Kubhoka 17
17
Machi kuhuma mu litalaghu
Hesabu 20:1-13
1Lipogha lokapi la Bhaizilaeli bhakabhokiki kuhuma ku lipololu la ku Sini, na kujendalela na mwanja kuhuma pandu pamu mbaka pandu pangi ngati Bambo Chapanga moakalaghalakile. Bhakabhekiki likambi ku Lefidimu, nambu panihapa ngachepakabhili na machi gha bhandu kunywa. 2Bhela bhandu bhakung'ong'utakili Musa na kupwagha, “Utupekyaje machi gha kunywa.”
Musa akayangike, “Mbona mng'ong'utakela nepane? Bho, maghambu kike mundenga Bambo Chapanga?”
3Nambu bhandu bhokapi bhakabhili na inywita, bhakung'ong'utakili Musa, bhakapwaghaje, “Maghambu kike ukatubhohiki ku Misili, na kutuleta pambani nahuli utukomaje kwa inywita tepani, bhana bhitu na hinyama hitu?”
4Musa akundobhiki namaa Bambo Chapanga, akapwaghaje, “Nabhatendila kike bhandu abhabha? Bhabhili pambipi kunapula kwa maganga.”
5Bambo Chapanga akamuyangiki Musa, “Ulongulyaje palongi ja bhandu, na ubhatolaje bhazee bhakumu bha Izilaeli papamu na wehapa. Utolaje mu mabhoku ghaku ndonga jela jeukalapwili mu nkoka Naili, na ujendaje. 6Lingalyaje, nepani ananyemaje palongi jinu palitalaghu la Holebu. Ulapulaje litalaghu, na machi anaghapitaje, nahuli bhandu bhokapi bhapata kunywa.” Bhela, Musa akahengiki bhenibhela palongi ja bhazee bhokapi bha Izilaeli.
7Musa akapalohiki pandu panihapa Masa, ndandi jaki “Kulenga” na Meliba, ndandi ja “Kung'ong'uteka” maghambu Bhaizilaeli bhakung'ong'utakili na kundenga Bambo Chapanga, bhakapwaghaje, “Bho, chakaka lelu kubha Bambo Chapanga abhi papamu na tepani au ngabhela?”
Bhaizilaeli bhakomana ngondo na Bhaamaleki
8Bhela, Bhaamaleki bhakahikiki kukomana ngondo na Bhaizilaeli ku Lefidimu hoku. 9Musa akumpwaghi Yoshua, “Ubhahaghulaje akanalomi bhakumu, na ujendaje ukakomanaje na Bhaamaleki. Chilabhu ananyemaje panani jakanopi ja katombi, nakabyaje na ndonga jaka Chapanga mu chiwoku changu.” 10Bhela, Yoshua akatendiki ngati Musa moakumpwaghile, akapiti kukomana ngondo na Bhaamaleki. Nambu Musa, Haluni na Huli bhakapiti kukwela panani jakanopi ja katombi. 11Chikahi chokapi Musa paakakwehiki mabhoku ghaki kunani, Bhaizilaeli bhakashindike, nambu chikahi paakahelihi mabhoku ghaki, Bhaamaleki bhakashindike. 12Mabhoku ghaka Musa paghakatondike, Haluni na Huli bhakatoliki liganga na kumpekeha atamilaje. Haluni na Huli bhakakamulakili mabhoku ghaka Musa, jumu upambala wa kumalelelu na jumu upambala wa kumangeja. Panihapa mabhoku ghaka Musa ghakahighalili ghakwehakiki kunani mbaka lyobha palajibhile. 13Bhela Yoshua akabhaweziki Bhaamaleki kwa lipanga.
14Panihapa Bambo Chapanga akumpwaghi Musa, “Ulembaje mambu aghagha mu chitabu nahuli ghakombukwaje, na unsomilaje Yoshua najombi ajowanaje, kubha ananabhayonangaje Bhaamaleki bhokapi pani pundema.” 15Musa akachengiki pandu pa kumbokeha Chapanga nyambiku, na kupaloha, “Yehova Nisi.” Ndandi jaki Bambo Chapanga nde Bendela Jangu. 16Musa akapwaghike, “Kwa ndandi mabhoku ghakakwehakiki mbaka pa chiteu cha kikolongwa chaka Bambo Chapanga. Bambo Chapanga anaakomanaje ngondo na Bhaamaleki chibheleku mbaka chibheleku.”
Currently Selected:
Kubhoka 17: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
