Ndū najə̄ yā Ngán Lebi gə̄ 22
22
3. Yá̰á̰ kə́ ɔgə kəsa yá̰á̰ kə́ ndējə̄ gə̄
1Kɔ́ɔ̄ɓē əda Moijə na:
2Ɔ́jə *Aaro̰ ō, ngánən gə̄ ō, yá̰a̰ gə̄ ń a ɔgə̄n̄də́ reē rɔ̄ *yá̰a̰ ndējə̄ kə́ táĺ gə̄ ń ngán *Israel gə̄ ɔrə̄n̄ kam̄ tām̄ yāḿ tə́ ní, na sōgə́ nujən̄ rīḿ kə́ táĺ. Mā i Kɔ́ɔ̄ɓē. 3Ədadə́ na:
De kə́ gír kaasí tə́ kə́ ngɔr ń toō, aké kə́ ndɔ̄ń tə́ ń majaĺ tákə̄n ba reē rɔ̄ *yá̰a̰ ndējə̄ kə́ táĺ gə̄ ń ngán Israel gə̄ ɔrə̄n̄ kam̄ tām̄ yā Kɔ́ɔ̄ɓē tə́ ní, a ɔrnən̄ kɔ̄ɔ́ kem kəla yāḿ tə́. Mā i Kɔ́ɔ̄ɓē.
4-5De kə́ gír kojə yā Aaro̰ tə́ kə́ mo̰y bānjə̄ rāān, aké bájal rāān adə̄ wī a də̄yā̰ rɔ̄n tə́ ní, a əsa *yá̰a̰ ndējə̄ kə́ táĺ gə̄ alé. De kə́ ɔdə rɔ̄ de kə́ yḛr tām̄ nīń kə́ kɔ́ɔ̄ ɔdə rɔ̄ tə́, aké de kə́ manə̄n teē rɔ̄n tə́, aké ɔdə rɔ̄ kur̄ kə́ a rāā kadə̄ deē tél de kə́ yḛr, aké ɔdə rɔ̄ de kə́ a rāā kadə̄ deē téĺ kə́ yḛr ní, ká ré i majaĺ rí gə̄gē anī, a əsa yá̰á̰ kə́ táĺ gə̄ alé. Ni a tél de kə́ yḛr aĺ pá tá a əsa ɓáý. 6Deē ń tél de kə́ yḛr tītə̄ ń noō ní, a ndiń bátə́ kadə̄ loo tíbə dɔn tə́. Ré ni ndogə man̄ pá tá a əsa *yá̰a̰ ndējə̄ kə́ táĺ gə̄ ɓáý. 7Ré mbang udə rap anī, ni i de kə́ *unjə̄ njáý njáý, adə̄ ni a əsa *yá̰a̰ ndējə̄ kə́ *táĺ gə̄, tɔdɔ̄ i yá̰a̰ kəsa yān. 8Nge tun̄ yá̰a̰ a əsa nīń dā̰ aĺ ō, dā̰ kə́ yá̰a̰ əhɔ aĺ ō, na sōgə́ a tél de kə́ yḛr. Mā i Kɔ́ɔ̄ɓē.
9Ādə̄ *ngé tun̄ yá̰a̰ gə̄ rāān yá̰á̰ gə̄ ń m-ɔ́jə́də́ kadə̄ rāān̄ ní ō, ādə̄ ənīn̄ najə̄ dɔdə́ tə́ tām̄ yā yá̰a̰ kəsa tə́ aĺ ō. Tɔdɔ̄ ré rāān̄ yá̰á̰ kə́ *táĺ gə̄ ń noō yá̰á̰ kə́ karī tə́ anī, a oyn̄. Mā i Kɔ́ɔ̄ɓē nge kɔr̄ kam̄də́.
10Ngōn̄ Israel ń i *nge tun̄ yá̰a̰ aĺ ní, a əsa yá̰a̰ kə́ *tál alé. Mbā yā *nge tun̄ yá̰a̰ nin̄ kə nge rāā kəla gír naraá ɓē nge tun̄ yá̰á̰ ní, a əsan̄ aĺ ō. 11Banī ɓəlo yā nge tun̄ yá̰á̰ kə́ mangən kə naraá ō, ni kə́ ojənən̄ ɓē looneé ō ní, a əsan̄ yá̰a̰ kəsan karī. 12Ngōn̄ nge tun̄ yá̰á̰ ń ngōn̄ Israel kə́ karī taā ní a əsa dɔ *yá̰a̰ ndējə̄ kə́ *táĺ gə̄ ń unən̄ ní alé. 13Banī ngōn̄ nge tun̄ yá̰á̰ ń ngaan oy, aké ngaan mbātə́n, ba ojə ngōn̄ aĺ ō, tél reē ndi ɓē bɔbə̄neé tītə̄ ń ndiń kə mandəneé kété ní, a əsa yá̰a̰ kəsa bɔbə̄n ń ɔgə̄n̄ deē ń i *nge tun̄ yá̰a̰ aĺ kəsa ní karī.
14Ré de kə́rēý əsa yá̰á̰ kə́ táĺ ní gō ger̄ aĺ tə́ anī, a əgā *nge tun̄ yá̰a̰ kə̄rā ō, a ənī manə̄n dɔ tə́#22.14 Ənī manə̄n dɔ tə́: Á̰a̰ī Leb 5.16 ō.
15Ādə̄ *ngé tun̄ yá̰a̰ gə̄ rāān̄ *yá̰a̰ ndējə̄ kə́ táĺ gə̄ ń ngán *Israel gə̄ ɔrə̄n̄ tām̄ yā Kɔ́ɔ̄ɓē tə́ ní yá̰á̰ kə́ karī tə́ alé. 16Tɔdɔ̄ ré majə kadə̄ əsan̄ alé tá əsan̄ anī, nin̄ ənīn̄ i najə̄ dɔ ngán Israel gə̄ tə́, adə̄ i gáŕ kadə̄ əgān̄ kə̄rā. Mā i Kɔ́ɔ̄ɓē nge kɔr̄ kam̄də́.
Loo gə̄rā dā̰ gə̄ kə́ yā tun̄
17Kɔ́ɔ̄ɓē mēr̄ Moijə 18kəda *Aaro̰ ō, ngán Israel gə̄ malang ō, ndū najə̄ gə̄ ń toō:
Ré deē kógə̄ḿ kə́ dan ngán Israel gə̄ tə́, aké tə̄rā kə́ ndi dandə́ tə́, gḛy ndējə̄ dā̰ kadə̄ róōn̄ tām̄ yā Kɔ́ɔ̄ɓē tə́, tām̄ ndūn kə́ ənī tə́, aké kə gō kem ndigə̄ yān nəkɔ́ anī, 19a əhɔ i man̄g kə́ bəra, aláa i bal batə̄, aláa i bal bə̄yā̰ kə́ loon kógə̄ḿ nujə alé, tá a nel Kɔ́ɔ̄ɓē. 20Nge ń yá̰a̰ rāā ní, ī-ndējī alé, na a nel̄ Kɔ́ɔ̄ɓē sesí alé. 21Ré dəngam gḛy ndējə̄ Kɔ́ɔ̄ɓē man̄g, aláa batə̄, aláa bə̄yā̰, tām̄ yā kem kógə̄ḿ tə́, adə̄ i tām̄ ndūn kə́ ənī tə́, aké i kə gō kem ndigə yān nəkɔ́ anī, ādə̄ dā̰ ní i dā̰ kə́ loon kógə̄ḿ nujə aĺ tá a nel̄ Kɔ́ɔ̄ɓē. 22Ba dā̰ kə́ kumən tɔ̄ɔ̄ ō, kə́ njan tetə, aláa gān̄g ō, kə́ kə ngīr̄ kənjá i rɔ̄n tə́ ō, kə́ nger rāān ō, kə́ mo̰y kə́ rang i ndārə́n tə́ ō ní ī-ndējə̄ Kɔ́ɔ̄ɓē aĺ ō, ə̄nīī yá̰a̰n sḛ́ý kum hor tə́ dɔ *loo tun̄ yá̰á̰ tə́ yā kadə̄n aĺ ō. 23Man̄g, aláa batə̄, aláa bə̄yā̰ ń njan kógə̄ḿ ngāl̄ tɔȳ madə̄ gə̄ aké gində̄ gō madə̄ gə̄ tə́ ní, ā ī-tun̄ kə gō kem ndigə̄ yāí karī.
Ba ré ī-tun̄ i tām̄ míndí kə́ ənī tə́ anī, a nel̄ Kɔ́ɔ̄ɓē alé. 24Dā̰ kə́ tɔ̄ɔ̄n̄ gumə̄n, aké rējə̄n i mbée, aké ɔrə̄n̄ i mbée, aké əjan̄ i mbée ní, ī-ndējī Kɔ́ɔ̄ɓē alé. Ī-rāāī yá̰á̰ kə́ beé dɔ nang yāsí tə́ alé. 25Ī-taāī dā̰ kə́ beē jī tə̄rā tə́ yā ndējə̄ Nə́ɓā yāsí yá̰a̰ kəsan tə́ alé na gumən ń gətóó ní rāā adə̄ dā̰ ní nujə, adə̄ ré ādə̄mī anī, a neləm̄ alé.
26Kɔ́ɔ̄ɓē əda Moijə ɓáý to̰ na:
27Ngōn̄ man̄g, aké ngōn̄ batə̄, aké ngōn̄ bə̄yā̰ kə́ kojə kijə a rāā ndɔ̄ sīrí gíŕ kó̰ó̰ tə́, ba əla gír dɔ ndɔ̄ kə́ nge ko̰ sɔ́sɔ́ tə́ ní, ré deē róō horoó adə̄ Kɔ́ɔ̄ɓē anī, Kɔ́ɔ̄ɓē a ndigə. 28Ā ī-tɔ̄l kó̰o̰ man̄g, aké kó̰o̰ batə̄, aké kó̰o̰ bə̄yā̰ naā tə́ kə ngōnəneé kem ndɔ̄ kə́ kógə̄ḿ beē tə́ alé.
29Ré a ī-tunī dā̰ yā kadə̄ Kɔ́ɔ̄ɓē yā tɔ̄ȳnəń anī, ā ī-rāāī i kə gō ń kadə̄ ni ndigə ní tá. 30Ā ə́saī dā̰ ní i ndɔ̄ nəkɔ́ ń noō tə́. Ā ə́yā̰ī yá̰a̰n sḛ́ý kadə̄ loo tīī dɔ tə́ alé. Mā i Kɔ́ɔ̄ɓē.
31Ā ī-ngɔ̄mī ndū najə̄ yāḿ gə̄ ō, ā ī-rāāī yá̰a̰ gə̄ ń ɔjən̄sí ní ō. Mā i Kɔ́ɔ̄ɓē.
32Ā ə́laī rɔ̄sɔl̄ dɔ rīḿ kə́ táĺ tə́ alé, tām̄ m̄-sāā kadə̄ sḭḭ̄ ngán *Israel gə̄ ī-gerī kadə̄ mā i de kə́ *táĺ. Mā i Kɔ́ɔ̄ɓē nge kɔr̄ kam̄sí tayā. 33m̄-teē sesí kem ɓē kə́ Ejiptə tə́ kɔ̄ɔ́ i kadə̄ mā i Nə́ɓā yāsí. Mā i Kɔ́ɔ̄ɓē.
Currently Selected:
Ndū najə̄ yā Ngán Lebi gə̄ 22: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad