Bhalawi 2
2
Nhupu ya uhembi
1Mundu jokapi anaaletiki nhupu ya uhembe kwaka Bambo Chapanga, nhupu jejiheji jibya ja uhembi laini. Ajeghala mahuta na ubani panani jaki. 2Bhela, anaabhaletilaje bhapenganyambiku bhana bha chikambaku bhaka Haluni. Mpenganyambiku anaatola libhundi limu lelitweli uhembi ghoubhi na mahuta gha zeituni, papamu na ubani wokapi na kujocha pamoto ngati kombukombu panani ja pandu pa kubhokeha nyambiku. Jeniheji nde nhupu ja kujochakeka kwa moto, jejinungi wichu na kunyambiha Bambo Chapanga. 3Nyambiku ja uhembi jejihighalile nde jaka Haluni na bhana bhaki. Jeniheji nde nhupu jihuhu namaa maghambu nde pandu pa nhupu jejibhohakeka kwaka Bambo Chapanga kwa moto.
4Ngati mundu anaaletiki nhupu ja uhembi jejijochakiki pamoto, jeniheji anajikubha ja mabumunda ghangakujeghalela amila gha uhembi laini ghouhangaghinwi na mahuta gha zeituni, na mabumunda mapependau ghangakubha na amila, na jejipakakiki mahuta gha zeituni.
5Ngati nhupu jaku ja uhembi ujilenganaki mu chikalangilu, anajibya ja uhembi laini ghouhangaghinwi na mahuta gha zeituni, panga kubheka amila. 6Mabumunda ghanihagha ughahekatanaje na kujeghe mahuta panani jaki, hajeji nde nhupu ja uhembi.
7Ngati nhupu jaku ja uhembi jitelakiki mu sufulia, ulenganakyaje kwa uhembi laini na mahuta gha zeituni. 8Uletaje nhupu heji ja uhembi jejilenganakiki kwa hindu yeniheyi kwaka Bambo Chapanga, na umpekya mpenganyambiku, jombi nde joanapelaka pandu pa kubhokeha nyambiku. 9Mpenganyambiku anaatola pandu pa nhupu jeniheji jakabya nde nhupu ja kombukombu na kujijocha panani ja pandu pa kubhokeha nyambiku. Jeniheji nde nhupu ja kujochakeka kwa moto, jejinungi wichu na kunyambiha Bambo Chapanga. 10Nhupu ja uhembi jejihighalile nde jaka Haluni na bhana bhaki. Jeniheji nde nhupu jihuhu namaa maghambu nde pandu pa nhupu jejibhohakeka kwaka Bambo Chapanga kwa moto.
11Kila nhupu ja uhembi jeuleta kwaka Bambo Chapanga jipalika jibya jangakujeghaleka amila, kwa ndandi ngacheikupalika kujocha amila jokapi jela au busi mu nhupu jejibhohakeka kwaka Bambo Chapanga kwa moto. 12Uweza kuleta kwaka Bambo Chapanga ngati nhupu ya malimbuku, nambu ngacheiweza kubhohakeka panani ja pandu pa kubhokeha nyambiku ngati unungilu unyahi wa kunyambiha Bambo Chapanga. 13Ujeghala mwinyo mu nhupu yaku yokapi ya uhembi. Ngawikotoka kujeghe mwinyu mu uhembi waku wa nhupu, maghambu mwinyu nde nginyulilu ja Lulaghilu loakahengiki Chapanga papamu na mwehapa, ubheka mwinyu mu nhupu yaku yokapi ya uhembi. 14Ngati anauletiki mahunu gha kutumbula gha nhupu ya ilebhi kwaka Bambo Chapanga, wibhoha mapukutu ghaghapondakiki gha mahunu ghahenu ghaghajochakiki kwa moto. 15Ujeghala mahuta gha zeituni panani jaki, na ubheka ubani panani jaki, jeniheji nde nhupu ja ilebhe. 16Mpenganyambiku anaajochaje pandu pa nhupu jeniheji jejipondakiki, na mahuta papamu na ubani waki wokapi, na kubha nyambiku ja kombukombu. Jeniheji anajikubha nhupu jejibhohakeka kwaka Bambo Chapanga kwa moto.
Currently Selected:
Bhalawi 2: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.