Ta Kəla gír yá̰a̰ gə̄ 27

Jakob gól̄ bɔbə̄n adə̄ tɔ́r̄ tan dɔn tə́

1Isaak tɔgə ɓə́gá ngá̰ý adə̄ kumən a̰a̰ loo to̰ alé. Ni-ɓāŕ Esau ngōnə̄n kə́ nga tɔ́gə na:

Esau!

Anī Esau ndigən na:

Mā n toó.

2Anī Isaak ədan na:

m̄-tɔgə ɓə́ga kɔ̄ɔ́, m̄-ger̄ ndɔ̄ koyḿ alé, 3ní m̄-rāāī ɓɔ́, ún nənga yāí ō, ngɔng gərā yāí ō, ga̰ gərā yāí ō ba āw̄ bembeé ī-ndo̰ dā̰ ādə̄m̄. 4Ī-ndīr̄ yá̰á̰ kə́ nel̄ taḿ ī-reēń ādə̄ m-ə́sa, ādə̄ m̄-tɔ́rəń taḿ dɔí tə́ pá tá m-óý ɓáý.

5Rebeka oō najə̄ ń Isaak ɔr̄ kə Esau ní. Adə̄ dan ń Esau ɔtə aw̄ bembeé ndo̰ dā̰á̰ yā reēń anī, 6Rebeka əda ngōnə̄n Jakob na:

Bɔbí əda Esau na 7kə tɔ̄l̄ dā̰, kə reē kə rāań yá̰a̰ kəsa kə́ nel̄ tan kadə̄ n-əsa. Ré n-əsa oy anī na n-tɔ́r̄ tan dɔn tə́ ta kum Kɔ́ɔ̄ɓē tə́ pá tá kadə̄ n-oy ɓáý. 8Ní, ngōnə̄ḿ, á̰á̰ yá̰á̰ ń m-ā m-ɔ́jiī kadə̄ ī-rāā ní. 9Āw̄ dan yá̰a̰ kul̄ gə̄ tə́, ə́hɔ́ ngán bə̄yā̰ kə́ majə gə̄ jōó, ī-reēń ādə̄ m̄-rāań yá̰a̰ kəsa kə́ nel̄ ta bɔbí ngá̰ý. 10Ā āwń yā kadə̄ bɔbí əsa ba tɔ́rəń tan dɔí tə́ pá tá oy ɓáý.

11Jakob tél əda kó̰o̰n na:

Esau i nge bḭḭ̄ ba mā m-ə́ɓa bḭḭ̄ alé. 12Ré bɔbə́ḿ ɔdə rɔ̄ḿ anī, a ger̄ kadə̄ m̄-gólə̄n i mbée, adə̄ a ndɔ̄lə́m̄ ba a tɔ́r̄ tan dɔḿ tə́ alé.

13Kó̰o̰n tél ədan na:

Ngōnə̄ḿ, m-ā m-ún ndɔ̄ĺ ní dɔí tə́ kɔ̄ɔ́ kadə̄ əsō dɔḿ mā tə́. Ōō najə̄ yāḿ kə̄ noí tə́, āw̄ ə́hɔ́ ngán bə̄yā̰ kə́ majə gə̄, ī-reēń ādə̄m̄.

14Jakob aw̄ əhɔdə́ reēń adə̄ kó̰o̰n. Kó̰o̰n rāań yá̰a̰ kəsa kə́ Isaak gḛy ngá̰ý. 15Gō tə́ anī Rebeka ɔy kūbə̄ yā Esau kə́ majə ngá̰ý gə̄ ń to kújú ní, tə́la rɔ̄ Jakob tə́. 16Ni-ɓír̄ ngə̄rā ngán bə̄yā̰ gə̄ ní gidə jī Jakob tə́ ō, ɓír̄ kɔ́ɔn ń i kanjə̄ bḭḭ̄ tə́ ní ō, 17ba un yá̰a̰ kəsa kə́ nel̄ ní ō, mápá ń ɔr̄ ní ō adə̄n. 18Jakob aw̄ rɔ̄ bɔbə̄n tə́ ɓārə́n na:

Bɔbə́ḿ. Anī Isaak ndigən na:

Mā n toó ngōnə̄ḿ. I ḭ̄ náā n toó?

19Jakob tél əda na:

I mā Esau ngōnīí kə́ nga tɔ́gə. Yá̰á̰ ń ī-mērə̄m̄ rāā ní, m̄-rāā oy kɔ̄ɔ́. Ní, ḭ́ḭ dɔɔ́ ī-ndi dɔ rɔ̄í tə́ ə́sa dā̰ tɔ̄lə̄ḿ, ba ī-tɔ́r̄ taí dɔḿ tə́.

20Isaak əda na:

Ngōnə̄ḿ, ī-rāā i ba̰ý n ə́ngeń dā̰ láẃ beé?

Jakob tél əda na:

I Kɔ́ɔ̄ɓē Nə́ɓā yāí n reē seneé noḿ tə́ ní.

21Isaak əda Jakob na:

Ngōnə̄ḿ, ī-reē kə̄ rɔ̄ḿ tə́ laā, ādə̄ m-ɔ́diī m-á̰a̰ ké i ḭ̄ ngōnə̄ḿ Esau nəkɔ́ wa.

22Jakob ndɔ́tə̄ kə̄ rɔ̄ bɔbə̄n Isaak tə́. Bɔbə̄n mámə̄n ba əda na:

Ndūn i ndū Jakob, ba jīn i jī Esau. 23Ni-gerə̄n alé tɔdɔ̄ jīn i bḭḭ̄ tītə̄ jī Esau. Ba ni dəjen najə̄ pá tá kadə̄ tɔ́r̄ tan dɔn tə́ ɓáý 24na:

Ḭ̄ i ngōnə̄ḿ Esau rɔ̄kum a?

Jakob ndigə na: A̰á̰ā̰.

25Isaak əda na:

Ngōnə̄ḿ, ādə̄m̄ dā̰ tɔ̄līí ādə̄ m-ə́sa ō, m̄-tɔ́rəń taḿ dɔí tə́ ō. Jakob adə̄ bɔbə̄n yá̰a̰ kəsa adə̄ əsa ō, adə̄n kasə *nduú adə̄ a̰ȳ ō. 26Gō tə́ anī Isaak ədan na:

Ngōnə̄ḿ, ī-njə̄rā kə̄ laā ə́hɔm̄ kə̄ rɔ̄í tə́.

27Ni-reē əhɔ bɔbə̄n kə̄ rɔ̄n tə́ ɓirə̄n dagə. Isaak un wusə kūbə̄ yān gə̄ ba tɔ́r̄ tan dɔn tə́, əda na:

Wusə ngōnə̄ḿ otə tītə̄ wusə ndɔr̄ kə́ Nə́ɓā rāā majə seneé.

28Ādə̄ Nə́ɓā adī tal kə́ dɔ rā̰ tə́ ō, dɔ nang kə́ teē kōō ngá̰ý ō,

adī gémē ngá̰ý ō, kasə *nduú ngá̰ý ō!

29Ādə̄ gír de gə̄ rāān̄ kəla yāí!

Ādə̄ gír nápar de gə̄ ɔsən̄ nodə́ nang tə́ noí tə́!

Ī-tél ngol ngákó̰ó̰í gə̄,

ādə̄ ngákó̰ó̰í gə̄ ɔsən̄ nodə́ nang tə́ noí tə́!

Ādə̄ ndɔ̄ĺ i dɔ deē ń a ndɔ̄líī tə́ ní,

ba ādə̄ tɔ́r̄ ta i dɔ deē ń a tɔ́r̄ tan dɔí tə́ ní!

30Dan ń Isaak tɔ́r̄ tan dɔ Jakob tə́ oy anī, Jakob teē. Ni-teē gō bɔbə̄n tə́ sḛ́ý beē ō, ngōkó̰o̰n Esau tél ndo̰ó̰ ō. 31Esau rāā yá̰a̰ kəsa aw̄ń adə̄ bɔbə̄n ō, ba ədan na:

Ḭ̄ ī-ndi dɔ rɔ̄í tə́ ə́sań dā̰ ń m̄-reēń kadī tə́ ní, ba ī-tɔ́r̄ taí dɔḿ tə́.

32Isaak dəjen na:

I ḭ̄ náā n toó?

Esau tél ədan na:

I mā Esau ngōnīí kə́ nga tɔ́gə.

33Isaak ndebə kə̄ rɔ̄n gə̄ tə́ malang ba əda na:

I náā n aw̄ ndo̰ó̰ tɔ̄l̄ dā̰ reēń adə̄m̄ ní? M-ə́sá yá̰a̰ malang kété noí tə́ laā kɔ̄ɔ́. m̄-tɔ́r̄ taḿ dɔ deē ń reēń adə̄m̄ tə́ ní, adə̄ kɔ́ɔ̄ ənge tɔ́r̄ ta.

34Loo ń Esau oō najə̄ kɔr̄ bɔbə̄n anī, wurən atə̄n ngá̰ý, adə̄ əga kɔŕ. Ni-rāā bɔbə̄n ɓɔ́, əda na:

Bɔbə́ḿ, ī-tɔ́r̄ taí dɔḿ tə́ ō!

35Isaak tél ədan na:

Ngōkó̰ó̰í reē gólə̄m̄, taā tɔ́r̄ ta yāí aw̄ń kɔ̄ɔ́.

36Anī Esau əda na:

I tām̄ rīn ń na i Jakob ní n taāń loo yāḿ nja jōó ní a#27.36 Jakob kə ta Hebəro kumən kə́rēý na i taā loo yāḿ.? Ni-taā ta róbə kənge yá̰a̰ ndəbā kə́ loo ngōn̄ hágə́ tə́ yāḿ kɔ̄ɔ́, tá ń toō reē taā tɔ́r̄ ta yāḿ kɔ̄ɔ́ ɓáý to̰!

Esau dəje bɔbə̄n ɓáý to̰ na:

Gotə tɔ́r̄ ta kə́ na̰y tām̄ yāḿ tə́ gətóó bátə́ a?

37Isaak tél ədan na:

M-ə̄ndān kadə̄ ni i ngolií ō, m-ādə̄n ngákó̰o̰n gə̄ malang kadə̄ nin̄ i ngé rāā kəla yān gə̄ ō. M-ādə̄n gémē ō, kasə *nduú ō. Ngōnə̄ḿ, m-ásə rāā yá̰á̰ kógə̄ḿ tām̄ yāí tə́ to̰ alé.

38Esau əda bɔbə̄n na:

I tɔ́r̄ ta ń noō ngóy n i kemií tə́ ní a? Bɔbə́ḿ, ī-tɔ́r̄ taí dɔḿ tə́ ō! Ni-nōō kə man̄ kumneé. 39Bɔbə̄n əda na:

Loo ń ā ī-ndi tū tə́ ní i kadə loo kə́ teē kōō tə́ ngɔr alé.

Tal kə́ dɔ rā̰ tə́ a əhɔ tū tə́ alé.

40Ā ī-ndi kə kumií i kə ta kūl̄ kaskar yāí ō,

ā ī-rāā i ɓer̄ yā ngōkó̰ó̰í ō,

ba ā ī-tetə njúkə yān kɔ́í tə́ yā teēń dɔɔ́.

Jakob a̰ȳ aw̄ ɓē nānə̄n Laban

41Esau im̄ Jakob najə̄ tɔ́r̄ ta ń bɔbə̄n tɔ́r̄ tan dɔn tə́ ní. Ni-əda kə̄ kemən tə́ na:

Bɔbə́ḿ a oy ngɔr. Ndɔ̄ ń bɔbə́ḿ a oy tə́ anī, m-ā m̄-tɔ̄l̄ Jakob. 42Dan ń ədan̄ Rebeka gotə najə̄ kɔr̄ Esau ń i ngōnə̄n kə́ ngatɔ́gə́ ní anī, ni-əla ɓāŕ Jakob ngōnə̄n kə́ nge ko̰ jōó tə́, ədan na:

Á̰a̰ā̰, ngōkó̰ó̰í Esau əhɔī kemən tə́, a sāā tɔ̄lī. 43Ngōnə̄ḿ, ōō najə̄ ń m-ā m-ə́daī toó: Ḭ́ḭ dɔɔ́, ā̰ȳ āw̄ Haran, ɓē ngōkó̰ó̰ḿ Laban. 44Āw̄ ī-ndi rɔ̄n tə́ ādə̄ wōn̄g yā ngōkó̰ó̰í tetə ō, 45dɔn ndígə̄nal yá̰á̰ ń ī-rāā seneé ní ō, pá tá m-ə́la gōí tə́ anī ī-téĺ ɓáý. m̄-sāā kadə̄ údiī jōó mbak ndɔ̄ mbang kógə̄ḿ alé.

46Rebeka əda Isaak na:

Nelə̄m̄ kə rɔ̄ḿ to̰ alé sɔɔ̄ń dəyá̰ Het gə̄ ń Esau taā ní. Ré Jakob taā dəyá̰ dɔ nang ń toō tə́ ɓáý to̰ anī, ndiḿ kə kumḿ to̰ aĺ i só tə́.

Currently Selected:

Ta Kəla gír yá̰a̰ gə̄ 27: BS

Highlight

Copy