Bhalawi 27
27
Shelia panani ja nhupu yaka Bambo Chapanga
1Bambo Chapanga akumpwaghi Musa, 2“Ubhapwaghila Bhaizilaeli anana, ‘Ngati mundu jokapi jola anaabhekiki nazili ja kumboha mundu kwa ndandi jaka Bambo Chapanga, mundu jonihoju aweza kujibhoha nazili jaki kwa kulepa mbija ngati moipangakike. 3Mwanalomi wa hyaka ishilini mbaka sitini anaakombuliwa kwa ipandi hamsini ya madini gha feza, kulengana na chipemu chechibhekakiki mu pandu pahuhu. 4Ngati nde mbomba, anaakombuliwa kwa ipandi selasini ya madini gha feza. 5Ngati mundu jonihoju nde wa hyaka nhwanu mbaka ishilini, anaakombuliwa kwa ipandi ishilini ya madini gha feza kwaka mwanaloni, na ipandi komi ya madini gha feza ngati nde mbomba. 6Ngati mundu jonihoju nde wa mwehi ghumu mbaka hyaka nhwanu, anaakombuliwa kwa ipandi nhwanu ya madini gha feza ngati nde mwanalomi, na ipandi itatu ya madini gha feza ngati nde mbomba. 7Ngati mundu jonihoju anaabhi na hyaka sitini na kujendalela, anaakombuliwa kwa ipandi komi na nhwanu ya madini gha feza ngati nde mwanalomi, na ipandi komi ya madini gha feza ngati nde mbomba.’ ”
8Nambu anangati mundu joabhekiki nazili hoju nde kahochu nakanopi, na kubha ngacheaweza kulepa pandu panihapa pa madini gha feza, ampelaka mundu hoju kwaka mpenganyambiku. Najombi mpenganyambiku anaapemaje samani jaka mundu hoju, kulengana na chela cheaweza kulepa mundu jola joabhekiki nazili.
9Ngati nazili jeni abhekiki chinyama cha ntundu ambau bhandu bhaweza kumbokeha nyambiku Bambo Chapanga, bhela chinyama chenihechi anachikubha chihuhu kwaka Bambo Chapanga. 10Mundu ngacheapalika kuching'anambula chinyama chenihechi kwa chengi, chamboni kwa chihakau, au chihakau kwa chamboni. Ngati anaang'anambwili kwa chinyama chengi, hinyama yokapi ibheli anaikubha ihuhu kwaka Bambo Chapanga. 11Ngati nazili jeniheji akabhekiki chinyama chihakau, cha ntundu ambau ngacheipalika kumbokeha Bambo Chapanga nyamabiku, bhela, mundu joabhohiki achiletaje chinyama hechi kwaka mpenganyambiku. 12Mpenganyambiku anaachipema chinyama hechi na kubhona unyahi au uhakau waki. Samani ambaju mpenganyambiku anaapwaghilaje, bhenibhela nde mokwibhelilaje. 13Ngati mweni chinyama hechi anaapaliki kuchikombola chinyama chaki, bhela, impalika ajonjukyaje asilimia ishilini ja samani ja chinyama chenihechi.
14Mundu anaajibhekiki nyumba jaki kwa kujitenda kubha jaka Bambo Chapanga, mpenganyambiku anaapwaghaje samani ja nyumba jeniheji kulengana na unyahi au uhakau waki. Ngati mpenganyambiku moaipwaghilaje samani jaki, bhenibhela nde mokwibhelilaje. 15Ngati mundu joajitengiki nyumba heji kubha jaka Chapanga anaapaliki kujikombola, bhela, anaimpalika kujonjukela asilimia ishilini ja samani ja nyumba heji, najombi anajikubha mali ghaki.
16“Mundu anaabhekiki pandu pa ngonda waki kwaka Bambo Chapanga, bhela, samani jaki anajipemakika kwa kulingalila imbeju yeitumika kupanda mu ngonda ghonihoghu. Kwa kila kilu ishilini ya shaili, samani ja ngonda ghonihoghu anaukubha ipandi hamsini ya madini gha feza. 17Ngati anaabhekiki ngonda waki kwaka Bambo Chapanga mu chaka cha Jubilii, yani kombukombu ja hyaka hamsini, samani jaki anajipemakika bhelabhela kulengana na ipemu hinu. 18Nambu ngati anaabhekiki kwaka Bambo Chapanga baada ja chaka chenihechi cha Jubilii, bhela, mpenganyambiku anaabheka samani jaki kulengana na hyaka yeihighalile mbaka kuhika mu chaka cha Jubilii chechihika, na samani jaki anajikepaje. 19Ngati mweni ngonda ghonihoghu anaapaliki kuukombola, anaimpalika kujonjukela asilimia ishilini ja samani ja ngonda ghonihoghu, na ngonda hoghu anaukubha mali ghaki. 20Nambu ngati ngacheapala kuukombola, au ngati anaandombasi mundu jongi ngonda ghonihoghu, bhela, ngacheiwezikana kuukombola ng'o. 21Chaka cha Jubilii anachihikiki, ngonda ghonihoghu anaulekakiwaji na kubha uhuhu kwaka Bambo Chapanga. Nawombi anaukubha mali ghaka mpenganyambiku.”
22Ngati mundu anaabhekiki kwaka Bambo Chapanga ngonda ghoahemili, yani nde pandu pangakubha pa upwelelu waki, 23mpenganyambiku anaapwaghaje samani ja ngonda ghonihoghu kulengana na hyaka yeihighalile mbaka kuhika mu chaka cha Jubilii, na mundu jonihoju anaimpalika kulepa samani jaki mu lichobha leniheli, ngati nde chindu chihuhu kwaka Bambo Chapanga. 24Nambu mu chaka cha Jubilii, ngonda ghonihoghu anaipalika akelabhukiwaje mundu jola joakalombise.
25Kila samani jipalika jipemakikaje kwa chipemu cha kutopa cha kupemela ipandi ya madini gha feza cha pandu pahuhu: Pambipi na lobu kilu ya madini gha feda ilengana na chipandi chimu cha madini gha feza.
26Nambu njeta mundu joanaimpalika kumbeka kwaka Bambo Chapanga mbelakeka waki wa kutumbula wa hinyama, jikubhi ng'ombi au imbuhi, maghambu yeniheyi tayali nde yaka Bambo Chapanga. 27Ngati chinyama hechi nde chihakau, mweni chinyama hechi anaachihemalaje kulengana na samani jaki, na kujonjukela asilimia ishilini ja samani jeniheji. Ngati chinyama hechi ngachikombulewi, bhela, anachihemaliwaje kulengana na ipemu ya pandu pahuhu.
28Nambu chindu chokapi chela chechibhekakiki kwaka Bambo Chapanga, akubhi nde mundu, au chinyama, au ngonda ghoupatakini kwa kupwelela, ngawihemalewi wala kukombulewa. Chokapi chela chechibhekakiki kwaka Bambo Chapanga, chenihechi nde chihuhu namaa kwaka Bambo Chapanga.
29Mundu jokapi jola joabhekakiki kwaka Bambo Chapanga nahuli ayonangikaje, ngacheaweza kukombulewa. Mundu ngati jonihoju ipalika akomakikaje.
30Zaka ja mahunu au mapambiku gha mikongu, yokapi nde mali ghaka Bambo Chapanga, yeniheyi nde ihuhu kwaka Bambo Chapanga. 31Ngati mundu anaapaliki kupakombola zaka jaki, anaimpalika kulepa samani jaki na kujonjukela asilimia ishilini ja samani ja zaka jaki. 32Zaka kubhokana na hinyama yokapi kuhuma mu lipogha la ng'ombi, au mambeleli, na imbuhi, kila chinyama cha komi chechipeta pahi ja ndonga jaka jola joadima, anachikubha chihuhu kwaka Bambo Chapanga. 33Mundu jokapi jola ngailalukila kubhokana na unyahi au uhakau wa chinyama chenihechi, wala chinyama chenihechi ngacheipalika kung'anambuliwa kwa chinyama chengi ng'o. Ngati anaching'anambuliwi kwa chinyama chengi, hinyama yokapi ibheli anaikubha ihuhu, na ngaiwezikani kuikombola.
34Yeniheyi nde amuli ambayu Bambo Chapanga akundaghalaki Musa nahuli abhapwaghila Bhaizilaeli panani ja chitombi cha Sinai.
Currently Selected:
Bhalawi 27: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.