Utumbulilu 42
42
Bhabheli bhaka Yusufu bhajenda ku Misili
1Chikahi Yakobo paakajowini kubha ku Misili kubhi na mahunu, akabhapwaghi bhana bhake, “Maghambu kiki ndingalanila?” 2Akajendali kupwagha, “Ndingalyaje, nyowini kubha ku Misili kubhi na mahunu. Nhwelala konihoko mkatuhemalya chilebhe, nahuli tuweza kubha tabhome wala ngatwipotela.” 3Bhela bhabheli komi bhaka Yusufu bhakahelili ku Misili nahuli kuhemela chilebhe.
4Nambu Yakobo ngacheakuntumiki Benyamini, ndongu waka Yusufu, papamu na bhange, maghambu akajowipi ngaghihika kumpata mahakau.
5Bhela, bhana bha Izilaeli bhakabhi pachilanda ja bhala bhabhapiti ku Misili kuhemela chilebhe, maghambu injala ngolongwa jakabhi mbaka ku inchi ja Kanaani. 6Chikahi chenihechi Yusufu akabhi liwali wa inchi ja Misili, na akabhi nde joabhalombasela bhandu bhokapi chilebhe. Nabhombi bhabheli bhaka Yusufu pabhakahikiki, bhakunchikamili na kujinama ukutama mbaka pahi palongi jaki. 7Chikahi Yusufu paakabhaweni bhabheli bhaki, akabhamanye, nambu akalitendiki ngati ngeni kwabho. Akalongili nabhu kwa malobhi makali, na kubhapwaghila, “Mwehapa nhumiki kwako?”
Bhakayangike, “Tuhumiki ku inchi ja Kanaani, na tuhikiki kuhemela chilebhe.”
8Hata ngati Yusufu akabhamanyi bhabheli bhaki, nambu bhombi ngachebhummanye. 9Panihapa Yusufu akakombwiki ndoto yeakabhaloti bhabheli bhaki yela. Akabhapwaghile, “Mabhanganya bhapelelezi. Nhwikiki nahuli mbonaje pandu ambapu inchi jitu ngachepabhi na makile.”
10Bhombi bhakayangike, “Ngabhela bambo wito. Bhatumika bhaku tuhikiki kuhemela chilebhe. 11Tepani tabhokapi nde tabhana bhaka tati jumo. Tepani nde bhandu bhalongwana, wala nga bhapelelezi.”
12Yusufu akabhapwaghile, “Ngabhela! Nhwikiki pambani nahuli mbona pandu ambapu inchi jitu ngachepabhi na makile.”
13Bhombi bhakayangike, “Tepani bhatumika bhaku tukabhi komi na bhabheli, bhana bhaka tati jumu joatama ku Kanaani. Sajenu nnung'una witu ahighalili na tati kunyumba, na ndongu witu jongi ngacheabhile.”
14Yusufu akabhapwaghile, “Nde chakaka ngati monakumpwaghile,” nakapwaghaje, “Mwehapa nde bhapelelezi. 15Anana nde ntundu moanandengakakyaje: Chakaka ngati Falao moatamila, ngamboki pandu pambani mbaka ndongu winu nchoku ahika pambane. 16Muntumaje jumu winu ajendaje akundeta ndongu winu nchoku pambane, na mabhangi anambekakika muchifungo, nahuli malobhi ghinu ghalengakikaje na kubhona kubha ndongela chakaka. Nangabhela, chekaka ngati Falao moatamila mwehapa nde bhapelelezi.” 17Akabhabhekiki bhokapi muchifungo kwa machobha ghatatu.
18Lichobha la katatu Yusufu akabhapwaghile, “Ntenda anana nanamu anankubha mabhome, maghambu nepani nunjoghopa Chapanga. 19Anangati mwehapa nde mabhandu bhalongwana, jumu wa bhalongu bhinu na ahighalya muchifungo, na mabhangi mpelaka chilebhe kwa bhalongu bhino bhabhang'ahakika na injala. 20Nambu impalika kunetela ndongu winu nchoku pambane, nahuli malobhi ghinu ghabhonikana kubha nde chakaka, wala ngamwipotele.”
Bhela, bhakahengiki bhenibhela. 21Bhakapwaghanili bheni kwa bheni, “Chakaka tepani tukuntendili mahakau ndongu wito, maghambu tukumbweni akang'ahikaje, nambu ngachetunjowanile. Nde ndandi mang'ahiku ghangani ghatupata.”
22Leubeni akayangike, “Bho, ngachenumpwaghili kubha ngamwihenga lihakau panani jaka nkombu jola? Wala ngachemwajowine, bhela sajenu tulapulika kwa ndandi ja mwahi wake.” 23Wala ngachebhamanyi kubha Yusufu abhajowana, maghambu akabhi mkalimani pachilanda jabho. 24Yusufu akalitengiki nabhu na kutumbula kulela. Paakatumbili, akakelawiki, na kulonge nabhu kabhete. Panihapa akunkamwi Simeoni na kunkonga palongi ja mihu ghabho.
Bhabheli bhaka Yusufu bhakelabhuka ku Kanaani
25Yusufu akalaghalaki bhatwelakya magunila ghabhu ilebhe, na kukelabhuha mbija jaka kila jumu wabhu mkati ja ligunila lake, na kubhapekeha chilebhi cha mwindela. Bhenibhela nde moakabhahengile. 26Bhakabhekiki ilebhi yabhu panani ja maponda ghabhu, na kubhoka konihoku. 27Bhela pabhakahikiki pandu pa kughonela bhaghene ku indela hoku, jumu wabhu akabhopwili ligunila lake nahuli alipekya chilebhe liponda lake, akakangichi kubhona mbija jaki mundomu wa ligunila lake. 28Akabhapwaghi bhalongu bhake, “Mbija jangu jikelawike. Jepambani mundomu wa ligunila lango!” Pabhajowini ghanihagha, mitima jabhu jakang'ahakiki kwa choghoi, na kila jumu wabhu akung'anambuki njake, koni bhakabhaghajaje, na kupwagha, “Bho, aleli nde lijambu bhole leatuhengi Chapanga?”
29Pabhakahikiki kwaka Yakobo tati wabhu ku inchi ja Kanaani, bhakumpwaghili mambu ghokapi ghaghabhapatike. Bhakapwaghaje: 30“Chiongozi wa inchi jenijela akalongi na tepani kwa ukale, na kututenda tepani ngati bhapelelezi bha inchi jabho. 31Nambu tukumpwaghile, ‘Tepani nde bhandu bhalongwana, wala nga bhapelelezi. 32Tukabhelakiki bhalongu komi na bhabheli, bhalongu bhaka tati jumu. Jumu ngacheabhile, na nnung'una witu abhi papamu na tati witu ku inchi ja Kanaani.’ 33Panihapa chiongozi wa inchi jeniheji akatupwaghile, ‘Anana nde ntundu moanamanyilaje kubha mwehapa nde mabhandu bhalongwana: Mundeka jumu wa bhalongu bhinu papamu na nepani pambane, na mabhangi njendanya mkapelaka chilebhe kwa bhalongu bhino bhabhang'ahakika kwa injala. 34Nambu mukundeta ndongu winu nchoku Benyamini pambane, na panihapa nde anamanya kubha mwehapa nga bhapelelezi, nambu nde mabhandu bhalongwana. Panihapa ananunkelabhua ndongu winu Simioni, nanamu anamuweza kuhemela na kulombesa mu inchi jenjeno.’ ”
35Pabhakabhi bhapiha ilebhi kuhuma mu magulina ghabhu, bhakakangichi kubhona kila jumu wabhu akelabhukiwi mfuku wa mbija jake mkati ja ligunila lake. Pabhakaweni ghanihagha, bhokapi papamu na tati wabhu, bhakajowipi namaa. 36Yakobo tati wabhu akabhapwaghile, “Mwehapa mmokeha bhana bhango, Yusufu ngacheabhile, wala Simeoni ngacheabhile, najombi Benyamini mumpala kuntola. Mambu ghanihagha ghokapi ghambatiki nepani!”
37Panihapa Leubeni akumpwaghi tati waki, “Uweza kubhakoma bhana bhangu bhokapi bhabheli, ngati nganunkelabhui Benyamini kwako. Undeka Benyamini mumabhoku ghango, nanatu ananunkelabhua kwako.”
38Nambu Yakobo akapwaghike, “Mwana wangu ngaajendi konihoku papamu na mwehapa, maghambu Yusufu mbeli waki apotile, najombi ahighali kanjika jake. Ngati anaghumpatiki mahaku mu mwanja ghonjenda, anamuhelihaje mmutu wangu ghoubhi na hulia kulitengele kwa kubhina mtima.”
Currently Selected:
Utumbulilu 42: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
