ᒨᓯᓯ ᐂᑉᐸᖏᑦ 24
24
ᐊᖏᖃᑎᒌᖕᓂᐅᑉ ᑍᒤᓕᖓᓂᐊᕐᓂᖓᑕ ᓇᕿᑦᔪᓯᕐᑕᐅᓂᖓ
1ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᖃᖅᑳᓗᖕᒧᑦ ᒪᔪᕋᕐᓗᑎᑦ ᐅᕙᓐᓄᐊᕆᑦ ᐂᕉᓂ ᐱᖃᑎᒋᓗᒍ, ᓁᑖᑉᓗ ᐊᐱᕼᐅᓗ, ᐃᓴᕆᐊᓕᒥᐅᓪᓗ ᐊᖓᔪᖅᑳᖏᓐᓂᒃ 70ᓂᒃ ᐅᖓᓯᒃᑐᒦᓪᓗᓯ ᓱᓕ ᐅᑯᔪᒃᓴᐅᕗᓯ ᑐᒃᓯᐊᕐᕕᒋᓗᖓ. 2ᒨᓯᓯᑐᐊᖅ ᑭᓯᒥ ᐊᑕᓂᕐᒧᑦ ᖃᒡᓕᔪᓐᓇᕐᑐᑑᓂᐊᕐᐳᖅ ᐊᓯᖏᓪᓕ ᖃᒡᓕᔪᒃᓴᐅᓐᖏᓚᑦ. ᐃᓄᑐᐃᓐᓁᓪᓗ ᖃᖅᑲᒧᑦ ᒪᔪᐊᕐᑐᒃᓴᐅᓐᖏᓚᑦ.”
3ᒨᓯᓯᐅᓪᓗ ᐃᓄᐃᑦ ᐅᖃᕐᕕᒋᕔᑦ, ᐊᑕᓂᐅᑉ ᐊᑐᕐᑕᐅᖁᔭᖏᓐᓂᒃ ᒪᓕᒐᕆᔭᐅᖁᔭᖏᓐᓂᒡᓗ. ᐃᓄᐃᓪᓗ ᐊᑕᐅᑦᓯᒃᑯᑦ ᑭᐅᕗᑦ, “ᐊᑕᓂᐅᑉ ᐅᖃᐅᓯᕆᔭᓕᒫᖏᓐᓂᒃ ᒪᓕᖕᓂᐊᕐᐳᒍᑦ.” 4ᒨᓯᓯᐅᓪᓗ ᑎᑎᕋᕐᐰᑦ ᐊᑕᓂᐅᑉ ᐱᓂᐊᕐᑕᐅᖁᔭᓕᒫᖏᑦ, ᖃᐅᑎᓪᓗᒍᓗ ᐅᓪᓛᕋᕐᔪᒃᑯᑦ ᑐᓂᕐᕈᓯᕐᕕᒃᓴᒥᒃ ᓴᓇᕗᖅ ᖃᖅᑳᓘᑉ ᐊᑖᓂ. ᓴᓇᕕᒋᓪᓗᓂᐅᒃ ᐅᔭᖅᑲᓂᒃ 12ᓂᒃ ᐅᔭᕋᒃ ᐊᑕᐅᓯᖅ ᑐᕌᖓᑎᓪᓗᓂᐅᒃ ᐃᓅᖃᑎᒌᑦ ᐃᓴᕆᐊᓕᒥᐅᑦ 12ᓕᖅᑲᖓᓂᖏᑦ ᒪᓕᒡᓗᒋᑦ. 5ᐃᓅᓱᒃᑐᓂᒡᓗ ᐃᓴᕆᐊᓕᒥᐅᓂᒃ ᑎᓕᓯᕗᖅ, ᑖᒃᑯᐊᓗ ᐃᑯᐊᓚᑦᓯᕗᑦ ᑐᓂᕐᕈᑎᓂᒃ ᐊᑕᓂᕐᒧᑦ. ᐃᒻᒧᒃᓯᐅᒐᕐᓂᒡᓗ ᑐᓂᕐᕈᓯᕆᓪᓗᑎᒃ ᒎᑎᒥᒃ ᐃᓚᖃᑦᓯᐊᕐᓂᖅ ᐱᑦᔪᑎᒋᓪᓗᒍ. 6ᒨᓯᓯᐅᓪᓗ ᐆᒪᔪᑦ ᐊᐅᖏᑕ ᐃᓚᖏᑦ ᐴᖅᑲᕐᐰᑦ ᐴᒍᑕᕐᓄᑦ, ᐃᓚᖏᓪᓗ ᑐᓂᕐᕈᓯᕐᕕᖕᒧᑦ ᓯᕐᐸᕐᓴᐅᑎᒋᓪᓗᓂᒋᑦ. 7ᐊᖏᖃᑎᒌᖕᓂᐅᓪᓗ ᑎᑎᕋᕐᓯᒪᔪᖁᑎᖏᑦ ᒨᓯᓯᐅᑉ ᐱᕔᑦ, ᑖᒃᑯᓇᓂ ᒎᑎᐅᑉ ᐱᓂᐊᕐᑕᐅᖁᔭᖏᑦ ᑎᑎᕋᕐᓯᒪᖕᒪᑕ. ᓂᐱᖃᕐᓗᓂᓗ ᐃᓄᖕᓄᑦ ᐅᖃᓕᒫᕐᐰᑦ, ᐃᓄᐃᓪᓗ ᐅᖃᕐᐳᑦ, “ᐊᑕᓂᖅ ᓈᓚᖕᓂᐊᕐᐸᕗᑦ ᐱᖁᔭᓕᒫᖏᓪᓗ ᐊᑐᕐᓗᑎᒍ.”
8 #
ᒫᑎᐅᓯ 26:28; ᒫᑯᓯ 14:24; ᓘᑲᓯ 22:20; 1 ᑯᕆᓐᑎ 11:25; ᐄᑉᕈᐃᓄᑦ 10:29;
ᐄᑉᕈᐃᓄᑦ 9:19,20. ᒨᓯᓯᐅᓪᓗ ᐊᐅᒃ ᐴᒍᑕᕐᒦᑦᑐᖅ ᐱᓪᓗᓂᐅᒃ ᐃᓄᐃᑦ ᓯᕐᐸᕐᓴᕐᕕᒋᕔᑦ, ᐅᖃᕐᓗᓂᓗ, “ᑕᑯᒋᑦ ᑕᒪᓐᓇ ᐊᐅᒃ ᓇᓗᓁᒃᑯᑕᐅᕗᖅ ᐊᖏᖃᑎᖃᕐᓯᒪᓂᑦᑕ ᑍᒤᓕᖓᓂᐊᓕᕐᓂᖓᓂᒃ. ᐊᑕᓂᐅᑉ ᐊᖏᖃᑎᒋᓚᐅᕐᒪᓯ ᐱᖁᔭᒥᓂᒃ ᑐᓂᓯᕕᒋᒐᒥᓯ.”
9ᑕᕝᕙ ᒨᓯᓯᓗ ᐂᕉᓂᓗ, ᓁᑖᑉᓗ, ᐊᐱᕼᐅᓗ, ᐃᓴᕆᐊᓕᒥᐅᓂᓗ ᐊᖓᔪᖅᑳᑦ 70 ᖃᖅᑲᒧᑦ ᒪᔪᐊᕐᐳᑦ, 10ᑖᒃᑯᐊᓗ ᑕᑯᕚᑦ ᐃᓴᕆᐊᓕᒥᐅᑦ ᒎᑎᖓᑦ; ᑖᑦᓱᒪᓗ ᐃᑎᒐᖏᑕ ᐊᑖᒍᑦ ᐅᔭᕋᒃᑕᖃᕐᐳᖅ ᓴᓇᓯᒪᔫᔮᕐᑐᒥᒃ ᓴᐰᕋᑎᑐᑦ ᑕᑯᒥᓇᕐᑐᐊᓗᒃᑎᑐᑦ ᑍᒤᑦᑐᒥᒃ, ᐅᔭᖅᑲᑎᑐᑦ ᓯᓚᑎᑐᑦ ᑕᑯᒃᓴᐅᓇᑦᓯᐊᕐᑐᒥᒃ ᑐᖑᔪᑦᓯᐊᕐᑎᒋᔪᒥᒃ. 11ᒎᑎᐅᓪᓗ ᑖᒃᑯᐊ ᐃᓴᕆᐊᓕᒥᐅᓂ ᑕᓯᐅᕐᑎᐅᔪᑦ ᖃᓄᐃᓕᑎᓚᐅᓐᖏᓔᑦ; ᑖᑦᓱᒥᖓ ᑕᑯᒐᓗᐊᕐᑎᓪᓗᒋᑦ, ᓂᕆᖃᑎᒌᒃᓗᑎᒡᓕ ᐃᒥᖃᑎᒌᓕᕐᐳᑦ ᑕᕝᕙᓂ.
ᒨᓯᓯᐅᑉ ᖃᖅᑲᒥ ᓮᓁᒦᓐᓂᖓ
12ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᖃᖅᑲᒧᑦ ᒪᔪᐊᓚᐅᕆᑦ ᐅᕙᓐᓄᑦ, ᑕᕝᕙᓂᓗ ᐅᑕᖅᑭᓗᑎᑦ; ᑐᓂᓯᓂᐊᕋᒃᑭᑦ ᐅᔭᕋᒃᑯᑦ ᑎᑎᕋᕐᓯᒪᔫᖕᓂᒃ ᒪᕐᕉᖕᓂᒃ, ᐱᖁᔭᓂᒃ ᑎᑎᕋᕐᕕᒋᓯᒪᔭᓐᓂᒃ ᐃᓄᖕᓄᑦ ᒪᓕᒃᑕᐅᔭᕆᐊᖃᕐᑐᓂᒃ.” 13ᑕᕝᕙ ᒨᓯᓯ ᐸᕐᓇᓕᕐᐳᖅ ᐱᔨᓂ ᔮᓱᐊ ᐃᓚᒋᓪᓗᒍ, ᒨᓯᓯᓗ ᖃᖅᑲᒧᑦ ᒪᔪᕋᕐᐳᖅ ᒎᑎᐅᑉ ᖃᖅᑲᖁᑎᖓᓄᑦ. 14ᐅᖃᕐᐳᕐᓗ ᐊᖓᔪᖅᑲᐅᔪᓄᑦ, “ᑕᕝᕙᓂ ᐅᑕᖅᑭᓚᐅᕆᑦᓯ ᐅᕙᑦᑎᓐᓂᒃ, ᐅᑎᓚᐅᖅᑳᕐᑎᓐᓇᑕ; ᑕᑯᒋᑦ ᐃᓚᖃᕐᐳᓯ ᐂᕉᓂᒥᒃ ᕼᐊᕐᒥᒡᓗ; ᓇᓪᓕᐊᓐᓂᒃ ᐊᑲᐅᓐᖏᓕᐅᕈᑎᔪᖃᕐᐸᑦ, ᑕᕝᕙ ᑖᒃᑯᓄᖓ ᐅᐸᒍᑎᔪᖃᕈᓐᓇᕐᓂᐊᕐᐳᖅ.”
15ᑕᕝᕙ ᒨᓯᓯ ᖃᖅᑲᒧᑦ ᒪᔪᐊᕐᒪᑦ, ᖃᖅᑲᖅ ᓄᕗᔭᒧᑦ ᐅᓕᒃᑕᐅᕗᖅ. 16ᐊᑕᓂᐅᓪᓗ ᓂᕐᑐᕐᓇᕐᓂᕐᔪᐊᖓ ᖃᖅᑲᐅᑉ ᖄᖓᓃᓕᕐᐳᖅ ᓮᓁᒥ, ᓄᕗᔭᒧᓪᓗ ᐅᓕᒃᑕᐅᓯᒪᓪᓗᓂ ᐅᓪᓗᓂᒃ 6ᓂᒃ; ᐅᓪᓗᓪᓕ 7ᖓᓐᓂ ᒎᑎᐅᑉ ᒨᓯᓯ ᐅᖃᕐᕕᒋᓕᕐᐹ ᓄᕗᔭᒥᑦ. 17ᐊᑕᓂᐅᓪᓕ ᓂᕐᑐᕐᓇᕐᓂᕐᔪᐊᖓᑕ ᓴᖅᑭᔮᕐᓂᖓ ᐃᑯᐊᓚᔪᑎᑐᑦ ᑍᒤᓚᐅᕐᐳᖅ ᖃᖅᑲᐅᑉ ᖄᖓᓂ ᐃᓄᐃᑦ ᐃᓴᕆᐊᓕᒥᐅᑦ ᑕᑯᓐᓇᕐᑕᖏᑎᒍᑦ. 18#ᒨᓯᓯ ᑕᓪᓕᒪᖏᑦ 9:9.ᒨᓯᓯᓗ ᓄᕗᔭᒧᑦ ᐃᑎᕐᐳᖅ, ᖃᖅᑲᐅᑉ ᖄᖓᓃᑦᑐᒧᑦ. ᑕᕝᕙᓃᑉᐳᕐᓗ ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ.
Currently Selected:
ᒨᓯᓯ ᐂᑉᐸᖏᑦ 24: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
