Kubhoka 9
9
Lilapuliku la kahanu: Kupotela kwa hinyama
1Bhela Bambo Chapanga akumpwaghi Musa, “Ujendaje kwaka Falao ukumpwaghilaje: Lendenu nde Bambo Chapanga, Chapanga wa Bhaebulania leapwagha, ‘Ubhalekaje bhandu bhangu bhajendaje nahuli bhakapataje kunyojabhela. 2Ngati anaukana kubhaleka bhajendaje, na kujendalela kubhahibhalakila, 3ananhatambulaje chiwoku changu na kuleta lilapuliku lihakau namaa kwa hinyama yaku yeibhili mu mighonda jaku, panani ja falasi yaku, maponda ghaku, ngamia yaku, ng'ombi yaku, mambeleli ghaku, na imbuhi yaku. 4Nambu Bambo Chapanga anaatengaje pachilanda ja hinyama ya Bhaizilaeli na hinyama ya Bhamisili, kubha njeta chinyama hata chimu chaka Muizilaeli cheanachipotilaje. 5Bambo Chapanga akabhekiki chikahi na kupwagha: Chilabhu nepani Bambo Chapanga anandendaje lijambu lenu mu inchi ja Misili.’ ”
6Chilabhu jaki Bambo Chapanga akatendiki cheakapwaghike. Hinyama yokapi ya Bhamisili yakahwile, nambu njeta chinyama hata chimu cha Bhaizilaeli chechakawile. 7Falao akabhatumiki bhatumika bhaki kulalukila panani ja hinyama ya Bhaizilaeli, pabhakelawiki bhakumpwaghili kubha njeta chinyama chabhu hata chimu chechiwile. Nambu mtima waka Falao ukajendali kubha na ing'omu, wala ngacheukajetakili kubhalekakela bhandu bhajendaje.
Lilapuliku la sita: Maputi
8Bhela Bambo Chapanga akumpwaghi Musa na Haluni, “Mhapulaje ilihu ya mvune, najombi Musa aghahomaje kunani palongi jaka Falao. 9Ilihu yeniheyi anaikubhaje luhombi lupepandau loanalujaghanyaje panani ja inchi jokapi ja Misili. Nalwombi analuletaje maputi ghaghahimba, na kupojoka panani ja bhandu na hinyama, mu inchi jokapi ja Misili.” 10Bhela bhakatoliki ilihu kuhuma mu mvune na kujema palongi jaka Falao. Musa akahuwiki kunani, naghombi maputi ghaghahimba ghakapitalile mu hyegha ja bhandu na hinyama. 11Bhalondola bhala ngachebhaweziki kujema palongi jaka Musa kwa ndandi ja maputi ghala, maghambu nabhombi bhaganga bhakabhi na mapute, na Bhamisili bhokapi bhakabhi naghu. 12Nambu Bambo Chapanga akautendiki mtima waka Falao kubha wa kunonopa, najombi ngacheabhajowanili Musa na Haluni, ngati Bambo Chapanga moakumpwaghile Musa.
Lilapuliku la saba: Iyula ja maganga
13Bhela, Bambo Chapanga akumpwaghi Musa, “Ujumukaje lukela pachibhombu, unjendila Falao, umpwaghilaje: Lendenu nde leapwagha Bambo Chapanga wa Bhaebulania, ‘Ubhalekakyaje bhandu bhangu bhabhokaje, nahuli bhakanyojabyaje. 14Maghambu chikahi chenjenu ananetaje malapuliku ghangu ghaghabhili na makili kwaku, bhatumika bhaku na bhandu bhaku, nahuli upata kumanya kubha njeta jongi joabhi ngati nepani mu ndema wokapi. 15Kwa ndandi mbaka sajenu nakabya nhatambwili chiwoku changu na kukulapula wehapa na bhandu bhaku kwa chitamu, na wehapa ukabya ujomwili kuyonangeka. 16Nambu nukulekiki wehapa ukubhaje wamwomi kwa ndandi jenjenu ngolongwa, nahuli mbataje kukulangiha makili ghangu na lihina langu lipata kumanyikana pundema pokapi. 17Nambu wakali kulangiha ing'omu kwa bhandu bhangu, wala ngacheupala kubhaleka bhajendaje. 18Lingalyaje, chilabhu chikahi ngati chenjenu ananetaje iyula ngolongwa namaa ja maganga ambaju ngachejilabhalili kutonya mu inchi ja Misili, kutumbula lichobha pajakabhombakiki mbaka lalenu. 19Bhela laghalakyaje hinyama yaku na chokapi chechibhili ku mighonda hoku ibhekakikaje mkati, kwa ndandi iyula ja maganga anajuntonyila kila mundu na kila chinyama chechibhili mu mighonda na yangakubha kunyumba, nayombi anaikuwaje.’ ” 20Bhatumika bhaka Falao ambabhu bhakabhi bhajoghopa chela cheakalongili Bambo Chapanga, bhakatendiki manyata kubhakelabhuha bhatumwa bhabhu na hinyamya yabhu mkati. 21Nambu bhala bhabhakabhi bhalikana lilobhi laka Bambo Chapanga bhakabhalekiki bhatumwa bhabhu na hinyama yabhu kumighonda.
22Bhela Bambo Chapanga akumpwaghi Musa, “Uhatambulaje chiwoku chaku kunani, nahuli iyula ja maganga jitonyaje panani ja inchi jokapi ja Misili, jabhatonyilaje bhandu, hinyama na panani ja kila chindu chechimela mu mighonda ja Misili.” 23Bhela, Musa paakahatambwili chiwoku chaki chechakabhili na ndonga chela kunani, Bambo Chapanga akaletiki kulundamila na iyula ja maganga, unang'anu wa chitobhi ukamuliki mbaka pa inchi. Henu Bambo Chapanga akajitendiki iyula ja maganga kutonya panani ja inchi ja Misili. 24Bhela kukabhili na iyula ngolongwa ja maganga jejahangaghini na unang'anu wa itobhi pandu pokapi. Kukabhili na mbelu wa kujoghoha namaa ambau ngacheulabhalili kupitalila mu inchi ja Misili, kutumbu inchi heji pajakabhi litaifa. 25Iyula ja maganga heji jakayoningi kila chindu mu inchi ja Misili chechikabhili ku mighonda, bhandu na hinyama, jakayoningi kila chindu chechimela mu mighonda na kuheketa kila nkongu wa mungonda. 26Mu muchi wa ku Gosheni kanjika jaki pela, kobhakabhi bhatama Bhaizilaeli, iyula ja maganga heji ngachejatonyike.
27Bhela, Falao akalaghalakili Musa na Haluni bhalowakikaje, na kubhapwaghila, “Sajenu nepani ndendiki mahoku. Bambo Chapanga atendiki ngati mokupalakila, nepani na bhandu bhangu tuhokihe. 28Mundobhaje Bambo Chapanga, kwa ndandi kulundamila hoku na iyula jenu ja maganga ipetalile. Nepani ananundekakyaje mbokaje, wala ngamwitami kabhete nakanope.”
29Musa akayangike, “Chikahi pela panikubha mbitiki kunja ja muchi, ananhatambulaje mabhoku ghangu kunani kundobha Bambo Chapanga. Kulundamila anakujomukaje, wala ngapikubhi na iyula ja maganga kabhete, nahuli upata kumanya kubha ndema ghongoni nde waka Bambo Chapanga. 30Nambu manyi kubha wehapa na bhatumika bhaku, mwakona ngachemunjoghopa Bambo Chapanga.”
31Mimea jejitumika kulenganakela ingobhu na mahunu gha shayili yakayonangike, kwa kubha shayili yakabhili na mapukutu, na mimea ja kulenganakela ingobhu heji jakabhi jipihiki malobha. 32Nambu inganu na ntundu ghongi ghoulengana na inganu ngacheyayonangike, maghambu yakabhi yakali ngacheikolike.
33Panihapa Musa akabhokiki kwaka Falao na kujenda kunja ja muchi. Musa akahatambwili mabhoku ghaki kunani kundobha Bambo Chapanga. Kulundamila na iyula ja maganga yakatumbile, wala iyula ngachejajendalili kutonya pa inchi kabhete. 34Nambu Falao paakaweni kubha iyula, na iyula ja maganga, na kulundamila kujomwiki, akakelabhukili kuhenga mahoku kabhete. Jombi na bhatumika bhaki bhakajendalili kubha na mitima ja kunonopa. 35Bhela, mtima waka Falao ukabhili wa kunonopa, najombi ngacheabhalekiki Bhaizilaeli bhajendaje, ngati Bambo Chapanga moakalongulili kupwagha kupetela Musa.
Currently Selected:
Kubhoka 9: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
