Ndū najə̄ yā Ngán Lebi gə̄ 15
15
De kə́ dəngam kə́ yḛr
1Kɔ́ɔ̄ɓē mēr̄ Moijə nin̄ kə *Aaro̰ 2kəda ngán *Israel gə̄ ndū najə̄ gə̄ ń toó:
Dəngam ń mo̰y bájal rāān ní, wī rāā adə̄ ni i de kə́ yḛr. 3Ká ré wī ní də̄yā̰ rɔ̄n tə́ ndágá aké kuĺ kemən tə́ gə̄gē anī, ni i de kə́ yḛr. 4Adə̄ tə̄rá malang ń ni a to kemeé ní a tél tə̄rá kə́ yḛr ō, yá̰a̰ malang ń ni a ndi dɔ tə́ ní a tél yá̰á̰ kə́ yḛr ō. 5Deē ń a ɔdə tə̄rá yān ní, kɔ́ɔ̄ a tə́go kūbə̄ yān gə̄ ō, a ndogə̄ man̄ ō, a tél de kə́ yḛr bátə́ loo tíbə dɔn tə́ ō. 6Deē a ndi dɔ yá̰á̰ ń ni-ndi dɔ tə́ kété ní a tə́go kūbə̄ yān gə̄ ō, a ndogə̄ man̄ ō, a tél de kə́ yḛr bátə́ kadə̄ loo tíbə dɔn tə́ ō. 7Deē ń a ɔdə rɔ̄n ní a tə́go kūbə̄ yān gə̄ ō, a ndogə̄ man̄ ō, a tél de kə́ yḛr bátə́ kadə̄ loo tíbə dɔn tə́ ō. 8Ré nge mo̰y ní tíbə̄ hōr̄ dɔ deē kógə̄ḿ kə́ *unjə̄ njáý njáý tə́ anī, deē ní a tə́go kūbə̄ yān gə̄ ō, a ndogə̄ man̄ ō, a tél de kə́ yḛr bátə́ loo tíbə dɔn tə́ ō. 9Síŕdí malang ń ni a ndi dɔ tə́ ní a téĺ síŕdí kə́ yḛr. 10Deē ń a ɔdə rɔ̄ yá̰á̰ ń ni-əndā gírən dɔ tə́ ní, kɔ́ɔ̄ a tél de kə́ yḛr bátə́ kadə̄ loo tíbə dɔn tə́ ō, deē ń a ətō yá̰á̰ ń ni-əndā gírən dɔ tə́ ní, kɔ́ɔ̄ a tə́go kūbə̄ yān gə̄ ō, a ndogə̄ man̄ ō, a tél de kə́ yḛr bátə́ kadə̄ loo tíbə dɔn tə́ ō. 11Deē ń nge mo̰y bájal ɔdə rɔ̄n kə jīn kə tə́go aĺ ní, kɔ́ɔ̄ a tə́go kūbə̄ yān gə̄ ō, a ndogə̄ man̄ ō, a tél de kə́ yḛr bátə́ kadə̄ loo tíbə dɔn tə́ ō. 12Jóó nánjə́ ń nge mo̰y bájal ɔdə rɔ̄ ní i yā tɔ̄ɔ̄ kɔ̄ɔ́ ō, bugə̄rū ń ni ɔdə rɔ̄ ní i yā tə́go kə maná kɔ̄ɔ́ ō.
13Ré gír wī kə́ rɔ̄ nge mo̰y bájal ní tə́ gān̄g anī, ni a ngóō ndɔ̄ sīrí pá tá a tél de kə́ majaĺ tákə̄n to̰ alé. A tə́go kūbə̄ yān gə̄ ō, a ndogə̄ rɔ̄n kə man̄ kə́ əɓa nang tə́ ō. Loo ń noō tə́ ni i de kə́ majaĺ tákə̄n to̰ alé. 14Kə ndɔ̄ kə́ nge ko̰ sɔ́sɔ́ anī, ni a əhɔ dér gutə gə̄ jōó aláa dér dum gə̄ jōó yā kaw̄ń ta *kújə kənge naā tə́, 15kadə̄ *nge tun̄ yá̰a̰ a tun̄ kə́ kógə̄ḿ tām̄ yā majaĺ tə́ ō, a róō kə́ noō horoó yā kadə̄ Kɔ́ɔ̄ɓē ō. Gō tə́ anī a rāā yá̰á̰ kə́ yā kutə̄ń dɔ majaĺ yā deē ní ta kum Kɔ́ɔ̄ɓē tə́ tām̄ mo̰y bájal ń rāān tə́ ní.
16De kə́ dəngam ń manə̄n teē rɔ̄n tə́ ní, kɔ́ɔ̄ a ndogə̄ man̄ ō, tél de kə́ yḛr bátə́ loo tíbə dɔn tə́ ō. 17Kūbə̄, aké ngə̄rā ń manə̄n ɔdə ní, ni a tə́go kɔ̄ɔ́ ō, a tél yá̰á̰ kə́ yḛr bátə́ kadə̄ loo tíbə dɔ tə́ ō.
18Ré dəyá̰ nin̄ kə dəngameé ɓīīn̄ kə naá anī, nin̄ jōó mbak a ndogə̄n̄ man̄ ō, a télən̄ de gə̄ kə́ yḛr bátə́ kadə̄ loo tíbə dɔdə́ tə́ ō.
Majaĺ kə́ tákə̄ de kə́ dəyá̰
19Dəyá̰ ń mósə əhɔn ní a tél dəyá̰ kə́ yḛr ndɔ̄ sīrí. Deē ń a ɔdə rɔ̄n ní a tél de kə́ yḛr bátə́ loo tíbə dɔn tə́. 20Tə̄rá ń ni to kemeé dan ń mósə rāānəń tə́ ní a tél tə̄rá kə́ yḛr ō, yá̰a̰ malang ń ni-ndi dɔ tə́ ní a téĺ yá̰á̰ kə́ yḛr ō. 21Deē ń a ɔdə tə̄rá yān ní a tə́go kūbə̄ yān gə̄ ō, a tél de kə́ yḛr bátə́ kadə̄ loo tíbə dɔn tə́ ō. 22Deē ń ɔdə yá̰á̰ ń ni-ndi dɔ tə́ ní a tə́go kūbə̄ yān gə̄ ō, a ndogə̄ man̄ ō, a tél de kə́ yḛr bátə́ kadə̄ loo tíbə dɔn tə́ ō. 23Deē ń a ɔdə rɔ̄ yá̰á̰ kə́ to kem tə́rá ń ni to kemeé tə́ ní, aké a ɔdə rɔ̄ yá̰á̰ kə́ to dɔ yá̰á̰ ń ni-ndi dɔ tə́ tə́ ní, a tél de kə́ yḛr bátə́ loo tíbə dɔn tə́. 24Dəngam ń ɓīī seneé dan ń mósə əhɔnəń tə́ ní, majaĺ ń tákə̄n ní a tákə̄ dəngam ní ō, adə̄ a tél de kə́ yḛr ndɔ̄ sīrí ō, tə́rá ń ni to kemeé ní a tél tə̄rá kə́ yḛr ō.
25Dəyá̰ ń ndɔ̄ mósə yān ugə̄ aĺ ɓáý ba mósə teē rɔ̄n tə́ rāā ndɔ̄ asə tām̄, aké dəyá̰ ń ndɔ̄ mósə ugə̄, ba mósə ní əhɔn adə̄ mān̄ dɔ ndɔ̄ kə́ kété gə̄ ní, ni i dəyá̰ kə́ yḛr bátə́ kadə̄ gíŕ mósə gāngəń. Ni i dəyá̰ kə́ yḛr tītə̄ kə́ kété ń mósə rāānəń ní. 26Tə̄rá malang ń ni a to kemeé, aké yá̰a̰ malang ń ni a ndi dɔ tə́ ní, a tél yá̰á̰ kə́ yḛr tītə̄ kə́ ndɔ̄ gə̄ ń mósə rāānəń tə́ ní. 27Deē ń a ɔdə rɔ̄ tə̄rá, aké rɔ̄ yá̰á̰ ń ni-ndi dɔ tə́ ní, a tə́go kūbə̄ yān gə̄ ō, a ndogə̄ man̄ ō, a tél de kə́ yḛr bátə́ kadə̄ loo tíbə dɔn tə́ ō.
28Ré gíŕ mósə ní gān̄g anī dəyá̰ ní a rāā ndɔ̄ sīrí pá tá a tél dəyá̰ kə́ yḛr to̰ alé. 29Kə ndɔ̄ kə́ nge ko̰ sɔ́sɔ́ anī, ni a əhɔ dér gutə gə̄ jōó, aláa dér dum gə̄ jōó, yā reēń ta *kújə kənge naā tə́ kadə̄ *nge tun̄ yá̰a̰. 30Nge tun̄ yá̰a̰ á tun̄ kə́ kógə̄ḿ tām̄ yā majaĺ tə́ ō, a róō kə́ noō horoó ta kum Kɔ́ɔ̄ɓē tə́ tām̄ mósə ń rāān adə̄ tél de kə́ yḛr ní.
31Ré ngán *Israel gə̄ télən̄ de kə́ yḛr gə̄ anī, ā ɔ̄gīdə́ kudə kem loo ndi yāḿ ń ra dɔ dáńdə́ tə́ ní, na sōgə́ oyn̄ tām̄ nin̄ i de kə́ yḛr gə̄. Tɔdɔ̄ ré nin̄ rāān̄ adə̄ loo ndi yāḿ tél loo kə́ yḛr anī, a oyn̄.
32*Ndū najə̄ kə́ dɔ de kə́ dəngam ń bájal rāān tə́, aké manə̄n teē rɔ̄n tə́ ní ō, 33dɔ de kə́ dəyá̰ ń mósə əhɔn tə́ ní ō, dɔ de kə́ dəngam ń ɓīī kə dəyá̰ kə́ majaĺ tákə̄n tə́ ní ō n noó.
Currently Selected:
Ndū najə̄ yā Ngán Lebi gə̄ 15: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad