ gə̄ sāān̄ ta ngé kul̄ yá̰a̰ yā Isaak gə̄, ədan̄ na man̄ na i yādə́. Adə̄ Isaak ənda rī bəlo man̄ ni na i Esek, kumən na i sāā tām̄, tɔdɔ̄ sāān̄ tan dɔ man̄ ní tə́. 21Ngé kəla yā Isaak gə̄ ndērə̄n̄ bəlo man̄ kə́ rang, ba kɔ̄lə̄n̄ naā dɔ tə́ ɓáý to̰. Isaak əndā rī bəlo man̄ ní na i Sitəna, kumən na i kɔ̄l̄ naā. 22Ni-ndɔ́tə̄ loo ń noō tə́ ba aw̄ ndēr̄ bəlo man̄ kə́ rang kə́ nge ko̰ mətá. Bəlo man̄ ní tā a kɔ̄l̄ gətóo dɔ tə́, adə̄ əndā rīn na i Rehobot, kumən na i loo kə́ kɔr̄ kemən kə̄ gogə́. Tɔdɔ̄ ni-əda na:

Kɔ́ɔ̄ɓē aw̄ sejí loo kə́ ndágə́ tə́ kadə̄ j-əngeī yá̰a̰ dɔ nang ń toō tə́.

23Isaak ḭḭ loo ń noō tə́ aw̄ Beer Seba. 24Kɔ́ɔ̄ɓē ndɔ̄bə̄n ndɔ̄ɔ́ ədan na:

Mā i Nə́ɓā yā bɔbí Abəraham. Ī-lōō ɓōĺ yá̰á̰ kógə̄ḿ, tɔdɔ̄ mā i naā tə́ seí, adə̄ m-ā m̄-rāā majə seí. M-ā m̄-rāā kadə̄ ngání gə̄gē, ngán kaaí gə̄gē, a bəlan̄ tām̄ táŕ ń m̄-tár nge kəla yāḿ Abəraham tə́ ní.

25Isaak ɔy kūbə̄rū mbal̄ gə̄ tə́ndā dɔ naā tə́ rāań *loo tun̄ yá̰a̰ tām̄ yā Kɔ́ɔ̄ɓē tə́ loo ní tə́. Ni-ɓāŕ Nə́ɓā na i Kɔ́ɔ̄ɓē kem ndɔ̄ȳ yān tə́. Ni-udə kújə tandā yān loo ní tə́ ō, ngé kəla yān gə̄ ndērə̄n̄ bəlo man̄ kə́ rang ō.

26Abimelek ḭḭ Gerar reē ka̰a̰n tə́, nin̄ kə Ahujat ń i nge kɔjən gōsə̄ najə̄ ní ō, Pikol ń i ngol áskar yān gə̄ ní ō. 27Isaak dəjedə́ najə̄ əda na:

Nel̄sí seḿ aĺ á ī-tə̄ɓāmī ɓē yāsí tə́ kɔ̄ɔ́ ní, ī-reēī ka̰a̰ḿ tə́ i najə̄ rí tə́?

28Nin̄ tél ədanən̄ na:

J-a̰a̰ kadə̄ Kɔ́ɔ̄ɓē i naā tə́ seí, adə̄ jə-gír̄ j-əda na majə kadə̄ *madə̄ naā kə́ rāā kə kənī míndí to dɔ dáńjí tə́ seí. 29Ə̄nī míndí kadə̄ ā ī-rāā yá̰á̰ kə́ majaĺ kógə̄ḿ sejí alé tītə̄ ń jə-rāań yá̰á̰ kə́ majaĺ seí alé ba jə-rāā i yá̰á̰ kə́ majə tá seí, adə̄ j-əya̰ī ādə̄ āw̄ kə lɔmɔɔ́ ní. Ḭ̄ i de kə́ Kɔ́ɔ̄ɓē rāā majə seí rɔ̄kum.

30Isaak rāā yá̰a̰ kəsa kə́ ngá̰ý adə̄də́, adə̄ əsan̄ ō, a̰ȳn̄ ō. 31Nin̄ ḭḭn̄ dɔɔ́ kə gír looí ɓatə, ənīn̄ míndə́də́ adə̄n̄ naā. Isaak rāādə́ lápə́ya ba əya̰də́ adə̄ aw̄n̄ kə kemdə́ kə́ sɔl̄ lɔmɔɔ́.

32Ndɔ̄ nəkɔ́ ń noō tə́ ngé kəla yā Isaak gə̄ reē ədanən̄ najə̄ yā bəlo man̄ kógə̄ḿ kə́ ndērə̄n̄, ədanən̄ na n-əngen̄ man̄. 33Isaak əndā rī bəlo man̄ ní na i Siba, kumən na i míndə́ kə́ kənī. I tām̄ najə̄ ń noō tə́ n ɓōólaā gə̄gē a ɓārə́n̄ ɓē ní na i Beer Seba ní. Kumən na i bəlo man̄ kənī míndə.

Esau taā dəyá̰

34Esau rāā ɓāl̄ kutə sɔ́ anī taā Judit ngōn̄ Beri ń i Het ní ō, Basmat ngōn̄ Elon ń i Het ní ō. 35Nin̄ rāān̄ Isaak ō, Rebeka ō, adə̄ wurdə́ atə̄də́ ngá̰ý.

Currently Selected:

Ta Kəla gír yá̰a̰ gə̄ 26: BS

Highlight

Copy