Kubhoka 38

Kulenganakela lisanduku la kubhokeha nyambiku ya kujochakeka

Kubhoka 27:1-8

1Bhela Bezaleli akalenganakili lisanduku kwa mbau ya nkongu wa mshita, lakalengini ipambala yokapi, ulachu waki ukabhili mita ibheli na lobu, na upana waki ukabhili mita ibheli na lobu, kimu chaki chakabhili mita jimu na lobu. 2Bhelabhela akalenganakili manyelu ncheche mu kona yaki ncheche, manyelu ghanihagha ghakabhili chindu chimu na lisanduku heli. Najombi akalihyekiki lisanduku heli kwa shaba. 3Bhelabhela akalenganakili hindu yokapi kwa shaba, yombu ya kubhokeha ilihu, na yoma yaki ya kubhokeha ilihu, na mabakuli ghaki gha kumichila, yoma ya kujochela inyama, na yombu ya kujokulela moto. Hindu heyi yokapi akailenganakili kwa shaba. 4Bhela akalenganakili waya wa shaba ghowabhili na peti nchechi ya shaba, na akaujingihi pahi ja ukengu mbaka pachilanda ja lisanduku. 5Bhelabhela akabhekiki peti nchechi ya shaba yela, mu kona nchechi ya waya wa shaba. 6Bhela akalenganakili mipeku kwa nkongu wa mshita kwa ndandi ja kutotulela lisanduku heli, na kujihyeka kwa shaba. 7Bhelabhela akajibhekiki mipeku heji mu peti yela yeyabhili mu kila upambala wa lisanduku, nahuli kulitotola. Akalenganakili lisanduku heli kwa mbau, na lakabhili na mbekenyu mkati jaki.

Kulenganakela liteleku la shaba

Kubhoka 30:18

8Bhela Bezaleli akalenganakili liteleku la shaba, na chitamilu chaki cha shaba, liteleku heli lakalenganakiki kwa hioo yebhabhohiki akambomba bhabhakabhi bhahenga lihengu pundyangu wa Lihema Lihuhu.

Liwangala la Lihema Lihuhu

Kubhoka 27:9-19

9Bhela Bezaleli akalenganakili liwangala kwa ndandi ja Lihema Lihuhu. Upambala wa kunkachi wa liwangala kukabhili na mapazia ghaghalenganakiwi kwa ingobhu jinyahi jihuhu, ambaju jakabhili na ulachu wa mita alobaini na nchechi kwa upambala ghumu, 10mapazia ghanihagha ghakakobhakiki mu mapali ishilini yeyakabhili na hitamilu ishilini ya shaba. Kabhate kukabhili na ikobhakelu ya madini gha feza na hikamulilu ya madini gha feza panani ja mapali ghanihagha. 11Bhelabhela upambala wa kungondi, mapazia ghanihagha ghakabhili na ulachu wa mita alobaini na nchechi, na mapali ishilini gha shaba, na hitamilu ishilini ya shaba, nambu ikobhakelu ya mapali na hikamulilu yaki yakabhili ya madini gha feza. 12Na upambala wa kolijibhi lyobha wa Lihema Lihuhu kukabhili na mapazia ghaghabhili na ulachu wa mita ishilini na ibheli, na mapali ghaki komi na hitamilu yaki komi. Ikobhakelu na hikamulilu yaki yakabhili ya madini gha feza. 13Bhelabhela upambala wa kolipita lyobha, kowabhili ndyangu wa Lihema Lihuhu lakabhili na upana wa mita ishilini na ibheli. 14Kila upambala ghumu wa ndyangu lakabhili na lipazia lelakabhili na upana wa mita sita na nusu, papamu na mapali ghatatu na hitamilu yaki itatu. 15Bhelabhela mu upambala wa kabheli wa ndyangu ukabhili na mapazia ghaghabhili na upana wa mita sita na nusu papamu na mapali ghaki ghatatu na hitamilu yaki itatu. 16Mapazia ghokapi kuliyongolota liwangala ghakabhili gha ingobhu jinyahi jihuhu jejilokakiki wichu. 17Hitamilu yaki yokapi ya mapali ghanihagha ghakabhi gha shaba, nambu ikobhakelu ya mapali na hikamulilu yaki yakabhili ya madini gha feza. Mapali ghaki ghakabhili gha madini gha feza, na fitu yeyatumiki kughakamulila mapali ghanihagha ghakabhi gha madini gha feza. 18Pundyangu wa liwangala heli akabhekiki lipazia lelilenganakiki wichu kwa ingobhu jinyahi jihuhu jejilokakiki wichu kwa lughoji lwa langi ja buluu, zambalau na jikeli, lihengu laka fundi mnyahi wa kuloka. Lipazia heli lakabhili na ulachu wa mita tisa, na kimu cha mita ibheli, ngati moghabhelile mapazia gha liwangala. 19Bhelabhela mapali ghaki nchechi, na hitamilu yaki nchechi, yakabhili ya shaba. Mapali ghaki na peti yaki yakabhili ya madini gha feza, hikamulakilu yaki yakabhili iyekaliwi kwa madini gha feza. 20Higingi yokapi kuliyongolota Lihema Lihuhu, na liwangala yakabhili ya shaba.

Hindu yeyatumiki kulichenga Lihema Lihuhu

21Yenjenu nde hindu yeyatumiki kwa ndandi ja kuchenga Lihema Lihuhu, mobhakabhekiki Lisanduku la Lulaghilu, ambayu ikaletakiki na Bhalawi ngati moakalaghalakili Musa, pahi ja ujemalelu waka Isamali, mwana waka mpenganyambiku Haluni.

22Bezaleli, mwana waka Uri, Uri hoju tati waki akabhi Huri, wa likabila laka Yuda, akatendiki kila chindu ngati Bambo Chapanga moakundaghalakile Musa. 23Akabhili na mundu wa kunjangatila joakalowakiki Oholiabu mwana waka Ahisamaki, wa likabila laka Dani, mundu jonihoju akabhili na umanyi wa kuhongola maganga, na kubheka mapambu gha hindu, na kuloka wichu mapambu mu ingobhu jinyahi jihuhu kwa uzi wa langi ya buluu, zambalau, na jikeli, na umanyi wa kila ntundu wa ufunde.

24Zahabu jokapi jebhakumbohili Bambo Chapanga kwa ndandi ja kuchenga Lihema Lihuhu jakabhili na kilu mia nane na sabini na saba na gilamu mia tatu, kulengana na hipemu ya Lihema Lihuhu. 25Madini gha feza ghaghapatakini kubhokana na lipogha la bhandu bhanihabha bhabhakabhalangiki ghakabhili ngati kilu elufu itatu na komi na saba, na gilamu mia saba na hamsini, kulengana na hipemu ya Lihema Lihuhu. 26Kila mundu joakabhalangiki kutumbula joakabhili na hyaka ishilini na jimu na kupetalela, akabhohiki nhupu waki wa gilamu nhwanu ya madini gha feza, kwa ndandi ja kuhengela lihengu la mu Lihema Lihuhu. Akanalomi bhokapi bhabhakabhalangiki bhakabhili ngati akanalomi laki sita na elufu itatu na mia nhwanu na hamsini. 27Kilu ngati elufu itatu ya madini gha feza yakatumiki kulenganakela hitamilu mia jimu ya Lihema Lihuhu lela na lipazia lela, yani kilu selasini kwa kila chitamilu. 28Akatumili kilu komi na saba na gilamu sabini na nhwanu ya madini gha feza yeyakahighalili kulenganakela ikobhakelu na hikamulilu, na ifuniku ya mapali ghanihagha. 29Shaba yeyakapatakini kubhokana na Bhaizilaeli yebhakumbokili nhupu Bambo Chapanga jakabhili ngati elufu ibheli na mia jimu na ishilini na ncheche. 30Bezaleli akatumili shaba heji kulenganakela hitamilu ya ndyangu wa Lihema Lihuhu, lisanduku la shaba la kubhokeha nyambiku ja kujochakeka papamu na waya waki wa shaba, na yombu yokapi ya lisanduku heli, 31na hitamilu ya liwangala yeyakayongalwiti Lihema Lihuhu na ya ndyangu wa liwangala, na higingi yokapi ya Lihema Lihuhu na ya liwangala.

Currently Selected:

Kubhoka 38: MpBV

Highlight

Compare

Copy