Kubhoka 14
14
Bhaizilaeli bhalomboka Bahali ja Shamu
1Bhela Bambo Chapanga akumpwaghi Musa, 2“Ubhapwaghila Bhaizilaeli bhakelabhukaje kunyuma na bhapomulyaje pambipi na Pi Hahiloti, pachilanda ja Migidoli na Bahali ja Shamu. Anabhapomulyaje munkeghi ja bahali, pambipi na Baali Sefoni. 3Falao anaapwaghaje, ‘Bhaizilaeli habha bhapotokapotoka mu inchi na chingwenje chabhahibhalakila ngabhiweza kulomboka.’ 4Panihapa nepani ananiutendaje mtima waka Falao kubha wa kunonopa, najombi anaanjengalyaje mwehapa. Nanatu anambataje utopelu kwa kunkoma Falao, papamu na manjolinjoli ghaki. Nabhombi Bhamisili anabhamanyaje kubha nepani nde Bambo Chapanga.” Bhela Bhaizilaeli bhakatendiki ngati mobhapwaghakike.
5Falao, nkolongwa wa ku Misili, paakajowini kubha Bhaizilaeli bhatilike, jombi na bhatumika bhaki bhakang'anambwili maholalelu ghabhu, bhakapwaghaje, “Tuhengiki kiki? Tubhalekakili Bhaizilaeli bhajenda panga kutuhengela lihengu kabheti!” 6Henu Falao akalibhekiki wichu ligali laki la ngondo, lelihutakika na falasi, na akapiti papamu na manjolinjoli ghaki. 7Akatoliki magali ghaki manyahi gha ngondo mia sita na magali ghangi ghokapi gha ngondo gha Bhamisili, ghakalonguhiwi na bhakolongwa bha manjolinjoli. 8Bambo Chapanga akautendiki mtima waka Falao, nkolongwa wa ku Misili kubha wa kunonopa namaa, najombi akabhajengalili Bhaizilaeli, maghambu Bhaizilaeli bhakabhokiki ku Misili kwa kukangamala. 9Bhamisili papamu na falasi yabhu yokapi, magali gha falasi gha ngondo na bhabhakabhili bhakweliki panani ja falasi bhakabhajengalili Bhaizilaeli, bhakabhahimanili bhapomulili punkeghi ja Bahali ja Shamu, pambipi na Pi Hahiloti, palongi ja Baali Sefoni.
10Falao paakaheghalili, Bhaizilaeli bhakabhaweni Bhamisili bhahika kunyuma jabho, bhakatengalamwiki namaa, na Bhaizilaeli bhakundelili Bambo Chapanga nahuli abhajangatyaje. 11Bhakumpwaghi Musa, “Bho, ngachekukabhili na matengeli gha kuyaghanila ku inchi ja ku Misili mbaka utuletaje tuwelilaje kuchingwenji kone? Maghambu kiki ututendili bhenibhela kwa kutubhoha ku inchi ja ku Misili? 12Ngachetukupwaghili patukabhili ku Misili hoku, utulekaje kanjika jitu tubhatumakyaje Bhamisili? Ikabya mbanga nakanopi kwitu tepani kubhatumakila Bhamisili kuliku kuwelela kuchingwenji koni!”
13Musa akabhayangiki Bhaizilaeli, “Ngamwijoghopa! Njemaje kwa kukangamala, lalenu anambonaje ntundu Bambo Chapanga moankengalela. Bhamisili abhabha bhamubhabhona lalenu, ngamwabhoni kabheti ng'o. 14Bambo Chapanga anaankomanyaje mwehapa, nanamu mtamaje chinunu.”
15Bhela Bambo Chapanga akumpwaghi Musa, “Maghambu kiki unelela? Ubhapwaghilaje Bhaizilaeli bhajendalyaje na mwanja wabhu. 16Jukuhaje ndonga jaku na uhatambulaje chiwoku chaku chechibhili na ndonga panani ja bahali. Machi anaghaghabhanikaje na Bhaizilaeli anabhawezaje kulomboka pachilanda ja bahali pandu pajomu. 17Nepani ananijitenda mitima ja Bhamisili kubha ja kunonopa, nabhombi anabhunjengalyaje pachilanda ja bahali, nanatu ananilipatilaje ulumbalilu kubhokana na kuyonangeka kwaka Falao na manjolinjoli ghaki, magali ghaki gha ngondo papamu na bhabhatami panani ja falasi ya ngondo. 18Nabhombi Bhamisili anabhamanyaje kubha nepani nde Bambo Chapanga panalipatilaje utopelu kwa kunkoma Falao, magali ghaki gha ngondo papamu na bhabhatami panani ja falasi ya ngondo.”
19Bhela mtumika wa kunani bhaka Chapanga, joakabhili palongi ja lipogha la Bhaizilaeli akabhokiki na kutama kunyuma jabhu. Na nguzu ja lihundi jela jakabhokiki palongi jabhu na kujema kunyuma jabhu. 20Nguzu heji jakatemi pachilanda ja Bhamisili na Bhaizilaeli. Lihundi lela lakabhayekiki Bhamisili lwihi, nambu lakabhamulakili Bhaizilaeli ikilu. Bhela mabhongelu ghabheli hagha, manjolinjoli ghaka Falao na libhongelu la Bhaizilaeli, ngacheghaheghalanili ikilu jokapi.
21Musa akahatambwili chiwoku chaki panani ja bahali, najombi Bambo Chapanga akaghakangiki machi gha bahali kunyuma kwa mpongu ukali wa kolipita lyobha. Mpongu hoghu ukapuliki ikilu jokapi, ukaghabhiki machi gha bahali ipambala ibheli na pachilanda pakapitalili pandu pajomu. 22Nabhombi Bhaizilaeli bhakapetiki pachilanda ja bahali pandu pajomu, machi ghakajemiki ngati lumatu upambala wa kumalelelu na upambala wa kumangeja. 23Bhamisili bhakabhajengalili mkati ja bahali kupetela pandu pajomu, papamu na falasi yokapi yaka Falao, magali gha ngondo na bhabhatami panani ja falasi ya ngondo. 24Pambipi na pachibhombu, Bambo Chapanga akaghalingalili manjolinjoli gha Bhamisili kuhuma mu nguzu ja moto jela na nguzu ja lihundi lela, na kughajeghela choghoi chikolongwa manjolinjoli gha Bhamisili. 25Chapanga akaghatendiki maguludumu gha magali ghabhu ghapatilaje, magali ghabhu ghakabhi ghajenda mbolimboli. Bhela Bhamisili bhakapwaghike, “Tutilaje na kutama kutali na Bhaizilaeli. Maghambu Bambo Chapanga atenda kubhajangatila kukomana na tepane.”
26Panihapa Bambo Chapanga akampwaghi Musa, “Hatambulaje chiwoku chaku panani ja bahali nahuli machi ghakelabhukaje kabhete na kubhayeka Bhamisili, papamu na magali ghabhu gha ngondo na bhabhatami panani ja falasi.” 27Bhela, Musa akahatambwili chiwoku chaki panani ja bahali, na pakukabhili kuchile machi gha bahali ghakakelawiki na kubha ngati moghabhelile pakutumbula hapa. Bhamisili bhakalengiki kughatila machi, nambu Bambo Chapanga akabhakangili mkati ja bahali. 28Machi ghakakelawiki na kughayeka magali gha ngondo na bhabhatami panani ja falasi papamu na manjolinjoli ghokapi ghaka Falao ghaghakabhi ghabhajengalela Bhaizilaeli bhakapotili mkati ja bahali. Ngacheakalamiki Mmisili hata jumu. 29Nambu Bhaizilaeli bhakapetiki mu bahali pandu pajomu, na machi ghakajemiki ngati lumatu upambala wabhu wa kumalelelu na upambala wabhu wa kumangeja.
30Lichobha lela Bambo Chapanga akabhakengalili Bhaizilaeli kuhuma mu mabhoku gha Bhamisili, nabhombi Bhaizilaeli bhakabhaweni Bhamisili bhabhapotile mu maheku gha bahali. 31Bhela Bhaizilaeli pabhakaweni makili makolongwa ghaakatendiki Bambo Chapanga kwa Bhamisili, Bhaizilaeli bhakunjowipi Bambo Chapanga na kubheka lihobhalelu labhu kwaka Bambo Chapanga, na kwaka Musa mtumika waki.
Currently Selected:
Kubhoka 14: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
