ᒨᓯᓯ ᐂᑉᐸᖏᑦ 26
26
ᑐᐱᖅ ᐊᑕᓂᐅᑉ ᐃᓂᒃᓴᖓ
ᒨᓯᓯ ᐂᑉᐸᖏᑦ 36:8-38
1“ᑐᐱᓕᐅᕐᑐᒃᓴᐅᕗᑎᑦ ᐃᓗᐊᒍᑦ ᐃᑦᔪᕐᓁᑦᑐᒃᑯᕕᖃᕐᑐᒥᒃ, ᐅᕙᓐᓄᑦ ᐃᓂᒃᓴᐅᖁᓪᓗᒍ ᑖᓐᓇ ᐃᑦᔪᕐᓁᑦᑐᒃᑯᕕᒃ, ᑐᐱᒃᓴᓂᑦ ᖁᒻᒧᑦ 10ᓂᒃ ᓴᓇᓯᒪᓗᓂ ᖃᓪᓗᓈᕐᑕᓕᐊᕆᓯᒪᔪᓂᑦ ᐱᐅᓂᕐᐹᓂᑦ ᑐᖑᔪᕐᑐᓂᒃ, ᐊᐅᐸᓪᓚᕆᒃᑐᓂᒃ, ᐊᐅᐸᕐᑐᓂᒡᓗ ᓄᕕᕐᓵᒃᓴᓂᒃ; ᑖᒃᑯᐊᓗ ᐊᑐᓂᑦ 10 ᒥᕐᓱᕐᓯᒪᔪᓂᒃ ᑕᕐᓴᓕᐅᕐᑕᐅᓯᒪᔪᒃᓴᐅᕗᑦ ᓯᕈᐲᒻᖑᐊᓂᒃ ᓴᓇᑦᓯᐊᕈᓐᓇᕐᑐᒧᑦ ᓴᓇᔭᐅᓯᒪᔪᓂᒃ ᓴᓇᔪᒃᓴᐅᕗᑎᑦ. 2ᑖᒃᑯᐊᓗ ᐊᑐᓂᑦ ᐊᑦᔨᒌᒥᒃ ᐊᖏᓂᖃᕐᑐᒃᓴᐅᕗᑦ, ᑐᑭᒧᑦ ᑕᑭᓂᖃᕐᓗᑎᒃ 14ᓂᒃ ᐆᒃᑑᑎᓂᒃ ᓴᓂᒧᓪᓗ ᓯᓕᖕᓂᖃᕐᓗᑎᒃ ᐆᒃᑑᑏᖕᓂᒃ ᒪᕐᕉᖕᓂᒃ. 3ᑖᒃᑯᐊᓗ ᑕᓪᓕᒪᑦ ᐃᒻᒥᖕᓄᑦ ᒥᕐᓱᕐᓗᒋᑦ ᑲᑎᑕᐅᔪᒃᓴᐅᕗᑦ; ᐂᑉᐸᖏᓪᓗ ᑕᓪᓕᒪᑦᑕᐅᖅ ᑍᒫᒃ ᒥᕐᓱᕐᓗᒋᑦ ᑲᑎᒻᒥᓗᒋᑦ. 4ᐳᑐᓕᖕᓂᒡᓗ ᓴᓇᔪᒃᓴᐅᕗᑎᑦ ᑐᖑᔪᕐᑐᓂᒃ ᓯᓈᒍᑦ ᓯᓚᑎᖔᖓᒍᑦ ᓂᕕᖓᓂᐊᕐᑑᑉ ᑖᓗᑕᐅᑉ; ᑍᒫᑦᓮᓐᓇᕐᑕᐅᖅ ᓂᕕᖓᓂᐊᕐᑑᑉ ᑖᓗᑕᐅᑉ ᐂᑉᐸᖓ ᐳᑐᓕᖕᓂᒃ ᓯᓈᒍᑦ ᓴᓇᔪᒃᓴᐅᒋᕗᑎᑦ. 5ᓂᕕᖓᓂᐊᕐᑐᒥ ᑖᓗᑕᕐᒥ ᐊᑕᐅᓯᕐᒥ 50ᓂᒃ ᐳᑐᓕᖕᓂᒃ ᓴᓇᔪᒃᓴᐅᕗᑎᑦ, ᑍᒫᑦᓮᓐᓇᕐᑕᐅᖅ ᓂᕕᖓᓂᐊᕐᑑᑉ ᑖᓗᑕᐅᑉ ᐂᑉᐸᖓ 50ᓂᒃ ᐳᑐᓕᐅᕐᑕᒃᓴᕆᒋᕙᑦ ᓯᓈᒍᑦ; ᑖᒃᑯᐊᓗ ᐳᑐᖏᑦ ᐊᑐᓂᑦ ᐊᑭᓕᕇᒃᑐᒃᓴᐅᕗᑦ. 6ᓂᒃᓯᖕᓂᒡᓗ ᒎᓗᓂᒃ 50ᓂᒃ ᓴᓇᔪᒃᓴᐅᕗᑎᑦ, ᑖᒃᑯᐊᓗ ᑖᓗᑕᕐᓂᒃ ᓂᕕᖓᔪᒃᓵᖕᓂᒃ ᒪᕐᕉᖕᓂᒃ ᑲᓱᕐᓯᒪᑦᔪᑕᐅᔪᒃᓴᐅᕗᑦ, ᑖᓐᓇ ᑐᐱᖅ ᑲᑎᓐᖓᓗᓂ ᐊᑕᐅᓯᐅᓕᖅᑲᖓᔪᓐᓇᕐᓯᖁᓪᓗᒍ.
7“ᑐᐱᐅᑉ ᓯᓚᑉᐱᐊᒃᓴᖓᓂᒃ ᓴᓇᔪᒃᓴᐅᒋᕗᑎᑦ ᒎᑦᓯᐅᑉ ᒥᖅᑯᕕᓂᖏᓐᓂᒃ ᑐᐱᒃᓴᓕᐊᕆᓯᒪᔪᒥᒃ; ᑖᒃᑯᐊᓗ ᑲᑎᓯᒪᔪᑦ 11ᐅᔪᒃᓴᐅᕗᑦ. 8ᑖᒃᑯᐊᓗ ᐊᑦᔨᒌᓂᒃ ᐊᖏᓂᖃᕐᑐᒃᓴᐅᕗᑦ ᑐᑭᒧᑦ ᑕᑭᓂᖃᕐᓗᑎᒃ ᐆᒃᑑᑎᓂᒃ 15ᓂᒃ ᓴᓂᒧᓪᓗ ᓯᓕᖕᓂᖃᕐᓗᑎᒃ ᐆᒃᑑᑏᖕᓂᒃ ᒪᕐᕉᖕᓂᒃ. 9ᑖᒃᑯᐊᓗ ᑕᓪᓕᒪᑦ ᐃᒻᒥᖕᓄᑦ ᒥᕐᓱᕐᓗᒋᑦ ᑲᑎᑕᐅᔪᒃᓴᐅᕗᑦ, ᐂᑉᐸᖏᓪᓗ ᑲᑎᓪᓗᒋᑦ 6ᐅᓗᒋᑦ ᐃᒻᒥᖕᓄᑦ ᒥᕐᓱᕐᑕᐅᔪᒃᓴᐅᒋᕗᑦ. ᐱᖓᓲᔪᕐᑐᖓᓪᓕ ᐱᕆᓪᓗᒍ ᑕᐱᑕᕇᓕᓯᒪᔪᒃᓴᐅᕗᖅ ᑐᐱᐅᑉ ᓯᕗᕌᓃᑦᑐᒃᓴᖅ. 10ᓯᓈᒍᑦ 50ᓂᒃ ᐳᑐᓕᖕᓂᒃ ᓴᓇᔪᒃᓴᐅᕗᑎᑦ ᑕᕝᕘᓇ ᑭᖑᓪᓕᕐᐸᐅᔪᒃᑯᑦ, ᑍᒫᑦᓮᓐᓇᕐᑕᐅᖅ ᐂᑉᐸᖓ 50ᓂᒃ ᐳᑐᓕᐅᕐᑕᒃᓴᕆᒋᕙᑦ ᓯᓈᒍᑦ. 11ᑲᓐᓄᔭᓂᒃ 50ᓂᒃ ᓂᒃᓯᓕᐅᕐᑐᒃᓴᐅᕗᑎᑦ, ᑖᒃᑯᐊᓗ ᑐᐱᐅᑉ ᓯᓚᑉᐱᐊᖓᑕ ᐳᑐᖏᓐᓄᑦ ᐋᖅᑭᒃᑕᒃᓴᕆᕙᑎᑦ, ᑖᒃᑯᐊᒃ ᒪᕐᕉᒃ ᑲᑎᓪᓗᒋᒃ ᐊᑕᐅᓯᐅᓕᓗᓂ ᑐᐱᕐᒧᑦ ᓯᓚᑉᐱᐊᒃᓴᐅᓕᖁᓪᓗᒍ. 12ᑐᐱᐅᓪᓕ ᐅᓕᖓᑕ ᐃᓚᖓ ᐊᖏᓗᐊᕈᑎᓂᕆᔭᖓ, ᐱᕆᓯᒪᔫᑉ ᐊᕝᕙᖓ ᑐᐱᐅᑉ ᑐᓄᐊᓄᑦ ᐊᑭᑦᔪᑎᓯᒪᔪᒃᓴᐅᕗᖅ. 13ᑐᐱᐅᓪᓗ ᐊᕙᑎᓕᒫᖓ ᐆᒃᑑᑎᐅᑉ ᐊᕝᕙᖓᓂᒃ ᐊᖏᓗᐊᕈᑎᓂᖓ ᑐᐱᐅᑉ ᓯᓚᑖᓄᑦ ᐊᕙᑖᓄᑦ ᐊᑭᑦᔪᑎᓯᒪᔪᒃᓴᐅᕗᖅ ᑐᐱᕐᒥᒃ ᐅᓕᒃᓯᓯᒪᑦᓯᐊᕈᓐᓇᖁᓪᓗᒍ.
14“ᒪᕐᕉᖕᓂᒡᓕ ᓱᓕ ᐅᓕᒃᓴᓕᐅᕐᑐᒃᓴᐅᕗᑎᑦ, ᐂᑉᐸᖓ ᐅᓕᒃᓴᖅ ᓰᐱᐅᑉ ᐊᖑᓴᓪᓗᖓᑕ ᐊᒥᖓ ᕿᑐᒻᒪᒃᓴᕐᓯᒪᔪᖅ ᓴᓇᔭᒃᓴᕆᕙᑦ, ᐂᑉᐸᖓᓕ ᒎᑦᓯᐅᑉ ᐊᒥᖓ ᓵᑦᑑᓗᓂ ᕿᑐᒻᒪᒃᓴᕐᓯᒪᔪᖅ ᓴᓇᔭᒃᓴᕆᒋᕙᑦ ᐅᓕᒃᓴᐅᔪᓐᓇᖁᓪᓗᒋᒃ ᑐᐱᕐᒧᑦ.
15“ᕿᔪᖕᓂᒃ ᓇᑉᐸᕐᓯᒪᔪᓂᒃ ᑎᓴᒃᑕᓂᒃ ᑐᐱᐅᑉ ᐊᕙᓗᒃᓴᖏᓐᓂᒃ ᓴᓇᔪᒃᓴᐅᕗᑎᑦ ᐊᑬᑦᓯᐊᓂᒃ ᐊᑎᓕᖕᓂᒃ. 16ᑖᒃᑯᐊᓗ ᐊᕙᓗᒃᓮᑦ ᑐᑭᒧᑦ ᑕᑭᓂᖃᕐᑐᒃᓴᐅᕗᑦ ᓯᑕᒪᓂᒃ ᒦᑕᓂᒃ, ᓴᓂᒧᓪᓗ ᓯᓕᖕᓂᖃᕐᓗᑎᒃ 66ᓂᒃ ᓯᓐᑎᒦᑕᓂᒃ, 17ᑖᒃᑯᐊᓗ ᐊᑐᓂᑦ ᐊᑦᔨᒌᒥᒃ ᑲᐱᒃᑎᕝᕕᓕᐅᕐᑕᒃᓴᕆᕙᓯ, ᑖᒃᑯᐊ ᐊᕙᓗᒃᓮᑦ ᐃᒻᒥᖕᓄᑦ ᑲᓱᑦᓯᐊᕈᓐᓇᖁᓪᓗᒋᑦ ᑲᐱᒃᑎᓯᒪᑦᓯᐊᕐᓗᑎᒃ. ᑖᒃᑯᐊᓗ ᕿᔪᐃᑦ ᐊᕙᓗᒃᓮᑦ ᑍᒫᒃ ᑲᐱᒃᑎᕝᕕᓕᐅᕐᓯᒪᔪᒃᓴᐅᕗᑦ. 18ᑐᐱᕐᓗ ᑖᓐᓇ ᐊᕙᓗᒃᓴᖃᕐᑐᒃᓴᐅᕗᖅ: 20ᓂᒃ ᓯᕿᓂᐅᑉ ᓇᓛᓃᑦᑐᒃᓴᓂᒃ; 19ᑖᒃᑯᐊᓗ 20ᐅᔪᑦ ᐊᕙᓗᒃᓮᑦ ᑐᓐᖓᕕᒃᓴᖏᓐᓂᒃ ᑐᓐᖓᕕᒃᓴᓕᐅᕐᑐᒃᓴᐅᕗᓯ ᓯᐅᓪᕕᕆᓂᒃ 40ᓂᒃ, ᐊᑐᓂᑦ ᐊᕙᓗᒃᓴᖅ ᐊᑕᐅᓯᖅ ᒪᕐᕉᖕᓂᒃ ᑐᓐᖓᕕᖃᖁᓪᓗᒍ ᑲᐱᒃᑎᓯᒪᓂᖏᖕᓄᑦ ᑖᒃᑯᐊᒃ ᑐᓐᖓᕕᖏᒃ ᐋᖅᑭᑦᓯᐊᕐᓯᒪᐅᑎᒋᔭᐅᖁᓪᓗᒋᒃ. 20ᐊᒻᒪᑦᑕᐅᖅ ᑐᐱᐅᑉ ᐃᒡᓗᐊ ᐅᓐᓄᐊᓪᓗᐊᑉ ᓇᓛᓃᑦᑐᖅ ᐊᕙᓗᖃᕐᑐᒃᓴᐅᕗᖅ 20ᓂᒃ, 21ᑖᒃᑯᐊᓗ ᑐᓐᖓᕕᖃᕐᑐᒃᓴᐅᕗᑦ ᓯᐅᓪᕕᕆᓂᒃ 40ᓂᒃ, ᐊᑕᐅᓯᖅ ᐊᕙᓗᒃᓴᖅ ᒪᕐᕉᖕᓂᒃ ᑐᓐᖓᕕᖃᕐᑐᒃᓴᐅᕗᖅ, ᐊᓯᐊᓗ ᐊᕙᓗᒃᓴᖅ ᒪᕐᕉᖕᓂᒃ ᑐᓐᖓᕕᖃᕐᒥᓗᓂ; 22ᑐᐱᐅᓪᓕ ᑐᓄᐊ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ ᐊᕙᓗᓕᐅᕐᑕᒃᓴᕆᕙᑦ ᐊᕙᓗᒃᓴᓂᒃ 6ᓂᒃ. 23ᑐᐱᐅᓪᓗ ᑎᕆᖅᑯᐊ ᑐᓄᐊᓃᑦᑐᖅ ᒪᕐᕉᖕᓂᒃ ᐊᕙᓗᓕᐅᒐᒃᓴᕆᕙᑦ; 24ᑖᒃᑯᐊᒡᓗ ᐊᕙᓗᒃᓵᒃ ᑎᕆᖅᑯᒃᓴᓕᐊᕆᔭᓯ ᐊᑖᒍᑦ ᑲᓱᕐᑎᑕᒃᓴᕆᕙᓯ ᑕᑉᐸᐅᖓ ᖁᓛᓄᑦ ᑎᑭᑐᐃᓐᓇᕐᓗᒋᒃ. ᐊᑐᓂᑦ ᐊᕙᓗᒃᓵᒃ ᑎᕆᒃᑯᒃᓴᓕᐊᕆᔭᓯ ᑍᒫᑦᓮᓐᓇᖅ ᐋᖅᑭᒃᓯᒪᔪᒃᓴᐅᕘᒃ. 25ᑍᒫᒃ ᑕᕝᕙ 8ᓂᒃ ᐊᕙᓗᒃᓴᖃᕆᐊᖃᕐᐳᓯ, ᑐᓐᖓᕕᒃᓴᖃᕐᓗᑎᒃ 16ᓂᒃ ᓯᐅᓪᕕᕆᓂᒃ; ᒪᕐᕉᖕᓂᒃ ᑐᓐᖓᕕᖃᖃᑦᑕᕐᓗᓂ ᐊᕙᓗᒃᓴᖅ ᐊᑕᐅᓯᖅ.
26“ᕿᔪᑯᑖᓂᒃ ᕿᕋᑦᑕᖅᑯᑎᒃᓴᓂᒃ ᓴᓇᔪᒃᓴᐅᕗᓯ 15ᓂᒃ ᕿᔪᖕᓂᒃ ᑎᓴᒃᑕᓂᒃ#26:26 ᑎᓴᒃᑕᓂᒃ ᐅᕝᕙᓗ ᓯᑎᔪᔭᓂᒃ ᐊᑬᑦᓯᐊᓂᒃ ᐊᑎᓕᖕᓂᒃ, ᑐᐱᐅᑉ ᐊᕙᓗᐊ ᐃᒡᓗᐃᓐᓇᖅ ᑕᓪᓕᒪᓂᒃ ᕿᕋᑦᑕᖅᑯᓯᕐᓗᒍ, 27ᑕᓪᓕᒪᐅᖕᒥᓗᑎᒃ ᑐᐱᐅᑉ ᐃᒡᓗᐊᒍᑦ ᕿᕋᑦᑕᖅᑯᓯᐅᑎᔭᓯ ᐊᕙᓗᖏᑎᒍᑦ, ᐊᒻᒪ ᑐᐱᐅᑉ ᑐᓄᐊᒍᑦ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᒃᑯᑦ ᑕᓪᓕᒪᐅᖕᒥᓗᑎᒃ ᐊᕙᓗᖏᑎᒍᑦ ᕿᕋᑦᑕᖅᑯᓯᐅᑎᔭᓯ. 28ᐊᕙᓗᖏᑕᓕ ᕿᑎᖓᒍᑦ ᕿᕋᑦᑕᖅᑯᓯᕆᐊᖃᕆᕙᓯ, ᖁᒻᒧᖓᔫᑉ ᓇᐸᔪᖓᑕ ᕿᑎᖓᒎᕐᑐᒥᒃ, ᑐᐱᐅᑉ ᐃᓱᐊᓂᑦ ᐃᓱᐊᓄᑦ ᓯᕗᒧᖓᔪᒥᒃ. 29ᐊᕙᓗᒃᓮᓪᓗ ᓯᓚᑉᐱᐊᕐᑕᒃᓴᕆᕙᓯ ᒎᓗᒥᒃ, ᓱᓪᓗᓕᖕᓂᒡᓗ ᒎᓗᓂᒃ ᕿᕋᑦᑕᖅᑯᑎᖏᓐᓄᑦ ᓇᔪᒻᒪᖅᑯᑎᒃᓴᓂᒃ ᐋᖅᑭᒃᓯᔪᒃᓴᐅᕗᓯ; ᑖᒃᑯᐊᓗ ᕿᕋᑦᑕᖅᑯᑎᒃᓮᑦ ᓯᓚᑉᐱᐊᕐᑕᒃᓴᕆᒋᕙᓯ ᒎᓗᒥᒃ. 30ᑐᐱᕐᓗ ᓇᑉᐸᕐᑎᑕᒃᓴᕆᕙᑦ ᑕᕝᕙᓂ ᖃᖅᑲᒥ ᐃᓕᖕᓄᑦ ᐃᒤᓕᐅᕆᐊᖃᕐᓂᖓᓂᒃ ᖃᐅᔨᑎᑦᓯᑦᔪᑎᒋᓯᒪᔭᕋ ᒪᓕᒡᓗᒍ.
31“ᑖᓗᑕᒃᓴᒥᒡᓗ ᓴᓇᔪᒃᓴᐅᕗᑎᑦ ᕿᐱᓯᒪᔪᒥᒃ ᖃᓪᓗᓈᕐᑕᑦᓯᐊᕙᖕᒥᒃ ᑐᖑᔪᕐᑐᒥᒃ ᐊᐅᐸᓪᓚᕆᒃᑐᒥᒡᓗ, ᐊᐅᐸᕐᑐᒥᒡᓗ ᓄᕕᕐᓵᒃᓴᒥᒃ; ᓴᓇᑦᓯᐊᕈᓐᓇᕐᑐᒧᓪᓗ ᓴᓇᔭᐅᔪᒃᓴᐅᕗᑦ ᓯᕈᐲᒻᖑᐊᖅ ᐃᓴᕈᖃᕐᑐᖅ, 32ᑖᒃᑯᐊᓗ ᓂᕕᓐᖓᕐᑕᒃᓴᕆᕙᑎᑦ ᓯᑕᒪᓄᑦ ᕿᔪᖕᓄᑦ ᑎᓴᒃᑕᓄᑦ ᐊᑬᑦᓯᐊᓂᒃ ᐊᑎᓕᖕᓄᑦ ᒎᓗᓂᒃ ᓯᓚᑉᐱᐊᓕᕐᓯᒪᔪᓄᑦ, ᓂᒃᓯᖕᓄᑦ ᒎᓗᓄᑦ ᖃᖓᑕᑦᔪᑎᖃᕐᓗᑎᒃ, ᑐᓐᖓᕕᖃᕐᓗᑎᒃ ᓯᑕᒪᓄᑦ ᓯᐅᓪᕕᕆᓄᑦ. 33#ᐄᑉᕈᐃᓄᑦ 6:19; 9:3-5.ᑖᓗᑍᓪᓗ ᑖᒃᑯᐊ ᓂᕕᓐᖓᕐᑕᒃᓴᕆᕙᑎᑦ ᑐᐱᐅᑉ ᖁᓛᖓᑕ ᐊᑎᑦᑎᐊᖓᒍᑦ ᓂᒃᓯᖕᓂᒃ ᖃᖓᑕᑦᔪᑎᖃᕐᓗᑎᒃ, ᑕᕝᕗᓐᖓᐅᑎᔭᒃᓴᕆᕙᓪᓗ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ ᐱᖁᔭᓂᒃ ᑎᑎᕋᕐᕕᒋᓯᒪᔫᖕᓂᒃ ᒪᕐᕉᖕᓂᒃ ᐅᔭᕌᖕᓂᒃ ᐃᓗᓕᓕᒃ ᑕᕝᕙᓂ ᑖᓗᑕᐅᑉ ᐅᖓᑖᓂ ᐃᓂᖃᖁᓪᓗᒍ; ᐃᑦᔪᕐᓁᑦᑐᕕᒡᓗ ᐃᑦᔪᕐᓁᓐᓂᕐᐹᕐᓗ ᐊᕕᒃᑕᐅᓯᒪᖁᓪᓗᒋᒃ ᑕᒪᑐᒧᖓ ᑖᓗᑕᕐᒧᑦ. 34ᑕᕝᕙᓂᓗ ᐃᑦᔪᕐᓁᓐᓂᕐᐹᒥ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ ᐃᓂᖃᕐᑐᒃᓴᐅᕗᖅ ᒪᑐᓯᒪᓗᓂ. 35ᐃᑦᔪᕐᓁᓐᓂᕐᐹᓪᓕ ᓯᓚᑖᓄᑦ ᓵ ᐃᓕᔭᒃᓴᕆᕙᑦ ᑐᐱᐅᑉ ᐅᓐᓄᐊᓪᓗᐊᖓᑕ ᓇᓛᓃᓪᓗᓂ ᓇᓂᕈᐊᖃᕐᕕᒡᓗ ᐃᓕᓗᒍ ᓯᕿᓂᐅᑉ ᓇᓛᓃᖔᕐᑐᒧᑦ.
36“ᑐᐱᐅᓪᓕ ᐃᑎᕐᑕᕐᕕᖓ ᑖᓗᑕᓕᐅᕐᑕᒃᓴᕆᕙᑦ ᖃᓪᓗᓈᕐᑕᑦᓯᐊᕙᖕᒥᒃ ᓵᑦᑐᒥᒃ ᑐᖑᔪᕐᑐᒥᒃ, ᐊᐅᐸᓪᓚᕆᒃᑐᒥᒡᓗ, ᐊᐅᐸᕐᑐᒥᒡᓗ ᓄᕕᕐᓵᒃᓴᒥᒃ; ᑕᕐᓯᕐᓱᕐᓯᒪᓗᓂᓗ ᒥᕐᓱᕐᓯᒪᔪᓂᒃ. 37ᑖᒃᑯᐊ ᑖᓗᑍᑦ ᓇᑉᐸᖅᑯᑕᓕᐅᕐᑕᒃᓴᕆᕙᑎᑦ ᕿᔪᖕᓂᒃ ᑎᓴᒃᑕᓂᒃ ᐊᑬᑦᓯᐊᓂᒃ ᐊᑎᓕᖕᓂᒃ ᑖᒃᑯᐊᓗ ᓯᓚᑉᐱᐊᕐᓯᒪᓗᑎᒃ ᒎᓗᒥᒃ ᓂᒃᓯᖕᓄᓪᓗ ᒎᓗᓄᑦ ᖃᖓᑕᓗᑎᒃ; ᑖᒃᑯᐊᓗ ᓇᐸᔪᐃᑦ ᑐᓐᖓᕕᓕᐅᕐᓗᒋᑦ ᐊᑐᓂᑦ ᑲᓐᓄᔭᓂᒃ ᑕᓪᓕᒪᓂᒃ.”
Currently Selected:
ᒨᓯᓯ ᐂᑉᐸᖏᑦ 26: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
