Utumbulilu 22
22
Ibulahimu amboha Isaka nyambiku
1Paghapetiki mambu ghanihagha ghokapi Chapanga akundengiki Ibulahimu, na kumpwaghila, “Ibulahimu!”
Na Ibulahimu akayangike, “Nepambane!”
2Panihapa Chapanga akumpwaghile, “Untola mwana waku, Isaka, mwana waku wa kanjika joumpala, na ukajenda mbaka ku inchi ja Molia. Ukumboha konihoku ngati nyambiku ja kujochakeka panani ja chitombi chimuchaki chenakupwaghilaje.”
3Ibulahimu akajumwiki lukela pachibhombu lichobha lelijengalyaje, akaliandii liponda laki, akabhatoliki bhatumika bhaki bhabheli, papamu na mwana waki Isaka. Paakajomwi kuandaa hanju yamaheli kwa ndandi ja nyambiku ja kujochakeka, akabhokiki na kujenda mbaka pandu ambapu Chapanga akumpwaghile. 4Lichobha la akatatu Ibulahimu akajinwihi mihu ghaki, na kupabhona pandu pala cha kutali. 5Ibulahimu akabhapwaghi bhatumika bhaki, “Ntamanya pambane papamu na liponda, na nepani na mwana wangu tujenda kola kujojabhela, na anatukelabhuka kabhete.”
6Ibulahimu akatoliki hanju ya nyambiku heyi, na kuntweka mwana waki Isaka, jombi mweni akatoliki moto na mpamba mumabhoku ghaki, na bhokapi bhabheli bhakapiti papamu. 7Isaka akalongi na Ibulahimu atati waki, “Atati!”
Ibulahimu akayangike, “Naam, mwanango!”
Isaka akalalukile, “Lingalya, moto na hanju ibhile, nambu abhi kwaku mwanambelele wa nyambiku ja kujochakeka?”
8Ibulahimu akayangike, “Mwanango, Chapanga mweni anaalipekya mwanambelele kwa ndandi ja nyambiku jeniheji.” Na bhokapi bhabheli bhakajendali na mwanja wabho papamu.
9Na pabhakahikiki pandu pala ambapu Chapanga akumpwaghile, Ibulahimu akachengiki kwa maganga pandu pa kubhohakela nyambiku, na kuibheka hanju panani jake. Panihapa akunkongiki mwana waki Isaka mabhoku na mabholu, na kumbeka panani ja hanju yela. 10Ibulahimu akatoliki mpamba nahuli kunchinja mwana waki. 11Nambu mtumika wa kunani waka Bambo akundohiki Ibulahimu kuhuma kunani kumahunde, “Ibulahimu, Ibulahimu!”
Ibulahimu akayangike, “Ena Nepambanne.”
12Mtumika wa kunani jola akumpwaghile, “Ngawamuyonanga nkombu, wala ngawantenda lijambu lokapi lela. Sajenu manyi kubha unjojabhela Chapanga, maghambu ngechewanhibhalili mwana waku, mwana waku wa kanjika.”
13Ibulahimu akajinwi mihu ghaki, akalingalili na akaweni limbelele likambaku kunyuma jaki, lipatile manyelu ghaki muchitutu. Panihapa Ibulahimu akapiti kulitola limbelele heli, na kulibhoha kubha nyambiku ja kujochakeka pandu paka mwana wake. 14Ibulahimu akapalohiki pandu panihapa, “Yehova Yire,” yani, Bambo Chapanga anaatupekyaje. Ngati bhandu mobhapwaghila mbaka lalenu, “Pa chitombi chaka Bambo Chapanga, Chapanga abhapekeha bhandu bhaki.”
15Bhela mtumika wa kunani waka Bambo Chapanga akundohiki Ibulahimu kuhuma kunani kumahunde mala ja kabhele, 16akapwaghaje, “Nililapila namwete apwagha Bambo Chapanga, kwa kubha utendiki lijambu alele, wala ngachewanhibhalili mwana waku, mwana waku wa kanjika, 17chakaka ananukupengalyaje, na ananyonjukyaje lubheleku lwaku ngati ndondwa ya kunani kumahunde, na ngati luhanga lwa mumaheku ja bahali. Na lubheleku lwaku analutawalaje michi ja bhandu bhabhunhakalila, 18na kupetela lubheleku lwaku mataifa ghokapi gha pundema anaghapengalikaje, maghambu wehapa ujikamulakili amuli jangu.” 19Panihapa Ibulahimu akakelawiki kwa bhatumika bhaki, nabhombi bhakabhokiki papamu na kujenda ku Beil Sheba. Na Ibulahimu akatami ku Beli Sheba.
Bhana bhaka Naholi
20Paghapetiki mambu ghanihagha Ibulahimu akajowini kubha ndongu waku Naholi apatiki bhana bhachikambaku kuhuma kwaka Milika ndongu waku: 21Usi mbelakeka wa kutumbula, na Buzi ndongu waki, na Kemueli atati waka Alamu, 22na Kesedi, na Hazo, na Pilidashi, na Yidilafu na Besueli. 23Besueli akumbeliki Lebeka. Bhela bhela Milika akumbelakili Naholi ndongu waka Ibulahimu bhana nane habha. 24Bhela bhela lidaba laka Naholi, joakalowakiki Leuma, najombi akumbelakili bhana: Teba, na Gahamu, na Tahashi na Maaka.
Currently Selected:
Utumbulilu 22: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
