Utumbulilu 23
23
Kupotela kwaka Sala
1Sala akatami hyaka mia moja na ishilini na saba. Na akapotela. 2Sala akapotili ku Kiliasi Aliba hoku, yani Hebuloni mu inchi ja Kanaani. Ibulahimu akundeli Sala kwa machobha jatatu ngati moukabhelili ntetu.
3Ibulahimu akabhokiki palongi ja ntuhi waka nhwanu waki, na kujenda kulongela na Bhahiti, akapwaghaje, 4“Nepani ndama ngati nungeni pachilanda jino. Chondi, nunjopa pandu pa kutaghila, pabya pangu, nahuli mbata kuutagha ntuhi waka nhwanu wango.”
5Bhahiti bhakamuyangiki Ibulahimu, na kumpwaghila, 6“Wenga wa bambo witu, utujowanyaje tepani. Wehapa wa mundu nkolongwa namaa kwitu tepani, utagha ntuhi waku mu litengeli lokapi lela leulipala pachilanda ja matengeli ghitu. Njeta mundu pachilanda jitu joaweza kukuhibhalila litengeli laki, ngawitagha ntuhi waku.”
7Panihapa Ibulahimu akajemiki na kuchikama palongi ja bhenei bha inchi jela, yani Bhahiti. 8Najombi akalongi nabhu, akapwaghaje, “Ngati anamunyetakili nutagha ntuhi wangu abhoka palongi jangu, chondi munjopa Efuloni mwana waka Sohali kwa ndandi jangu, 9nahuli anhemalyaje limbaku laki la Makipela, lelibhi mu malindakanilu gha ngonda waki. Mumpwaghila anhemalyaje kwa bei jejipalika nahuli jibya pandu pangu pa kutagha, ananepa pambane pachilanda jinu.”
10Efuloni Mhiti akabhi atami pachilanda ja bhandu bhaki, akamuyangiki Ibulahimu palongi ja Bhahiti bhokapi bhabhakabhi pundyangu ukolongwa wa muchi. 11“Ngabhela bambo wangu, unyowanyaje. Nukupekeha ngonda ghola waka, na limbaku lelibhi mkati jaki. Nukupekeha palongi ja Bhahiti bhokapi. Utagha ntuhi waku.”
12Ibulahimu akachikimi kabhete palongi ja bhandu bha inchi jenijela. 13Ibulahimu akumpwaghi Efuloni, koni bhandu bhokapi bhakabya bhajowanela, “Chondi, nukulobha unyowanyaje. Ananukulepa mbija jejipalika ja ngonda wako. Na nukujopa ujopaje malepu ghani, nahuli nhwezaje kutagha ntuhi wango.”
14Efuloni akamuyangiki Ibulahimu, akapwaghaje, 15“Unyowanyaje bambo wango. Ngonda wa kuhemalela kwa mbija shekeli mia nne nde kike pachilanda jangu nepani na wehapa? Utaghaje ntuhi wako.” 16Ibulahimu akajetakili malobhi ghaka Efuloni. Na Ibulahimu akumpemili Efuloni mbija jela jeakalowile palongi ja Bhahiti bhokapi, hipandi mia nne ja madini ja feza, kulengana na ipemu ya bhabhalombesa na kuhemela bha chikahi chenihechi. 17Bhela ngonda waka Efuloni ghoukabhi ku Makipela pambipi na Mamile, limbaku na mikongu jokapi jejakabhi mkati ja malindakanilu gha ngonda hoghu, 18kubha waka Ibulahimu, palongi ja Bhahiti bhokapi bhabhakabhi bhahikiki pundyangu ukolongwa wa muchi.
19Bhela paghapetiki ghanihagha ghokapi Ibulahimu akuntaghiki Sala nhwanu waki mu limbaku mkati ja ngonda wa Makipela pambipi na Mamile, yani Hebuloni mu inchi ja Kanaani. 20Panihapa Bhahiti bhakumpeki Ibulahimu ngonda ghola papamu na limbaku lelakabhi monihomu kubha pandu paki pa kutagha.
Currently Selected:
Utumbulilu 23: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
