ᒨᓯᓯ ᐂᑉᐸᖏᑦ 25
25
ᑐᓂᕐᕈᓯᕐᓂᖅ ᐃᑦᔪᕐᓁᑦᑐᒥ ᑐᐱᕐᒥ
ᒨᓯᓯ ᐂᑉᐸᖏᑦ 35:4-9
1ᐊᑕᓂᖅ ᐅᖃᕐᐳᖅ ᒨᓯᓯᒧᑦ, 2“ᐃᓴᕆᐊᓕᒥᐅᑦ ᐅᖃᐅᑎᓚᐅᒃᑭᑦ, ᑐᓂᕐᕈᓯᖁᓪᓗᒋᑦ ᐅᕙᓐᓄᑦ; ᐃᓄᐃᑦ ᐊᑐᓂᑦ ᓇᖕᒥᓂᖅ ᐱᔪᒪᓂᕐᒥᖕᓂᒃ ᒪᓕᒡᓗᑎᒃ, ᑐᓂᕐᕈᑎᖏᓪᓗ ᖃᓄᐃᑦᑐᑐᐃᓐᓇᐅᒐᓗᐊᕐᐸᑕ ᐃᓚᓕᐅᕐᓂᐊᕐᐸᑎᑦ ᐅᕙᖓ ᐱᑦᔪᑎᒋᓗᖓ. 3ᒪᑯᐊ ᑕᕝᕙ ᑐᓂᕐᕈᑎᒃᓴᐅᔪᑦ ᐃᓚᓕᐅᕐᑕᒃᓴᕆᔭᑎᑦ ᑖᒃᑯᓇᓐᖓᑦ: ᒎᓗᐃᑦ, ᓯᐅᓪᕕᕇᑦ, ᑲᓐᓄᔧᓪᓗ, 4ᐅᕕᓂᕈᒃᓴᔧᓪᓗ ᓵᑦᑐᑦ; ᑐᖑᔪᕐᑐᐃᑦ ᐊᐅᐸᓪᓚᕆᒃᑐᓪᓗ#25:4 ᐊᐅᐸᓪᓚᕆᒃᑐᑦ ᐅᕝᕙᓗ ᐃᑦᑎᓐᖑᐊᑦ ᐊᐅᐸᕐᑐᓪᓗ ᓄᕕᕐᓵᒃᓮᑦ; ᐊᓐᓄᕌᓕᐊᕆᓯᒪᔪᓪᓗ ᒎᓯᐅᑉ ᒥᖅᑯᖏᓐᓂᑦ. 5ᓰᐱᐅᓪᓗ ᐊᖑᓴᓪᓗᖏᑕ ᐊᒥᖏᓐᓂᒃ ᕿᑐᒻᒪᒃᓴᕐᓯᒪᔪᓂᒃ ᐊᐅᐸᕐᑐᓂᒃ, ᐊᒥᕐᓂᒡᓗ ᕿᑐᒻᒪᒃᓴᕐᓯᒪᔪᓂᒃ, ᕿᔪᖕᓂᒡᓗ ᑎᓴᒃᑕᓂᒃ#25:5 ᑎᓴᒃᑕᖅ ᐅᕝᕙᓗ ᓯᑎᔪᔭᖅ ᐊᑬᑦᓯᐊᓂᒃ ᐊᑎᓕᖕᓂᒃ, 6ᓇᓂᕈᐊᓪᓗ ᐅᕐᓱᒃᓴᖏᓐᓂᒃ, ᓇᐹᕐᑑᓪᓗ ᐅᕐᓱᖓᑕ ᒥᖑᐊᕐᓯᒍᑎᐅᑉ ᑎᐱᑦᓯᐊᕆᒃᓴᐅᑎᖓᓂᒃ, ᑎᐱᑦᓯᐊᕆᒃᑐᓂᒡᓗ ᐃᓯᕐᓗᐊᕐᓂᑎᑦᓯᒍᑎᒃᓴᓂᒃ, 7ᐅᔭᕋᖕᓂᒡᓗ ᐊᑭᑐᔪᒃᓴᔭᓂᒃ ᐊᑎᖃᕐᑐᓂᒃ ᑳᕐᓂᓕᐊᓂᒃ, ᐊᓯᖏᓐᓂᒡᓗ ᐅᔭᕋᖕᓂᒃ ᐱᐅᓴᐅᑎᒋᔭᐅᔪᒃᓴᓂᒃ, ᑐᓂᕐᕈᓯᕐᑎᑦᓯᔩᑦ ᓴᒡᕕᖕᒥᐅᑕᖏᓐᓂ ᐃᐹᑎᓂᒃ ᐊᑎᓕᖕᓂᒃ ᓴᒡᕕᖕᒥᐅᑕᖏᓐᓂᓗ. 8ᑖᒃᑯᓇᓂ ᐃᑦᔪᕐᓁᓐᓂᕐᐹᒥᒃ ᐃᓂᒃᓴᒥᒃ ᓴᓐᓇᔪᖃᕐᑐᒃᓴᐅᕗᖅ, ᐃᓂᒃᓴᖃᖁᓪᓗᖓ ᐊᑯᕐᖓᓐᓂ. 9ᑐᐱᕐᒥᒃ ᓴᓇᔪᒃᓴᐅᕗᑎᑦ ᐃᓕᖕᓄᑦ ᓇᓗᓁᕐᓂᐊᕐᑕᓐᓂᒃ, ᐃᓗᓕᒃᓴᓕᒫᖏᓪᓗ ᐋᖅᑭᒃᓯᒪᓂᒃᓴᖓᓗ, ᐃᓱᒪᒋᓯᒪᔭᒃᑲ ᒪᓕᒡᓗᒋᑦ.”
ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ
ᒨᓯᓯ ᐂᑉᐸᖏᑦ 37:1-9
10“ᐃᒃᓯᕐᕕᖕᒥᒃ ᓴᓇᔪᒃᓴᐅᕗᑎᑦ ᕿᔪᖕᒥᒃ ᑎᓴᒃᑕᒥᒃ ᐊᑬᑦᓯᐊᓂᒃ ᐊᑎᓕᖕᒥᒃ; ᑕᑭᓂᖃᕐᓗᒍ 110ᓂᒃ ᓯᓐᑎᒦᑕᓂᒃ, ᓯᓕᖕᓂᖃᕐᓗᒍ 66ᓂᒃ ᓯᓐᑎᒦᑕᓂᒃ, ᐳᕐᑐᓂᖃᕐᓗᒍᓗ 66ᓂᒃ ᓯᓐᑎᒦᑕᓂᒃ. 11ᑖᓐᓇᓗ ᖄᓕᕐᑕᒃᓴᕆᕙᑦ ᒎᓗᓪᓚᕆᖕᒥᒃ, ᐃᓗᐊ ᓯᓚᑖᓗ ᖄᐹᕐᓗᒍ#25:11 ᖄᐹᕐᓗᒍ ᒎᓗᒥᒃ ᐅᕝᕙᓗ ᓯᓚᑉᐱᐊᕐᓗᒍ ᒎᓗᒥᒃ ᒎᓗᒥᒃ, ᓯᓇᕐᔪᓕᐅᕐᓗᒍᓗ ᒎᓗᒥᒃ. 12ᓯᑕᒪᓂᒡᓗ ᒎᓗᓂᒃ ᑎᒍᒥᐊᕐᕕᓕᐅᕐᓗᒍ ᐊᖕᒪᓗᕐᑐᓂᒃ ᓱᓪᓗᓕᖕᓂᒃ ᑖᒃᑯᐊᓗ ᓂᐅᖏᓐᓄᑦ ᐃᓕᓗᒋᑦ, ᒪᕐᕉᒃ ᐃᒡᓗᐊᓃᓪᓗᑎᒃ, ᒪᕐᕉᒡᓗ ᐃᒡᓗᐊᓃᒻᒥᓗᑎᒃ. 13ᑕᑭᔪᑯᑖᖕᓂᒃ ᕿᔪᖕᓂᒃ ᓴᓇᓕᕆᑦ ᑎᓴᒃᑖᖕᓂᒃ ᐊᑬᑦᓯᐊᒥᒃ ᐊᑎᓕᖕᒥᒃ, ᑖᒃᑯᐊᒡᓗ ᓯᓚᑉᐱᐊᕐᓗᒋᒃ#25:13 ᖄᐹᕐᓗᒍ ᒎᓗᒥᒃ ᐅᕝᕙᓗ ᓯᓚᑉᐱᐊᕐᓗᒍ ᒎᓗᒥᒃ ᒎᓗᒥᒃ. 14ᓱᓪᓗᖏᑎᒍᓪᓗ ᑲᐅᑎᓪᓗᒋᒃ ᑍᒫᒃ ᐊᑭᕋᐅᑎᓕᐅᒐᒃᓴᕆᕙᑦ ᐃᒃᓯᕐᕕᐅᑉ ᓴᓂᕌᒍᑦ, ᑕᒪᐅᓇ ᐊᑭᕋᕐᑕᐅᖃᑦᑕᖁᓪᓗᒍ. 15ᑖᒃᑯᐊᓗ ᕿᔪᑯᑖᑦ ᐊᑭᕋᐅᑎᖏᑦ ᐃᒃᓯᕐᕕᐅᑉ ᐳᑐᖏᑎᒎᖓᔪᑦ; ᑕᕝᕙᓐᖓᑦ ᐃᓂᖏᓐᓂᑦ ᐲᕐᑕᐅᔪᒃᓴᐅᓐᖏᓚᑦ. 16ᑕᕝᕗᖓᓗ ᐃᒃᓯᕐᕕᖕᒧᑦ ᐃᓕᔪᒫᕐᐹᒃᑭᒃ ᐅᔭᕌᒃ ᒪᕐᕉᒃ ᐱᖁᔭᓂᒃ ᑎᑎᕋᕐᕕᒋᓯᒪᔫᒃ ᐃᓕᖕᓄᑦ ᑐᓂᔪᒫᕐᑖᒃᑲᒃ.
17 #
ᐄᑉᕈᐃᓄᑦ 9:5. “ᒪᑐᓕᐅᕐᑕᒃᓴᕆᕙᓪᓗ ᓂᑲᒍᓱᖕᓂᐅᑉ ᐃᒃᓯᕙᐅᑕᖓᓂᒃ ᑍᔭᐅᔪᒥᒃ ᒎᓗᐃᓐᓇᐅᓗᒍ; ᑕᑭᓂᖃᕐᓗᒍ 110ᓯᓐᑎᒦᑕᓂᒃ, ᓯᓕᖕᓂᖃᕐᓗᒍᓗ 66ᓯᓐᑎᒦᑕᓂᒃ. 18ᑖᑦᓱᒪᓗ ᒪᑑᑉ ᖄᖓᒍᑦ ᐃᓱᖏᒃᑎᒃᑯᑦ ᐃᒡᓗᒌᖕᓂᒃ; ᐃᓴᕈᓐᖑᐊᓖᖕᓂᒃ ᓴᓇᔪᒃᓴᐅᕗᑎᑦ ᓯᕈᐲᓂᒃ ᑍᔭᐅᔪᖕᓂᒃ; ᑖᒃᑯᐊᒡᓗ ᒎᓘᔪᒃᓴᐅᕘᒃ ᑲᐅᒐᕐᓗᒋᒃ ᓴᓇᓯᒪᓗᑎᒃ. 19ᓴᓇᔪᒃᓴᐅᕗᑎᑦ ᐊᑕᐅᓯᖅ ᓯᕈᐲᒻ ᒪᑑᑉ ᐃᓱᐊᓃᓪᓗᓂ, ᐂᑉᐸᖓᓗ ᓯᕈᐲᒻ ᐃᒡᓗᐊᓃᓪᓗᓂ; ᑕᕝᕙᓂ ᒪᑐᒥ ᐃᓛᒃᑰᖏᓪᓗᑎᒃ ᓴᓇᓯᒪᖁᓪᓗᒋᒃ, ᓯᕈᐲᒻᓂᒃ ᒪᕉᖕᓂᒃ ᐃᒡᓗᒌᖕᓂᒃ ᖄᒥᐅᑕᖃᖁᓪᓗᒍ. 20ᑖᒃᑯᐊᒡᓗ ᓯᕈᐲᒻ ᐃᓴᕈᖏᒃ ᐃᓯᕕᖓᔪᒃᓴᐅᕘᒃ, ᑖᓐᓇ ᒪᑐ ᐃᓴᕈᒥᖕᓄᑦ ᖁᓚᖏᐊᕐᓗᒍ, ᑖᒃᑯᐊᒡᓗ ᓯᕈᐲᒻ ᐃᒻᒥᖕᓄᑦ ᓵᓐᖓᖃᑦᑕᐅᑎᔪᒃᓴᐅᕘᒃ ᒪᑑᑉ ᖄᖓᓂ. 21ᐃᒃᓯᕐᕕᒡᓗ ᑕᑦᓱᒧᖓ ᒪᑐᒧᑦ ᒪᑐᔭᒃᓴᕆᕙᑦ; ᐅᔭᕌᒡᓗ ᒪᕐᕉᒃ ᐱᖁᔭᓂᒃ ᑎᑎᕋᕐᕕᒋᓯᒪᔫᒃ ᐃᒃᓯᕐᕕᐅᑉ ᐃᓗᐊᓄᐊᕐᓗᒋᒃ ᐃᓕᖕᓄᑦ ᑐᓂᔪᒫᕐᑖᒃᑲᒃ. 22ᑕᕝᕙᓂᓗ ᐃᓕᖕᓄᑦ ᓴᖅᑭᕈᒫᕐᐳᖓ, ᑖᑦᓱᒪᓗ ᒪᑑᑉ ᖄᖓᓂ ᓯᕈᐲᒻᖑᐊᒃ ᐊᑯᓐᓂᖓᓂᑦ ᐱᖁᔭᓕᒫᓐᓂᒃ ᑐᓂᓯᕕᒋᔪᒫᕐᐸᒋᑦ, ᐃᓴᕆᐊᓕᒥᐅᓕᒫᓄᑦ ᑐᕌᖓᓂᐊᕐᑐᓂᒃ.”
ᒎᑎᒧᑦ ᑐᓂᕐᕈᑎᐅᔪᑦ ᓂᐊᖂᔧᑦ ᐃᓂᒃᓴᖓ
ᒨᓯᓯ ᐂᑉᐸᖏᑦ 37:10-16
23“ᕿᔪᖕᒥᒃ ᑎᓴᒃᑕᒥᒃ ᐊᑬᑦᓯᐊᒥᒃ ᐊᑎᓕᖕᒥᒃ ᓵᓕᐅᕐᑐᒃᓴᐅᕗᑎᑦ; ᑕᑭᓂᖃᕐᓗᒍ 88ᓂᒃ ᓯᓐᑎᒦᑕᓂᒃ, ᓯᓕᖕᓂᖃᕐᓗᒍᓗ 44ᓂᒃ ᓯᓐᑎᒦᑕᓂᒃ, ᐳᕐᑐᓂᖃᕐᓗᒍᓗ 66ᓂᒃ ᓯᓐᑎᒦᑕᓂᒃ. 24ᑖᓐᓇᓗ ᓯᓚᑉᐱᐊᕐᑕᒃᓴᕆᕙᑦ ᒎᓗᓪᓚᕆᖕᒥᒃ, ᓯᓇᕐᔪᓕᐅᕐᓗᒍᓗ ᐊᕙᓕᐊᕈᑕᒃᓴᖓᓂᒃ ᓴᖑᐃᐱᓗᒃᓯᒪᔪᒥᒃ ᒎᓗᒥᒃ. 25ᑖᓐᓇᓗ ᓯᓇᕐᔪᒃᓯᐅᓯᕐᑕᒃᓴᕆᕙᑦ ᐊᕙᑎᓕᒫᖓ ᐊᒡᒊᑦ ᓴᓂᒧᑐᓂᖓᑎᑐᑦ ᓯᓕᒃᑎᒋᔪᒥᒃ, ᓯᓇᕐᔪᖓᓗ ᓯᓚᑉᐱᐊᓕᒃᑲᓐᓂᕐᓗᒍ ᓴᖑᐃᐱᓗᒃᓯᒪᔪᒥᒃ ᒎᓗᒥᒃ. 26ᑕᕝᕙᓂᓗ ᒎᓗᓂᒃ ᐊᖕᒪᓗᕐᑐᓂᒃ ᓱᓪᓗᓕᖕᓂᒃ ᓴᓇᔪᒃᓴᐅᕗᑎᑦ, ᑖᒃᑯᐊᓗ ᐊᖕᒪᓗᕐᑐᑦ ᓱᓪᓗᓖᑦ ᐃᓕᓗᒋᑦ ᓂᐅᖏᒃᑕ ᑎᕆᖅᑯᖏᓐᓄᑦ ᓯᑕᒪᓄᑦ. 27ᓯᓇᕐᔪᐊᑕ ᑭᒡᓕᖓᓃᑦᑐᒃᓴᐅᕗᑦ ᐊᖕᒪᓗᕐᑐᑦ ᓱᓪᓗᓖᑦ, ᑕᑭᔪᑯᑖᖕᓄᑦ ᑲᐅᑎᑦᓯᕕᐅᓗᑎᒃ ᐊᑭᕋᐅᓯᕐᕕᒃᓴᐅᖁᓪᓗᒋᑦ ᑖᑦᓱᒧᖓ ᓵᒧᑦ. 28ᑕᑭᔪᑯᑖᖕᓂᒃ ᕿᔪᖕᓂᒃ ᓴᓇᓕᕆᑦ ᑎᓴᒃᑖᖕᓂᒃ ᐊᑬᑦᓯᐊᒥᒃ ᐊᑎᓕᖕᒥᒃ, ᑖᒃᑯᐊᒡᓗ ᓯᓚᑉᐱᐊᕐᓗᒋᒃ#25:28 ᖄᐹᕐᓗᒍ ᒎᓗᒥᒃ ᐅᕝᕙᓗ ᓯᓚᑉᐱᐊᕐᓗᒍ ᒎᓗᒥᒃ ᒎᓗᒥᒃ, ᑕᒪᒃᑯᖕᓄᖓ ᑖᓐᓇ ᓵ ᐊᑭᕋᕐᑕᐅᔪᓐᓇᖁᓪᓗᒍ. 29ᐊᓪᓕᕋᓕᐅᕐᑐᒃᓴᐅᒋᕗᑎᑦ ᒥᑭᓐᓂᕐᓴᓂᒡᓗ ᐊᓪᓕᕋᒃᓴᓂᒃ ᐃᓯᕐᓗᐊᕐᓂᑎᑦᓯᑦᔪᑎᒧᑦ ᐊᑐᕐᑐᒃᓴᓂᒃ, ᐃᒥᖃᐅᑎᓂᒡᓗ ᐴᒍᑕᓂᒡᓗ ᐃᒥᖃᐅᑎᒃᓴᓂᒃ; ᑖᒃᑯᐊᓗ ᒎᓗᐃᓐᓇᐅᑎᓪᓗᒋᑦ ᓴᓇᔭᒃᓴᕆᕙᑎᑦ. 30#ᒨᓯᓯ ᐱᖓᔪᖏᑦ 24:5-8.ᑖᓐᓇᓗ ᓵ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᓯᕗᕌᓃᑦᑐᒃᓴᐅᕗᖅ, ᓵᓪᓗ ᖄᖓᓂ ᑍᒪᓐᖓᑦ ᓂᐊᖂᔭᕐᑕᖃᕐᑐᒃᓴᐅᕗᖅ ᐅᕙᓐᓄᑦ ᑐᓂᕐᕈᑎᐅᔪᕕᓂᕐᓂᒃ.”
ᓇᓂᕈᐊᑉ ᓇᐸᕕᖓ
ᒨᓯᓯ ᐂᑉᐸᖏᑦ 37:17-24
31“ᓴᓇᔪᒃᓴᐅᕗᑎᑦ ᓇᓂᕈᐊᑉ ᓇᐸᕕᖓᓂᒃ ᒎᓗᐃᓐᓇᐅᓗᒍ. ᐊᓪᓕᕋᖓᓕ ᓇᐸᔪᖓᓗ ᒎᓘᔪᒃᓴᐅᕗᖅ ᑲᐅᒐᕐᓯᒪᓗᓂᓗ ᓴᓇᔭᐅᓯᒪᔪᒃᓴᐅᕗᖅ; ᓇᓂᕈᐊᖃᕐᕕᖓ, ᑕᑯᒥᓇᕐᓴᐅᑎᖏᓪᓗ ᐱᕈᕐᓯᐊᖑᐊᑦ, ᐱᕈᕐᕕᓐᖑᐊᖏᓪᓗ ᐊᑕᐅᓯᕐᒥ ᐃᓗᐃᑦᑑᓗᑎᒃ ᓴᓇᓯᒪᔪᒃᓴᐅᕗᑦ; 32ᕿᑎᖓᓃᑦᑑᓪᓗ ᓇᓂᕈᐊᖃᕐᕕᐅᑉ ᐊᕙᑎᖏᒃᑎᒍᑦ 6ᓂᒃ ᓇᓂᕈᐊᖃᕐᕕᖃᕐᑐᒃᓴᐅᕗᖅ ᓇᐹᕐᑑᑉ ᐊᕙᓚᖓᔪᖏᑎᑐᑦ, ᕿᑎᖓᓃᑦᑑᑉ ᐃᒡᓗᐊᒍᑦ ᐱᖓᓱᑦ ᓇᓂᕈᐊᖃᕐᕕᐅᓗᑎᒃ ᐃᒡᓗᐊᒍᓪᓗ ᐱᖓᓱᑦ ᓇᓂᕈᐊᖃᕐᕕᐅᖕᒥᓗᑎᒃ; 33ᑖᒃᑯᐊᓗ ᐱᖓᓱᑦ ᓇᓂᕈᐊᖃᕐᕖᑦ ᕿᑎᖓᑕ ᐊᕙᑖᓃᑦᑐᑦ ᐊᑐᓂᑦ 6 ᓴᓇᓯᒪᔪᒃᓴᐅᕗᑦ ᐊᕙᑎᖏᒃᑎᒃᑯᑦ ᖁᖁᖓᔪᒥᒃ ᖃᖅᑯᐊᒐᑎᑐᑦ ᓇᓂᕈᐊᖃᕐᕕᖃᕐᓗᑎᒃ, ᐃᒻᒥᒍᓪᓗ ᐊᑐᓂᑦ ᓇᐸᔪᖏᑦ ᐱᕈᕐᑐᖃᕐᕕᓐᖑᐊᖃᕐᓗᑎᒃ ᐱᕈᕐᑐᖏᓪᓗ ᐅᖃᐅᔭᓐᖑᐊᖃᕐᓗᑎᒃ, ᑍᒤᓕᖓᓗᑎᒃ ᑕᕝᕙ ᑖᒃᑯᐊ 6ᐅᔪᑦ ᓇᓂᕈᐊᖃᕐᕕᐅᔪᒃᓴᐅᕗᑦ; 34ᑕᕝᕙᓂᓕ ᓇᓂᕈᐊᖃᕐᕕᐅᑉ ᓇᐸᔪᖓᓂ ᓯᑕᒪᓂᒃ ᐊᕙᒻᒧᑦ ᖁᖁᖓᔪᓂᒃ ᑕᕐᓴᖃᕐᑐᒃᓴᐅᕗᖅ, ᐱᕈᕐᑐᖃᕐᕕᓐᖑᐊᖃᕐᓗᑎᒃ ᐱᕈᕐᑐᖏᓪᓗ ᐅᖃᐅᔭᓐᖑᐊᖃᕐᓗᑎᒃ, 35ᑖᒃᑯᐊᓗ 6ᐅᔪᑦ ᓇᓂᕈᐊᖃᕐᕖᑦ ᐊᑐᓂᑦ ᐃᓱᐊᒍᑦ ᓇᓴᓐᖑᐊᖑᔮᕐᑐᒥᒃ ᓇᓂᕈᐊᖃᕐᕕᖃᕐᑐᒃᓴᐅᕗᑦ ᑕᕝᕙᓐᖓᑦ ᓇᓂᕈᐊᖃᕐᕕᖕᒥᑦ ᕿᑎᖓᓃᑦᑐᒥᑦ ᐊᕙᓚᖓᔪᑎᑐᑦ ᑍᒤᓕᖓᓗᑎᒃ. 36ᑭᓯᐊᓂᓕ ᑖᒃᑯᐊ ᓇᓂᕈᐊᖃᕐᕖᑦ ᓇᓴᓐᖑᐊᑦ ᐊᕙᓚᖓᔪᓐᖑᐊᕆᔭᖏᓪᓗ ᑕᒪᕐᒥᒃ ᐊᑕᐅᓯᐅᓗᓂ ᐃᓗᐃᑦᑑᔪᒃᓴᐅᕗᖅ, ᑕᒪᓐᓇ ᓇᓂᕈᐊᖃᕐᕕᐅᔪᖅ ᐃᓗᐃᑦᑑᓗᓂ ᐃᓛᕐᑐᕐᓯᒪᖏᓪᓗᓂᓗ ᑲᐅᒐᕐᑕᐅᓯᒪᓗᓂ ᓴᓇᓯᒪᔪᒃᓴᐅᕗᖅ ᒎᓗᐃᓐᓇᐅᓗᓂ. 37ᓇᓂᕈᐊᖃᕐᕕᒃ ᑖᓐᓇ 7ᓂᒃ ᑲᑎᓪᓗᒋᑦ ᓇᓂᕈᐊᖃᕐᕕᖃᕐᑐᒃᓴᐅᕗᖅ; ᐃᓕᓯᒪᔭᐅᔪᒃᓴᐅᕗᕐᓗ ᑕᑉᐹᓂ ᓯᕗᕌᓂ ᖃᐅᒪᑎᑦᓯᖁᓪᓗᒍ. 38ᐃᑯᒪᖏᓐᓄᑦ ᖃᒥᑦᓯᑦᔪᑎᖓ ᐊᓪᓕᕋᖓᓗ ᒎᓗᓪᓚᕆᐅᔪᒃᓴᐅᕘᒃ. 39ᒎᓗᐃᓐᓇᐅᔪᒥᒃ 75ᐸᐅᒥᒃ ᐅᖁᒤᓐᓂᖃᕐᓗᓂ ᓇᓂᕈᐊᖃᕐᕕᓕᐅᕐᑐᒃᓴᐅᕗᑎᑦ, ᐊᓯᖏᓪᓗ ᐃᓚᒋᔭᕆᐊᓕᖏᑦ ᐱᖃᓯᐅᑎᑎᓪᓗᒋᑦ. 40#ᐋᐴᓯᑕᓖᑦ 7:44; ᐄᑉᕈᐃᓄᑦ 8:5.ᑲᒪᑦᓯᐊᕐᓗᑎᑦ ᐃᒫᖎᓚᑦᔪᑎᒋᔭᓐᓂᒃ ᓴᓇᔪᒃᓴᐅᕗᑎᑦ, ᐃᓕᖕᓄᑦ ᑕᑯᑎᑦᔪᑎᒋᓚᐅᕐᑕᓐᓂᒃ ᖃᖅᑲᒥ ᒪᓕᒡᓗᑎᑦ.”
Currently Selected:
ᒨᓯᓯ ᐂᑉᐸᖏᑦ 25: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
