Bhalawi 23
23
Uwangalalu ghoubhekakiki
1Bambo Chapanga akumpwaghi Musa, 2Ubhapwaghila Bhaizilaeli anana: Ayeyi nde uwangalalu yangu nepani Bambo Chapanga ambayu itehi kupangakika anamkubha na uhimanganu uhuhu. Uwangalalu yeipangakiki nde ayeye: 3Kubhi na machobha sita ghamuweza kuhenga mahengu, nambu lichobha la saba nde Sabato ja kupomulela, lichobha la uhimanganu uhuhu. Ngamwihenga lihengu lokapi lela, pandu pokapi pala pamtama, jeniheji nde Sabato kwaka Bambo Chapanga. 4Uwangalalu yengi yangu nepani Bambo Chapanga nde ayeye, ambayu anamkubha na mihimanganu mihuhu mu chikahi chenihechi chechibhekakiki.
Uwangalalu wa Pasaka na Mabumunda Ghangakujegheleka Amila
Hesabu 28:16-25
5“Pasaka jaka Bambo Chapanga jitumbula pakamihe ja lichobha la komi na ncheche la mwehi wa kutumbula. 6Lichobha la komi na nhwanu la mwehi ghonihoghu wa kutumbula Uwangalalu waka Bambo Chapanga wa Mabumunda Ghangakujeghaleka Amila jitumbula, na kwa chikahi cha machobha saba anamkula mabumunda ghangakujeghaleka amila. 7Mu lichobha la kutumbula la kula mabumunda ghanihagha anamkubha na uhimanganu uhuhu, na mu lichobha leniheli ngamwihenga mahengu ghinu gha kila lichobha. 8Kwa machobha saba anamundetila Bambo Chapanga nyambiku ja kujochakeka kwa moto. Mu lichobha heli la saba anantenda uhimanganu uhuhu, na ngamwihenga mahengu ghinu gha kila lichobha.”
9Bambo Chapanga akumpwaghi Musa, 10Ubhapwaghila Bhaizilaeli anana: Chikahi pamwijingalaje mu inchi jenampekyaje na kuhuna mahunu gha inchi jeniheji, ndetaje kwaka mpenganyambiku lipukutu la mahunu gha kutumbula. 11Mpenganyambiku anaahenga nalu lipukutu heli nginyulila ja kumokeha nepani mu lichobha la kabheli baada ja Sabato, nahuli mpata kujetakalewa. 12Lichobha leniheli pamwikubha mtenda nginyulila ja kukweha lipukutu leniheli, impalika mmokiha nepani Bambo Chapanga nyambiku ja kujochakeka jaka mwanalimbeleli likambaku la chaka chimu langakubha na chilema. 13Papamu na nyambiku jeniheji, mwibhoha nhupu ja uhembe wa mahunu kilu ibheli ya uhembi laini ghouhangaghinwi na mahuta gha zeituni, mwimokiha nepani Bambo Chapanga kwa moto, na kunungila kwaki anakunyambiha nepani. Nyambiku jaki ja chakunywa anajikubha nde lita jimu ja divai. 14Mangani ja lichobha leniheli la kunete nepani Chapanga winu nyambiku jeniheji, ngamwikula mahunu ghinu gha kutumbula ng'o, ghakubhi mabhehi, au ghaghakalingwi, au ghaghajochakiki kubha mabumunda. Aleli analikubha lilaghalakilu la kutamakila kwa ibheleku yokapi yeihika, pandu pokapi pamwitamaje.
Uwangalalu wa Majuma
Hesabu 28:26-31
15“Mwibhalanga majuma saba kamili kutumbu lichobha lela lelijengalela baada ja Sabato, lichobha lela lemwileta lipukutu la nyambiku ja kumokeha kwa nginyulila nepani Bambo Chapanga. 16Mu lichobha la hamsini, lichobha la kabheli lelijengalela baada ja Sabato ja saba, mwimokiha nepani Bambo Chapanga nyambiku ja uhembi wahenu. 17Kuhuma pandu pokapi pamwitamaje, mwileta mabumunda ghabheli gha nyambiku ja kubhoha kwa nginyulila palongi jangu nepani Bambo Chapanga. Kila libumunda ipalika lilenganakikaje kwa kilu ibheli ya uhembi laini ghoujeghaliki amila, na libumunda leniheli mwimokiha nepani Bambo Chapanga kubha nde nhupu ya malimbuku ghinu. 18Papamu na ghanihagha, mwibhoha bhanambeleli saba bha chaka chimu, likambaku la ng'ombi limu, na mambeleli makambaku ghabheli, yangakubha na chilema. Hinyama yeniheyi anaikubha nyambiku ja kujochakeka papamu na nyambiku ya mahunu na nyambiku ya chakunywa. Kunungila kwa nyambiku yeniheyi anakunyambiha nepani Bambo Chapanga. 19Bhelabhela mwibhoha nyambiku ja lipongu limu la imbuhi kwa ndandi ja kubhoha mahoku, na bhanambeleli bhabheli bha chaka chimu, kwa ndandi ja nyambiku ja kutama kwa lukwale. 20Mpenganyambiku akwehaje bhanambeleli bhabheli habha palongi jangu nepani Bambo Chapanga kubha nyambiku ja kujinuliwa, papamu na libumunda la mahunu gha kutumbula. Jeniheji nde nyambiku jihuhu kwangu nepani Bambo Chapanga, nayombi anaikubha kwa ndandi jaka mpenganyambiku. 21Mu lichobha leleli mwitangaza uhimanganu uhuhu, na ngamwihenga mahengu ghinu gha kila lichobha. Aleli analikubha lilaghalakilu la mileli kwa ibheleku yokapi yeihika, pandu pokapi pamwitamaje.
22“Pauhuna mahunu gha mungonda, ngawihuna nakanopi mbaka mu malindakanilu gha mungonda waku ng'o, wala ngawikelabhuka kunyuma kubhongana mahighalilu. Nepani nde Bambo Chapanga, Chapanga winu.”
Uwangalalu wa Chaka Chahenu
Hesabu 29:1-6
23Bambo Chapanga akumpwaghi Musa, 24“Ubhapwaghila Bhaizilaeli anana: Mu lichobha la kutumbula la mwehi wa saba anamkubha na lichobha la kupomulela, lipomulelu lihuhu la ukombukelu lelitangazwaje kwa kulapu mbata. 25Ngamwihenga mahengu ghinu ghokapi ghala gha kila lichobha, nambu mbohaje nyambiku jejijochakiki kwa moto kwangu nepani Bambo Chapanga.”
Lichobha la Ujonganesu
Hesabu 29:7-11
26Bambo Chapanga akumpwaghi Musa, 27“Lichobha la komi la mwehi hoghu wa saba nde lichobha la ujonganesu. Lichobha leniheli mwihenga uhimanganu uhuhu, mkonga kula, nanamu mboha nyambiku ja kujochakeka kwa moto kwangu nepani Bambo Chapanga. 28Ngamwihenga lihengu lokapi lela mu lichobha leniheli, maghambu nde lichobha la ujonganesu ghouhengakeka kwa ndandi jinu palongi jangu nepani Bambo Chapanga, Chapanga winu. 29Mundu jokapi jola jwangakukonga kula mu lichobha leniheli, impalika atengakika kutali la bhandu bhake. 30Mundu jokapi jola joanahenga lihengu mu lichobha leniheli, ananunjonangaje abhoka pachilanda ja bhandu bhake. 31Ngamwihenga lihengu la ntundu wokapi ghola ng'o. Aleli analikubha lilaghalakilu la mileli kwa ibheleku yokapi yeihika, pandu pokapi pamwitamaje. 32Lichobha leniheli, kwinu analikubha nde Sabato ja kupomulela na kukonga kula. Lichobha la Sabato nde kutumbu pakamihi ja lichobha la tisa la mwehi ghonihoghu, mbaka pakamihi ja lichobha lelijengalela.”
Uwangalalu wa Indamba
Hesabu 29:12-40
33Bambo Chapanga akumpwaghi Musa, 34Ubhapwaghila Bhaizilaeli anana: Mu lichobha la komi na nhwanu la mwehi wa saba nde uwangalalu wa indamba ja kuntopela Bambo Chapanga, kwa chikahi cha machobha saba. Ghonihoghu nde uwangalalu waka Bambo Chapanga. 35Lichobha la kutumbula la machobha saba hagha, mwikubhaje na uhimanganu uhuhu wa kujojabhela, ngamwihenga mahengu ghinu gha kila lichobha. 36Kwa machobha saba mwibhoha nyambiku ja kujochakeka kwa moto kwaka Bambo Chapanga. Mu lichobha la nane anamkubha na uhimanganu ukolongwa na kumbokeha Bambo Chapanga nyambiku ja kujochakeka. Uhimanganu ghonihoghu nde uhuhu, na ngamwihenga mahengu ghinu gha kila lichobha.
37Ayeyi nde uwangalalu yaka Bambo Chapanga yeiamuliwi, ambayu anamwitangaza kubha mihimanganu mihuhu kwa kumbokeha Bambo Chapanga nyambiku yeibhohakeka kwa moto, nyambiku ya kujochakeka, nyambiku ya mahunu na nyambiku ya chakunywa, kila nyambiku mu lichobha laki. 38Nyambiku yeniheyi nde papamu na yela yemmokeha nepani Bambo Chapanga mu lichobha la Sabato ngati bhela nyambiku hinu ya kila lichobha, nyambiku ya kutimiza nazili hinu, na nyambiku hinu ya kupala mabhete yemmokeha nepani Bambo Chapanga.
39Ananjomwi kuhuna mighonda jinu, mwihenga uwangalalu waka Bambo Chapanga kwa chikahi cha machobha saba, kutumbu lichobha la komi na nhwanu la mwehi wa saba. Lichobha la kutumbula la machobha ghanihagha nde lichobha la kupomulela, bhelabhela na lichobha la nane nde lichobha la kupomulela. 40Mu lichobha la kutumbula mwitola mapambiku manyahi gha mikongu jinu, mambandi gha mitende, mambandi ghaghabhi na mahamba ghamaheli, na mambandi gha mikongu jejimela munkeghi ja nkoka, nanamu mwihenga uwangalalu palongi jaka Bambo Chapanga, Chapanga winu, kwa machobha saba. 41Kila chaka impalika kutenda uwangalalu aghoghu kwa chikahi cha machobha saba kwa ndandi ja kuntopela Bambo Chapanga. Aleli analikubha lilaghalakilu la mileli kwa ibheleku hinu yokapi yeihika. Mtendaje uwangalalu hoghu mu mwehi wa saba. 42Mwitamaje mu indamba kwa machobha saba. Bhabhelakeka bhokapi bha Izilaeli bhitamaje mu indamba, 43nahuli bhabhelakeka bhinu bhamanyaje kubha nakabhatendiki Bhaizilaeli bhatamaje mu indamba chikahi panakabhabhohiki kuhuma mu inchi ja Misili. Nepani nde Bambo Chapanga, Chapanga winu.
44Bhela Musa akabhatangazi Bhaizilaeli uwangalalu yeibhekakiki na Bambo Chapanga.
Currently Selected:
Bhalawi 23: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.