Ta Kəla gír yá̰a̰ gə̄ 35

Jakob ḭḭ Sisem aw̄ Betel

1Ndɔ̄ kógə̄ḿ tə́ Nə́ɓā əda Jakob na:

Ḭ́ḭ dɔɔ́ āw̄ Betel, āw̄ ɔ́y kūbə̄rū mbal̄ gə̄ ī-tə́ndā dɔ naā tə́ ī-rāā *loo tun̄ yá̰á̰ tə́ ādə̄m̄. Kété dan ń ā ā̰yń ngōkó̰ó̰í Esau ní, m̄-ndɔ̄bī i loo ń noō tə́.

2Jakob əda de kə́ kújú gōn tə́ gə̄ ō, de gə̄ ń seneé malang ní ō na:

Ī-ró̰yī ɓesə̄ gə̄ ń i nə́ɓā kə́ tə̄rā gə̄ ní dɔ dáńsí tə́ kɔ̄ɔ́. Ī-rāāī yá̰á̰ kə́ yā kunəń majaĺ ń tákə̄sí ní kɔ̄ɔ́ ō, ī-tə́laī kūbə̄ kə́ rang gə̄ rɔ̄sí tə́ ō. 3J-a j-awī Betel yā kadə̄ m-ā m̄-rāā *loo tun̄ yá̰a̰ noó tām̄ yā Nə́ɓā ń ndɔ̄bə̄m̄ ɔr̄ najə̄ seḿ ndɔ̄ wur kɔl yāḿ tə́ ní ō, i naā tə́ seḿ dan ń mā m̄-njə̄rań mbā tə́ ní ō.

4Nin̄ adə̄n̄ Jakob ɓesə̄ yādə́ gə̄ ní malang ō, nə̄ngá kə́ mbīdə́ gə̄ tə́ ō, adə̄ Jakob ndēr̄ bəlo ɓɔ̄ɔń gír kāgə̄ kə́ bo ń ra kadə ɓē kə́ Sisem tə́ ní, 5ba ndɔ́tə̄n̄ ɓē aw̄n̄. Nə́ɓā rāā adə̄ ɓōĺ kə́ ngá̰ý əsō kem ɓē gə̄ ń gīrə̄n̄ gidədə́ tə́ ní, adə̄ de kə́ ngɔ̄də̄ gō ngán Jakob gə̄ gətóo.

6Jakob ō, de gə̄ ń seneé malang ní ō, reēn̄ ugə̄n̄ Lujə ń i Betel ní, dɔ nang kə́ Kanaan tə́. 7Ni rāā *loo tun̄ yá̰a̰ ba əndā rī dɔ tə́ na i Nə́ɓā kə́ Betel, tām̄ dan ń a a̰ȳń ngōkó̰o̰n kété ní, Nə́ɓā ndɔ̄bə̄n i loo ń noō tə́.

8Debora nge kətō Rebeka, oy adə̄ dubə̄nən̄ kadə Betel tə́, gír kāgə̄ séń kógə̄ḿ tə́. Jakob əndā rī kāgə̄ ní na i kāgə̄ nōō.

9Dan ń Jakob tél Mesopotami#35.9 Mesopotami: Á̰a̰ī Tkg 24.10 ní Nə́ɓā ndɔ̄bə̄n, əda najə̄ kə́ majə dɔn tə́. 10Nə́ɓā ədan:

Rīí na i Jakob, ba a ɓāríīn̄ na i Jakob to̰ alé, a ɓāríīn̄ na i *Israel.

Adə̄ Nə́ɓā əndā rīn na i Israel, 11ba əda na:

Mā i Nə́ɓā kə́ bo kə́ tɔ́gə́ḿ i ngá̰ý. M-ā m-ādī ngán gə̄ ngá̰ý adə̄ ā ī-tél kaa nápar de kə́ ngá̰ý gə̄ ō, kaa de kə́ gíŕ nápar de kə́ ngá̰ý gə̄ ō. Ā ī-tél kaa mban̄g gə̄. 12Dɔ nang ń m-ādə̄ Abəraham ō, Isaak ō, kété ní, m-ādī ō, m-ā m-ādə̄ ngán kaaí gə̄ gotií tə́ ō.

13Gō tə́ anī Nə́ɓā əya̰n loo ń ɔr̄ najə̄ seneé tū tə́ tə́ ní ba aw̄. 14Jakob udə mbal̄ loo ní tə́, tə́te kasə *nduú dɔ tə́ ō, *ur yibə̄ dɔ tə́ ō, 15ba əndā rīn na i Betel, kumən na i kújə yā Nə́ɓā.

Rasel ojə Benjamḛ ba oy tan tə́

16Jakob nin̄ kə deē yān gēé ḭḭn̄ Betel a aw̄n̄ kə̄ Epərata. Na̰yn̄ kə̄ róbó ɓáý anī, Rasel ojə, ba kojə ní tá tōr̄ rɔ̄n ngá̰ý. 17Dan ń rāā kem tōr̄ rɔ̄ Rasel ngá̰ý anī, dəyá̰ kə́ nge taā ngōn̄ ədan na kə lōō ɓōĺ, na a ojə na i ngōn̄ kə́ dəngam ɓáý to̰. 18Rasel to i kə̄ ta yo tə́, ba loo ń koōn a rāā yā teē anī, əndā rī ngōn̄ ní na i Ben Oni, kumən na i ngōn̄ no kisə. Banī Jakob ɓāŕ ngōn̄ ní na i Benjamḛ, kumən na i ngōn̄ jī ko̰ḿ. 19Rasel oy adə̄ dubə̄nən̄ róbə́ kə́ ta kaw̄ kə̄ Epərata ń i Betlehem ní tə́. 20Jakob udə mbal̄ dɔ ɓádən tə́. Ɓōólaā gə̄gē a ɓārə́n̄ mbal̄ ní na i mbal̄ kə́ dɔ ɓádə Rasel tə́.

21*Israel aw̄ əndā ɓē yān gidə Migədal Eder tə́. 22Ndin̄ kə̄ noó anī Ruben aw̄ ɓīī kə Bila də̄yá̰ gidə ndogə̄ yā bɔbə̄neé, adə̄ bɔbə̄n Israel oō najə̄ ní.

Ngán Jakob gə̄ i kutə gidə i jōó. 23Ngán Lea gə̄ n toó: Ruben hágə Jakob ō, Simeo̰ ō, Lebi ō, *Juda ō, Isakar ō, Jabulo̰ ō. 24Ngán Rasel gə̄ n toó: Jəjep ō, Benjamḛ ō. 25Ngán Bila nge kəla kə́ dəyá̰ yā Rasel gə̄ n toó: Dan ō, Nepətali ō. 26Ngán Silpa nge kəla kə́ dəyá̰ yā Lea gə̄ n toó: Gad ō, Aser ō. Ngán Jakob gə̄ ń ojədə́ Mesopotami#35.26 Mesopotami: Á̰a̰ī Tkg 24.10 ní n noó.

27Jakob ugə̄ rɔ̄ bɔbə̄n Isaak tə́ Mamre, kadə Kiryat Arba ń a ɓārə́n̄ na i Hebron ní tə́. I loo ń Abəraham ō, Isaak ō, ndin̄ tū tə́ kété ní. 28Isaak rāā ɓāl̄ ɓú kə kutə sɔ́sɔ́ 29tá kadə̄ oy. Tɔgə ɓə́gá ngá̰ý pá tá kadə̄ oy aw̄ gō kaan gə̄ tə́ ɓáý. Esau ō, Jakob ō ń i ngánən gə̄ ní dubə̄nən̄.

Currently Selected:

Ta Kəla gír yá̰a̰ gə̄ 35: BS

Highlight

Copy