ᒨᓯᓯ ᐂᑉᐸᖏᑦ 16
16
ᐃᓴᕆᐊᓕᒥᐅᑦ ᓂᕿᒃᓴᕐᑖᕐᑎᑕᐅᓂᖏᑦ ᒫᓇᓂᒃ ᐊᕿᒡᒋᐅᔭᓂᒡᓗ ᕿᓚᖕᒥᑦ ᑲᑕᒃᑐᓂᒃ
1ᑕᕝᕙᓐᖓᓪᓗ ᐃᓴᕆᐊᓕᒥᐅᓕᒫᑦ ᐊᐅᓪᓚᕐᐳᑦ ᐃᓕᒻᒥᒃ ᐊᑎᓕᖕᒥᑦ, ᐅᓪᓗᐃᓪᓗ 15ᖓᓐᓂ ᑕᖅᑭᐅᑉ ᐂᑉᐸᖓᓂ ᐄᑦᔨᑉᑎᒥᑦ ᐊᐅᓪᓚᕐᕕᒋᓚᐅᕐᑕᖓᓐᓂᑦ. ᓄᓇᒧᑦ ᓯᓐᒧᑦ ᑎᑭᑉᐳᑦ ᐃᓄᖃᖏᑦᑐᒧᑦ, ᓄᓇᐅᑉ ᐃᓕᒻᒥᐅᑉ ᓮᓁᓪᓗ ᐊᑯᓐᓂᖓᓐᓃᑦᑐᒧᑦ. 2ᑕᕝᕙᓂᓗ ᐃᓄᖃᖏᑦᑐᒥ ᓄᓇᖃᓕᕐᓗᑎᒃ ᐃᓴᕆᐊᓕᒥᐅᓕᒫᑦ ᓈᒻᒪᒃᓴᖏᑦᔪᑎᒥᖕᓂᒃ ᐅᖃᓕᕐᐳᑦ ᒨᓯᓯᒧᑦ ᐂᕉᓂᒧᓪᓗ. 3ᐅᖃᕐᓗᑎᒡᓗ, “ᐄᑦᔨᑉᑎᒦᑎᓪᓗᑕ ᐊᑕᓂᐅᑉ ᑐᖁᑎᓐᓂᕐᐸᑎᒍᑦ ᐊᑲᐅᓂᕐᓴᐅᑲᓴᖕᓂᕐᐳᖅ, ᑍᑲᓂᓕ ᓂᕿᑐᕈᓐᓇᖃᑦᑕᓚᐅᕋᑦᑕ ᐊᓯᖏᓐᓂᒡᓗ ᓂᕆᔪᒪᔭᓕᒫᑦᑎᓐᓂᒃ, ᒪᐅᖓᓕ ᓯᐅᕅᓐᓈᓗᖕᒧᑦ ᑕᒪᑦᑕ ᑳᖕᓂᕐᒧᑦ ᐱᕐᓕᕐᑎᒋᐊᕐᑐᕐᓂᕐᐱᑎᒎᑦ?”
4 #
ᔪᐊᓇᓯ 6:31. ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᓂᕿᒃᓴᑦᓯᓐᓂᒃ ᕿᓚᖕᒥᑦ ᑲᑕᒐᕐᑎᑦᓯᓂᐊᕋᒪ ᓯᓚᓗᒃᑐᑎᑐᑦ. ᐃᓄᐃᑦ ᖃᐅᑕᒫᑦ ᐅᓪᓗᒧᑦ ᐊᑕᐅᓯᕐᒧᑦ ᓂᕿᒃᓴᒥᖕᓂᒃ ᑲᑎᑦᓯᔭᕐᑐᖃᑦᑕᕆᐊᖃᕐᓂᐊᕐᐳᑦ, ᑍᒤᓕᐅᕐᑎᓪᓗᒋᑦ ᖃᐅᔨᓴᕈᓐᓇᕐᓂᐊᕐᐸᒃᑲ ᐱᖁᔭᓐᓂᒃ ᐊᑐᕐᓯᔪᓐᓇᕐᓂᐊᕐᒪᖔᑕ. 5ᐅᓪᓗᑦ 6ᖓᓐᓂ ᒪᕐᕈᐊᕐᑎᓪᓗᐊᕐᑐᒥᒃ ᑲᑎᑦᓯᔭᕆᐊᖃᖃᑦᑕᕐᓂᐊᕐᐳᑦ ᐱᐅᓯᕐᒥᒃᑐᓪᓗ ᑖᓐᓇ ᐅᐸᓗᖎᔭᕐᓗᒍ.”
6ᒨᓯᓯᓗ ᐂᕉᓂᓗ ᐃᓴᕆᐊᓕᒥᐅᓂᒃ ᐅᖃᐅᑦᔨᓕᕐᐴᒃ, “ᐅᓐᓄᒃ ᒫᓐᓇ ᖃᐅᔨᓂᐊᓕᕐᐳᓯ ᐊᑕᓂᕐᒧᑦ ᑭᓯᐊᓂ ᐊᐅᓪᓚᕐᑎᑕᐅᓯᒪᓂᑦᓯᓐᓂᒃ ᐄᑦᔨᑉᑎᒥᑦ. 7ᐅᓪᓛᒃᑯᑦ ᐊᑕᓂᐅᑉ ᓇᔫᑎᓂᖓᑕ ᖃᐅᒪᓂᖓ ᑕᑯᓂᐊᕐᐸᓯ, ᓈᒻᒪᒃᓴᖏᑦᔪᑎᒋᔭᓯ ᑖᑦᓱᒪ ᑐᓴᕐᒪᒋᑦ, ᓱᖕᒪᑦ ᓈᒻᒪᒃᓴᖏᑦᑐᒃᓴᐅᕕᑖ? ᑕᑦᓱᒪ ᒪᓕᒃᑕᐅᖁᔭᖏᓐᓂᒃ ᒪᓕᒃᑎᑐᐃᓐᓇᐅᕗᒍᑦ.” 8ᒨᓯᓯ ᐅᖃᓕᕆᕗᖅ, “ᐊᑕᓂᐅᑉ ᑭᓯᐊᓂ ᓂᕿᒥᒃ ᓂᕆᓂᐊᕐᑕᑦᓯᓐᓂᒃ ᑐᓂᓯᕕᒋᓂᐊᕐᐹᓯ ᐅᓐᓄᒍᒻᒥᑕᒃᓴᑦᓯᓐᓂᒃ, ᐅᓪᓛᕈᒻᒥᑕᕆᓂᐊᕐᑕᑦᓯᓐᓂᒡᓗ ᓂᐊᖂᔭᒥᒃ ᐱᔪᒪᔭᓕᒫᑦᓯᓐᓂᒃ ᐱᑎᓐᓂᐊᕆᕚᓯ, ᓈᒻᒪᒃᓴᖏᓐᓂᓯ ᑐᓴᕐᒪᒍ, ᐅᕙᑦᑎᓐᓄᑦ ᓈᒻᒪᒃᓴᖏᑦᔪᑎᒋᔭᑦᓯᓐᓂᒃ ᐅᖃᕌᖓᑦᓯ ᐅᕙᑦᑎᓐᓄᑐᐃᓐᓇᖅ ᐅᖃᕐᕕᖃᕐᐸᖏᓐᓇᑦᓯ ᐊᑕᓂᕐᒧᓪᓕ ᓈᒻᒪᒃᓴᖏᓐᓂᕋᕐᐸᒃᐳᓯ.”
9ᒨᓯᓯᓗ ᐂᕉᓂᒧᑦ ᐅᖃᕐᐳᖅ, “ᓄᓇᖅᑲᑎᒌᓕᒫᑦ ᐃᓴᕆᐊᓕᒥᐅᑦ ᑲᑎᖁᓚᐅᒃᑭᑦ ᐊᑕᓂᐅᑉ ᓵᖓᓄᑦ, ᓈᒻᒪᒃᓴᖏᓐᓂᖏᑦ ᑐᓴᕐᓯᒪᖕᒪᒋᑦ.” 10ᐂᕉᓂᓗ ᐅᖃᓪᓚᓕᕐᑎᓪᓗᒍ ᑖᒃᑯᓄᖓ ᓄᓇᖅᑲᑎᒌᓕᒫᓄᑦ ᐃᓴᕆᐊᓕᒥᐅᓄᑦ, ᓄᓇᒧᓪᓗ ᐃᓄᖃᖏᑦᑐᒧᑦ ᑕᑯᓴᕋᒥᒃ ᐊᑕᓂᐅᑉ ᖃᐅᒪᓂᖓ ᓴᖅᑭᑉᐳᖅ ᓄᕗᔭᒥᑦ. 11ᐊᑕᓂᕐᓗ ᒨᓯᓯᒧᑦ ᐅᖃᕐᐳᖅ, 12“ᐃᓴᕆᐊᓕᒥᐅᑦ ᓈᒻᒪᒃᓴᖏᓐᓂᖓᑦ ᑐᓴᕐᓯᒪᕙᕋ, ᐅᖃᐅᑎᒃᑭᑦ ᐅᓐᓄᓕᓵᕐᑎᓪᓗᒍ ᑖᕐᓯᓕᕐᐸᑦ ᓂᕿᒥᒃ ᓂᕆᔭᒃᓴᖃᕐᓂᐊᕐᐳᑦ, ᐅᓪᓛᓐᖑᕐᐸᓪᓗ ᓂᐊᖂᔭᕐᑐᕈᒪᔭᓕᒫᒥᖕᓂᒃ ᐱᔪᓐᓇᕐᓂᐊᕆᕗᑦ, ᑍᒫᒡᓗ ᖃᐅᔨᓂᐊᕐᐳᑦ ᐅᕙᖓ ᐊᑕᓂᖅ ᑖᒃᑯᓄᖓ ᒎᑎᒋᔭᐅᓂᓐᓂᒃ.”
13ᐅᓐᓄᓕᕐᑎᓪᓗᒍᓗ ᑎᖕᒥᐊᓂᒃ ᑲᑎᓐᖓᔪᐊᓗᖕᓂᒃ ᑎᑭᑦᑐᖃᕐᐳᖅ ᐅᓄᕐᓂᖏᓐᓄᓪᓗ ᑖᒃᑯᐊ ᓄᓇᓖᑦ ᐅᓕᒃᑕᐅᓗᐊᕐᐳᑦ ᑕᒪᒃᑯᓄᖓ. ᐅᓪᓛᒃᑯᓪᓗ ᓄᓇ ᖃᑯᐊᕐᑎᖓᓚᐅᕐᐳᖅ ᓄᓇᓕᖕᓂ. 14ᓄᓇᓗ ᑕᒪᓐᓇ ᐸᓂᕋᒥ ᓄᓇᐅᑉ ᖄᖓ ᖃᑯᕐᑕᒥᒃ ᐱᑕᖃᓚᐅᕐᐳᖅ ᓯᖃᓕᖕᒥᒃ ᓵᑦᑐᔮᖑᑎᑯᓗᖕᓂᒃ ᒥᑭᔫᑎᓂᒃ, ᐸᑐᒃᑎᑐᑦ ᐊᕿᑎᒋᓪᓗᓂ. 15#1 ᑯᕆᓐᑎ 10:3.ᐃᓴᕆᐊᓕᒥᐅᓪᓗ ᑕᑯᒐᒥᑦᔪᒃ ᑭᓲᖕᒪᖔᑦ ᓇᓗᕚᑦ, ᐃᒻᒥᖕᓄᓪᓗ ᐊᐱᕆᖃᑦᑕᐅᑎᓕᕐᐳᑦ, “ᓱᓇ ᒪᓐᓇ?”
ᒨᓯᓯᐅᑉ ᐅᖃᐅᑎᕔᑦ, “ᑕᒪᑦᔭ ᐊᑕᓂᐅᑉ ᑐᓂᓯᒪᔭᖓ ᓂᕿᒃᓴᕆᔭᐅᖁᓪᓗᓂᐅᒃ ᐃᓕᑦᓯᓐᓄᑦ. 16ᐊᑕᓂᖅ ᐱᖁᔨᓯᒪᕗᖅ ᐃᓕᑦᓯᓐᓂᒃ ᐊᑐᓂᑦ ᑲᑎᑦᓯᖁᓪᓗᓯ ᓂᕆᔪᓐᓇᕐᑕᑦᓯᓐᓂᒃ ᐃᒡᓗᒥᐅᖃᑎᒌᑦ ᐃᓄᖏᑕ ᐅᓄᕐᓂᖏᑦ ᒪᓕᒡᓗᒋᑦ, ᒪᕐᕉᖕᓂᒃ ᖃᑦᑕᓪᓗᐊᖕᓂᒃ ᐱᖁᓪᓗᒋᑦ.”
17ᐃᓴᕆᐊᓕᒥᐅᓪᓗ ᑍᒫᒃ ᐱᕗᑦ, ᐃᓚᖏᑦ ᑲᑎᑦᓯᓪᓗᐊᕐᓂᕐᓴᐅᕗᑦ ᐃᓚᖏᓪᓗ ᑲᑎᑦᓯᓂᑭᓐᓂᕐᓴᐅᓪᓗᑎᒃ ᐊᓯᒥᖕᓂᑦ. 18#2 ᑯᕆᓐᑎ 8:15.ᐆᒃᑐᕋᕐᑕᐅᖕᒪᑕᓕ ᑖᒃᑯᐊ ᑲᑎᑦᓯᓂᕐᓴᐅᔫᒐᓗᐊᑦ ᐱᓂᕐᓴᐅᓐᖏᓚᑦ ᑖᒃᑯᐊᓗ ᑲᑎᑦᓯᖏᓐᓂᕐᓴᐅᔫᒐᓗᐊᑦ ᐱᖏᓐᓂᕐᓴᐅᖏᒃᑭᓪᓗᑎᒃ, ᐊᑐᓂᑦ ᓈᒻᒪᒋᔭᒥᖕᓂᒃ ᑲᑎᑦᓯᓚᐅᕐᒪᑕ. 19ᒨᓯᓯᐅᓪᓗ ᐅᖃᐅᑎᕔᑦ, “ᓇᓪᓕᐊᑦ ᖃᐅᒃᐸᑦ ᐱᓂᐊᕐᑕᒥᓂᒃ ᐱᓯᒪᔭᕆᐊᖃᓐᖏᓚᖅ.” 20ᐃᓚᖏᓪᓕ ᒨᓯᓯᒥᒃ ᓈᓚᖏᓪᓗᑎᒃ ᐃᓚᖓᓂᒃ ᐊᒥᐊᒃᑯᕗᑦ, ᖃᐅᑎᓪᓗᒍᓕ ᖁᐱᕐᕈᓂᒃ ᑕᑕᓚᐅᕐᐳᑦ ᐃᒍᓇᕐᓂᓕᕐᓗᓂᓗ. ᒨᓯᓯᓗ ᑖᒃᑯᓂᖓ ᐊᑲᐅᒃᓴᓚᐅᓐᖏᓚᖅ. 21ᐅᓪᓛᑕᒫᑦ ᐊᑐᓂᑦ ᑲᑎᑦᓯᕙᓚᐅᕐᐳᑦ ᓈᒻᒪᒋᔭᒥᖕᓂᒃ. ᓯᕿᓂᕐᓗ ᐆᓇᕐᓯᔭᕌᖓᑦ ᒪᓂᖅᑲᒥ ᐊᒥᐊᒃᑰᔪᕕᓃᑦ ᐊᐅᒃᐸᓚᐅᕐᐳᑦ.
22ᐅᓪᓗᐃᓪᓕ ᐱᖓᓲᔪᕐᑐᖓᓐᓂ ᓂᕿᒃᓴᓂᒃ ᑲᑎᑦᓯᓚᐅᕐᐳᑦ ᑲᑎᑉᐸᒃᑕᖏᑕ ᒪᕐᕈᐃᕐᓱᓪᓗᐊᕐᑕᖏᓐᓂᒃ, ᐃᓄᖕᒧᑦ ᐊᑕᐅᓯᕐᒧᑦ ᖃᓪᓗᑎᓪᓗᐊᒥᒃ ᑲᑎᑦᓯᓪᓗᑎᒃ. ᑕᓯᐅᕐᑎᒋᔭᐅᔪᓕᒫᓪᓕ ᑕᒪᓐᓇ ᐅᖃᐅᓯᕆᕚᑦ ᒨᓯᓯᒧᑦ, 23#ᒨᓯᓯ ᐂᑉᐸᖏᑦ 20:8-11.ᒨᓯᓯᐅᓪᓕ ᐅᖃᐅᑎᕔᑦ, “ᐊᑕᓂᐅᑉ ᐱᑯᓯᒪᖕᒪᑎᒍᑦ ᖃᐅᒃᐸᑦ ᑕᕾᕐᓯᕐᕕᐅᓂᐊᕐᒪᑦ ᑭᓱᓕᕆᕕᐅᖏᑦᓯᐊᕐᓗᓂ, ᑖᓐᓇ ᐊᑕᓂᐅᑉ ᓴᐸᑎᖁᑎᒋᖕᒪᒍ ᐃᑦᔪᕐᓁᑦᑐᖅ; ᑕᕝᕙᓂ ᐅᓪᓗᒥ ᐆᑎᕆᒋᑦᓯ ᐆᑦᑕᕆᐊᖃᕐᑕᑦᓯᓐᓂᒃ ᐆᔪᓕᐅᕐᓗᓯᓗ ᐆᔪᓕᐅᕆᐊᖃᕐᑕᑦᓯᓐᓂᒃ, ᐊᒥᐊᒃᑯᒋᔭᓯᓗ ᖃᐅᒃᐸᒧᑦ ᖁᒥᐅᑎᒋᓗᒋᑦ.” 24ᒨᓯᓯᒧᑦ ᑍᒫᒃ ᐱᖁᔭᐅᓯᒪᒐᒥᒃ, ᐊᒥᐊᒃᑯᒋᔭᒥᖕᓂᒃ ᖃᐅᒃᐸᒧᑦ ᖁᒥᐅᕗᑦ, ᖃᕐᕈᑎᒐᓗᐊᕐᒪᒋᓪᓕ ᓱᒃᑯᑦᑐᖃᓚᐅᓐᖏᓚᑦ ᖁᐱᕐᕈᕐᑕᐅᓯᒪᒐᑎᒡᓗ. 25ᑕᕝᕙ ᒨᓯᓯ ᐅᖃᕐᐳᖅ, “ᐅᓪᓗᒥ ᑕᒪᒃᑯᐊ ᓂᕆᓯᒋᒃ, ᐅᓪᓗᒥ ᐊᑕᓂᐅᑉ ᓴᐸᑎᒋᖕᒪᒍ; ᐅᓪᓗᒥ ᓇᑎᕐᓇᒥ ᑕᒪᒃᑯᓂᖓ ᓇᓂᓯᓂᐊᖏᓐᓇᑦᓯ. 26ᐅᓪᓗᓂᒃ ᐱᖓᓲᔪᕐᑐᓂᒃ ᑕᒪᒃᑯᓂᖓ ᑲᑎᑦᓯᔪᒃᓴᐅᕗᓯ; ᐅᓪᓗᓪᓕ 7ᖓᓂ ᓴᐸᑎ ᓇᓪᓕᐅᑎᕗᖅ, ᑕᕝᕙᓂ ᐅᓪᓗᒥ ᑕᒪᒃᑯᓂᖓ ᓴᖅᑭᑦᑐᖃᕐᓂᐊᓐᖏᓚᖅ.”
27ᐅᓪᓗᑦ 7ᖓᓐᓂ ᐃᓄᐃᑦ ᐃᓚᖏᑦ ᑲᑎᑦᓯᔭᕐᑐᕋᓱᐊᓚᐅᕐᐳᑦ, ᑭᓯᐊᓂᓕ ᓇᓂᓯᔪᖃᓚᐅᓐᖏᓚᑦ. 28ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᖃᓄᖅ ᐊᑯᓂᐅᑎᒋᔪᖅ ᐱᖁᔭᓐᓂᒃ ᒪᓕᒃᑍᓕᒪᓂᐊᕐᐱᓰ? 29ᐃᖅᑲᐅᒪᓚᐅᕆᑦᓯ, ᐅᕙᖓ ᐊᑕᓂᐅᔪᖓ ᑕᕾᕐᓯᕐᕕᒃᓴᑦᓯᓐᓂᒃ ᑐᓂᓯᕕᒋᓚᐅᕋᑦᓯ, ᑍᒤᒻᒪᑦ ᐅᓪᓗᑦ ᐱᖓᓲᔪᕐᑐᖓᓐᓂ ᓂᕿᒃᓴᓂᒃ ᐅᓪᓘᖕᓄᑦ ᒪᕐᕉᖕᓄᑦ ᓈᒻᒪᒃᑐᒥᒃ ᑐᓂᓯᕕᒋᕙᑦᓯ; ᑍᒤᒻᒪᑦ ᐃᓄᓕᒫᑦ ᐃᓂᒥᖕᓂᑦ ᓅᑦᑐᖃᕐᑐᒃᓴᐅᓐᖏᓚᑦ ᐊᓂᔪᖃᖏᓪᓗᑎᒡᓗ ᐃᒡᓗᒥᖕᓂᑦ ᐅᓪᓗᑦ 7ᖓᓐᓂ.” 30ᑍᒤᒻᒪᑦ ᐅᓪᓗᐃᑦ 7ᖓᓐᓂ ᐃᓄᐃᑦ ᕿᑲᓚᐅᕐᐳᑦ ᓴᓇᔪᖃᕋᑎᒃ.
31 #
ᒨᓯᓯ ᓯᑕᒪᖏᑦ 11:7,8. ᐃᓴᕆᐊᓕᒥᐅᓪᓕ ᑕᒪᒃᑯᐊ ᓂᕿᒃᓴᑦ ᐊᑎᖃᕐᑎᓚᐅᕐᐰᑦ ᒫᓇᒥᒃ; ᑰᕆᐊᓐᑐᕆᐅᑉ ᐱᕈᕐᓯᐊᒃᓴᐅᑉ ᑲᓐᖓᕐᓲᑎᒃᓴᖓᑐᑦ ᑍᒤᑦᑑᕗᖅ ᖃᑯᕐᑕᑯᓘᓪᓗᓂ, ᑎᐱᖃᕐᓗᓂᓗ ᓂᐊᖂᔭᑎᑐᑦ ᓵᑦᑐᑯᓘᓪᓗᑎᒃ ᐸᓂᕐᓯᒪᔪᑎᑐᑦ ᕼᐊᓂᒥᒃ ᐃᓚᓯᒪᔪᑎᑐᑦ. 32ᒨᓯᓯᓗ ᐅᖃᕐᐳᖅ, “ᐃᒫᒃ ᑕᕝᕙ ᐊᑕᓂᐅᑉ ᐱᖁᓯᒪᕚᑎᒍᑦ: ᒫᓇᐅᑉ ᐃᓚᖓᓂᒃ ᖃᓪᓗᑎᐅᑉ ᐊᕝᕙᖓᑐᑦ ᐊᖏᑎᒋᔪᒥᒃ ᐱᐅᓕᒃᓯᓯᒪᖁᓪᓗᑕ, ᑭᖑᕚᑦᑎᓐᓄᑦ ᑕᑯᔭᐅᖃᑦᑕᕐᑐᒃᓴᒥᒃ ᖃᓄᐃᑦᑐᒥᒃ ᓂᕿᖃᕐᑎᑕᐅᓚᐅᕐᒪᖔᑦᑕ ᐃᓄᖃᖏᑦᑐᒥ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᓯᒪᓕᕐᑎᓪᓗᑕ.” 33#ᐄᑉᕈᐃᓄᑦ 9:4.ᒨᓯᓯᓗ ᐅᖃᕐᐳᖅ ᐂᕉᓂᒧᑦ, “ᐃᒥᖃᐅᑎᒥᒃ ᑎᒍᓯᓕᕆᑦ, ᖃᓪᓗᑎᐅᓪᓗ ᓇᑉᐸᖓᑐᑦ ᐊᖏᑎᒋᔪᒥᒃ ᒫᓇᒥᒃ ᐃᓗᓪᓕᕐᓗᒍ, ᐊᑕᓂᕐᒧᑦ ᑐᓂᕐᕈᑎᒋᓕᕈᒃ, ᐱᓯᒪᔭᐅᖁᓪᓗᒍ ᑭᖑᕚᑦᑎᓐᓄᑦ.” 34ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᒪᒍ, ᑕᕝᕙ ᐂᕉᓂᐅᑉ ᐃᓕᓚᐅᕐᐹ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᓯᕗᕌᓄᑦ, ᑕᕝᕙᓂ ᐱᐅᓕᐊᖑᓯᒪᖁᓪᓗᒍ. 35#ᔮᓱᐊ 5:12.ᐃᓴᕆᐊᓕᒥᐅᓪᓗ ᓂᕿᖃᓚᐅᕐᐳᑦ ᒫᓇᒥᒃ ᐊᕐᕌᒍᓂᒃ 40ᓂᒃ, ᓄᓇᒧᑦ ᐱᕈᕐᑐᓕᖕᒧᑦ ᑎᑭᓚᐅᖏᓐᓂᕐᒥᖕᓂ; ᓂᕿᖃᓚᐅᕐᐳᑦ ᒫᓇᒥᒃ, ᑬᓇᓂᐅᑉ ᓄᓇᖓᓄᑦ ᑎᑭᓚᐅᖏᓐᓂᕐᒥᖕᓂ. 36(ᖃᓪᓗᑎᐅᑉ ᓇᑉᐸᖓ ᐸᓂᕐᓯᕐᓯᒪᔪᓄᑦ ᐊᑐᕐᑕᐅᕙᓚᐅᕐᑐᖅ ᐊᑦᔨᖃᐸᓗᒍᓐᓇᕐᑐᖅ ᖃᓪᓗᑎᓂᒃ ᑕᓪᓕᒪᓂᒃ.)
Currently Selected:
ᒨᓯᓯ ᐂᑉᐸᖏᑦ 16: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
