Najə̄ kə́ Majə yā Jeju ń Luk ndang ní 7

Jeju ajə nge kəla yā ngol áskar kógə̄ḿ kə́ Rom tə́

(Á̰a̰ī Mat 8.5-13)

1Dan ń Jeju ɔr̄ najə̄ gə̄ ń noō malang adə̄ de gə̄ oōn̄ anī, ɔtə udə kem ɓē kə́ Kapernaum tə́. 2Anī ngol áskar kə́ ɓú gə̄ kógə̄ḿ ndi kem ɓē ní tə́. Ni-aw̄ kə nge kəla yān kógə̄ḿ kə́ ni-tárən ngá̰ý, banī nge kəla ní əsō mo̰y kógə̄ḿ kə́ na̰y i sḛ́ý a oy. 3Ngol áskar gə̄ ní oō najə̄ yā Jeju anī, əla *kum kɔɔ̄ kə́rēý gə̄ yā *Jipə gə̄ rɔ̄ Jeju tə́ kadə̄ rāānən̄ ɓɔ́ kadə̄ reē rāā kadə̄ rɔ̄ nge kəla yān ngáā. 4Dan ń *kum kɔɔ̄ gə̄ ní reē ugə̄n̄ rɔ̄ Jeju tə́ anī rāānən̄ ɓɔ́, ədan̄ na:

Ni i de kə́ asə kadə̄ ī-rāā yá̰á̰ ń dəjeī ní ādə̄n, 5tɔdɔ̄ o̰o̰n tɔdɔ̄ nápar deē yājí gə̄ ō, rāā kújə́ kán̄ naā adə̄jí ō.

6Anī Jeju ɔtə aw̄ sedə́. Dan ń əndān̄ dɔ ɓē yā ngol áskar gə̄ ní ngɔr anī, ngol ní əla madə̄ tan gə̄ kadə̄ aw̄ ədan̄ Jeju najə̄ ń toō:

Kɔ́ɔ̄ɓē, ī-lōō njə́ɓā rɔ̄í, tɔdɔ̄ m-ásə kadə̄ údə́ kújə yāḿ tə́ alé. 7I tām̄ ń noō tə́ n mə̄kɔ́ m-ɔ́dəń kaw̄ rɔ̄í tə́ aĺ ní. Banī ə́da najə̄ kógə̄ḿ ngóy anī, rɔ̄ nge kəla yāḿ a ngáā. 8Tɔdɔ̄ de kə́ dɔḿ mā tə́ i noó ō, mā m̄-ndi dɔ áskar gə̄ tə́ ō, adə̄ ré m-ə́da ni kógə̄ḿ kə aw̄ anī, a aw̄. Ré m-ə́da ni kə́ rang na kə reē anī, a reē. Ré m-ə́da nge kəla yāḿ na kə rāā yá̰á̰ ń toō anī, a rāā.

9Dan ń Jeju oō najə̄ gə̄ ń noō anī ɔr kumən kə ngol áskar gə̄ ní ngá̰ý ō, nelə̄n seneé ō. Adə̄ ni-tél tūr̄ tan əda kósə de gə̄ ń unən̄ gōn ní na:

Ādə̄ m-ə́dásí, dan ngán *Israel gə̄ tə́ gə̄gē ní, m-á̰a̰ taā kem kə́ ngá̰ý beē aĺ ɓáý.

10Dan ń ngé kaw̄ kəla gə̄ ní tél reēn̄ ɓēé anī əngen̄ nge kəla yā ngol áskar gə̄ ní ndi rɔ̄n ngan̄g májə́ májə́.

Jeju ndól̄ ngōn̄ dəyá̰ kə́ ngaa koy kə́ oy

11Gō tə́ anī Jeju aw̄ kem ɓē kógə̄ḿ kə́ rīn na i Nayin tə́. Ngé ndóō yá̰a̰ yān gə̄ ō kósə de gə̄ ngá̰ý ō aw̄n̄ seneé. 12Dan ń ni-ugə ngɔr kə̄ ta róbə kə́ yā kudəń kə̄ kem ɓēé tə́ anī, de gə̄ teēn̄ kem ɓēé kə nīń kógə̄ḿ yā kaw̄ dubə̄. Deē ń oy ní i ngōn̄ kə́ kal kógə̄ḿ beē kə́ jī dəyá̰ kə́ ngaan oy tə́. Adə̄ kósə de kə́ kem ɓēé gə̄ kə́ to ɓōĺ ngá̰ý gə̄ a dānə̄n̄ dəyá̰ ní. 13Dan ń Kɔ́ɔ̄ɓē a̰a̰n anī kumən o̰o̰n seneé, adə̄ ədan na kə lōō nōō.

14Ba gō tə́ anī, njə̄rā kə̄ kété aw̄ ɔdə ta waá yo. Ngé kətō nīń gə̄ ní dəban̄, anī ni-əda na:

Balsáa, m-ə́daī na kə ḭ́ḭ dɔɔ́!

15Anī nge yo ḭḭ ndi dɔɔ́, a ɔr̄ najə̄. Tā anī Jeju tél adə̄n kə kó̰o̰neé. 16Ɓōĺ rāā de gə̄ malang, adə̄ a ɔsən̄ gɔn Nə́ɓā, ədan̄ na:

*Nge koō ta kə́ bo teē danjí tə́, adə̄

Nə́ɓā reē go̰ō̰ gír deē yān gə̄ tə́.

17Adə̄ yá̰á̰ ń Jeju rāā ní najə̄n taā gō nang kə́ Jude malang ō, ngán ɓē kə́ gidə tə́ gə̄ ō.

De gə̄ ń Ja̰a̰ Batistə əladə́ ní

(Á̰a̰ī Mat 11.2-19)

18Ngé ndóō yá̰a̰ yā Ja̰a̰ gə̄ aw̄ ɔjən̄ ngoldə́ gotə yá̰a̰ malang ń Jeju rāā ní. Anī Ja̰a̰ ɔr̄ de gə̄ jōó dandə́ tə́ 19əladə́ rɔ̄ Kɔ́ɔ̄ɓē tə́ kadə̄ aw̄ dəjenən̄ na ké i ni n i deē ń kadə̄ reē ní aké kə n-ngóōn̄ i de kə́ rang ɓáý wa. 20Dan ń nin̄-aw̄ ugə̄n̄ rɔ̄ Jeju tə́ anī ədanən̄ na, Ja̰a̰ Batistə na əladə́ kadə̄ kə n-reē kə n-dəjenən̄ ké i ni n i deē ń kadə̄ reē ní aké kə n-ngóōn̄ i de kə́ rang ɓáý wa.

21Kum mbang ngeé ń noō tə́ ní Jeju rāā adə̄ rɔ̄ de kə́ mo̰y ngá̰ý ngáā ō, rāā adə̄ rɔ̄də́ kə́ nujə gə̄ tél majə gogə́ ō, taā de gə̄ jī ndíĺ kə́ majaĺ gə̄ tə́ əya̰də́ dɔɔ́ ō, rāā adə̄ ngé kum tɔ̄ɔ̄ gə̄ ngá̰ý tél a̰a̰n̄ loo gogə́ ō. 22Gō tə́ anī ni-tūr̄ əda de gə̄ ń Ja̰a̰ əladə́ ní na:

Yá̰á̰ ń sḭḭ̄ á̰a̰ī ō, ōōī ō ní āw̄ ɔ́jiī Ja̰a̰ gotə: Ngé kum tɔ̄ɔ̄ gə̄ a̰a̰n̄ loo ō, ngé tə́sō motə gə̄ tél njə̄rān̄ majə ō, bānjə̄ ur̄ kɔ̄ɔ́ rɔ̄ ngé bānjə̄ gə̄ tə́ ō, mbíkī gə̄ oōn̄ loo ō, de kə́ koy gə̄ ndólə̄n̄ ō, ngé ndoō gə̄ oōn̄ Najə̄ kə́ Majə ō. 23Rɔ̄nel̄ i kə deē ń a əsō najə̄ yāḿ mā tə́ aĺ ní.

24Dan ń ngé kəla yā Ja̰a̰ gə̄ aw̄n̄ kɔ̄ɔ́ anī, Jeju ɔr̄ najə̄ yā Ja̰a̰ kə kósə de gēé əda na:

Āwī i ka̰a̰ rí tə́ kem dəla loo tə́? I ka̰a̰ tə̄ɓā kə́ nél a yéȳn tə́ a? 25I yá̰á̰ rí bang n āwī ka̰á̰ ní? I de kə́ o̰ō̰ kūbə̄ kə́ majə ngá̰ý rɔ̄n tə́ a? Ngé ko̰ō̰ kūbə̄ kə́ majə ngá̰ý gə̄ ō, ngé ndi dan majaá gə̄ ō, ndin̄ i kem kújə yā mban̄g gə̄ tə́. 26Ní āwī i ka̰a̰ rí tə́? I ka̰a̰ *nge koō ta tə́ a? A̰á̰ā̰, i *nge koō ta. Ba ādə̄ m-ə́dásí, ni i de kə́ bo tɔȳ *nge koō ta. 27Tɔdɔ̄ Ja̰a̰ i deē ń ndangən̄ najə̄ ń toō dɔn tə́ ní: Nə́ɓā əda na:

Á̰a̰, m-ā m-ə́la nge kəla yāḿ kété noí tə́

kadə̄ aw̄ rāā gō róbə yāí.

28Ādə̄ m-ə́dásí, dan de gə̄ malang ń dəyá̰ gə̄ ojən̄də́ tə́ ní, ni kógə̄ḿ kə́ bo tɔȳ Ja̰a̰ gətóo. Ɓá tā ba de kə́ dūú ngá̰ý kə́ kem *Ɓē ko̰o̰ yā Nə́ɓā tə́ bo tɔȳn.

29De gə̄ malang ō, ngé taā lambóo gə̄ ō, oōn̄ najə̄ yān, ba ədan̄ na najə̄ i yā Nə́ɓā, adə̄ nin̄-dəjen̄ kadə̄ Ja̰a̰ rāādə́ *batém. 30Banī *Parijiyḛ gə̄ ō, ngé ndóō de gə̄ *ndū najə̄ ō, mbātə́n̄ yá̰á̰ ń Nə́ɓā gḛy tām̄ yādə́ tə́ ní, adə̄ mbātə́n̄ kadə̄ Ja̰a̰ rāādə́ batém.

31Ní, de kə́ ngɔlaā gə̄ ní kə m-ɔ́jə sedə́ i náā ō? Nin̄-ton̄ i tītə̄ náā ō? 32Ton̄ i tītə̄ ngán gə̄ kə́ ndin̄ ndágə looó a ɓārə́n̄ naā ba ədan̄ naā na:

Jə-kɔ̄ŕ nal j-ənīń pā ndām̄ j-adə̄sí, banī sḭḭ̄ ī-ndāmī alé. J-un pā yo banī sḭḭ̄ ī-nōōī alé. 33Tām̄ dan ń Ja̰a̰ Batistə reē ní ni-əsa mápa aĺ ō, a̰ȳ kasə kan̄ *kāgə̄ nduú aĺ ō, anī sḭḭ̄ ə́daī na ndíĺ kə́ majaĺ na i kemən tə́. 34Ba dan ń Ngōn̄ deē reē ní əsa yá̰a̰ ō, a̰ȳ ō, anī sḭḭ̄ ə́daī na ni na i nge kəsa wa ō, nge ka̰ȳ yá̰a̰ wa ō, ni na i madə̄ ngé taā lambóo gə̄ ō, madə̄ ngé rāā yá̰a̰ majaĺ gə̄ ō. 35Banī de gə̄ malang n ndigən̄ kum kedə̄ yā Nə́ɓā ní, a̰a̰ gerə̄n̄ kadə̄ kum kedə̄ yā Nə́ɓā rāā i yá̰á̰ kə́ gōtə́.

Jeju ndi ɓē Simo̰ kə́ Parijiyḛ

36*Parijiyḛ kógə̄ḿ mēr̄ Jeju ta kəsa yá̰a̰ seneé, adə̄ Jeju aw̄ udə kújú looneé ndi ta yá̰a̰ kəsa tə́. 37Anī dəyá̰ kógə̄ḿ kə́ nge rāā majaĺ ndi kem ɓē ní tə́. Dəyá̰ ní oō kadə̄ Jeju a əsa yá̰a̰ i ɓē *Parijiyḛ ní anī, reē kə ngōn̄ kū kə́ rāā kə mbal̄ albatər#7.37 Albatər i mbal̄ kə́ unjə̄ yáŕ yáŕ kə́ a rāān̄neé kū ítər. kə́ ítər rosə kem. 38Ni-reē ra gidə Jeju tə́#7.38 Gidə Jeju tə́... : Jeju to i kə mbɔ́rneé ta kəsa tə́ ba sə́ra njan. I jī bēl̄ loo ndi ta yá̰a̰ kəsa tə́ yā de kə́ jóo gə̄. kə̄ nja tə́. Dəyá̰ ní ra i kə nōó kumən tə́, adə̄ man̄ kumən nɔ̄l̄ gidə nja Jeju. Gō tə́ anī ɔl̄ gidə nja Jeju ní kə nənga dɔneé ō, əhɔ njan ní kə̄ rɔ̄n tə́ ba rāā ítər tū tə́ ō. 39Dan ń *Parijiyḛ ń ɓāŕ Jeju ta kəsa yá̰á̰ ní a̰a̰ yá̰á̰ ní tītə̄ ń noō anī, əda kə̄ kemən tə́ na: Ré deē ń toō i *nge koō ta anī a ger̄ dəyá̰ ń ɔdə rɔ̄n toó ō, a ger̄ ké i dəyá̰ kə́ ba̰ý wa ō, a ger̄ kadə̄ i dəyá̰ kə́ nge rāā majaĺ. 40Loo ń noō tə́ Jeju un najə̄ ɔr̄, əda *Parijiyḛ ní na:

Simo̰, m-āw̄ kə najə̄ kógə̄ḿ yā kədaī.

Simo̰ əda na:

Ngoləḿ, ə́dam̄ ādə̄ m-ōō. 41Anī Jeju ədan na: Deē kógə̄ḿ aw̄ kə de gə̄ jōó kə́ kə̄rā yān i dɔdə́ tə́. Kə̄rā kə́ dɔ nge kə́ kógə̄ḿ tə́ i sə́lē ɓú mí ō, kə́ dɔ nge kə́ noō tə́ i sə́lē kutə mí ō. 42Nin̄ jōó mbak əngen̄ yá̰a̰ kə́ yā kəgāń kə̄rā alé, anī deē ní əya̰ kə̄rā ní adə̄də́. Dan de kə́ jōó gə̄ ń noō tə́ ní, i náā n a tár nge kadə̄də́ gúrsə loo tə̄nā tə́ ngá̰ý ní?

43Simo̰ tél ədan na:

Mā m̄-gír̄ kadə̄ i deē ń ni-əya̰ kə̄rā kə́ ngá̰ý adə̄n ní.

Jeju ədan na:

Ḭ̄ ə́da najə̄ ní i gō tə́ bang.

44Gō tə́ anī Jeju tūr̄ rɔ̄n kə̄ rɔ̄ dəyá̰ ní tə́, ba əda Simo̰ na: Á̰a̰ dəyá̰ ń toō a? M-údə́ kújú looí ní ī-ɓōkə́ man̄ sḛ́ý gidə njaḿ tə́ alé. Banī ni-tə́go njaḿ kə man̄ kumneé ō, ɔl̄ kə nənga dɔneé ō. 45Ḭ̄ ī-ɓirə̄m̄ kə̄ rɔ̄í tə́ dagə alé, banī kudə ń ni-udə kújú jóo toó asən loo kəhɔ njaḿ kə̄ rɔ̄n tə́ aĺ ɓáý. 46Ḭ̄ úr yibə̄ kə́ kotə mbo̰o̰ dɔḿ tə́ alé, banī ni-ɓōkə́ ítər gidə njaḿ tə́. 47Tām̄ najə̄ ń toō tə́ ní ādə̄ m-ə́daī: Táŕ ń ni-táŕ ngá̰ý ní ɔjə kadə̄ maȳn̄ rɔ̄də́ dɔ majaĺ yān gə̄ kə́ ngá̰ý tə́ kɔ̄ɔ́. Banī deē ń maȳn̄ rɔ̄də́ dɔn tə́ i sḛ́ý beē ní, a tár i sḛ́ý beē.

48Loo ń noō tə́ Jeju əda dəyá̰ ní na:

Maȳn̄ rɔ̄də́ dɔ majaĺ yāí gə̄ tə́ kɔ̄ɔ́.

49Anī ngé gə̄ ń ndin̄ seneé ta yá̰a̰ kəsa tə́ ní tél a ədan̄ kə̄ kemdə́ tə́ na: Deē ń aw̄ bátə́ māȳ rɔ̄n dɔ majaĺ gə̄ tə́ toō i náā? 50Banī Jeju əda dəyá̰ ní na:

Āw̄ kə kem sɔl̄ lɔmɔɔ́ na taā kem yāí ajiī.

Currently Selected:

Najə̄ kə́ Majə yā Jeju ń Luk ndang ní 7: BS

Highlight

Copy