Utumbulilu 44
44
Chikombi chibhonikana kwaka Benyamini
1Bhela Yusufu akundaghalaki mlonda wa nyumba jaki akapwaghaje, “Utwelakyaje chilebhe mu magunila gha bhandu abhabha kwa chipemu chebhiweza kutotola, ubhekaje na kila mbija jaka mundu mkati ja ligunila lake. 2Kabhete ubhekaje chikombi changu cha madini gha feza chela mu ndomu wa ligunila laka nchoku wa bhokapi jola, papamu na mbija ya kuhemela chilebhe.” Najombi akahengiki ngati Yusufu moakumpwaghile. 3Pakwahiki lukela, bhalongu habha bhakajetakaliwi bhabhokaje, papamu na maponda ghabho. 4Pabhakabhi bhakali nga kuhika kutali kuhuma kumbwane, Yusufu akumpwaghi mtumika wake, “Ubhajengalyaje bhalongu bhala manyata, anaubhahimanile, ubhapwaghilaje, ‘Bho, maghambu kiki ndepiki wambone kwa uhakau? 5Bho, chikombi achechi le nga cheanywelela bambo wango, na kutumila kulotela mambu ghaghihikaje? Haleli nde lijambu lihakau namaa lemulihengike!’ ”
6Akabhajengalili, na kubhahimanila, na kubhapwaghi malobhi ghanihagha. 7Nambu bhombi bhakumpwaghile, “Bambo, ubhi na ndandi bhole kulongela malobhi ngati ghanihagha? Lijambu leniheli likubha kutali na bhatumika bhako ngabhihika kuhenga lijambu ngati lenihele. 8Lingalya, hata bhela tukakelawihi madini gha feza ghala kuhuma ku inchi ja Kanaani ghatughahimani mu milomu ja magunila ghitu yela. Henu tuweza bhole kujibha madini gha feza au zahabu kuhuma munyumba jaka bambo wako? 9Bhela, anangati mundu jokapi jola pachilanda ja bhatumika bhaku anaakamuliki nachu, unkomaje, na tepani tabhangi anatubha bhatumwa bhaku.”
10Akayangike, “Bhela na kubya ngati mompwaghile, mundu joanabhonikana kubha abhi nachu, anaakubha mtumwa wango, nambu mabhangi mwenga ngamwikubhi na lawama.” 11Kila jumu wabhu akahengiki manyata kuheleya ligunila laki, na kulibhopola. 12Mundu jola akatumbwi kulonda, akatumbwili kwaka nkolongwa na kujomulela kwaka nchoko. Bhela, chikombi chakabhonakini mu ligunila laka Benyamini. 13Kwa lijambu haleli, bhakakachwili ingobhu yabho. Bhakabhekiki kila mundu chibwahila chaki panani ja liponda lake, na kukelabhuka kumbwane koakabhi atama Yusufu.
14Yusufu akabhi akali munyumba jake chikahi Yuda na bhalongu bhaki pabhakabhi bhajingila, bhokapi bhakunchikamili ukutama mbaka pahi palongi jake. 15Yusufu akabhapwaghile, “Bho, lijambu bholi haleli lemulihengike? Ngechemmanyi kubha mundu ngati nepani nhweza kughamanya mambu kwa indela ja kulotela?”
16Yuda akayangike, “Bho, tukupwaghila kyani bambo? Tupwagha kyane kubha ngachetubhi na lihakau? Chapanga aghayekwili mahakau gha bhatumika bhako. Sajenu tepani tabhokapi nde bhatumwa bhako, tepani tabhokapi papamu na jola joakapatakini na chikombi chako.”
17Nambu Yusufu akapwaghike, “Ngabhela! Nepani ngachenhweza kuhenga bhenibhela! Mundu jola pela joabhonakini na chikombi mumabhoku ghaki, jonihoju nde joanakubha mtumwa wango. Mwehapa mabhangi, nkelabhuka kunyumba jaka tati winu kwa lukwale.”
Yuda ankengalela Benyamini
18Panihapa Yuda akunheghalili, na kumpwaghila, “Chondi, bambo wango, nukujopa unyetakyaje kukupwaghila lilobhi wa bambo wango. Nukulobha ngawiyoma, kwa ndandi jaka mtumika wako, maghambu wehapa nde ngati Falao. 19Wehapa, wa bambo witu, ukatulalukili, ukapwaghaje, ‘Bho, mbi le na atati au ndongo?’ 20Natatu tukakuyangike, ‘Tubhili na tati witu, sajenu asejike, na kubha tubhili na nnung'una witu joabhelakiki mu useja waka tati wito. Ndongu waki apotile, na nchoku hoju nde kanjika jaki joahighalile na mabhu waki, na tati witu ampala namaa.’ 21Bambo, ukutupwaghili bhatumika bhaku, ‘Mundeta kwangu nahuli nhweza kumbona kwa mihu ghangu namwete.’ 22Natatu tukakupwaghile, wa bambo witu, ‘Nkombu ngacheaweza kundeka tati wake, anaandekiki, tati waki anaapotilaje.’ 23Nambu ukatupwaghili bhatumika bhako, ‘Nangakuhelela na nnung'una winu papamu na mwehapa, ngamwimoni sula jangu kabhete.’
24“Patwakelawiki kunyumba jaka mtumika waku, tati wangu, tukundandili malobhi ghaku ghawapwaghike, wa bambo wangu. 25Panihapa tati witu akapwaghike, ‘Nkelabhukaje ku Misili, mkahemala chilebhi chengi kichokope.’ 26Nambu tukumpwaghile, ‘Ngatuwezi kujenda ku Misili, mbaka ndongu witu nchoku abya papamu na tepani, maghambu ngatuwezi kumbona mundu jonihoju, ngati ndongu witu nchoku ngaajendi papamu na tepani.’ 27Mtunika waku, tati wangu, akatupwaghile, ‘Mmanyi kubha nhwanu wangu akamelakili bhana bhabheli bha chikambaku.’ 28Jumu wabhu akahobhiki, na nakapwaghike, ‘Chakaka ayonangiki ipandi ipandi na chinyama cha muchitengo, maghambu ngachenumbweni kutumbu chikahi cheniheche. 29Na ngati anamuntoliki kabhete hajoju, na mahakau anaghumpatiki, anamuheliya mmutu wangu ghoubhi na huliya mulitengeli kwa kubhina mtima.’
30“Bhela, ngati anambiti kwaka mtumika waku, tati wangu, pangakubha na nkombu hajoju papamu na tepani, ambaju matamu ghaki ghakamulini na matamu ghaka nkombu hajoju, 31ngati anaaweni nkombu ngacheabhile, anaapotilaje. Na tepani bhatumika bhaku anatuntenda mtumika waku, tati witu, kupotela kwa kubhina mtima. 32Maghambu nepani nakalibhohiki kubha mzamini waka nkombu hajoju kwaka tati wango, nakapwaghaje, ‘Nangakubhuja naku kwaku, anangubha na hatia kwaka tati wangu machobha ghokapi gha matamu ghango.’ 33Bhela, bambo, pepakoku uneka nepani mtumika waku nhighalya ngati mtumwa na wehapa pandu paka nkombu hajoju, na nkombu hajoju undeka ajendaje papamu na bhalongu bhake. 34Bho, ananhweza bhole kubhuja kwaka tati wangu, na nkombu ngacheabhi papamu na nepane? Ngawineka kujenda kughabhona mang'ahiku ghaanaghumpata tati wango.”
Currently Selected:
Utumbulilu 44: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
