Utumbulilu 38
38
Yuda na Tamali
1Chikahi chenihechi, Yuda akahelili kuhuma kwa bhalongu bhaki, na kujenda kutama ku muchi wa Mwadulami, kwaka mundu jumu lihina laki Hila. 2Konihoku Yuda akumbweni mwali wa Kikanaani, lihina laki Shua. Akuntowili, na kughonela naku kihyegha. 3Shua akapatiki chitumbu, na kumbeleka mwana wa chikambaku, joakalowakiki lihina laki Eri. 4Shua akapatiki chitumbu kabhete, akumbeliki kabhete mwana wa chikambaku, akundohiki lihina laki Onani. 5Akajendalili, na kumbeleka kabhete mwana jongi wa chikambaku, akundohiki lihina laki Shela. Chikahi paakabhelakiki Shela, Yuda akabhi ku muchi wa Kezibu.
6Yuda akuntoghukili Eri, mbelakeka waki wa kutumbula mbomba, lihina laka mbomba hoju akalowakiki Tamali. 7Nambu Eri, mbelakeka wa kutumbula waka Yuda akabhi muhakau palongi jaka Bambo Chapanga, bhela Bambo Chapanga akunkomike. 8Bhela, Yuda akumpwaghi Onani, “Untolaje nhwanu waka ndongu waku joapotile abya nhwanu waku, ndandi nde moikupalaki kuhenga, nahuli umbelakya ndongu waku bhana.” 9Onani akamanyi kubha lubheleku holu ngalwikubhi lwaki, bhela kila paakahimangini kihyegha na nhwanu waka ndongu wake, akajitalili pahi imbeju ya chikambaku nahuli ngaambelakela ndongu waki bhana. 10Lijambu leakabhi alihenga lakabhi lihakau palongi jaka Bambo Chapanga, bhelabhela Bambo Chapanga akunkomiki Onani. 11Panihapa Yuda akumpwaghi Tamali, nhwanu waka mwana wake, “Ukelabhukaje kunyumba jaka tati waku, na kutama ngati mbomba joaweliwi na ndomi waki, mbaka mwana wangu Shela payikolaje.” Yuda akapwaghiki bhenibhela maghambu akabhi na choghoi kubha pangi najombi Shela akabya apotile ngati bhalongu bhake. Bhela, Tamali akakelawiki na kujenda kutama munyumba jaka tati waki.
12Paghapetiki machobha ghamaheli, mwali waka Shua, nhwanu waka Yuda akapotile. Yuda paakajomwili kulela malelu, akapiti ku Timna, kwa bhandu bhabhakabhi bhaheketa mangoma gha mambeleli ghaki, akapiti papamu na nkochi waki Hila, wa likabila la Mwadulami. 13Tamali akajowini kubha, “Nkowanu waku ajenda ku Timna, kuheketa mangoma gha mambeleli ghaki.” 14Akahuliki ingobhu yaki ya kuwelewa na ndomi, na kuliyeka kwa shela nahuli ngaimanyikana, na kujenda kutama pundyangu wa Enaimu, ghoubhi pindela kujenda ku Timna. Akahengiki bhenibhela maghambu akaweni kubha Shela akabhi akolike, nambu jombi ngacheatoghukiki kubha nhwanu wake.
15Bhela, Yuda paakumbweni akaholaki kubha nde mbomba nkemi, maghambu akabhi aliyekiki pamihu jake. 16Panihapa akabya ngakumanya kubha akabhi nkowanu waki, akunjendili punkeghi ja indela, na kumpwaghila, “Chondi, unyetakalyaje ng'onila na wehapa kihyegha.”
Tamali akundalukile, “Bho, anaumbekya kyane anang'onili na wehapa kihyegha?”
17Yuda akayangike, “Ananukuletila mwana mbuhe kuhuma mu libhongelu lango.”
Tamali akundalukile, “Bho, anaumbekya chindu chokapi chela ngati zamana mbaka pawiletaje mwana mbuhe?”
18Yuda akundalukile, “Nukupekya zamana bhole?”
Tamali akayangike, “Umbekya peti jaku ja muhuli, ngoji waki papamu na ndonga jejibhi mumabhoku ghaku.” Bhela, Yuda akumpeki Tamali hindu yokapi, na kughonela naku kihyegha, na Tamali akapatiki chitumbo. 19Bhela, Tamali akakelawiki kunyumba, na kuhula shela jeakaliyekiki jela, na kuwata kabhete ingobhu yaki ya kuwelewa na ndomi.
20Chikahi chela chela Yuda akuntumiki nkochi waki Mwadulami apelakaje mwana mbuhi jola, nahuli akelabhuhaje zamana yaki kuhuma kwaka mbomba jola, na nkochi waki jola ngacheakunhimani mbomba jola. 21Akabhalalukili bhandu bhabhatama pandu panipala, akapwaghaje, “Abhi kwaku mbomba nkemi joakabhi punkeghi ja indela ja ku Enaimu?”
Bhakamuyangike, “Pambani ngachepalabhali kubha na mbomba nkemi.”
22Bhela, akakelawiki kwaka Yuda na kumpwaghila, “Ngachenumbwene. Nakanopi ja ghanihagha, bhandu bhabhatama pandu panipala bhakapwaghiki, ‘Ngachepalabhali kubha na mbomba nkemi pandu pambane.’ ”
23Yuda akapwaghike, “Undekaje atolaje hindu yeniheye, nangabhela anatuhika kujeghaleka iyone. Lingalyaje, hata bhela nukumpelakili mwana mbuhe, nambu ngacheunhimanile.”
24Pajapetiki myehi jitatu, Yuda bhakumpwaghile, “Tamali nkowanu waku abhi mbomba nkeme, na mapitalilu ghaki abhi na chitumbo.”
Panihapa Yuda akalaghalakile, “Mumpiha kunja munjocha kwa moto mbaka apotilaje.”
25Pabhakabhi bhumpiha kunja, akatumiki ubholu kwaka nkowanu waki kupwagha, “Nepani mbekiwi chitumbu na mundu joabhi na hindu yenjeno. Bhela nukujopa umanyaje peti ajeji na ngoji waki, papamu na ndonga ajeji nde yaka nane.”
26Yuda akaimanyi hindu yeniheyi na kupwagha, “Tamali abhi na haki kupeta nepane, maghambu ngachenuntoghukili kwaka mwana wangu Shela nahuli akubha nhwanu wake.” Kutumbula lichobha leniheli Yuda ngacheaghonili kihyegha kabhete na Tamali.
27Chikahi chaka Tamali cha kulibhopola pachahikiki, kukabhi na bhana mabhela mulutumbu jake. 28Bhela, paakabhi alibhopola, mwana jumu akapihiki chiwoku chaki kunja, na mundu wa kubheleha akatoliki uzi ukeli na kuukonga mu chiwoku cha mwana jola, akapwaghaje, “Jonjoni nde joatumbwi kubhelakeka.” 29Nambu mwana hoju paakakelawihi chiwoku chaki mkati, ndongu waki akabhelakiki wa kutumbula. Panihapa akapwaghike, “Mbona upetiki kwa makili wehapa?” Bhela, lihina laki akalowakiki Pelesi. 30Palongi najombi ndongu waki akabhelakike, akabya abhi na uzi ukeli mu chiwoku chaki, jonihoju akalowakiki Zela.
Currently Selected:
Utumbulilu 38: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
