ᒨᓯᓯ ᐂᑉᐸᖏᑦ 21
21
ᓯᐊᓛᕆᔭᐅᔪᑦ ᐱᓂᐊᕐᕕᐅᓂᖏᑦ
ᒨᓯᓯ ᑕᓪᓕᒪᖏᑦ 15:12-18
1“ᐅᑯᐊ ᑕᕝᕙ ᐃᓴᕆᐊᓕᒥᐅᓄᑦ ᒪᓕᒃᑕᐅᔪᒃᓴᐅᔪᑦ ᐅᖃᐅᓯᕆᔭᒃᓴᕆᕙᑎᑦ ᑖᒃᑯᓄᖓ. 2#ᒨᓯᓯ ᐱᖓᔪᖏᑦ 25:39-46.ᐄᑉᕉᒥᐅᑕᒥᒃ ᓂᐅᕕᐊᕆᓗᒍ ᓯᐊᓛᕐᑖᕈᕕᑦ, ᑖᑦᓱᒪ ᐱᔨᑦᓯᕐᑕᒃᓴᕆᕚᑎᑦ ᐊᕐᕌᒍᓂᒃ ᐱᖓᓲᔪᕐᑐᓂᒃ, ᐊᕐᕌᒍᓪᓕ 7ᖓᓐᓂ ᓯᐊᓛᖑᔪᓐᓃᕐᑐᒃᓴᐅᕗᖅ, ᐊᑭᓕᕐᑕᐅᓂᒃᑰᖏᓪᓗᓂ. 3ᐂᑉᐸᖃᖏᓪᓗᓂ ᐱᒋᐊᓚᐅᕈᓂ, ᐊᐅᓪᓚᕆᐊᖃᕋᔭᕆᕗᖅ ᐂᑉᐸᖃᖏᓪᓗᓂ; ᓄᓕᐊᖃᕐᓗᓂᓕ ᐱᒋᐊᕐᓯᒪᒃᐸᑦ, ᑕᕝᕙ ᓄᓕᐊᖓᑕ ᐊᐅᓪᓚᖃᑎᒋᔭᒃᓴᕆᕚ. 4ᐊᖓᔪᖅᑳᖓᑕᓕ ᓄᓕᐊᓂᒃᑎᓯᒪᒃᐸᒍ ᓯᐊᓛᕆᓕᕐᓗᓂᐅᒃ ᑖᑦᓱᒨᓇᓗ ᕿᑐᕐᖓᕐᑖᕐᓯᒪᒃᐸᑦ ᐊᖑᒻᒥᒃ ᐊᕐᓇᒥᒡᓘᓐᓃᑦ, ᑕᕝᕙ ᑖᓐᓇ ᓄᓕᐊᖓ ᕿᑐᕐᖓᖏᓪᓗ ᐊᖓᔪᖅᑳᖓᑕ ᐱᒋᒐᔭᕐᐰᑦ, ᓯᐊᓛᖑᔪᖅ ᐊᐅᓪᓚᓕᕈᓂ ᑖᒃᑯᐊᓕᒫᑦ ᕿᒪᒡᓗᒋᑦ ᐊᐅᓪᓚᕐᑐᒃᓴᐅᕗᖅ. 5ᓯᐊᓛᖑᔪᕐᓕ ᐅᖃᕐᐸᑦ ‘ᐊᖓᔪᖅᑳᕋ ᐅᖓᓕᕋᒃᑯ, ᓄᓕᐊᕋᓗ, ᕿᑐᕐᖓᒃᑲᓗ; ᐊᐅᓪᓚᕐᑎᑕᐅᔪᒪᔪᓐᓃᕐᐳᖓ ᓯᐊᓛᖑᔪᓐᓃᕐᓂᒃᑯᑦ.’ 6ᑕᕝᕙ ᐊᖓᔪᖅᑳᖓᑕ ᒎᑎᒧᑦ ᐂᑎᑕᒃᓴᕆᕚ, ᐃᑎᕐᑕᕐᕕᐊᓂᓗ ᓇᖏᕐᑎᓪᓗᓂᐅᒃ ᐅᕝᕙᓗ ᐃᑎᕐᑕᕐᕕᐊᑕ ᓇᐸᔪᖓᑕ ᓴᓂᐊᓂ; ᑕᕝᕙᓂᓗ ᐊᖓᔪᖅᑳᖓᑕ ᑖᓐᓇ ᓯᐊᓛᓂ ᓯᐅᑎᖓᒍᑦ ᐳᑐᔭᒃᓴᕆᕚ ᐳᑐᓯᑦᔪᑎᒧᑦ; ᑕᕝᕙᓗ ᐃᓅᓯᓕᒫᒥᓂ ᓯᐊᓛᖑᓕᕋᔭᕐᐳᖅ ᑖᑦᓱᒧᖓ.
7“ᐊᖑᓪᓕ ᐸᓂᖕᒥᓂᒃ ᓂᐅᕐᕈᑎᖃᕐᐸᑦ ᓯᐊᓛᖑᓂᕐᒧᑦ, ᑖᓐᓇ ᐊᖑᑎᑎᑐᑦ ᓯᐊᓛᑎᑐᑦ ᐊᓂᑎᑕᐅᔭᕆᐊᖃᕋᔭᓐᖏᓚᖅ. 8ᓂᐅᕐᕈᑎᒋᔭᐅᓯᒪᒃᐸᓪᓕ ᓂᐅᕕᕐᑐᒧᑦ ᓄᓕᐊᕐᑖᕆᔭᐅᓂᐊᕐᓗᓂ, ᑖᑦᓱᒪᓗ ᐊᖑᑎᐅᑉ ᓈᒻᒪᒋᖏᒃᑯᓂᐅᒃ, ᑕᕝᕙ ᐊᑖᑕᖓᓄᑦ ᐅᑎᕐᑎᒋᐊᖃᕐᐹ ᐊᑭᓕᕐᑕᐅᑎᓪᓗᒍ; ᓂᐅᕕᕐᓯᒪᔪᕐᓕ ᑖᑦᓱᒥᖓ ᐊᕐᓇᒥᒃ ᓂᐅᕐᕈᑎᖃᕆᐊᖃᓐᖏᓚᖅ ᓄᓇᖃᑎᑐᖃᕆᓐᖏᑕᒥᓄᑦ, ᑖᑦᓱᒪ ᐊᖑᑎᐅᑉ ᓇᕐᕈᒋᓯᒪᖕᒪᒍ. 9ᐊᖑᓪᓕ ᐊᕐᓇᒥᒃ ᓯᐊᓛᒃᓴᒥᒃ ᓂᐅᕕᕐᓯᒪᒍᓂ ᐃᕐᓂᕐᒥᓄᑦ ᑐᓂᔪᒪᓗᒍ, ᑕᕝᕙ ᐸᓂᖕᒥᑐᑦ ᐱᓂᐊᕐᕕᒋᔭᒃᓴᕆᕚ. 10ᐊᖑᓪᓕ ᓄᓕᐊᓂᒃᑲᓐᓂᕈᓂ, ᓄᓕᐊᕆᖅᑳᕐᓯᒪᔭᓂ ᓱᓕ ᑲᒪᒋᑦᓯᐊᕆᐊᖃᕐᐹ ᓂᕿᒃᓴᑎᒍᑦ ᐊᓐᓄᕌᒃᓴᑎᒍᓪᓗ, ᓄᓕᐊᕆᔭᐅᔫᓪᓗ ᑲᒪᒋᔭᐅᑦᔪᑎᒋᔭᕆᐊᖃᕐᑕᖏᑎᒍᑦ ᓱᓕ ᑕᒤᑎᒍᑦ ᑲᒪᒋᑦᓯᐊᕐᓗᓂᐅᒃ. 11ᑕᒪᒃᑯᓂᖓᓕ ᑲᒪᒋᔭᕆᐊᖃᕐᑕᒥᓂᒃ ᐱᖓᓲᓕᖅᑲᖓᔪᓂᒃ ᐱᓇᓱᐊᕐᕕᒋᖏᑉᐸᒍ, ᑕᕝᕙ ᐊᕐᓇᖅ ᐃᓱᒪᕐᓱᕐᓗᓂ ᐊᐅᓪᓚᕐᑐᒃᓴᐅᕗᖅ ᐊᖑᑎᐅᑉ ᑮᓇᐅᔭᕐᑖᕈᑎᒋᖏᓪᓗᓂᐅᒃ.”
ᐱᖁᔭᑦ ᒪᓕᒃᑕᐅᔭᕆᐊᓖᑦ ᐱᑦᓯᐊᖏᑦᑐᓄᑦ
12 #
ᒨᓯᓯ ᐱᖓᔪᖏᑦ 24:17. “ᓇᓪᓕᐊᓪᓕ ᐃᓅᖃᑎᒥᓂᒃ ᐊᓇᐅᓯᓗᓂ ᑐᖁᑦᓯᒃᐸᑦ ᑖᓐᓇ ᑐᖁᑕᐅᔪᒃᓴᐅᕗᖅ. 13#ᒨᓯᓯ ᓯᑕᒪᖏᑦ 35:10-34; ᒨᓯᓯ ᑕᓪᓕᒪᖏᑦ 19:1-13; ᔮᓱᐊ 20:1-9.ᑭᓯᐊᓂᓕ ᐱᔮᕆᖏᓪᓗᓂ ᑐᖁᑦᓯᒃᐸᑦ, ᑖᓐᓇ ᕿᒫᔪᓐᓇᕐᐳᖅ ᐅᕙᖓ ᕿᒫᕕᐅᖁᔭᓐᓄᑦ, ᑕᕝᕙᓂᓗ ᖃᓄᐃᓕᔭᐅᒐᔭᓐᖏᓚᖅ. 14ᑭᓯᐊᓂᓕ ᐃᓄᒃ ᓂᓐᖓᐅᒪᓗᓂ ᐱᔮᕆᓗᓂᓗ ᐃᓅᖃᑎᒥᓂᒃ ᑐᖁᑦᓯᒃᐸᑦ, ᑖᓐᓇ ᑐᖁᑕᐅᔪᒃᓴᐅᕗᖅ, ᐊᒡᓛᑦ ᑐᓂᕐᕈᓯᕐᕕᖁᑎᓐᓄᑦ ᖃᓄᐃᓕᔭᐅᔪᒪᖏᓪᓗᓂ ᕿᒫᒐᓗᐊᕐᐸᑦ.
15“ᓇᓪᓕᐊᑦ ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᐊᓇᐅᓯᒃᐸᑦ ᑖᓐᓇ ᑐᖁᑕᐅᔪᒃᓴᐅᕗᖅ.
16 #
ᒨᓯᓯ ᑕᓪᓕᒪᖏᑦ 24:7. “ᓇᓪᓕᐊᑦ ᐃᓅᖃᑎᒥᓂᒃ ᐃᓱᒪᓯᐅᕆᖏᓪᓗᓂ ᑎᒍᓯᑐᐃᓐᓇᕐᐸᑦ, ᓂᐅᕐᕈᑎᖃᕋᓱᐊᕐᓂᕐᒧᑦ ᐅᕝᕙᓗ ᓯᐊᓛᕐᑖᕆᔪᒪᓗᓂᐅᒃ, ᑖᓐᓇ ᑐᖁᑕᐅᔪᒃᓴᐅᕗᖅ.
17 #
ᒨᓯᓯ ᐱᖓᔪᖏᑦ 20:9; ᒫᑎᐅᓯ 15:4; ᒫᑯᓯ 7:10. “ᓇᓪᓕᐊᑦ ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᓯᕗᓂᕐᓗᖁᔨᓗᓂ ᐅᖃᕐᓂᕐᓘᑎᓕᒃ ᑖᓐᓇ ᑐᖁᑕᐅᔪᒃᓴᐅᕗᖅ.
18“ᐃᓅᒃ ᐂᕙᖃᑎᒌᒃᐸᑎᒃ ᐂᑉᐸᖓᑕᓗ ᐱᒋᐊᕐᐸᒍ ᐅᔭᕋᖕᒧᑦ ᐊᒡᒐᖕᒥᓄᓪᓘᓐᓃᑦ, ᑐᖁᑕᐅᖏᓪᓗᓂᓕ, ᑖᓐᓇ ᑍᒤᓕᓯᔪᖅ ᓱᒋᐊᕐᑕᐅᔪᒃᓴᐅᓐᖏᓚᖅ, ᐋᓐᓂᕐᑕᖓ ᐃᒡᓕᕐᒦᒋᐊᖃᓕᓚᕿᒃᐸᑦ, 19ᑭᖑᓂᖓᒍᓪᓕ ᒪᑭᑦᑐᓐᓇᕐᓯᖕᒥᒃᐸᑦ ᐊᓂᔪᓐᓇᕐᓯᓗᓂᓗ ᐊᔭᐅᑉᐱᐊᕐᓗᓂ, ᑖᓐᓇ ᑍᒤᓕᑎᑦᓯᔪᕕᓂᖅ ᑖᑦᓱᒪ ᐃᒡᓕᕐᒦᑦᔪᑎᖓᓂᒃ ᐊᑭᓖᔭᕆᐊᖃᕐᐳᖅ ᑲᒪᒋᑦᓯᐊᕆᐊᖃᕐᓗᓂᐅᒡᓗ ᐋᖅᑭᓚᐅᖏᓐᓂᓕᒫᖓᓂ.
20“ᐃᓄᒡᓕ ᐊᓇᐅᓕᕐᓯᒃᐸᑦ ᓯᐊᓛᒥᓂᒃ, ᐊᖑᒻᒥᒃ ᐊᕐᓇᒥᒡᓘᓐᓃᑦ, ᑖᓐᓇᓗ ᓯᐊᓛᖓ ᑕᕝᕙᓂ ᑐᖁᑲᐅᑎᒋᒃᐸᑦ, ᑖᓐᓇ ᑍᒤᓕᐅᕆᔪᖅ ᓱᒋᐊᕐᑕᐅᔪᒃᓴᐅᕗᖅ. 21ᓯᐊᓛᖓᓕ ᐊᓐᓇᒃᐸᑦ ᐅᓪᓗᕐᒥᒃ ᒪᕐᕉᖕᓂᒡᓘᓐᓃᑦ ᐊᓂᒍᐃᓗᓂ, ᑖᓐᓇ ᑍᒤᓕᐅᕆᔪᖅ ᓱᒋᐊᕐᑕᐅᔪᒃᓴᐅᓐᖏᓚᖅ. ᑖᓐᓇ ᐱᖁᑎᓕᒃ ᐃᓚᓐᖓᕐᓯᒪᓂᕐᒥᓄᑦ ᓱᒋᐊᕐᑕᐅᓂᕆᔭᕇᕐᒪᒍ.
22“ᐊᖑᑏᒃ ᐅᓇᑕᕐᓗᑎᒃ, ᐊᕐᓇᒥᒃ ᓄᑕᕋᒃᓴᓕᖕᒥᒃ ᐋᓐᓃᑐᐊᕐᐸᑎᒃ ᐊᕐᓇᕐᓗ ᑖᓐᓇ ᑕᒪᐅᓁᓐᓇᖅ ᐃᕐᓂᓱᓕᕐᓗᓂ ᓄᑕᕋᒃᓴᖓ ᓱᕋᒃᑕᐅᒃᐸᑦ, ᐊᕐᓇᖅ ᓇᖕᒥᓂᖅ ᐋᓐᓂᖏᒃᑲᓗᐊᕐᓗᓂ, ᑖᓐᓇ ᐋᓐᓃᔪᖅ ᐊᑭᓖᑎᑕᐅᔭᕆᐊᖃᕐᐳᖅ ᐊᕐᓇᐅᑉ ᐅᐃᖓᑕ ᐊᑭᓕᐅᑎᒋᔭᐅᖁᔭᖓᓂᒃ; ᐃᓅᖃᑎᒥᖕᓂᒃ ᐋᖅᑭᒃᓱᐃᔨᐅᔪᓄᑦ ᓈᒻᒪᒋᔭᐅᑐᐊᕐᐸᑕ ᐊᑭᓕᐅᑎᒋᔭᐅᖁᔭᐅᔪᑦ. 23ᑭᓯᐊᓂᓕ ᐊᕐᓇᖅ ᐋᓐᓂᕐᑕᐅᖃᑕᐅᒃᐸᑦ, ᑕᕝᕙ ᐊᑭᓕᕐᑕᐅᔭᕆᐊᖃᕐᐳᖅ ᐃᓅᓯᕐᒥᒃ ᐃᓅᓯᕐᒧᑦ. 24#ᒨᓯᓯ ᐱᖓᔪᖏᑦ 24:19,20; ᒨᓯᓯ ᑕᓪᓕᒪᖏᑦ 19:21; ᒫᑎᐅᓯ 5:38.ᐃᔨ ᐃᔨᒧᑦ, ᑭᒍᑎ ᑭᒍᑎᒧᑦ, ᐊᒡᒊᑦ ᐊᒡᒐᓄᑦ, ᐃᑎᒊᑦ ᐃᑎᒐᖕᓄᑦ, 25ᐆᓐᓂᖅ ᐆᓐᓂᕐᒧᑦ, ᐃᑭᓕᕐᑕᐅᓂᖅ ᐃᑭᓕᕐᑕᐅᓂᕐᒧᑦ, ᑎᒡᓘᔭᕐᓂᖅ ᑎᒡᓘᔭᕐᓂᕐᒧᑦ.
26“ᐊᖑᑦ ᓯᐊᓛᒥᓂᒃ ᐊᖑᒻᒥᒃ ᐊᕐᓇᒥᒡᓘᓐᓃᑦ ᐊᓇᐅᓯᓗᓂ ᐃᔨᖓᓂᒃ ᖄᕐᓯᒃᐸᑦ, ᑕᕝᕙ ᑖᓐᓇ ᓯᐊᓛᖅ ᓯᐊᓛᖑᔪᓐᓃᕆᐊᖃᕐᐳᖅ ᐃᔨᖓᓄᑦ ᐊᑭᓕᐅᑎᓗᓂ. 27ᐊᒻᒪᑦᑕᐅᖅ ᓯᐊᓛᒥᓂᒃ ᐊᖑᒻᒥᒃ ᐊᕐᓇᒥᒡᓘᓐᓃᑦ ᑭᒍᑍᕐᓯᔪᖃᕐᐸᑦ, ᑕᕝᕙ ᑖᓐᓇ ᓯᐊᓛᖅ ᓯᐊᓛᖑᔪᓐᓃᕆᐊᖃᕐᐳᖅ ᑭᒍᑎᖓᓄᑦ ᐊᑭᓕᐅᑎᓗᓂ.”
ᐱᖁᑎᓕᐅᑉ ᑲᒪᒋᔭᒃᓴᖃᕐᓂᖓ
28“ᐃᒻᒧᒃᓯᐅᒐᐅᑉ ᐊᖑᓴᓪᓗᖓᑕ ᐊᖑᑦ ᐊᕐᓇᕐᓘᓐᓃᑦ ᓇᒡᔪᖕᒥᒡᓗᓂᐅᒃ ᑐᖁᑉᐸᒍ, ᑕᕝᕙ ᐃᒻᒧᒃᓯᐅᒐᐅᑉ ᐊᖑᓴᓪᓗᖓ ᒥᓪᓗᕐᑕᐅᓗᓂ ᑐᖁᑕᐅᔭᕆᐊᖃᕐᐳᖅ, ᓂᕿᖓᓕ ᓂᕆᔭᐅᔭᕆᐊᖃᓐᖏᓚᖅ; ᑭᓯᐊᓂᓕ ᐊᖑᓴᓪᓗᕐᒥᒃ ᐱᖁᑎᓕᒃ ᑕᒪᑐᒧᖓ ᐸᓯᔭᒃᓴᐅᔪᒃᓴᐅᓐᖏᓚᖅ. 29ᐃᒻᒧᒃᓯᐅᒐᐅᓪᓕ ᐊᖑᓴᓪᓗᖓ ᐃᓄᖕᓂᒃ ᐱᒋᐊᕐᑕᖃᑦᑕᕐᓯᒪᒃᐸᑦ, ᑖᑦᓱᒪᓗ ᐃᓄᐊ ᐅᖃᐅᑦᔭᐅᓯᒪᒐᓗᐊᕐᓗᓂ ᐃᐱᕐᓯᒪᖏᑉᐸᒍ, ᑭᖑᓂᖓᒍᓪᓕ ᓇᒡᔪᖕᒥᒃᓯᓗᓂ ᐊᖑᒻᒥᒃ ᐊᕐᓇᒥᒡᓘᓐᓃᑦ ᑐᖁᑦᓯᒃᐸᑦ, ᑕᕝᕙ ᐊᖑᓴᓪᓗᖅ ᒥᓪᓗᕐᑕᐅᓗᓂ ᑐᖁᑕᐅᔪᒃᓴᐅᕗᖅ, ᐃᓄᐊᓗ ᑐᖁᑕᐅᔪᒃᓴᐅᒋᕗᖅ. 30ᑭᓯᐊᓂᓕ ᐊᖑᓴᓪᓘᑉ ᐃᓄᐊ ᐊᑭᓖᖁᔭᐅᒃᐸᑦ ᑐᖁᑕᐅᖁᓇᒍ, ᑕᕝᕙ ᐊᑭᓕᐅᑎᒋᖁᔭᐅᔪᓕᒫᓂᒃ ᖃᑦᓯᐅᒐᓗᐊᕐᐸᑕ ᐊᑭᓖᔪᒃᓴᐅᕗᖅ. 31ᐊᖑᓴᓪᓗᕐᓕ ᓇᒡᔪᖕᒦᓗᓂ ᓄᑲᑉᐱᐊᒥᒃ ᓂᕕᐊᕐᓯᐊᒥᒡᓘᓐᓃᑦ ᑐᖁᑦᓯᒃᐸᑦ, ᑕᕝᕙ ᐱᓇᓱᐊᕐᕕᐅᔭᕆᐊᖃᕋᔭᕆᕗᖅ ᑕᒪᒃᑯᐊ ᐱᖁᔭᐅᔪᑦ ᒪᓕᒃᑕᐅᓗᑎᒃ. 32ᐊᖑᓴᓪᓗᕐᓕ ᓇᒡᔪᖕᒥᒃᓯᓗᓂ ᓯᐊᓛᕆᔭᐅᔪᒥᒃ, ᐊᖑᒻᒥᒃ ᐊᕐᓇᒥᒡᓘᓐᓃᑦ ᑐᖁᑦᓯᒃᐸᑦ, ᑕᕝᕙ ᐊᖑᓴᓪᓘᑉ ᐃᓄᐊ ᓯᐊᓛᖃᕐᑐᒧᑦ ᐊᑭᓖᔭᕆᐊᖃᕐᐳᖅ ᓯᐅᓪᕕᕆᓂᒃ 30ᓂᒃ, ᐊᖑᓴᓪᓗᕐᓗ ᒥᓪᓗᕐᑕᐅᓗᓂ ᑐᖁᑕᐅᔪᒃᓴᐅᕗᖅ.
33“ᐊᖑᓪᓕ ᐃᑎᕐᓴᓕᐅᕐᓯᒪᔪᒥᒃ ᒪᑐᐃᕐᓯᓗᓂ ᒪᑐᐃᖎᓐᓇᕐᑎᑉᐸᒍ, ᐅᕝᕙᓗ ᓄᓇᒥᒃ ᐃᑎᕐᓴᓕᐅᕆᓗᓂ ᒪᑐᖏᑉᐸᒍ, ᐊᖑᓴᓪᓗᕐᓕ ᓯᐅᑎᖅᑯᕐᑐᔪᕐᓘᓐᓃᑦ ᑕᕝᕗᖓ ᐃᔪᒃᑲᕐᐸᑦ, 34ᑖᓐᓇ ᐃᑎᕐᓴᓕᐅᕆᓯᒪᔪᖅ ᐆᒪᔪᖁᑎᓕᖕᒧᑦ ᐊᑭᓖᔪᒃᓴᐅᕗᖅ; ᑮᓇᐅᔭᓂᒃ ᐊᑭᓕᕐᓗᓂᐅᒃ, ᑖᓐᓇᓕ ᐆᒪᔪᖅ ᑐᖁᖓᓕᕐᑐᖅ ᐱᑖᕆᒐᔭᕐᐹ. 35ᐊᖑᑎᐅᓪᓕ ᐊᖑᓴᓪᓗᖁᑎᖓ ᐊᓯᐊᑕ ᐊᖑᓴᓪᓗᖁᑎᖓᓂᒃ ᐋᓐᓂᕐᓯᓗᓂ ᑐᖁᑦᓯᒃᐸᑦ, ᑕᕝᕙ ᑖᓐᓇ ᑐᖁᑦᓯᔪᖅ ᓂᐅᕐᕈᑎᒋᔭᐅᓗᓂ ᐊᑭᖏᑦ ᑖᒃᑯᓄᖓᑦ ᐊᖑᑎᓄᑦ ᐊᒡᒍᕐᑕᐅᔪᒃᓴᐅᕗᑦ; ᑖᓐᓇᓗ ᑐᖁᑕᐅᔪᖅ ᐊᖑᓴᓪᓗᖅ ᑖᒃᑯᓄᖓ ᐊᕕᒃᑕᐅᖕᒥᓗᓂ. 36ᐃᒻᒧᒃᓯᐅᒐᐅᓪᓕ ᐊᖑᓴᓪᓗᖓ ᖃᐅᔨᔭᐅᖃᑦᑕᕐᓯᒪᒃᐸᑦ ᐱᒋᐊᖃᑦᑕᕐᓯᒪᓂᖓᓂᒃ, ᐃᓄᐊᑕᓗ ᐃᐱᕐᓯᒪᖏᑉᐸᒍ, ᑕᕝᕙ ᐊᑭᓖᔭᕆᐊᖃᕐᐳᖅ ᐊᖑᓴᓪᓗᖁᑎᒥᓂᒃ ᐊᖑᓴᓪᓗᖁᑎᖃᓚᐅᕐᑐᒧᑦ, ᑖᓐᓇᓗ ᐊᖑᓴᓪᓗᖅ ᑐᖁᑕᐅᓯᒪᔪᖅ ᐱᑖᕆᖔᕐᓗᓂᐅᒃ.”
Currently Selected:
ᒨᓯᓯ ᐂᑉᐸᖏᑦ 21: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
