Kubhoka 10
10
Lilapuliku la nane: Nzige
1Bhela Bambo Chapanga akumpwaghi Musa, “Ujendaje kwaka Falao, kwa kubha nepani nutendiki mtima waki kubha wa kunonopa na mitima ja bhatumika bhaki nahuli nepani mbataje kutenda nginyulila yenjenu pachilanda jabhu, 2nahuli upata kubhalandila bhana bhaku na bhachokolu bhaku ntundu monakabhatendili Bhamisili kwa ukali na ntundu mondendili nginyulila yangu pachilanda jabhu, na mwehapa mpata kumanya kubha nepani nde Bambo Chapanga.”
3Bhela, Musa na Haluni bhakapiti kwaka Falao, na kumpwaghila, “Lendenu nde Bambo Chapanga, Chapanga wa Bhaebulania, leapwagha, ‘Anaujendalyaje kukana kuliheleha palongi jangu mbaka lile? Ubhalekaje bhandu bhangu bhajendaje, nahuli bhapata kunyojabhela. 4Ngati anaukana kubhalekakela bhandu bhangu bhajendaje, lingalyaje, chilabhu ananetaje nzige mu inchi jaku. 5Inchi jokapi ja Misili anajiyekaliwaje na nzige yeniheyi. Anaikula kila chindu chechihighalili pajakajomwiki iyula ja maganga, kabheti ngabhachileki chokapi panani ja mikongu jokapi jejimela mu mighonda. 6Nzige yeniheyi anaitwelalaje mu nyumba jaku, mu nyumba ya bhatumika bhaku na nyumba ya Bhamisili bhokapi. Anaikubhaje yamaheli, hata bhazee bhinu ngachebhalabhalili kuibhona kutumbu pabhabhelakiki, mbaka lalenu.’ ” Panihapa Musa akabhokiki kwaka Falao.
7Bhatumika bhaka Falao bhakundalukile, “Bho, mundu ajoju anaatung'ahaje mbaka lile? Ubhalekaje bhandu abhabha bhajendaje, nahuli bhakunjojabyaje Bambo Chapanga wabhu. Bho, ukona ngacheumanyi kubha Misili jiyonangike?”
8Panihapa Musa na Haluni bhakalowakiki kabhete kwaka Falao. Falao akabhapwaghile, “Njendaje, mukunjojabyaje Bambo Chapanga, Chapanga winu. Nambu mbwaghilaje nde akanane bhabhijendaje papamu na mwehapa?”
9Musa akayangike, “Anatujendaje na akakombu bhitu, na bhazee, papamu na bhana bhitu na akakamwali bhitu, kabheti papamu na mambeleli ghitu, ng'ombi, na imbuhi, kwa ndandi itupalika kuntendela Bambo Chapanga uwangalalu.”
10Falao akapwaghike, “Bambo Chapanga akubha papamu na mwehapa, ngati ananunjetakili mwehapa njendaje papamu na akabhahanu bhinu na bhana bhinu, ndingalyaje, chakaka mbili na maholalelu mahakau mu mitima jino. 11Ngabhela! Akanalomi kanjika jabhu bhajendaje, bhakunjojabyaje Bambo Chapanga, maghambu leniheli nde lendobhikaje.” Panihapa Musa na Haluni bhakabhengakiki palongi jaka Falao.
12Bambo Chapanga akumpwaghi Musa, “Hatambulaje chiwoku chaku kunani ja inchi ja ku Misili nahuli libhongelu la nzige liwezaje kujingila panani ja inchi, nahuli ikulaje kila mmea ghoumela mu mighonda, na kila chindu chechikahighalili kubhokana na iyula ja maganga jela.” 13Panihapa Musa akahatambwili chiwoku chaki chechikabhili na ndonga chela panani ja inchi ja ku Misili, Bambo Chapanga akaletiki mpongu kuhuma kolipita lyobha ukapuliki mu inchi jokapi muhi jokapi na ikilu jokapi, pakwahikiki lukela mpongu ukaletiki nzige. 14Nzige yeniheyi yakajaghanili kila pandu mu inchi ja ku Misili, yakabhili yamaheli namaa, na ngacheilabhalili kupitalila nzige ngati yeniheyi mu chikahi chokapi chela, wala ngalikubhi kabheti ng'o. 15Nzige yeniheyi yakayekalili inchi jokapi ja Misili, mbaka inchi jakabhonakini kubha lwihi. Yakakuliki kila chindu chechikabhili chihighalili kubhokana na iyula ja maganga jela, kila chindu chechikabhili mu mighonda, papamu na mapambiku gha mu mikongu. Njeta lihamba hata limu lelakahighalili mu inchi. Njeta lihamba lokapi lela lelahighalili panani ja mikongu wala mimea mu inchi ja Misili.
16Falao akabhalohiki manyata Musa na Haluni, na kubhapwaghila, “Nuntendili mahoku Bambo Chapanga, Chapanga winu, na kwinu mwehapa bhelabhela. 17Bhela nundobha, mnekakyaje mahoku ghangu kwa mala jenjenu kabhete, na mundobhaje Bambo Chapanga, Chapanga winu, abhohaje lilapuliku lendenu lihakau kwangu nepane.” 18Panihapa Musa akabhokiki kwaka Falao, na kundobha Bambo Chapanga. 19Najombi Bambo Chapanga akaung'anambwili mpongu ukolongwa ghoukapuliki kuhuma kolijibhi lyobha, ghoubhili na makili ghamaheli, mpongu hoghu ukabhohiki nzige yela na kuipeleka mu Bahali ja Shamu. Njeta nzige hata jimu jejakahighalili pokapi mu inchi ja Misili. 20Nambu Bambo Chapanga akautendiki mtima waka Falao kubha wa kunonopa, najombi ngacheakabhalekiki Bhaizilaeli bhabhokaje.
Lilapuliku la tisa: Lwihi
21Bhela Bambo Chapanga akumpwaghili Musa, “Hatambulaje chibhoku chaku kunani nahuli lwihi lukolongwa lujaghanyaje mu inchi ja Misili, bhandu bhapapi papihaje mu lwihi.” 22Bhela Musa akahatambwili chiwoku chaki kunani, panihapa kukabhili na lwihi lukolongwa mu inchi jokapi ja Misili kwa machobha ghatatu. 23Njeta mundu jokapi joakaweziki kumbona njaki, wala kubhoka pandu paakabhili kwa machobha ghatatu. Nambu Bhaizilaeli bhokapi bhakabhili na unang'anu pandu pabhakabhi bhatama.
24Panihapa Falao akundohiki Musa na kupwagha, “Njendanyaje, mukunjojabyaje Bambo Chapanga. Akambomba na bhana bhinu muweza kujenda papamu nabhu, nambu mambeleli ghinu, imbuhi hinu, na ng'ombi hinu muilekaje.”
25Nambu Musa akumpwaghile, “Itupalika utulekakyaje tukubha na nhupu, na hinyama ya nyambiku ja kujochakeka ja kubhoha palongi jaka Bambo Chapanga, Chapanga witu. 26Tepani itupalika tubhokaje na hinyama hitu yokapi, wala njeta chinyama hata chimu chechihighalyaje. Maghambu itupalika kutumila hinyama yeniheyi mu kunjojabhela Bambo Chapanga, Chapanga witu, kwa kubha mbaka patwihikaje konihoku ngachetumanyi kubha nde hinyama bholi yeanatutumilaje nahuli kunjojabhela Bambo Chapanga.”
27Nambu Bambo Chapanga akautendiki mtima waka Falao kubha wa kunonopa, ngacheakapaliki kubhalekakela Bhaizilaeli bhabhokaje. 28Falao akumpwaghi Musa, “Ubhokaje palongi jangu! Ulilingalyaje, ngawihika palongi jangu kabhete! Maghambu lichobha pawihikaje kabhete palongi jangu, anaukuwaje!”
29Musa akayangike, “Ulongi wichu! Nepani nganapabhoni kabhete pamihu jako.”
Currently Selected:
Kubhoka 10: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
