Ndū najə̄ yā Ngán Lebi gə̄ 21
21
Ndū najə̄ gə̄ kə́ tām̄ yā ngé tun̄ yá̰a̰ gə̄ tə́
1. Háĺdə́ kə́ kem kújú ɓēé
1Kɔ́ɔ̄ɓē mēr̄ Moijə kəda *ngé tun̄ yá̰a̰ gə̄ ń i ngán *Aaro̰ gə̄ ní ndū najə̄ gə̄ ń toō:
De kə́ *nge tun̄ yá̰a̰ a aw̄ rɔ̄ nīń ngeen deē tə́ alé na sōgə́ tél de kə́ yḛr. 2Ba ré i ngeen kə́ ngɔr ngá̰ý tītə̄ kó̰o̰n, aláa bɔbə̄n, aláa ngōnən, aláa ngōkó̰o̰n kə́ dəngam, tá ni a aw̄ rɔ̄ nīńdə́ tə́. 3Ni a tél de kə́ yḛr tām̄ yā nīń ngōkó̰o̰n kə́ dəyá̰ kə́ taā dəngam aĺ ɓáý tə́ karī, tɔdɔ̄ ngōkó̰o̰n kə́ dəyá̰ ní i yā de kə́ rang alé, ba ni i yā ngéén gə̄ ɓáý. 4Nge tun̄ yá̰a̰ i ngār dan deē yān gə̄ tə́, adə̄ a rāā kadə̄ ni a tél de kə́ yḛr alé, na sōgə́ tél de kə́ karī.
5Ngé tun̄ yá̰a̰ gə̄ a dəsān̄ dɔdə́ ō, mbāýdə́ kə́ mbɔ́ŕdə́ gə̄ tə́ ō, a əndān̄ tə́re rɔ̄də́ tə́ ō, loo yo tə́ alé. 6A ɔrə̄n̄ kam̄də́ tām̄ yā Nə́ɓā yādə́ tə́ ō, nujə̄n rīn aĺ ō. Ādə̄ nin̄ i de kə́ táĺ gə̄, tām̄ i nin̄ ń i ngé ndējə̄ Kɔ́ɔ̄ɓē *yá̰a̰ tun̄ gə̄ ń i yá̰a̰ kəsa yā Nə́ɓā yādə́ ní.
7A taān̄ dəyá̰ ájə́ba aĺ ō, dəyá̰ kə́ dəngam ɓīī seneé əlań rɔ̄sɔl̄ dɔn tə́ aĺ ō. A taān̄ dəyá̰ kə́ ngaan mbātə́n aĺ ō, tɔdɔ̄ *nge tun̄ yá̰a̰ i de kə́ ɔrə̄n̄ kamə̄n tām̄ yā Nə́ɓā yān tə́. 8Ā ī-rāā *nge tun̄ yá̰a̰ i de kə́ táĺ tə́ tām̄ i ni n i nge kadə̄ Nə́ɓā yāí *yá̰a̰ ndējə̄ ní. Ā ī-rāān i de kə́ táĺ tə́, tām̄ mā Kɔ́ɔ̄ɓē nge kɔr̄ kam̄sí ní mā i de kə́ táĺ.
9Ré ngōn̄ *nge tun̄ yá̰a̰ rāā ájə́ba əlań rɔ̄sɔl̄ dɔ rɔ̄n tə́ anī, əla rɔ̄sɔl̄ i dɔ bɔbə̄n tə́, adə̄ a róōnən̄ horoó kɔ̄ɔ́.
10Ngol *ngé tun̄ yá̰a̰ gə̄ ń urən̄ *yibə̄ kə́ táĺ dɔn tə́ ō, əndānən̄ kə rī rāā kəla yā Nə́ɓāá ō, əlan̄ kūbə̄ kə́ *táĺ gə̄ rɔ̄n tə́ ō ní, a əya̰ nənga dɔn kadə̄ to gususu aĺ ō, a *rə́yā̰ kūbə̄ kə́ rɔ̄n tə́ aĺ ō. 11A aw̄ dɔ nīń deē tə́ alé. A aw̄ dɔ nīń bɔbə̄n tə́ aĺ ō, dɔ nīń kó̰o̰n tə́ aĺ ō, na sōgə́ ni tél de kə́ yḛr. 12A teē kɔ̄ɔ́ *loo kə́ táĺ tə́ alé, na sōgə́ ní ń urən̄ *yibə̄ kə́ táĺ yā Nə́ɓā yān dɔn tə́ ní rāā adə̄ *loo kə́ táĺ yā Nə́ɓā yān tél loo kə́ karī. Mā i Kɔ́ɔ̄ɓē.
13Ni a taā i dəyá̰ kə́ ger̄ dəngam aĺ ɓáý. 14A taā dəyá̰ kə́ ngaa koy aĺ ō, kə́ ngaan mbātə́n aĺ ō, kə́ rāā ájə́ba əlań rɔ̄sɔl̄ dɔ rɔ̄n tə́ aĺ ō, banī a taā ngōn̄ kə́ mandə kə́ dan gír deē yān gə̄ tə́. 15Na sōgə́ reē kə dəyá̰ kə́ gír kaa de kə́ karī tə́ əlan dan de gə̄ kə́ gír kojə yān tə́. Mā i Kɔ́ɔ̄ɓē, nge kɔr̄ kamə̄n.
2. Yá̰á̰ kə́ ɔgə̄ teē nge tun̄ yá̰a̰
16Kɔ́ɔ̄ɓē mēr̄ Moijə 17kəda *Aaro̰ ndū najə̄ gə̄ ń toō:
18De kə́ nujə kə́ gír kojə yāí tə́ a reē ta *loo tun̄ yá̰á̰ tə́ yā ndējə̄ yá̰a̰ kəsa yā Nə́ɓā yān dɔ tə́ alé. I ndū najə̄ kə́ a to kə dɔ ɓāl̄ gə̄. Nge nja motə ō, de kə́ kɔ́nən laa mbo ō, kə́ loon kə́rēý ngāl̄ tɔȳ madə̄ gə̄ ō, a reē ta *loo tun̄ yá̰á̰ tə́ alé.
19De kə́ njan tetə, aláa jīn tetə, 20de kə́ rugə ō, kə́ dūú njéḿ njéḿ ō, kə́ kumən əɓa ō, kə́ kur əsan ō, kə́ mo̰y rāā ndārə́n ō, *áji mbang i de kə́ ɔrə̄n̄ gumə̄n kɔ̄ɔ́. ō ń,
21i de kə́ nujə kə́ gír kaa yā Aaro̰ nge tun̄ yá̰á̰ tə́ ní, a reē ta *loo tun̄ yá̰á̰ tə́ yā ndējə̄ yá̰a̰ kəsa yā Nə́ɓā yān dɔ tə́ alé. 22Ni a asə kəsa yá̰a̰ yā Nə́ɓā yān gə̄ ń i yá̰á̰ kə́ táĺ ngá̰ý gə̄ ō, i yá̰á̰ kə́ táĺ gə̄ ō ní karī.
23Ba ni asə kaw̄ kugə̄ rɔ̄ kūbə̄ ń gangnən gír *loo kə́ táĺ yā Nə́ɓā tə́ aĺ ō, kugə̄ ta *loo tun̄ yá̰á̰ tə́ aĺ ō, na sōgə́ ni-rāā adə̄ *loo kə́ táĺ yāḿ ō, yá̰á̰ kə́ kemeé gə̄ ō, télən̄ yá̰á̰ kə́ karī gə̄ tām̄ ni i de kə́ nujə. Tɔdɔ̄ mā i Kɔ́ɔ̄ɓē nge kɔr̄ kam̄ *ngé tun̄ yá̰a̰ gə̄.
24Moijə tél kə najə̄ gə̄ ní əda Aaro̰ ō, ngánən gə̄ ō, ngán *Israel gə̄ malang ō.
Currently Selected:
Ndū najə̄ yā Ngán Lebi gə̄ 21: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad