Najə̄ kə́ Majə yā Jeju ń Luk ndang ní 8

Dəyá̰ gə̄ ń unən̄ gō Jeju ní

1Gō tə́ anī, Jeju njə̄rā kə gō ngán ɓē gə̄ ō, ɓē kə́ bo gə̄ ō, ənīń mbēr̄. Ni ɔjə Najə̄ kə́ Majə kə́ dɔ *Ɓē ko̰o̰ yā Nə́ɓā tə́. Ngé ndóō yá̰a̰ yān gə̄ ń nin̄ i deē kutə gidə i jōó ní ō, 2dəyá̰ kə́rēý gə̄ ń ni-taādə́ jī ndíĺ kə́ majaĺ gə̄ tə́ əya̰də́ dɔɔ́ ō, tɔ̄l̄ mo̰y dɔdə́ tə́ ō ní nin̄ i seneé. Dəyá̰ gə̄ ní i Mari ń ɓāŕnən̄ na i Mari kə́ Magədala, á ndíĺ kə́ majaĺ gə̄ sīrí teēn̄ kemən tə́ ní ō, 3Jan kə́ nə̄yá̰ Suja kə́ nge kəndā kumən gír yá̰a̰ kənge yā Herod tə́ ō, Sujan ō, dəyá̰ kə́ rang gə̄ ngá̰ý kə́ ngé kɔy yá̰a̰ kənge yādə́ gə̄ rāań kə Jeju ō kə ngé ndóō yá̰a̰ yān gə̄ ō.

Kūjə́ najə̄ yā nge kənda kōō

(Á̰a̰ī Mat 13.1-9; Mark 4.1-9)

4De gə̄ teēn̄ kə gō ɓē gə̄ malang reēn̄ rɔ̄ Jeju tə́, adə̄ dɔ kósə de kə́ ngá̰ý gə̄ ɔsə naā anī, Jeju un kūjə́ najə̄ ń toō, ədadə́ na:

5Nge ndɔr̄ kógə̄ḿ teē aw̄ kənda kōō tə́. Dan ń ra a ənda kōō ní anī kum kōō kə́rēý gə̄ tə́sōn̄ kadə róbə́ tə́. Anī de gə̄ tə́ɓān̄ njadə́ tə́ ō, yel̄ kə́ dɔɔ́ gə̄ əsan̄ kɔ̄ɔ́ ō. 6Kum kōō kə́rēý gə̄ tə́sōn̄ i dɔ ngonjə̄ tə́. Dan ń əɓan̄ anī tutən̄ kɔ̄ɔ́, tɔdɔ̄ man̄ gətóo loo ní tə́. 7Kə́rēý gə̄ tə́sōn̄ i dan kōn̄ gə̄ tə́, ba kōn̄ gə̄ əɓan̄ naā tə́ sedə́ adə̄ taān̄ dɔdə́ kɔ̄ɔ́. 8Kə́rēý gə̄ tə́sōn̄ i nang kə́ majə tə́, adə̄ əɓan̄ ō edə̄n̄ kum ngá̰ý ō. Kumən kógə̄ḿ teē madə̄ asə ɓú. Dan ń Jeju ɔr̄ najə̄ ní oy anī, un ndūn kə̄ dɔɔ́ ədań ɓororo na:

Deē ń aw̄ kə mbīneé yā koōń loo anī ādə̄ kɔ́ɔ̄ oō.

I tām̄ rí tə́ á Jeju a ɔr̄ najə̄ i kə kūjə́ najá ní

(Á̰a̰ī Mat 13.10-17; Mark 4.10-12)

9Ngé ndóō yá̰a̰ yā Jeju gə̄ dəjenən̄ kum kūjə́ najə̄ ní. 10Anī ni tūr̄ ədadə́ na:

I sḭḭ̄ n Nə́ɓā rāā adə̄ ī-gerī yá̰á̰ kə́ dɔ *Ɓē ko̰o̰ yān tə́ gə̄ ń ton̄ loo mundə̄ tə́ kété ní. Ba gotə de kə́ rang gə̄ ní a ɔjən̄də́ i kə kūjə́ najá yā kadə̄

nin̄-a̰a̰n̄ loo, ba a̰a̰n̄ yá̰a̰ aĺ ō,

oōn̄ loo ba gerə̄n̄ kum najə̄ ń oōn̄ ní aĺ ō#8.10 K. 10b: Á̰a̰ī Ij 6.9.

Jeju ɔjə kum kūjə́ najə̄ yā nge kənda kōō ní

(Á̰a̰ī Mat 13.18-23; Mark 4.13-20)

11Najə̄ ń m-ún gidə kə̄ gogə́ m-ɔ̄r̄ ní kumən n toó: Kum kōō ní, i najə̄ yā Nə́ɓā. 12Ngé gə̄ ń tə́sōn̄ kadə róbə́ tə́ ní i de gə̄ ń oōn̄ najə̄ yā Nə́ɓā ba gō tə́ anī *diabəl reē ɔr̄ najə̄ ní kemdə́ tə́ kɔ̄ɔ́, na sōgə́ taān̄ kem kadə̄ ajən̄. 13Ngé gə̄ ń tə́sōn̄ dɔ ngonjə̄ tə́ ní, i ngé gə̄ ń oōn̄ najə̄ yā Nə́ɓā anī taān̄ kə rɔ̄nelēé banī əya̰n̄ najə̄ ní adə̄ əla ngəran kemdə́ tə́ aĺ ní. Nin̄-taān̄ kem i kum mbang kə́ sḛ́ý beē tə́ ngóy. Ba dan ń nge gól̄ loo gə̄ nāādə́ anī, lōōn̄ gír taā kem najə̄ ní tə́ kɔ̄ɔ́. 14Ngé gə̄ ń tə́sōn̄ dan kōn̄ gə̄ tə́ ní, i ngé gə̄ ń oōn̄ najə̄ yā Nə́ɓā ba teē kə̄ danaá anī gír̄ najə̄ gə̄, kə yá̰a̰ kənge gə̄, kə yá̰á̰ kə́ to rɔ̄nel̄ kə́ dɔ nang tə́ gə̄ taān̄ dɔdə́ kɔ̄ɔ́, adə̄ kumdə́ mbujə alé ní. 15Ngé gə̄ ń tə́sōn̄ nang kə́ majə tə́ ní, i ngé gə̄ ń oōn̄ najə̄ yā Nə́ɓā i kə kem kə́ súmūú ō, kə́ majə ō, əren̄ tadə́ nják ngɔ̄mə̄n̄ najə̄ ní adə̄ kumdə́ to ō ní.

Kūjə́ najə̄ yā hor lámba

(Á̰a̰ī Mark 4.21-25)

16Deē əndā hor tū lámbá tə́ i yā sébə́ jóo dɔ tə́, aláa i yā kəndā gír tə̄ráá alé. A naānən̄ i tū gajə kāgə̄ tə́, yā kadə̄ ngé gə̄ ń a udən̄ kə̄ kújú ní a̰a̰n̄neé loo. 17Tɔdɔ̄ yá̰á̰ kə́ to loo mundə̄ tə́ kə́ kadə̄ dɔ teē ndágá aĺ gətóo ō, yá̰á̰ kə́ to loo ɓɔ̄ɔ̄ rɔ̄ tə́ kə́ kadə̄ deē ger̄ aĺ, aláa reēn̄neé loo kə́ unjə̄ kow tə́ aĺ gətóo ō.

18I beé ní á̰a̰ī loo koō ń ōōī loo ní majə. Tɔdɔ̄ deē ń i kə yá̰á̰ ní Nə́ɓā adə̄n madə̄ dɔ tə́. Ba deē ń i kə yá̰á̰ aĺ ní, yá̰á̰ ń ni-ɔjəń na i yá̰a̰ yān ní gə̄gē, Nə́ɓā a taā jīn tə́ kɔ̄ɔ́.

Kó̰o̰ Jeju ō ngákó̰o̰n gə̄ ō

(Á̰a̰ī Mat 12.46-50; Mark 3.31-35)

19Kó̰o̰ Jeju ō ngákó̰o̰n gə̄ ō reēn̄ kəngen tə́, banī nin̄-asən̄ kugə̄ rɔ̄n tə́ alé najə̄ yā kósə de gə̄ tə́. 20Anī de gə̄ ədan̄ Jeju na:

Kó̰ó̰í ō ngákó̰ó̰í gə̄ ō ran̄ ndágá noō a sāān̄ ka̰a̰ī.

21Banī ni-tūr̄ ədadə́ na:

I ngé koō najə̄ yā Nə́ɓā ba rāā yá̰á̰ ń Nə́ɓā əda ní gə̄ n i kó̰ó̰ḿ gə̄ ō, ngákó̰ó̰ḿ gə̄ ō ní.

Jeju dəba nél balway

(Á̰a̰ī Mat 8.23-27; Mark 4.35-41)

22Ndɔ̄ kógə̄ḿ tə́ Jeju al̄ kem to tə́ kə ngé ndóō yá̰a̰ yān gēé ba ədadə́ na kə n-teēn̄ bā kə̄ gidə kə́rēý tə́.

Nin̄-aw̄ ugə̄n̄ dan ɓūlūú. 23Dan ń a nēlə̄n̄ to ní Jeju to a ɓīī. Anī nél balway kógə̄ḿ əsō maná. Néĺ ní əla kə ngangāá ngá̰ý. Man̄ əla gír rosə kem to adə̄ nin̄ i kem jī yo tə́. 24Ngé ndóō yá̰a̰ gə̄ ndɔ́tə̄n̄ kə̄ rɔ̄ Jeju tə́ ngɔr, ndól̄nən̄ dɔ ɓīī tə́ ba ədanən̄ na:

Ngoljí, ngoljí, tají a tḭ̄ḭ̄! Jeju ndól̄, ba ndán̄g nél ō, bəngál man̄ ō adə̄ dəban̄. Loo tél to kúkúkú kɔ̄ɔ́. 25Gō tə́ anī Jeju əda ngé ndóō yá̰a̰ yān gə̄ na ké taā kem yādə́ n ké to rá wa. Banī ɓōĺ rāādə́ ō, ɔr kumdə́ ngá̰ý ō. Anī nin̄-ədan̄ naā dɔ dáńdə́ tə́ na ké deē nəkɔ́ ń toō i náā áké əndā dɔ néĺ tə́ ō, man̄ tə́ ō, adə̄ oōn̄ tan beé wa.

Jeju rāā adə̄ rɔ̄ deē kógə̄ḿ kə́ ndíĺ kə́ majaĺ a tápə̄n ngáā

(Á̰a̰ī Mat 8.28-34; Mark 5.1-20)

26Nin̄-aw̄ ugə̄n̄ gidə kə́ nú tə́ gō nang yā Gadara gə̄ tə́. Loo ní sɔɔ̄n̄ ta naā kə nang kə́ Galile. 27Dan ń Jeju risə kem toó kə̄ nang tə́ anī, deē kógə̄ḿ kə́ kem ɓēé, kə́ ndíĺ kə́ majaĺ gə̄ i kemən tə́ tə́nī tan. Deē ní o̰ō̰ kūbə̄ aĺ i jóó ngá̰ý ō, ndi kem kújú alé banī a to i kə̄ kem bāá ɓádə gə̄ tə́ ō. 28Dan ń a̰a̰ Jeju anī əga kɔŕ ngá̰ý ō, əsō kə̄ nang tə́ njan tə́ ō, ba un ndūn kə̄ dɔɔ́ ədań ngá̰ý ɓororo na:

Jeju, Ngōn̄ Nə́ɓā kə́ dɔɔ́, yāí i rí seḿ? m̄-rāāī ɓɔ́ ba ī-lōō rāām̄ yá̰á̰ kə́ tōr̄.

29Ni-əda tītə̄ ń noō i tɔdɔ̄ Jeju əda ndíĺ kə́ yḛr ní na kə teē kɔ̄ɔ́ kem deē ní tə́. Ndíĺ kə́ yḛr ní rāā deē ní nja i ngá̰ý, adə̄ kété ní a do̰ō̰n̄ jīn i kə súlú ō, a ənīn̄ i kángə́lá njan tə́ ō n a ngɔ̄m̄nən̄neé ní. Banī ni-gán̄g súĺ ní kɔ̄ɔ́ ō, ndíĺ kə́ majaĺ ní a aw̄ seneé i kem dəla loo tə́ ō. 30Jeju dəje deē ní na ké rīn na i rí wa.

Anī ni-əda na rīn na i kósə de kə́ ngá̰ý gə̄, tɔdɔ̄ ndíĺ kə́ majaĺ gə̄ kə́ nin̄ i kósə́ ngá̰ý n udən̄ kemən tə́ ní.

31Ndíĺ gə̄ ní rāān̄ Jeju ɓɔ́ kadə̄ əla sedə́ bəlo kə́ bo ngá̰ý kə́ ngɔ́nən gətóo ń ndíĺ kə́ majaĺ gə̄ i tū tə́ ní alé.

32Ba ɓūtə̄ kosong kə́ ɓēé kə́ sḛ́ý beē tə́ aĺ bátə́ gə̄ i loo ngeé ń noō tə́. Ra a əsan̄ i yá̰á̰ dɔ mbalá. Anī ndíĺ kə́ majaĺ gə̄ ní rāān̄ Jeju ɓɔ́ kadə̄ kə adə̄də́ ta róbə kadə̄ n-udən̄ kem bor̄ gə̄ ní tə́. Jeju adə̄də́ ta róbə kudə kem bor̄ gə̄ ní tə́. 33Loo ń noō tə́ ndíĺ kə́ yḛr gə̄ ní teēn̄ kem deē ní tə́ ba udən̄ kem kosong gə̄ tə́. Anī kosong gə̄ ɓə̄ngān̄ naā ɓuk, ḭḭn̄ ta kóongó mbal̄ tə́ dɔɔ́ tə́sōn̄ kə̄ bāá bāá, a̰ȳn̄ man̄ oyn̄ malang.

34Dan ń ngé kul̄ bor̄ gə̄ ní a̰a̰n̄ beé anī a̰ȳn̄ naā kɔ̄ɔ́, ba aw̄ ɔjən̄ gotə kem ɓē bo tə́ ō, kem ngán ɓē gə̄ tə́ ō. 35Adə̄ de gə̄ teē reēn̄ ka̰a̰ yá̰a̰ nəkɔ́ ń rāā yá̰á̰ tə́ ní. Dan ń reē ugə̄n̄ rɔ̄ Jeju tə́ anī, əngen̄ dəngam ń ndíĺ kə́ majaĺ gə̄ teēn̄ kemən tə́ kɔ̄ɔ́ ní ndi nang tə́ nja Jeju tə́ kə kūbūú rɔ̄n tə́ ō, ndi i kə́ de kə́ karī gə̄ tə́ ba i kə́ de kə́ yá̰a̰ rāān tə́ to̰ aĺ ō, adə̄ ɓōĺ rāādə́. 36Ngé gə̄ ń a̰a̰n̄ yá̰á̰ gə̄ ń noō kə kumdə́ ní, ɔjən̄də́ gotə yá̰á̰ ń rāā dəngam ngeé ń toō á ndíĺ kə́ majaĺ gə̄ teēn̄neé kɔ̄ɔ́ kemən tə́ ní.

37Loo ń noō tə́ ɓáa kósə de kə́ gō nang ngeé ń noō tə́ gə̄ malang dəjen̄ Jeju kadə̄ ɔtə kɔ̄ɔ́ dɔ nang yādə́ tə́, tɔdɔ̄ ɓōĺ asədə́ nák. Adə̄ Jeju ɔtə al̄ kem toó yā tél ta kaw̄ kə̄ gogə́. 38Dəngam ń ndíĺ kə́ majaĺ gə̄ teēn̄ kemən tə́ kɔ̄ɔ́ ní dəje Jeju kadə̄ n ndi seneé. Anī Jeju ɔdə alé ba ədan na 39kə tél kə aw̄ gogə́ ɓēé ba kə ɔjə gotə yá̰a̰ malang ń n-rāā tām̄ yān tə́ ní kem ɓē ní tə́ kə taá malang. Anī dəngam ní tél aw̄ ɔjə gotə yá̰a̰ malang ń Jeju rāā tām̄ yān tə́ ní kem ɓēé kə taá malang.

Ngōn̄ Jairus kə́ dəyá̰ ō, dəyá̰ kə́ nge kɔdə ta kūbə̄ yā Jeju o

(Á̰a̰ī Mat 9.18-26; Mark 5.21-43)

40Dan ń Jeju ḭḭ gidə bā kə́ nú tə́ reē ugə̄ anī, kósə de gə̄ əhɔnən̄ kə̄ rɔ̄də́ tə́ majə, tām̄ nin̄ malang ra a ngóōnən̄ i mbée. 41Anī dəngam kógə̄ḿ kə́ rīn na i Jairus, ni i ngār kújə́ kán̄ naā kə́ kem ɓēé, teē tū tə́ noō reē. Ni-əsō kə̄ nang tə́ nja Jeju tə́ ba rāān ɓɔ́ kadə̄ reē ta kújə yān tə́, 42tɔdɔ̄ ngōnən kə́ dəyá̰ kə́ kal kógə̄ḿ beē, kə́ ɓālə̄n asə kutə gidə i jōó ń noō na to i kə̄ ta yo tə́.

Dan ń Jeju a aw̄ kə̄ looneé anī, kósə de gə̄ rosən̄ naā dɔn tə́ kə́ utə̄nən̄ kə koó.

43Anī dəyá̰ kógə̄ḿ kə́ mósə téēn dan gān̄g aĺ ɓāl̄ kutə gidə i jōó i noó. Yá̰a̰ kənge yān udə gír doktór gə̄ tə́ malang ō, nge kógə̄ḿ sḛ́ý kə́ asə rāā seneé gətóo ō. 44Dəyá̰ ní reē gidə Jeju tə́ ngɔr ba ɔdə ta kūbə̄ yān, anī mósə́ ń a teē rɔ̄n tə́ ní dəba kə̄ ta jī tə́ noō. 45Jeju dəje na ké i náā n ɔdə rɔ̄n wa. Anī de gə̄ malang nējə̄n̄ kɔ̄ɔ́. Loo ń noō tə́ Piyer əda na:

Ngoljí, kósə de gə̄ asən̄ naā beé dɔí tə́, a mbə́rēnī kə̄ yóō kə̄ laā anī ə́da na

ké i náā n ɔdə rɔ̄í ní wa a?

46Banī Jeju əda na:

Deē kógə̄ḿ ɔdəm̄ laā, tɔdɔ̄ tɔ́gə́ kógə̄ḿ teē rɔ̄ḿ tə́ adə̄ m̄-ger̄ gō majə ngá̰ý.

47Dan ń dəyá̰ ní a̰ā̰ kadə̄ gírən teē dɔɔ́ kɔ̄ɔ́ anī, gān̄g a ndew kə kérneé yakə yakə. Ni-reē əsō nang tə́ nja Jeju tə́, ba ɔjə gíŕ yá̰á̰ ń rāān á ɔdəń rɔ̄n ní ta kum de gə̄ tə́ malang ō, ɔjən loo gān̄g ń mo̰y mósə gān̄g dɔn kə̄ ta jī tə́ noō ní ō. 48Anī Jeju ədan na:

Ngōnə̄ḿ, taā kem yāí ajiī, ba āw̄ kə kem sɔl̄ lɔmɔɔ́.

49Jeju a ɔr̄ najə̄ kə̄ tan tə́ ɓáý anī, deē kógə̄ḿ teē ɓē yā ngār kújə́ kán̄ naā tə́ reē ədan na ngōnən ní na oy kɔ̄ɔ́ ba kə lōō njə́ɓā ngoldə́ to̰.

50Banī Jeju oō najə̄ ní kɔ̄ɔ́ adə̄ əda Jairus na:

Ī-lōō ɓōĺ, ī-taā kem ngóy, anī ngōnīí a ajə. 51Dan ń Jeju ugə̄ ɓē yā ngār kújə́ kán̄ naā tə́ anī, adə̄ de kə́ rang udə kújú seneé alé, banī i Piyer ō, Ja̰a̰ ō, Jakə ō, bɔbə̄ ngōn̄ ō, kó̰o̰ ngōn̄ ō tá ngóy. 52De gə̄ malang a nōōn̄ i mbée ō, rɔ̄də́ nel̄də́ aĺ ō, tām̄ yā ngōn̄ ní tə́. Anī Jeju ədadə́ na kə lōōn̄ nōō, tām̄ ngōn̄ ní na oy alé, ba na a ɓīī na i mbée.

53Banī nin̄-əgōnən̄, tɔdɔ̄ gerə̄n̄ kadə̄ ngōn̄ ní oy kɔ̄ɔ́. 54Banī Jeju əhɔ jī ngōn̄ kə́ dəyá̰ ní ba ɓārə́n na:

Ngōnə̄ḿ, ī-ndól̄ dɔ ɓīī tə́!

55Anī ndíĺ ngōn̄ kə́ dəyá̰ ní tél reē gogə́ rɔ̄n tə́ ō, ni-ḭḭ dɔɔ́ kə̄ ta jī tə́ noō ō. Anī Jeju ədadə́ na kə adə̄nən̄ yá̰a̰ kadə̄ əsa. 56Ɔr kum ngé kojən gə̄ ngá̰ý, banī Jeju ədadə́ na kə lōōn̄ kəda gotə sḛ́ý kadə̄ de kə́ rang oō.

Currently Selected:

Najə̄ kə́ Majə yā Jeju ń Luk ndang ní 8: BS

Highlight

Copy