ᒨᓯᓯ ᐂᑉᐸᖏᑦ 27
27
ᑐᓂᕐᕈᓯᕐᕕᒃ ᐊᓪᑕᕆ
ᒨᓯᓯ ᐂᑉᐸᖏᑦ 38:1-7
1“ᑐᓂᕐᕈᓯᕐᕕᓕᐅᕐᑐᒃᓴᐅᕗᑎᑦ ᕿᔪᖕᒥᒃ ᑎᓴᒃᑕᒥᒃ#27:1 ᑎᓴᒃᑕᓂᒃ ᐅᕝᕙᓗ ᓯᑎᔪᔭᓂᒃ ᐊᑬᑦᓯᐊᒥᒃ ᐊᑎᓕᖕᒥᒃ. ᑖᓐᓇᓗ ᑐᓂᕐᕈᓯᕐᕕᒃ ᓯᒃᑭᑕᓪᓗᐊᖑᔪᒃᓴᐅᕗᖅ#27:1 ᓯᒃᑭᑕᓪᓗᐊᖅ ᐅᕝᕙᓗ ᑭᒃᐹᕆᓪᓗᐊᕐᑐᖅ ᑕᑭᓂᖃᕐᓗᓂ 2.2ᓂᒃ ᒦᑕᓂᒃ ᓯᓕᖕᓂᖃᕐᓗᓂᓗ 2.2ᓂᒃ ᒦᑕᓂᒃ, ᐳᕐᑐᓂᖃᕐᓗᓂᓗ 1.3ᓂᒃ ᒦᑕᓂᒃ. 2ᑎᕆᖅᑯᖏᑕᓗ ᖄᖏᑎᒍᑦ ᓯᑕᒪᑎᒍᑦ ᓇᒡᔪᓕᐅᕐᑕᒃᓴᕆᕙᑦ; ᑖᒃᑯᐊᓕ ᑐᓂᕐᕈᓯᕐᕕᐅᑉ ᐊᓪᑕᕆᐅᑉ ᐃᓚᒋᔭᒃᓴᕆᕔᑦ ᐃᓕᐅᕋᕐᓯᒪᖏᓪᓗᑎᒃ, ᑖᓐᓇᓗ ᓯᓚᑉᐱᐊᕐᑕᒃᓴᕆᕙᑦ ᐊᑕᖏᕐᓗᒍ ᑲᓐᓄᔭᒥᒃ. 3ᐊᓪᓕᕋᒃᓴᓕᐅᕐᑐᒃᓴᐅᒋᕗᑎᑦ ᑐᓐᓄᕕᓃᑦ ᐊᕐᔭᓕᓂᖏᓐᓄᑦ ᐊᓪᓕᕋᒃᓴᒥᒃ, ᑖᒃᑯᓄᖓᓗ ᖃᓗᓯᑦᔪᑎᒃᓴᒥᒃ ᓴᓇᔪᒃᓴᐅᕗᑎᑦ, ᐴᒍᑕᓂᒡᓗ, ᓂᒃᓯᒐᐅᑎᓂᒡᓗ, ᐃᑯᒪᓂᒡᓗ ᐊᒡᔭᕐᓯᑦᔪᑎᒃᓴᓂᒃ; ᑕᒪᒃᑯᐊᓕᒫᓪᓗ ᑲᓐᓄᔭᐅᔪᒃᓴᐅᕗᑦ. 4ᑐᓂᕐᕈᓯᕐᕕᐅᑦᑕᐅᖅ ᕿᔪᖃᕐᕕᒃᓴᖓᓂᒃ ᓄᓗᐊᓐᖑᐊᓕᐊᕆᓯᒪᔪᒥᒃ ᓴᓇᔪᒃᓴᐅᕗᑎᑦ ᑲᓐᓄᔭᒥᒃ; ᑖᓐᓇᓗ ᑎᕆᖅᑯᖏᑎᒍᑦ ᓯᑕᒪᓂᒃ ᓂᒃᓯᒡᕕᓕᐅᕐᑕᒃᓴᕆᕙᑦ ᓄᕐᓗᓂᒃ. 5ᑖᓐᓇᓗ ᕿᔪᖃᕐᕕᒃ ᓄᓗᐊᓐᖑᐊᓕᐊᕆᓯᒪᔪᖅ ᑐᓂᕐᕈᓯᕐᕕᐅᑉ ᖁᓛᑕ ᐊᑖᓃᑦᑐᒃᓴᐅᕗᖅ, ᑖᑦᓱᒪ ᑐᓂᕐᕈᓯᕐᕕᐅᑉ ᐃᓗᖔᖓᓃᓪᓗᓂ ᖁᓛᑕᓗ ᓇᑎᖓᑕᓗ ᐊᑯᓐᓂᖓᓂ ᐃᓂᖃᕐᓗᓂ. 6ᕿᔪᑯᑖᖕᓂᒡᓗ ᓴᓇᔪᒃᓴᐅᕗᑎᑦ ᐊᑭᕋᐅᑎᒃᓵᖕᓂᒃ ᑐᓂᕐᕈᓯᕐᕕᖕᒥᒃ ᑎᓴᒃᑕᓂᒃ ᐊᑬᑦᓯᐊᒥᑦ ᐊᑎᓕᖕᒥᒃ, ᑖᒃᑯᐊᒡᓗ ᓯᓚᑉᐱᐊᕐᓗᒋᒃ ᑲᓐᓄᔭᒥᒃ, 7ᐊᑭᕋᐅᑎᖏᒡᓗ ᑐᓂᕐᕈᓯᕐᕕᐅᑉ ᓄᕐᓗᖏᑎᒍᑦ ᑲᐅᑎᓯᒪᔪᒃᓴᐅᕗᒃ, ᑐᓂᕐᕈᓯᕐᕕᐅᑉ ᐊᕙᑖᒍᑦ ᐃᒡᓗᒃᑐᑦ ᐊᑭᕋᐅᑎᐅᔪᓐᓇᖁᓪᓗᒋᒃ, ᑐᓂᕐᕈᓯᕐᕕᒃ ᐊᒡᔭᕐᑕᐅᔭᕆᐊᖃᓕᕌᖓᑦ. 8ᑖᓐᓇᓗ ᑐᓂᕐᕈᓯᕐᕕᒃ ᐊᓪᑕᕆ ᓴᓇᓯᒪᔪᒃᓴᐅᕗᖅ ᓵᑦᑐᔮᓂᑦ ᐃᓗᐊ ᐃᓗᓕᖃᖏᓪᓗᒍ, ᐃᓕᖕᓄᑦ ᑕᑯᑎᑦᓯᓯᒪᓂᕋ ᖃᖅᑲᒥ ᒪᓕᒡᓗᒍ ᓴᓇᔭᒃᓴᕆᕙᑦ.”
ᐊᑕᓂᐅᑉ ᐃᓂᒃᓴᖓ ᑐᐱᐅᑉ ᐃᓗᐊᓃᓐᓂᕐᓴᖅ
ᒨᓯᓯ ᐂᑉᐸᖏᑦ 38:9-20
9“ᑐᐱᕐᒥ ᐃᓂᒃᓴᕆᓂᐊᕐᑕᓐᓂᒃ ᐃᒡᓗᐊᕈᓯᓕᐅᕐᑐᒃᓴᐅᕗᑎᑦ ᑲᓪᓗᓈᕐᑕᑦᓯᐊᕙᖕᓂᒃ ᓵᑦᑐᓂᒃ ᑖᓗᑕᖃᕐᓗᒍ. ᑐᐱᕐᒥ ᓯᕿᓂᐅᑉ ᓇᓛᓃᑦᑐᒃᑯᑦ ᐋᖅᑭᒃᓱᐃᔪᒃᓴᐅᕗᑎᑦ ᑖᓗᑕᕐᒥᒃ ᓴᓂᒧᑐᓂᖃᕐᓗᒍ 50ᓂᒃ ᐆᒃᑑᑎᓂᒃ, 10ᓇᐸᔪᖃᕐᓗᓂ 20ᓂᒃ ᑖᒃᑯᐊᓗ ᑐᓐᖓᕕᖃᕐᓗᑎᒃ 20ᓂᒃ ᐊᑐᓂᑦ ᑲᓐᓄᔭᐅᓗᑎᒃ, ᓇᐸᔪᖏᓪᓕ ᓂᒃᓯᖃᕐᑐᒃᓴᐅᕗᑦ ᓯᐅᓪᕕᕆᓂᒃ ᓂᒃᓯᒡᕕᖏᓪᓗ ᐃᑳᖓᔪᑦ ᓯᐅᓪᕕᕆᐅᖕᒥᓗᑎᒃ. 11ᑍᒫᑦᓮᓐᓇᕐᑕᐅᖅ ᑐᐱᐅᑉ ᐅᓐᓄᐊᓪᓗᐊᖓᑕ ᓇᓛᓃᓐᓂᕐᓴᖅ ᑖᓗᑕᖅ ᐃᒡᓗᐊᓃᑦᑐᑎᑐᑦ ᐋᖅᑭᒃᓯᒪᔪᒃᓴᐅᒋᕗᖅ; ᓇᐸᔪᖃᕐᓗᓂ 20ᓂᒃ ᑖᒃᑯᐊᓗ ᑐᓐᖓᕕᖃᕐᓗᑎᒃ 20ᓂᒃ ᐊᑐᓂᑦ ᑲᓐᓄᔭᐅᓗᑎᒃ, ᓇᐸᔪᖏᓪᓕ ᓂᒃᓯᖃᕐᑐᒃᓴᐅᕗᑦ ᓯᐅᓪᕕᕆᓂᒃ ᓂᒃᓯᒡᕕᖏᓪᓗ ᐃᑳᖓᔪᑦ ᓯᐅᓪᕕᕆᐅᖕᒥᓗᑎᒃ. 12ᓯᕿᓂᐅᓪᓕ ᓂᐱᕕᐊᑕ ᓇᓛᓃᑦᑐᖅ ᑖᓗᑕᖅ ᓴᓂᒧᑐᓂᖃᕆᐊᖃᕐᐳᖅ ᐆᒃᑑᑎᓂᒃ 25ᓂᒃ, ᓇᐸᔪᖃᕐᓗᓂᓗ 10ᓂᒃ ᑖᒃᑯᐊᓗ ᑐᓐᖓᕕᖃᕐᓗᑎᒃ ᐊᑐᓂᑦ 10ᓂᒃ. 13ᓯᕿᓂᐅᓪᓕ ᓄᐃᕕᐊᑕ ᓇᓛᓃᑦᑐᖅ, ᐃᒡᓗᐊᕈᓯᐅᑉ ᐃᑎᕐᑕᕐᕕᒃᓴᖓ, ᓴᓂᒧᑐᓂᖃᕆᐊᖃᕐᐳᖅ ᐆᒃᑑᑎᓂᒃ 25ᓂᒃ. 14ᐃᑎᕐᑕᕐᕕᖓᓕ ᑖᓗᑕᖃᕐᑐᒃᓴᐅᕗᖅ ᐊᕙᒻᒧᑦ ᒪᑐᐃᕐᑕᕐᑐᒥᒃ ᐃᒡᓗᐊ ᓴᓂᒧᑦ ᓯᓕᖕᓂᖃᕐᓗᓂ ᐆᒃᑑᑎᓂᒃ 7ᓂᒃ ᐊᕝᕙᕐᒥᒡᓗ, ᑖᒃᑯᐊᓗ ᓇᐸᔪᖃᕐᓗᑎᒃ ᐱᖓᓱᓂᒃ ᐊᑐᓂᓪᓗ ᑐᓐᖓᕕᖃᕐᓗᑎᒃ ᐱᖓᓱᓂᒃ. 15ᐃᒡᓗᐊᑦᑕᐅᖅ ᑍᒫᓪᓗᐊᖅ ᐊᖏᓂᖃᕐᑐᒃᓴᐅᒋᕗᖅ ᓯᓕᖕᓂᖃᕐᓗᓂ ᐆᒃᑑᑎᓂᒃ 7ᓂᒃ ᐊᕝᕙᕐᒥᒡᓗ, ᑖᒃᑯᐊᓗ ᓇᐸᔪᖃᕐᓗᑎᒃ ᐱᖓᓱᓂᒃ; ᐊᑐᓂᓪᓗ ᑐᓐᖓᕕᖃᕐᓗᑎᒃ ᐱᖓᓱᓂᒃ. 16ᐃᑎᕐᑕᕐᕕᓪᓚᕆᖓᓕ ᑖᓗᑕᖃᕐᑐᒃᓴᐅᒋᕗᖅ ᓴᓂᒧᑐᓂᖃᕐᑐᒥᒃ ᐆᒃᑑᑎᓂᒃ 10ᓂᒃ, ᖃᓪᓗᓈᕐᑕᑦᓯᐊᕙᖕᒥᒃ ᓵᑦᑐᒥᒃ ᑐᖑᔪᕐᑐᖃᕐᓗᓂ, ᐊᐅᐸᓪᓚᕆᒃᑐᖃᕐᓗᓂᓗ, ᐊᐅᐸᕐᑐᖃᕐᓗᓂᓗ ᓄᕕᕐᓵᒃᓴᒥᒃ, ᑖᒃᑯᐊᓗ ᑕᕐᓯᕐᓱᕐᓯᒪᓗᑎᒃ ᒥᕐᓱᕐᓯᒪᔪᓂᒃ, ᓇᐸᔪᖃᕐᑐᒃᓴᐅᕗᕐᓕ ᓯᑕᒪᓂᒃ ᑖᒃᑯᐊᓗ ᑐᓐᖓᕕᖃᕐᓗᑎᒃ ᓯᑕᒪᓂᒃ. 17ᑕᒪᒃᑯᐊᓗ ᓇᐸᔪᐃᑦ ᐃᑦᔪᕐᓁᑦᑐᕕᖕᒦᑦᑐᑦ ᑲᓱᕐᓯᒪᐅᑎᔪᒃᓴᐅᕗᑦ ᐃᑳᖓᔪᖃᕐᓗᑎᒃ ᓯᐅᓪᕕᕆᓂᒃ, ᓂᒃᓯᖏᓪᓗ ᓯᐅᓪᕕᕆᐅᖕᒥᓗᑎᒃ ᑐᓐᖓᕕᖃᕐᓗᑎᒡᓗ ᑲᓐᓄᔭᓂᒃ. 18ᐃᑦᔪᕐᓁᑦᑐᕕᒡᓕ ᑐᑭᒧᑦ ᑕᑭᓂᖃᕐᑐᒃᓴᐅᕗᖅ ᐆᒃᑑᑎᓂᒃ 50ᓂᒃ, ᓴᓂᒧᑐᓂᖃᕐᓗᓂᓗ ᐆᒃᑑᑎᓂᒃ 25ᓂᒃ, ᐳᕐᑐᓂᖃᕐᓗᑎᒡᓗ ᐆᒃᑑᑏᖕᓂᒃ ᒪᕐᕉᖕᓂᒃ ᐊᕝᕙᕐᒥᒡᓗ. ᑖᓗᑕᖏᓪᓗ ᖃᓪᓗᓈᕐᑕᑦᓯᐊᕙᐅᔪᒃᓴᐅᕗᑦ ᓵᑦᑑᓗᑎᒃ ᑐᓐᖓᕕᖃᕐᓗᑎᒡᓗ ᑲᓐᓄᔭᓂᒃ. 19ᓱᓇᑐᐃᓐᓇᓕᒫᑦ ᐊᑐᕐᑕᐅᔪᑦ ᑐᐱᕐᒥ, ᑐᐱᐅᓪᓗ ᓄᖃᕐᕕᖏᑦ ᑕᒪᕐᒥᒃ, ᐃᑦᔪᕐᓁᑦᑐᕕᐅᓪᓗ ᐱᑐᒡᕕᓕᒫᖏᑦ ᑲᓐᓄᔭᐅᔪᒃᓴᐅᕗᑦ.”
ᓇᓂᕈᐊᑦ ᑲᒪᒋᔭᐅᔭᕆᐊᖃᕐᓂᖏᑦ
ᒨᓯᓯ ᐱᖓᔪᖏᑦ 24:1-4
20“ᐃᓴᕆᐊᓕᒥᐅᑦ ᐱᖁᔭᒃᓴᕆᕙᑎᑦ ᐃᓕᖕᓄᑦ ᕾᑦᓯᖁᓗᒋᑦ ᓇᐹᕐᑑᑉ ᐅᕐᓱᖏᓐᓂᒃ ᐱᐅᓂᕐᐹᓂᒃ ᓇᓂᕈᐊᒧᑦ ᐅᕐᓱᒃᓴᐅᓂᐊᕐᑐᓂᒃ, ᓇᓂᕈᐊᑦ ᐋᖅᑭᒃᓱᕐᑕᐅᔪᓐᓇᖁᓪᓗᒋᑦ ᑍᒪᓐᖓᓪᓗ ᐃᑯᒪᓕᖁᓪᓗᒋᑦ ᑕᕝᕙᓂ. 21ᑐᐱᕐᒥ ᑲᑎᒪᓕᕐᑎᓪᓗᓯ, ᑖᑦᓱᒪ ᐃᑦᔪᕐᓁᓐᓂᕐᐹᑉ ᐱᖁᔭᓂᒃ ᑎᑎᕋᕐᕕᒋᓯᒪᔪᕐᑕᓕᐅᑉ ᓯᓚᑖᓂ, ᐂᕉᓂᐅᑉ ᐃᕐᓂᖏᑕᓗ ᑖᒃᑯᐊ ᓇᓂᕈᐊᑦ ᐋᖅᑭᒃᑕᒃᓴᕆᕔᑦ ᐃᑯᐊᓪᓚᒡᓗᒋᓪᓗ ᐊᑕᓂᐅᑉ ᓵᖓᓂ. ᐃᑯᒪᓕᖁᓪᓗᒋᑦ ᐅᓐᓄᒥᑦ ᐅᓪᓛᒧᑦ ᑎᑭᓪᓗᒋᑦ. ᑕᒪᓐᓇᓗ ᐱᖁᔨᑦᔪᑎᒋᔭᕋ ᑍᒪᓐᖓᑦ ᐊᑐᕐᑕᐅᖏᓐᓇᕆᐊᖃᕐᐳᖅ ᐃᓴᕆᐊᓕᒥᐅᓄᑦ ᑭᖑᕚᖏᓐᓄᓪᓗ.”
Currently Selected:
ᒨᓯᓯ ᐂᑉᐸᖏᑦ 27: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
