Bhalawi 4
4
Nyambiku kwa ndandi ja mahoku
1Bambo akumpwaghi Musa, 2Ulongilaje na Bhaizilaeli, na kubhapwaghila: Ngati mundu jokapi jola anaatendiki lihoku panga kuholakela, kwa kuhenga lijambu lokapi lela lelikanakiwi mu Amuli yaka Chapanga, anaimpalika kuhenga anana:
3Ngati mpenganyambiku joapakakiki mahuta nde joahengiki lihoku, kwa kubhatenda bhandu bhabhonikana bhatehi kuhokela, bhela jonihoju anaimpalika kumbokeha Bambo Chapanga litoli likambaku langakubha na chilema, kubha nyambiku ja kubhoha mahoku. 4Aletaje litoli likambaku heli pundyangu wa Lihema Lihuhu, palongi jaka Bambo Chapanga, najombi abhekaje chiwoku chaki panani ja mmutu wa litoli likambaku heli, na kulichinja palongi jaka Bambo Chapanga. 5Bhela mpenganyambiku hoju joajeghaliki mahuta anaatola pandu pa mwahi wa likambaku heli na kuleta mu Lihema Lihuhu. 6Anaajwiha lukonji lwaki mu mwahi ghonihoghu na kumicha mwahi ghonihoghu palongi jaka Bambo Chapanga mala saba, palongi ja lipazia leligabhanyisha Pandu Pahuhu na Pandu Pahuhu Nakanopi. 7Bhela mpenganyambiku anaatola pandu pa mwahi ghonihoghu na kupaka mu manyelu gha pandu pa kubhokeha nyambiku ya kuhukila ubani na unungilu unyahi palongi jaka Bambo Chapanga mu Lihema Lihuhu. Mwahi ghouhighalila ajitala pahi ja matamilu gha pandu pa kubhoke nyambiku ya kujochakeka kwa moto jejibhi pambipi na ndyangu wa Lihema Lihuhu. 8Bhela aghabhohaje mahuta ghokapi gha ng'ombi jeniheji ja nyambiku ja kubhoha mahoku, mahuta ghaghayekalela matumbu, na ghaghayekalela hindu yengi ya mkati, 9na figu yokapi ibheli na mahuta ghaghabhi panani jaki pambipi na chibhunu, na ghala ghaghayekelela pandu panyahi pa imani, ghanihagha ghokapi aghabhohaje, 10ngati bhela mahuta ghaghabhohakeka kuhuma mu ng'ombi jejibhohakiki nyambiku ja lukwali. Panihapa mpenganyambiku ajijochaje kwa moto panani ja pandu pa kubhokeha nyambiku ya kujochakeka. 11Nambu ngozi ja lipongu leniheli na inyama jaki jokapi, papamu na mmutu na magholu ghaki, matumbu na imahi ghaki, 12yani pandu pangi pokapi papahighalile pa lipongu leniheli, aipelaka kunja la likambi mbaka pandu panyahi papajetakalewa na Chapanga, pala pabhalekela ilihu, najombi aijochaje kwa moto panani ja hanju yela yeibhi panani ja lundu lwa ilihu.
13Ngati bhandu bhokapi bha Izilaeli anabhahengiki lihoku panga kuholakela, kwa kuhenga lijambu lela lelikanakiwi mu Amuli jaka Bambo Chapanga, hata ngati bhandu ngachebhamanyi panani ja lijambu leniheli, bhabhi na mahakau. 14Pabhimanyaje kubhokana na lihoku lebhahengiki, bhandu bhokapi anaibhapalika kubhoha litoli likambaku kubha nyambiku ja kubhoha mahoku. Ibhapalika bhaletaje litoli heli palongi ja Lihema Lihuhu laka Bambo Chapanga. 15Bhela ihongozi bha bhandu anabhabheka mabhoku ghabhu panani ja mmutu wa likambaku leniheli lelibhi palongi jaka Bambo Chapanga, na kuchinjakika panihapa. 16Bhela mpenganyambiku joajeghaliki mahuta anaaletaje mwahi wa likambaku leniheli mkati ja Lihema Lihuhu. 17Anaajwiha lukonji lwaki mu mwahi na kumicha mala saba palongi ja lipazia leligabhanisha Pandu Pahuhu na Pandu Pahuhu Nakanopi, palongi jaka Bambo Chapanga. 18Bhela, pandu pa mwahi apakaje mu manyelu gha pandu pa kubhokeha nhupu ya ubani jejibhi mkati ja Lihema Lihuhu palongi jaka Bambo Chapanga. Mwahi ghowihighalyaje aujitalaje pahi ja matamilu gha pandu pa kubhokeha nyambiku ya kujochakeka jejibhi pambipi na ndyangu wa Lihema Lihuhu. 19Bhela aghatola mahuta ghokapi gha likambaku leniheli na kughajocha panani ja pandu pa kubhokeha nyambiku. 20Bhela alitendaje likambaku aleli ngati moakalitendile likambaku lengi lela la nyambiku ja kubhoha mahoku. Kwa kuhenga bhenibhela mpenganyambiku hoju anaabhatendila bhandu ujonganesu, nabhombi anabhalekakiwa mahoku ghabhu. 21Bhela atolaje pandu pa inyama ja likambaku heli na kujipeleka kunja ja likambi, na kujijocha kwa moto ngati moakahengi kwa likambaku lengi lela. Jeniheji nde nyambiku ja kubhoha mahoku kwa ndandi ja bhandu bhokapi.
22Chikahi chiongozi anaatendiki mahoku panga kuholakela, kwa kuhenga ghaghakanakiwi mu Amuli jaka Bambo Chapanga, Chapanga waki, joakanakili mambu ghanihagha ngaghihengakeka, panihapa akubha na mahoku. 23Anaapwaghakiki lihoku leahengiki, impalika aletaje lipongu la imbuhi langakubha na chilema kubha nyambiku jaki. 24Abhekaje chiwoku chaki panani ja imbuhi jeniheji, na kujichinja pandu pala ambapo nyambiku ya kujochakeka ichinjakika palongi jaka Bambo Chapanga. Ajeji nde nyambiku ja kubhoha mahoku. 25Bhela mpenganyambiku anaatolaje pandu pa mwahi wa nyambiku ja kubhoha mahoku kwa lukonji lwaki, na kumicha mu manyelu gha pandu pa kubhokeha nyambiku ja nyambiku ya kujochakeka, na kujitila mwahi ghouhighalila pahi ja matamilu gha pandu pa kubhokeha nyambiku. 26Bhela mpenganyambiku aghajochaje mahuta ghokapi gha imbuhi jeniheji panani ja pandu pa kubhokeha nyambiku, ngati moakahengile kwa mahuta ghangi gha nyambiku ya kutama kwa lukwale. Kwa kuhenga bhenibhela mpenganyambiku anaakubha atendiki ujonganesu wa mahoku kwa ndandi jaka chiongozi jonihoju, najombi anaalekakiwa mahoku ghaki.
27Ngati mundu jokapi jola kuhuma pachilanda ja bhandu anaahengiki mahoku panga kuholakela, kwa kuhenga lijambu lelikanakiwi mu Amuli jaka Bambo Chapanga, jonihoju akubha na mahoku. 28Anaapwaghakiki mahoku ghaki ghaatendiki, impalika aletaje imbuhi jimbomba jangakubha na chilema, kubha nyambiku jaki ja kubhoha mahoku ghaatendike. 29Mundu jonihoju abhekaje chiwoku chaki panani ja mmutu wa nyambiku jaki ja kubhoha mahoku, na kijichinja pandu pala pabhachinjila hinyama yengi ya nyambiku ya kujochakeka. 30Bhela mpenganyambiku atolaje pandu pa mwahi wa nyambiku jeniheji kwa lukonji lwaki, na kumicha mu manyelu gha pandu pa kubhokeha nyambiku ya kujochakeka, na kujitila mwahi ghouhighalila pahi ja matamilu gha pandu pa kubhokeha nyambiku. 31Aghabhohaje mahuta ghokapi mkati ja chinyama hechi, ngati moakabhohile mahuta kuhuma mu nyambiku ya kutama kwa lukwale, najombi mpenganyambiku aghajochaje panani ja pandu pa kubhokeha nyambiku kubha unungilu unyahi wa kunyambiha Bambo Chapanga. Kwa kuhenga bhenibhela mpenganyambiku anaakubha atendiki ujonganesu kwa ndandi jaka mundu jonihoju, najombi anaalekakiwa mahoku ghaki.
32Ngati anaaletiki mwanalimbeleli kubha nyambiku jaki ja kubhoha mahoku, aletaje limbeleli limbomba langakubha na chilema. 33Mundu hoju abhekaje chiwoku chaki panani jaka mwanalimbeleli heli la nyambiku ja kubhoha mahoku, najombi anaalichinjaje pandu pala pabhachinjila nyambiku ya kujochakeka. 34Bhela mpenganyambiku atolaje pandu pa mwahi wa nyambiku jeniheji ja kubhoha mahoku kwa lukonji lwaki, na kumicha mu manyelu gha pandu pa kubhokeha nyambiku ya kujochakeka. Mwahi ghouhighalila aujitalaje pahi ja matamilu gha pandu pa kubhokeha nyambiku. 35Aghabhohaje mahuta ghokapi mkati ja chinyama hechi, ngati moakabhokile mahuta kuhuma mu limbeleli la nyambiku ja kutama kwa lukwale, na mpenganyambiku aghajochaje panani ja pandu pa kubhokeha nyambiku, papamu na nyambiku yeibhihakeka kwaka Bambo Chapanga kwa moto. Kwa indela jeniheji mpenganyambiku anaakubha antendili ujonganesu kwa ndandi ja mahoku ghaki, najombi anaalekakiwaje mahoku ghaki.
Currently Selected:
Bhalawi 4: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.