ᒨᓯᓯ ᐂᑉᐸᖏᑦ 23
23
ᐃᓅᖃᑎᒧᑦ ᓈᒻᒪᓈᕐᑐᒥᒃ ᐱᓇᓱᐊᕐᓂᖅ ᐱᑦᓯᐊᕐᓂᕐᓗ
1 #
ᒨᓯᓯ ᐂᑉᐸᖏᑦ 20:16; ᒨᓯᓯ ᐱᖓᔪᖏᑦ 19:11,12; ᒨᓯᓯ ᑕᓪᓕᒪᖏᑦ 5:20. “ᓱᓕᖏᑦᑐᒥᒃ ᐅᖃᐅᓯᖃᕐᓗᓯ ᐃᓅᖃᑎᑦᓯᓐᓄᑦ ᓯᐊᒻᒪᕐᑎᑦᓯᔪᒃᓴᐅᓐᖏᓚᓯ, ᐸᓯᔭᒃᓴᐅᔪᒥᒡᓗ ᐃᑲᔪᕐᑐᕐᑐᒃᓴᐅᓐᖏᓚᓯ, ᓱᓕᖏᑦᑐᒥᒃ ᖃᐅᔨᓯᒪᓂᕋᕐᓂᑦᓯᓐᓄᑦ. 2ᐃᓄᒋᐊᖕᓂᕐᓮᑦ ᐅᓄᕐᓂᕐᓴᐅᓂᑐᐃᓐᓇᖏᓐᓄᑦ ᒪᓕᒃᓴᕐᑐᒃᓴᐅᓐᖏᓚᓯ ᓈᒻᒪᖏᑦᑐᒧᑦ ᐱᓇᓱᐊᕐᐸᑕ; ᐅᕝᕙᓘᓐᓃᑦ ᓇᓗᓁᕐᓯᓕᕐᐸᑕ ᐃᓅᖃᑎᒧᑦ ᓈᒻᒪᓈᖏᑦᑐᒥᒃ ᐱᓇᓱᐊᓕᕐᓗᑎᒃ; 3#ᒨᓯᓯ ᐱᖓᔪᖏᑦ 19:15.ᐅᕝᕙᓗ ᐃᓔᓐᓇᕐᓯᐅᕐᓂᕐᒧᑦ ᐃᑲᔪᕐᑐᖏᓐᓂᕐᓴᐅᔪᒃᓴᐅᓐᖏᓚᓯ ᐊᖑᑦ ᐊᔪᕐᓴᕐᑐᖅ ᐃᖅᑲᕐᑐᕐᑕᐅᓕᕐᐸᑦ.
4 #
ᒨᓯᓯ ᑕᓪᓕᒪᖏᑦ 22:1-4. “ᐊᑭᕋᕐᑐᕐᑎᕕᑦ ᐆᒪᔪᖁᑎᖓᓂᒃ ᑕᑯᒍᕕᑦ ᐃᒻᒧᒃᓯᐅᒐᖁᑎᖓᓂᒃ ᓯᐅᑎᖅᑯᕐᑐᔪᖁᑎᖓᓂᒡᓘᓐᓃᑦ ᐃᐱᕐᓯᒪᖏᑦᑐᒥᒃ, ᑕᕝᕙ ᐅᑎᕐᑎᑕᒃᓴᕆᕙᑦ ᐃᓄᐊᓄᑦ. 5ᖀᒥᒋᔨᕕᑦ ᓯᐅᑎᖅᑯᕐᑐᔪᖁᑎᖓᓂᒃ ᑕᑯᒍᕕᑦ ᓇᖕᒪᒡᓗᓂ ᐅᖁᒤᒃᓴᕐᓂᕐᒧᑦ ᐹᓪᓚᒃᓯᒪᔪᒥᒃ, ᒪᑭᑎᑕᒃᓴᕆᕙᑦ ᐃᑲᔪᕐᓗᒍ; ᓴᓂᖅᑯᑐᐃᓐᓇᖏᓪᓗᒍ.
6 #
ᒨᓯᓯ ᐱᖓᔪᖏᑦ 19:15; ᒨᓯᓯ ᑕᓪᓕᒪᖏᑦ 16:19. “ᐃᓅᖃᑎᑦᓯᓐᓄᑦ ᓈᒻᒪᓈᖏᓐᓇᓱᐊᕐᑐᒃᓴᐅᓐᖏᓚᓯ ᐊᔪᕐᓴᕐᓂᖓ ᐱᑦᔪᑎᒋᓗᒍ ᐃᖅᑲᕐᑐᐃᕕᖕᒦᑎᑕᐅᓕᕐᐸᑦ.
7“ᓱᓕᖏᑦᑐᒥᒃ ᐸᓯᔭᒃᓴᓐᖑᕐᑎᑦᓯᓇᓱᐊᕐᓂᖅ ᐃᓕᑦᓯᓐᓂᑦ ᐅᖓᓯᒡᓕ, ᐸᓯᔭᒃᓴᐅᖏᑦᑐᒥᒃ ᓈᒻᒪᓈᕐᓯᒪᔪᒥᒡᓗ ᑐᖁᑕᐅᑎᑦᓯᔪᒃᓴᐅᓐᖏᓚᓯ, ᓇᓪᓕᐊᓐᓂᑐᐃᓐᓇᖅ ᓯᕗᓂᕐᓗᓕᕐᑎᑦᓯᓂᐊᕐᐳᖓ ᑍᒫᒃ ᐱᐅᖏᑦᑐᒥᒃ ᐱᔪᖃᕐᐸᑦ. 8ᓯᓔᕐᕆᒃᓯᓇᓱᐊᕐᑐᓂᒃ ᐃᓚᓕᐅᕐᓯᔪᒃᓴᐅᓐᖏᓚᓯ, ᓯᓔᕐᕆᒃᓯᓂᖅ ᓈᒻᒪᓈᕐᑐᒥᒃ ᑕᑯᓐᓇᕈᓐᓃᕐᑎᑦᓯᖕᒪᑦ ᐸᓯᔭᒃᓴᐅᖏᑦᑐᓪᓗ ᐃᓅᓯᖏᓐᓂᒃ ᓯᖁᒥᑦᓯᓪᓗᓂ.
9 #
ᒨᓯᓯ ᐂᑉᐸᖏᑦ 22:21; ᒨᓯᓯ ᐱᖓᔪᖏᑦ 19:33,34; ᒨᓯᓯ ᑕᓪᓕᒪᖏᑦ 24:17,18; 27:19. “ᓄᓇᒋᓐᖏᑕᒥᓃᑦᑐᒥᒃ ᐅᖁᒤᒃᓴᕐᑎᑦᓯᔪᒃᓴᐅᓐᖏᓚᓯ; ᐃᒃᐱᒋᔭᖓᓂᒃ ᖃᐅᔨᒪᒐᑦᓯ, ᓄᓇᒋᓐᖏᑕᑦᓯᓐᓃᓚᐅᕐᒥᒐᑦᓯ ᓄᓇᒥ ᐄᑦᔨᑉᑎᒥ.”
ᐊᕐᕌᒎᑉ 7ᖓᑦ ᐅᓪᓗᐃᓪᓗ 7ᖓᑦ
10 #
ᒨᓯᓯ ᐱᖓᔪᖏᑦ 25:1-7. “ᐊᕐᕌᒍᓂᒃ ᐱᖓᓲᔪᕐᑐᓂᒃ ᓄᓇᖁᑎᑦᓯᓐᓂ ᐱᕈᕐᓰᔪᒃᓴᐅᕗᓯ ᐱᕈᕐᑎᑕᖏᓐᓂᒡᓗ ᑕᕝᕙᓐᖓᑦ ᑲᑎᕐᓱᐃᕙᒡᓗᓯ. 11ᐊᕐᕌᒍᓪᓕ 7ᖓᓐᓂ ᓄᓇ ᐱᕈᕐᓰᕕᒃ ᑕᕾᕐᓯᕐᑎᑕᒃᓴᕆᕙᓯ ᑕᕝᕙᓂᓗ ᐱᕈᕐᑐᑦ ᑲᑎᕐᓱᖏᓪᓗᒋᑦ, ᐃᓄᐃᓪᓕ ᐊᔪᕐᓴᑐᑦ ᑕᕝᕙᓐᖓᑦ ᐱᕈᕐᑐᓂᒃ ᓂᕆᔪᓐᓇᕐᐳᑦ, ᑖᒃᑯᐊᓗ ᐊᒥᐊᒃᑯᒋᔭᖏᓐᓂᒃ ᐆᒪᔪᑦ ᓄᔪᐊᕐᑐᑦ ᓂᕆᔪᓐᓇᕆᕗᑦ. ᕔᓂᓕᒃᓴᖁᑎᓯᑦᑕᐅᖅ ᓇᐹᕐᑐᓪᓗ ᐅᕐᓱᒃᓴᓖᑦ ᑍᒪᑦᓮᓐᓇᖅ ᐱᓇᓱᐊᕐᕕᒋᔭᒃᓴᕆᕙᓯ.
12 #
ᒨᓯᓯ ᐂᑉᐸᖏᑦ 20:9-11; 31:15; 34:21; 35:2; ᒨᓯᓯ ᐱᖓᔪᖏᑦ 23:3; ᒨᓯᓯ ᑕᓪᓕᒪᖏᑦ 5:13,14. “ᐅᓪᓗᓂᒃ ᐱᖓᓲᔪᕐᑐᓂᒃ ᓴᓇᔭᒃᓴᑦᓯᓐᓂᒃ ᓴᓇᔪᒃᓴᐅᕗᓯ, ᐅᓪᓗᓪᓕ 7ᖓᓐᓂ ᑕᕾᕐᓯᕐᑐᒃᓴᐅᕗᓯ; ᐆᒪᔪᖁᑎᓯᓗ ᐊᖑᓴᓪᓗᐃᑦ ᓯᐅᑎᖅᑯᕐᑐᔪᓪᓗ ᑕᕾᕐᓯᕐᑐᒃᓴᐅᒋᕗᑦ, ᓯᐊᓛᓯᓗ ᕿᑐᕐᖓᖏᓪᓗ ᓄᓇᑐᖃᒥᓃᖏᑦᑐᓪᓗ, ᑕᕾᕐᓯᕐᑐᐃᓐᓇᐅᔪᒃᓴᐅᕗᑦ.
13“ᑕᒪᒃᑯᐊ ᐃᓕᑦᓯᓐᓄᑦ ᐅᖃᐅᓯᕆᔭᓕᒫᒃᑲ ᓈᓚᒃᓯᒋᒃ; ᐊᓯᓐᓂᒃ ᒎᑎᐅᓂᕅᔪᒃᓴᐅᓐᖏᓚᓯ ᑐᒃᓯᐊᕐᕕᖃᕐᓂᐊᕋᓯᓗ ᑍᒤᑦᑐᓂᒃ, ᐊᑎᖏᓐᓂᒃ ᐊᒡᓛᑦ ᐅᖃᕐᑐᖃᕐᑐᒃᓴᐅᓐᖏᓚᖅ ᖃᓂᑦᓯᒍᑦ.”
ᓇᓪᓕᐅᓐᓂᕐᓯᐅᕐᕖᑦ ᐱᖓᓱᑦ ᐊᖏᓂᕐᐹᑦ
ᒨᓯᓯ ᐂᑉᐸᖏᑦ 34:18-26; ᒨᓯᓯ ᑕᓪᓕᒪᖏᑦ 16:1-17
14“ᐊᕐᕌᒍᒥ ᐊᑕᐅᓯᕐᒥ ᐱᖓᓱᐃᕐᑐᕐᓗᓯ ᓇᓪᓕᐅᓐᓂᕐᓯᐅᕐᑐᒃᓴᐅᕗᓯ ᐅᕙᓐᓂᒃ ᐅᐱᒍᓲᑎᒃᓴᐅᔪᓂᒃ. 15#ᒨᓯᓯ ᐂᑉᐸᖏᑦ 12:14-20; ᒨᓯᓯ ᐱᖓᔪᖏᑦ 23:6-8; ᒨᓯᓯ ᓯᑕᒪᖏᑦ 28:17-25.ᐳᕙᓪᓚᕐᓴᐅᑎᖃᖏᑦᑐᒥᒃ ᓂᐊᖂᔭᒥᒃ ᓇᓪᓕᐅᓐᓂᕐᓯᐅᕐᕕᒃ ᓇᓪᓕᐅᓐᓂᕐᓯᐅᕐᑕᒃᓴᕆᕙᓯ; ᑍᒤᖃᑦᑕᖁᓚᐅᕋᑦᓯ, ᐳᕙᓪᓚᕐᓴᐅᑎᖃᖏᑦᑐᒥᒃ ᓂᐊᖂᔭᒥᒃ ᓂᕆᔪᒃᓴᐅᕗᓯ ᐅᓪᓗᓂᒃ 7ᓂᒃ ᓇᓪᓕᐅᓐᓂᖓ ᓇᓪᓕᐅᑎᔭᕌᖓᑦ ᑕᖅᑭᒥ ᐊᐱᑎᒥ, ᑕᕝᕙᓂ ᓇᓪᓕᐅᓐᓂᕐᒥ ᐄᑦᔨᑉᑎᒥᑦ ᐊᓂᑎᑕᐅᓚᐅᕋᑦᓯ. ᓇᓪᓕᐊᓐᓂᒡᓘᓐᓃᑦ ᐅᕙᓐᓄᑦ ᑐᒃᓯᐊᕆᐊᕐᑐᖃᕐᑐᒃᓴᐅᓐᖏᓚᖅ ᑐᓂᕐᕈᑎᒃᓴᖃᖏᓪᓗᓂ.
16 #
ᒨᓯᓯ ᐱᖓᔪᖏᑦ 23:15-21; ᒨᓯᓯ ᓯᑕᒪᖏᑦ 28:26-31;
ᒨᓯᓯ ᐱᖓᔪᖏᑦ 23:39-43. “ᐱᕈᕐᑐᓄᑦ ᑲᑎᕐᓱᐃᕕᖕᒥᒃ ᓇᓪᓕᐅᓐᓂᕐᓯᐅᕐᕕᒃ ᓇᓪᓕᐅᓐᓂᕐᓯᐅᖃᑦᑕᒐᒃᓴᕆᕙᓯ; ᐱᕈᕐᓯᐊᑦᓯᓐᓂᑦ ᓯᕗᓪᓕᕐᐹᒥᒃ ᐱᕈᕐᑐᓂᒃ ᑲᑎᕐᓱᐃᓕᕈᑦᓯ.
“ᐅᑭᐊᒃᓵᒃᑯᓪᓗ ᓇᓪᓕᐅᓐᓂᕐᓯᐅᕐᑐᒃᓴᐅᕗᓯ ᐊᕐᕌᒎᑉ ᓄᖑᓕᕐᓂᖓᓂ, ᑲᑎᕐᓱᐃᓕᕈᑦᓯ ᐱᕈᕐᓰᕕᒧᑦ ᑲᓐᖓᕐᓲᑎᒋᓚᕐᑕᑦᓯᓐᓂᑦ. 17ᐊᕐᕌᒍᒥ ᐊᑕᐅᓯᕐᒥ ᐱᖓᓱᐃᕐᑐᕐᓗᑎᒃ ᐊᖑᑎᓕᒫᑦ ᑐᒃᓯᐊᕆᐊᖃᑦᑕᕐᑐᒃᓴᐅᕗᑦ ᐊᑕᓂᕐᒧᑦ ᒎᑎᒧᑦ.
18“ᐅᕙᓐᓄᑦ ᑐᓂᕐᕈᓯᐅᑎᒋᔭᕕᑦ ᐊᐅᖓᓂᒃ ᑐᓂᓯᓕᕐᑎᓪᓗᑎᑦ ᓂᐊᖂᔭᒥᒃ ᐳᕙᓪᓚᕐᓴᐅᑎᖃᕐᑐᒥᒃ ᑐᓂᕐᕈᓯᖃᓯᐅᑦᔨᔪᒃᓴᐅᓐᖏᓚᑎᑦ, ᐅᕙᓐᓄᓪᓗ ᓇᓪᓕᐅᓐᓂᕐᓯᐅᕐᓇᐅᑎᓪᓗᒍ ᑐᓂᕐᕈᑕᐅᔫᑉ ᑐᓐᓄᖓᓂᒃ ᐊᒥᐊᒃᑯᑕᖃᕐᑐᒃᓴᐅᓐᖏᓚᖅ ᖃᐅᑎᓪᓗᒍ ᐅᓪᓛᒃᑯᑦ.
19 #
ᒨᓯᓯ ᑕᓪᓕᒪᖏᑦ 26:2; ᒨᓯᓯ ᐂᑉᐸᖏᑦ 34:26; ᒨᓯᓯ ᑕᓪᓕᒪᖏᑦ 14:21. “ᐱᕈᕐᓰᕕᖁᑎᕕᑦ ᐱᕈᕐᑎᑕᖏᑕ ᓯᕗᓪᓕᕐᐹᖏᓐᓂᒃ ᑐᓂᓯᔪᒃᓴᐅᕗᑎᑦ ᐊᑕᓂᕐᒧᑦ ᒎᑎᖕᓄᑦ.
“ᓰᐱᐅᑉ ᒎᑦᓯᐅᓪᓘᓐᓃᑦ ᓄᕐᕋᖓᓂᒃ ᐆᔪᓕᐅᕐᑐᒃᓴᐅᓐᖏᓚᑎᑦ ᐊᓈᓇᖓᑕ ᐃᒻᒧᖓᓄᑦ.”
ᐊᖏᕈᑕᐅᔪᑦ ᒪᓕᒃᑕᐅᔭᕆᐊᓖᓪᓗ
20“ᑕᑯᒋᑦ, ᐂᖏᓕᒥᒃ ᑎᓕᓯᕗᖓ ᓯᕗᓂᕐᓄᑦ, ᑖᑦᓱᒧᖓ ᓴᐳᑎᔭᐅᓯᒪᖁᓪᓗᑎᑦ ᐊᖅᑯᑎᖕᓂ ᓄᓇᒧᓪᓗ ᐃᓕᖕᓄᑦ ᐅᐸᓗᖎᕐᓯᒪᔭᓐᓄᑦ ᑎᑭᑦᓱᓐᓇᖁᓪᓗᑎᑦ. 21ᑖᓐᓇ ᑲᒪᒋᑦᓯᐊᕐᓯᐅᒃ ᐅᖃᐅᓯᖓᓗ ᓈᓚᒡᓗᒍ, ᐊᑭᕋᕐᑐᕐᓂᐊᕋᓯᐅᒃ, ᑎᓕᓯᒪᒐᒃᑯ, ᐊᑭᕋᕐᑐᕈᑦᓯᐅᒃ ᐊᔪᕐᑐᓕᓂᓯ ᐃᓱᒪᒋᔪᓐᓁᕐᓂᐊᖏᒻᒪᒋᑦ. 22ᓈᓚᖕᓂᐊᕈᑦᓯᐅᒡᓕ ᐅᖃᓯᕆᔭᒃᑲᓗ ᑖᑦᓱᒨᓇ ᐱᓇᓱᐊᕈᑎᒋᓂᐊᕈᑦᓯᐅᒃ, ᑕᕝᕙ ᐊᑭᕋᕐᑐᑎᓯ ᐊᑭᕋᕐᑐᕐᑎᒋᓂᐊᕆᕙᒃᑲ ᐅᓇᖕᒥᔨᓯᓗ ᐅᓇᖕᒥᔨᒋᓗᒋᑦ. 23ᐂᖏᓕᖁᑎᒐ ᓯᕗᓂᑦᓯᓐᓄᑦ ᑎᓕᓂᐊᕐᐸᕋ, ᑖᑦᓱᒪ ᑕᓯᐅᕐᓂᐊᕐᐹᓯ ᐊᒧᕅᑎᒥᐅᓄᑦ, ᕼᐃᑍᑎᒥᐅᓄᓪᓗ, ᐱᕆᔧᑎᒥᐅᓄᓪᓗ, ᑬᓇᓂᒥᐅᓄᓪᓗ, ᕼᐃᕔᑎᓄᓪᓗ, ᔨᐳᓮᑎᒥᐅᓄᓪᓗ, ᑖᒃᑯᐊᓗ ᓄᖑᑎᓐᓂᐊᕐᐸᒃᑲ. 24ᑖᒃᑯᐊᓗ ᒎᑎᒋᔭᖏᓐᓄᑦ ᐹᒻᒪᒃᑎᕐᑐᒃᓴᐅᓐᖏᓚᓯ, ᑐᒃᓯᐊᕐᕕᒋᓇᒋᓪᓗ, ᐅᒃᐱᕆᔭᖏᓪᓗ ᒪᓕᖏᓪᓗᒋᑦ, ᐊᑕᖏᓪᓚᕆᒃᑐᒥᒡᓕ ᒎᑎᓐᖑᐊᖁᑎᒋᔭᖏᑦ ᐲᔭᕐᑕᒃᓴᕆᕙᓯ ᓇᐸᔪᖁᑎᒋᔭᖏᓪᓗ ᐅᔭᕅᑦ ᐅᕐᕈᑎᓪᓗᒋᑦ ᓯᖁᒥᑕᒃᓴᕆᕙᓯ. 25ᐊᑕᓂᖅ ᒎᑎᓯ ᐱᔨᑦᓯᒐᒃᓴᕆᕙᓯ, ᑕᕝᕙ ᓂᕿᒃᓴᓯ ᐃᒥᒃᓴᓯᓗ ᓮᒻᒪᕐᑎᓐᓂᐊᕐᐸᒃᑲ; ᖃᓂᒪᓇᕐᑐᓪᓗ ᐃᓕᑦᓯᓐᓂᑦ ᐲᔭᕐᓂᐊᕐᐸᒃᑲ. 26ᓄᓇᖕᓂ ᐊᕐᓁᑦ ᑕᒪᐅᓁᓐᓇᖅ ᐃᕐᓂᔪᖃᕐᓂᐊᓐᖏᓚᑦ, ᕿᑐᕐᖏᓱᐃᑦᑐᕐᑕᖃᕐᓂᐊᕋᓂᓗ, ᐊᑯᓂᓗ ᐃᓅᑯᑖᒃᑎᓐᓂᐊᕐᐸᑦᓯ.
27“ᐊᑭᕋᕐᑐᕐᑎᓯ ᐅᕙᓐᓂᒃ ᑲᑉᐱᐊᓱᓕᕐᑎᓐᓂᐊᕐᐸᒃᑲ, ᐅᓇᑕᖃᑎᒋᔭᓕᒫᓯᓗ ᓇᓗᓕᕐᓇᕐᑐᒧᑦ ᑎᑭᑕᐅᑎᓐᓂᐊᕐᐸᒃᑲ, ᐊᑭᕋᕐᑐᕐᑎᓯᓗ ᐃᓕᑦᓯᓐᓂᑦ ᕿᒫᑎᓪᓗᒋᑦ. 28ᐅᐃᒻᒪᖕᓇᕐᑐᐊᓗᖕᒧᑦ ᓇᓗᓕᕐᓇᕐᑐᒧᓪᓗ ᑎᑭᑕᐅᑎᓐᓂᐊᕐᐸᒃᑲ, ᑕᒪᑐᒧᖓᓗ ᕼᐃᕔᑎᒥᐅᑦ ᓄᓇᒥᖕᓂᑦ ᐊᐅᓪᓚᕐᑎᑕᐅᓂᐊᕐᐳᑦ, ᑬᓇᓂᒥᐅᓪᓗ, ᕼᐃᑍᑎᒥᐅᓪᓗ, ᕿᒪᒃᓯᓗᑎᒃ ᐃᓕᑦᓯᓐᓂᒃ. 29ᐃᓕᑦᓯᓐᓂᓪᓕ ᐊᐅᓪᓚᕐᑎᓐᓂᐊᓐᖏᓚᒃᑲ ᐊᕐᕌᒍᒥ ᐊᑕᐅᓯᕐᒥ, ᓄᓇ ᑕᒪᓐᓇ ᓇᔪᕐᑕᖓ ᐃᓄᖃᕈᓐᓃᕈᓂ ᐆᒪᔪᖃᓗᐊᓕᖁᓇᒍ ᓄᔪᐊᕐᑐᓂᒃ ᐃᓕᑦᓯᓐᓄᑦ ᐊᒡᕕᐊᕋᔭᕐᑐᓂᒃ. 30ᓱᒃᑬᑦᑐᒥᒃ ᐱᕙᓪᓕᐊᒐᓛᐱᒡᓗᑎᒃ ᐊᐅᓪᓚᕐᑎᑉᐸᓪᓕᐊᓂᐊᕐᐸᒃᑲ ᐃᓕᑦᓯᓐᓂᑦ, ᐃᓕᑦᓯᓗ ᐅᓄᕐᓯᕙᓪᓕᐊᓂᓯ ᒪᓕᒡᓗᒍ ᓄᓇᑖᕈᓐᓇᕐᓯᕙᓪᓕᐊᖁᓪᓗᓯ. 31ᓄᓇᒋᓂᐊᕐᑕᑦᓯᓗ ᑭᒡᓕᖃᕐᑎᓐᓂᐊᕐᐸᕋ ᐃᒪᕐᒥᑦ ᐊᐅᐸᓗᒃᑕᒥᑦ ᐱᒋᐊᕐᓗᒍ ᐱᓕᔅᑍᓂᐅᑉ ᐃᒪᖓᓄᑦ ᑎᑭᓪᓗᒍ, ᐃᓄᖃᖏᑦᑐᒥᓪᓗ ᐱᒋᐊᕐᓗᒍ ᐃᕗᕅᑎᐅᑉ ᑰᖓᓄᑦ ᑎᑭᓪᓗᒍ; ᑕᒫᓂᓗ ᓄᓇᖃᕐᑐᑦ ᐃᓕᑦᓯᓐᓄᑦ ᑐᓂᓂᐊᕐᐸᒃᑲ, ᐃᓕᑦᓯᓪᓗ ᑕᒫᓐᖓᑦ ᓄᓇᒥᑦ ᐊᓂᑎᓐᓂᐊᕐᐸᓯ. 32ᑖᒃᑯᓂᖓ ᓱᓇᑐᐃᓐᓇᕐᒧᑦ ᐊᖏᖃᑎᒌᒍᑎᖃᕆᐊᖃᓐᖏᓚᓯ ᐅᕝᕙᓗ ᒎᑎᖏᓐᓄᑦ. 33ᓄᓇᒋᔭᑦᓯᓐᓂ ᓄᓇᖅᑲᑎᒋᔭᒃᓴᕆᓐᖏᓚᓯ, ᑖᒃᑯᓇᓐᖓᑦ ᐊᔪᕐᑐᓕᑎᑕᐅᖁᓇᓯ ᐅᕙᓐᓄᑦ; ᒎᑎᓐᖑᐊᖏᓐᓂᒃ ᑐᒃᓯᐊᕐᕕᖃᓕᕈᑦᓯ, ᑕᒪᓐᓇ ᖁᓚᕐᓇᒋᑦᓯᐊᕐᑐᒥᒃ ᐃᓕᑦᓯᓐᓄᑦ ᓂᒐᕐᑎᑦᓯᔪᑎᑎᑐᑦ ᑍᒤᓐᓂᐊᕐᐳᖅ.”
Currently Selected:
ᒨᓯᓯ ᐂᑉᐸᖏᑦ 23: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
