Ndū najə̄ yā Ngán Lebi gə̄ 16
16
Ndɔ̄ kə́ bo kə́ Kɔ́ɔ̄ɓē a ma̰ȳń rɔ̄n dɔ majaĺ gə̄ tə́
1Gō yo ngán *Aaro̰ kə́ jōó gə̄#16.1 Yo ngán Aaro̰ kə́ jōó gə̄: Á̰a̰ī najə̄ kə́ dɔ tə́, Leb 10.1-2 ń aw̄n̄ ta kum Kɔ́ɔ̄ɓē tə́ ní, Kɔ́ɔ̄ɓē əda Moijə na:
2Ə́da ngōkó̰ó̰í Aaro̰ na kə lōō kudə kə̄ noó kem *loo kə́ táĺ ngá̰ý ń *sandúkə ndū najə̄ gə̄ ō, yá̰a̰ tan ō, i tū tə́ á gāngə̄n̄ gír kə kūbūú ní, na sōgə́ a oy loo ń m-ā m̄-teē tū yá̰á̰ kə́ tītə̄ kil̄ man̄#16.2 Yá̰á̰ kə́ tītə̄ kil̄ man̄: Á̰a̰ī najə̄ kə́ dɔ tə́, Teē 13.21, 33.9, 40.36 tə́ dɔ ta sandúkə tə́ ní.
3Yá̰a̰ gə̄ ń Aaro̰ a rāā tá a udə kem *loo kə́ táĺ ngá̰ý tə́ ní n toó: A əhɔ man̄g kə́ bəra kə́ yā tun̄ tām̄ yā majaĺ tə́ ō, bal batə̄ kə́ yā róō horoó kadə̄ Kɔ́ɔ̄ɓē ō. 4A əla kūbə̄ *lḛ́ḛ́ kə́ ngāl̄ rɔ̄n tə́ ō, kə́ gíndə̄ gírən tə́ ō, a do̰ō̰ ɓōdə̄n kə kəlā *lḛ́ḛ ō, a ənda dɔn kə kūbə̄ *lḛ́ḛ ō. I kūbə̄ kə́ yā ɓōĺ gidə gə̄, adə̄ a ndogə̄ man̄ pá tá a tə́ládə́ rɔ̄n tə́. 5Ngán Israel gə̄ malang a adə̄nən̄ bal bə̄yā̰ gə̄ jōó kadə̄ tun̄ tām̄ yā majaĺ tə́ ō, a adə̄nən̄ bal batə̄ kógə̄ḿ kə́ yā róō horoó kadə̄ Kɔ́ɔ̄ɓē ō.
6*Aaro̰ a tɔ̄l̄ man̄g kə́ bəra ní yā tun̄ tām̄ yā majaĺ yān nəkɔ́ tə́ ō, a rāā yá̰á̰ kə́ yā kutə̄ń dɔ majaĺ yān ō, yā de gə̄ kə́ kem kújə yān tə́ ō. 7A aw̄ kə bal bə̄yā̰ kə́ jōó gə̄ ní no Kɔ́ɔ̄ɓē tə́ ta *kújə kənge naā tə́. 8Aaro̰ a túgə̄ wə̄lā dɔ bal bə̄yā̰ kə́ jōó gə̄ ní tə́. Nge kə́ ta kəga dɔ i tām̄ yā Kɔ́ɔ̄ɓē tə́ ō, kə́ nge ko̰ jōó i tām̄ yā *Ajajel tə́ ō. 9Bal bə̄yā̰ ń wə̄lā kə́ túgə̄ tām̄ yā Kɔ́ɔ̄ɓē tə́ əhɔ ní, Aaro̰ a əhɔ yā tun̄ tām̄ yā majaĺ tə́. 10Ba bal bə̄yā̰ ń wə̄lā kə́ túgə̄ tām̄ yā *Ajajel tə́ əhɔ ní, a udənən̄ kə kumuú no Kɔ́ɔ̄ɓē tə́ yā rāā yá̰a̰ kutə̄ dɔ majaĺ dɔn tə́ ō. A aw̄n̄ seneé kem loo kə mángá tə́ yā kadə̄n kə Ajajel ō.
11*Aaro̰ a reē kə man̄g kə́ bəra kə́ tām̄ yā majaĺ tə́ ní. Gō tə́ anī rāā yá̰á̰ kə́ yā kutə̄ń dɔ majaĺ yān ō, yā de gə̄ kə́ kem kújə yān tə́ ō, ba a əja kɔ́ɔ man̄g ní. 12Ni a ɔy yā̰l̄ hor kə́ dɔ *loo róō ndujə̄ yá̰á̰ kə́ kotə majə ń ra no Kɔ́ɔ̄ɓē tə́ ní, kadə̄ rosə kem ganán ō, a ɔy kajaja kem jīn jōó ō, ba a udəń kem *loo kə́ táĺ ngá̰ý ń gāngə̄n̄ gír kə kūbūú ní. 13A ɓōkə́ kajaja kum yā̰l̄ hor ní tə́ ta kum Kɔ́ɔ̄ɓē tə́ kadə̄ san, utə̄ dɔ yá̰a̰ ta *sandúkə ndū najə̄ gə̄. Ré rāā beé anī a oy alé. 14Ni a əla ta ngōn̄ jīn kum mósə man̄g kə́ bəra ní tə́, ba a sə̄kā kadə yá̰a̰ ta sandúkə́ ní tə́ dām̄ kə́ gír ɓē tə́ ō, a sə̄kā nja sīrí non tə́ ō. 15A əja kɔ́ɔ bal bə̄yā̰ kə́ tun̄ tām̄ yā majaĺ yā ngán *Israel gə̄ tə́ ní ō, a reē kə mósəneé kem *loo kə́ táĺ ngá̰ý ń gāngə̄n̄ gír kə kūbūú tə́ ní ō. I yá̰á̰ ń ni rāā kə mósə mangá ní n a rāā kə mósə bal bə̄yā̰á̰ ní. Ni a sə̄kā mósə́ ní dɔ yá̰a̰ ta sandúkə́ tə́ ō, non tə́ ō.
16Ni a rāā yá̰á̰ kə́ yā kutə̄ń dɔ majaĺ dɔ *loo kə́ táĺ ngá̰ý tə́, tɔdɔ̄ majaĺ kə́ dɔ ngán Israel gə̄ tə́ ō, yá̰á̰ kə́ gōtə́ aĺ gə̄ ń nin̄ rāān kə gō dum̄ naā yādə́ ō ní, rāā adə̄ *loo kə́ táĺ ngá̰ý tél loo kə́ yḛr. Ni a rāā tītə̄ ń noō tām̄ yā *kújə kənge naā ń ra dɔ dáńdə́ tə́ kum majaĺ ń rāādə́ adə̄ télən̄ de kə́ yḛr gə̄ tə́ ní ō. 17Dan ń ni udə kem *loo kə́ táĺ ngá̰ý tə́ yā rāā yá̰á̰ kə́ yā kutə̄ń dɔ majaĺ ní, deē a gətóo kem *kújə kənge naā tə́ bátə́ kadə̄ ni a teēń ndágá. A rāā yá̰á̰ kə́ yā kutə̄ń dɔ majaĺ yān nəkɔ́ ō, yā de gə̄ kə́ kem kújə yān tə́ ō, yā ngán *Israel gə̄ malang ō.
18A teē kem *kújə kənge naā tə́ yā kaw̄ rāā yá̰á̰ kə́ yā kutə̄ń dɔ majaĺ dɔ *loo tun̄ yá̰á̰ ń ra ta kum Kɔ́ɔ̄ɓē tə́ ní. A ɔdə mósə man̄g kə́ bəra ní ō, mósə bal bə̄yā̰ ní ō, yā rāā ta gajə gə̄ kə́ dɔ *loo tun̄ yá̰á̰ ní tə́. 19A əla ta ngōn̄ jīn kum mósə́ ní tə́ yā sə̄kā nja sīrí dɔ tə́ yā kɔrə̄ń majaĺ yā ngán *Israel gə̄ kə́ dɔ tə́ kɔ̄ɔ́ ō, yā kɔrə̄ń kam̄ *loo tun̄ yá̰á̰ ní tām̄ yā Nə́ɓā tə́ ō.
20Ré *Aaro̰ rāā yá̰á̰ kə́ yā kutə̄ń dɔ majaĺ kə́ tām̄ yā *loo kə́ táĺ ngá̰ý tə́ ō, *loo kə́ táĺ tə́ ō, *loo tun̄ yá̰á̰ tə́ ō oy anī, ni a adə̄ a reēn̄ kə bal bə̄yā̰ kə́ kə kumuú ní. 21Aaro̰ a əndā jīn jōó mbak dɔ bal bə̄yā̰ kə́ kə kumuú ní tə́ ō, a ɔr̄ gír kə dɔ ngan̄g gə̄ kə yá̰á̰ kə́ rāā gōtə́ aĺ gə̄ yā ngán *Israel gə̄ ní malang ō, kadə̄ nayn̄ dɔ bə̄yā̰ ní tə́. Gō tə́ anī ni a adə̄n kə deē ń ndi kə ríí ní kadə̄ aw̄ seneé kem dəla loo tə́.
22Bal bə̄yā̰ ní a ɔy yá̰á̰ kə́ gōtə́ aĺ gə̄ malang ń ngán Israel gə̄ rāān̄ ní dɔn tə́ yā kaw̄ń dɔ nang kə́ teē aĺ tə́.
Dan ń Aaro̰ əla kə bal bə̄yā̰ ní dəla loo tə́ oy anī, 23a tél yā kudə gogə́ kem *kújə kənge naā tə́ yā kɔr̄ kūbə̄ *lḛ́ḛ́ ń əla rɔ̄n tə́ udəń kem *loo kə́ táĺ ngá̰ý tə́ ní. A əya̰ kūbə̄ ní kə̄ noó. 24A ndogə̄ man̄ kem loo kógə̄ḿ kə́ táĺ tə́ ba a tə́la kūbə̄ yān kə́ kété gə̄ gogə́ rɔ̄n tə́. A teē ndágá yā kaw̄ róō dā̰ kógə̄ḿ tām̄ yān nəkɔ́ tə́ ō, kógə̄ḿ tām̄ yā ngán *Israel gə̄ tə́ ō, yā kadə̄ Kɔ́ɔ̄ɓē. A rāā yá̰á̰ kə́ yā kutə̄ń dɔ majaĺ tām̄ yān nəkɔ́ tə́ ō, tām̄ yā ngán Israel gə̄ tə́ ō. 25A róō yibə̄ dā̰ gə̄ ń ni tun̄ tām̄ yā majaĺ tə́ ní dɔ *loo tun̄ yá̰á̰ tə́.
26Nge tə̄ɓā bə̄yā̰ dəla loo tə́ ní a tə́go kūbə̄ yān gə̄ ō, a ndogə̄ man̄, pá tá a udə kem ɓēé ɓáý. 27Man̄g kə́ bəra kə́ tām yā majaĺ tə́ ō, bal bə̄yā̰ kə́ tām̄ yā majaĺ tə́ ō ń aw̄n̄ kə mósə́də́ kem loo kə́ *táĺ ngá̰ý tə́ ní, a ɔyn̄də́ yā kaw̄ sedə́ gidə ɓē tə́ ndágá, yā kaw̄ róō ngə̄rādə́ ō, dā̰də́ ō, yedə̄də́ ō, kum hor tə́. 28Deē ń a róōdə́ ní, kɔ́ɔ̄ a tə́go kūbə̄ yān gə̄ ō, a ndogə̄ man̄ ō, pá tá a udə kem ɓēé.
29*Ndū najə̄ kə́ a to ngándáńg tām̄ yāsí tə́ n toó: Kə ndɔ̄ kə́ nge ko̰ kutə yā nāā kə́ nge ko̰ sīrí, ndɔ̄ ń noō tə́ ní ngán ngé ɓē gə̄ gə̄gē, tə̄rā gə̄ kə́ ngé nam̄ gə̄ ń ndin̄ dɔ dáńsí tə́ ní gə̄gē, ā ī-*ndi ɓō tām̄ yā Nə́ɓā tə́ ō, a ī-rāāī kəla aĺ ō.
30Tɔdɔ̄ i ndɔ̄ ń noó tə́ n a rāānəń yá̰á̰ kə́ yā kutə̄ń dɔ majaĺ yāsí kadə̄ ūnjīiń njáý njáý ní. Majaĺ yāsí gə̄ malang a gətóon̄ dɔsí tə́ kɔ̄ɔ́ ta kum Kɔ́ɔ̄ɓē tə́. 31Ā ī-rāāī ndɔ̄ ń noō i ndɔ̄ *sabat ń ā ī-*ndiī ɓō tām̄ yā Nə́ɓā tə́ ní. Nge ń noō i ndū najə̄ kə́ a to ngándáńg.
32I *nge tun̄ yá̰a̰ ń urən̄ yibə̄ dɔn tə́ yā kəndānəń kem kəla tun̄ yá̰á̰ tə́ gotə bɔbə̄n tə́ ní n a rāā yá̰á̰ kə́ yā kutə̄ń dɔ majaĺ ní. Ni-əla kūbə̄ *lḛ́ḛ gə̄ ń i kūbə̄ kə́ yā ɓōĺ gidə gə̄ ní rɔ̄n tə́ 33yā rāań yá̰á̰ kə́ yā kutə̄ń dɔ majaĺ kə́ kem *loo kə́ táĺ ngá̰ý tə́ ō, *loo kə́ táĺ tə́ ō, kə́ dɔ *loo tun̄ yá̰á̰ tə́ ō, yā rāań yá̰á̰ kə́ yā kutə̄ń dɔ majaĺ yā *nge tun̄ yá̰a̰ gə̄ ō, yā ngán Israel gə̄ ń kánə̄n̄ naā ní ō.
34Nge ń noō i ndū najə̄ kə́ a to ngándáńg tām̄ yāsí tə́. Ā ī-rāāī yá̰á̰ ń ndū najə̄ ń toō əda ní nja kógə̄ḿ kə dɔ ɓāl̄ gə̄, yā kutə̄ń dɔ majaĺ gə̄ malang ń ngán Israel gə̄ rāān̄ ní.
*Aaro̰ rāā yá̰a̰ malang ń Kɔ́ɔ̄ɓē əda Moijə ní.
Currently Selected:
Ndū najə̄ yā Ngán Lebi gə̄ 16: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad