ᒨᓯᓯ ᐂᑉᐸᖏᑦ 32
32
ᐃᒻᒧᒃᓯᐅᒐᓐᖑᐊᖅ ᒎᓗ
ᒨᓯᓯ ᑕᓪᓕᒪᖏᑦ 9:6-29
1 #
ᐋᐴᓯᑕᓖᑦ 7:40. ᐃᓄᐃᓪᓗ ᖃᐅᔨᓕᕋᒥᒃ ᒨᓯᓯ ᓱᓕ ᖃᖅᑲᒥᑦ ᐊᖅᑲᓚᐅᖏᓐᓂᖓᓂᒃ, ᐊᑯᓂᓗ ᑕᑉᐹᓃᓕᕐᒪᑦ ᐂᕉᓂᐅᑉ ᐊᕙᑖᓄᐊᕐᓗᑎᒃ ᐅᖃᕐᕕᒋᓕᕐᐹᑦ, “ᐃᓐᓇ ᒨᓯᓯ ᓇᓗᓇᕐᓯᖕᒪᑦ ᖃᓄᐃᓕᖓᓕᕐᒪᖔᑦ ᐄᑦᔨᑉᑎᒥᑦ ᐊᐅᓪᓚᕈᑦᔨᓚᐅᕐᑐᖅ ᐅᕙᑦᑎᓐᓂᒃ, ᒎᑎᓕᐅᓚᐅᕆᑦ ᐅᕙᑦᑎᓐᓂᒃ ᑕᓯᐅᕐᓯᓂᐊᕐᑐᒥᒃ.”
2ᐂᕉᓂᐅᑉ ᐅᖃᐅᑎᕔᑦ, “ᓄᐊᑦᓯᓕᕆᑦᓯ ᓄᓕᐊᑦᓯ, ᐃᕐᓂᑦᓯ, ᐸᓂᑦᓯᓗ ᓯᐅᑎᒥᐅᑕᖏᓐᓂᒃ ᒎᓗᓂᒃ, ᑕᒪᒃᑯᐊᓗ ᐲᔭᕐᓗᒋᑦ ᐅᕙᓐᓄᐊᕈᑎᓯᒋᒃ.” 3ᑕᕝᕙ ᐃᓄᓕᒫᑦ ᓯᐅᑎᒥᐅᑕᒥᖕᓂᒃ ᒎᓗᓂᒃ ᐲᔧᕗᑦ, ᐂᕉᓂᒧᐊᕐᓗᒋᓪᓗ. 4#ᐊᑕᓃᑦ ᓯᕗᓪᓖᑦ 12:28; ᐋᐴᓯᑕᓖᑦ 7:41.ᐂᕉᓂᐅᓪᓗ ᓯᐅᑎᒥᐅᑍᑦ ᐱᒐᒥᒋᑦ ᐊᐅᒃᑎᑉᐰᑦ, ᑯᕕᓪᓗᒋᓪᓗ ᐋᖅᑭᒃᓯᕕᖕᒧᑦ, ᓄᕐᕋᓐᖑᐊᒥᒡᓗ ᓴᓇᕗᖅ.
ᐃᓄᐃᓪᓗ ᐅᖃᕐᐳᖅ, “ᐃᓴᕆᐊᓕ, ᐅᓇ ᑕᕝᕙ ᒎᑎᕗᑦ, ᐄᑦᔨᑉᑎᒥᑦ ᐊᐅᓪᓚᕈᑦᔨᓚᐅᕐᑐᖅ ᐅᕙᑦᑎᓐᓂᒃ!”
5ᑕᕝᕙ ᐂᕉᓂ ᑐᓂᕐᕈᓯᕐᕕᒃᓴᒥᒃ ᐋᖅᑭᒃᓱᐃᕗᖅ ᐊᖑᓴᓪᓗᓐᖑᐊᑉ ᒎᓘᑉ ᓯᕗᕌᓂ ᐅᖃᕐᓗᓂᓗ, “ᖃᐅᒃᐸᑦ ᓇᓪᓕᐅᓐᓂᕐᓯᐅᕐᓂᐊᕐᐳᒍᑦ ᐊᑕᓂᖅ ᓂᕐᑐᕐᑕᐅᖁᓪᓗᒍ.” 6#1 ᑯᕆᓐᑎ 10:7.ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᒪᑭᑉᐳᑦ ᐆᒪᔪᓂᒃ ᑐᓂᕐᕈᑎᒃᓴᓂᒃ ᐆᑕᒃᓴᓂᒃ ᓇᒃᓴᕐᓗᑎᒃ ᐃᓚᖏᓪᓕ ᑐᓂᕐᕈᑎᒃᓴᓂᒃ ᓂᕆᔭᒃᓴᓂᒃ ᓇᒃᓴᕐᓗᑎᒃ. ᐃᓄᐃᓪᓗ ᐃᖏᑉᐳᑦ ᓂᕆᖃᑎᒌᓕᕐᓗᑎᒃ ᐃᒥᖃᑎᒌᓕᕐᐳᓪᓗ ᐋᖓᔮᓕᕐᓗᑎᒃ, ᐃᓚᖏᑦ ᑖᓂᓯᓕᕐᐳᑦ ᐃᓚᖏᓪᓗ ᓄᓕᐊᕐᓗᑎᒃ.
7ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᒫᓐᓇᑦᓴᐅᑎᒋ ᐃᓅᖃᑎᖕᓄᑦ ᐊᑎᕐᓵᓕᕆᑦ, ᐃᓅᖃᑎᑎᑦ, ᐄᑦᔨᑉᑎᒥᑦ ᐊᐅᓪᓚᕈᑎᓚᐅᕐᑕᑎᑦ, ᐊᔪᕐᑐᓕᓕᕐᒪᑕ ᕿᒤᓪᓗᑎᒡᓗ ᐅᕙᓐᓂᒃ. 8ᑖᒃᑯᓄᖓ ᐊᑐᕐᑕᐅᖁᓚᐅᕐᑕᓐᓂᒃ ᒪᓕᒃᑕᐅᖁᓚᐅᕐᑕᓐᓂᒡᓗ ᕿᒤᓯᒪᓕᕇᕐᒪᑕ; ᒎᓗᒥᒃ ᐊᐅᒃᑎᑦᓯᓪᓗᑎᒃ ᐃᒻᒧᒃᓯᐅᒐᐅᑉ ᓄᕐᕋᓐᖑᐊᖓᓂᒃ ᓴᓇᓯᒪᓕᕐᐳᑦ ᑖᓐᓇᓗ ᑐᒃᓯᐊᕐᕕᒋᓪᓗᒍ ᑐᓂᕐᕈᓯᕐᕕᒋᓯᒪᓕᕐᐹᑦ. ᐅᖃᕐᓗᑎᒡᓗ ‘ᑖᒃᑯᐊ ᑕᕝᕙ ᒎᑎᓯ, ᐃᓴᕆᐊᓕᒥᐅᖑᔪᓯ ᐄᑦᔨᑉᑎᒥᑦ ᐊᐅᓪᓚᕈᑦᔨᔨᒋᓚᕐᑕᓯ.’” 9ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, “ᖃᐅᔨᕙᒃᑲ ᐃᓄᐃᑦ ᑖᒃᑯᐊ ᓯᑎᔪᐊᓘᓂᖏᑦ. 10ᒫᓐᓇ ᐅᕙᓐᓂᒃ ᓄᖅᑲᕐᑎᑦᓯᓇᓱᐊᕐᓂᐊᕐᓇᒃ, ᐃᓄᐃᑦ ᑖᒃᑯᐊ ᓂᓐᖓᐅᑎᒻᒪᕆᒐᒃᑭ, ᐊᓯᕈᕐᓂᐊᓕᕐᐸᒃᑲ. ᐃᕝᕕᓪᓕ ᑭᖑᕚᒃᓴᑎᓪᓗ ᐃᓅᖃᑎᒌᒡᔪᐊᓐᖑᕐᑎᓐᓂᐊᕐᐸᒃᑲ.”
11 #
ᒨᓯᓯ ᓯᑕᒪᖏᑦ 14:13-19. ᒨᓯᓯᓕ ᐃᓗᖏᕐᓱᕐᓗᓂ ᑐᒃᓯᐊᓕᕐᐳᖅ ᐊᑕᓂᕐᒧᑦ ᒎᑎᒥᓄᑦ ᐅᖃᕐᓗᓂᓗ, “ᐊᑕᓃᖅ, ᓱᖕᒪᑦ ᐃᓄᖁᑎᖕᓄᑦ ᑍᒫᕌᓗᒃ ᓂᓐᖓᐅᒪᔪᒃᓴᐅᕖᑦ? ᑖᒃᑯᐊ ᓴᐳᑎᓚᐅᕋᕕᒋᑦ ᐄᑦᔨᑉᑎᒥᑦ ᐊᔪᒐᖃᖏᓐᓂᕐᓄᑦ ᐱᔪᓐᓇᕐᓂᕐᔪᐊᕐᓄᓪᓗ. 12ᓱᖕᒪᑦ ᐄᑦᔨᑉᑎᒥᐅᑦ ᐅᖃᕈᓐᓇᕐᓯᔪᒫᓕᕐᐹᑦ ᐃᓄᖁᑎᑎᑦ ᐊᐅᓪᓚᕈᑦᔭᐅᓚᐅᕐᓂᕋᕐᓗᒋᑦ ᐄᑦᔨᑉᑎᒥᑦ, ᑐᖁᑦᓴᕐᑐᕈᒪᓪᓗᒋᑦ ᖃᖅᑲᓕᖕᒥ ᐊᓯᕈᕆᐊᕐᑐᕈᒪᓪᓗᒋᓪᓗ ᓄᖑᑦᓯᐊᕐᓗᒋᑦ? ᓂᓐᖓᐅᒪᔪᓐᓁᓚᐅᕆᑦ; ᐃᓱᒪᒋᔧᑦ ᓴᖑᑎᓚᐅᕈᒃ ᐊᓯᕈᕐᑕᐅᓂᕐᓗ ᑕᒪᓐᓇ ᐃᓄᖁᑎᖕᓄᑦ ᑎᑭᑎᓐᓂᐊᕐᓇᒍ. 13#ᒨᓯᓯ ᓯᕗᓪᓖᑦ 22:16,17; 17:8.ᐱᔨᒋᓚᐅᕐᑕᑎᑦ ᐃᖅᑲᐅᒪᓚᐅᒃᑭᑦ, ᐂᑉᕋᕼᐋᒻ, ᐂᓴᑭᓗ, ᔧᑯᓗ, ᑖᒃᑯᓄᖓ ᐊᖏᒻᒪᕆᓚᐅᕋᕕᑦ ᑭᖑᕚᖃᕈᒫᕐᓂᕋᕐᓗᒋᑦ ᐅᓪᓗᕆᐊᑎᑐᑦ ᐅᓄᕐᑎᒋᔪᓂᒃ ᑭᖑᕚᖏᓪᓗ ᓄᓇᒥᒃ ᐊᖏᕈᑎᒋᓯᒪᔭᕐᓂᒃ ᑐᓂᓯᕕᒋᓂᐊᕐᓂᕋᕐᓗᒋᑦ ᓄᓇᒋᓂᐊᕐᑕᖏᓐᓂᒃ ᐃᓱᖃᖏᑦᑐᒧᑦ.” 14ᑕᕝᕙ ᐊᑕᓂᐅᑉ ᐃᓱᒪᒋᓚᐅᕐᑕᓂ ᓴᖑᑎᓕᕐᐹ ᐃᓄᖁᑎᒥᓄᓪᓗ ᐊᓯᕈᕐᑕᐅᓇᕐᑐᒥᒃ ᑎᑭᑎᑦᓯᔪᒪᔪᓐᓁᕐᐳᖅ.
15ᒨᓯᓯ ᑕᕝᕙ ᖃᖅᑲᒥᑦ ᐊᖅᑲᓕᕐᐳᖅ, ᑎᒍᒥᐊᕐᓗᓂ ᐱᖁᔭᓂᒃ ᑎᑎᕋᕐᕕᒋᓯᒪᔫᖕᓂᒃ ᐅᔭᕌᖕᓂᒃ ᒪᕐᕉᖕᓂᒃ ᑖᒃᑯᐊᒡᓗ ᐃᒡᓗᒃᑐᑦ ᑎᑎᕋᕕᒋᓯᒪᕘᒃ ᐊᑐᓂᑦ. 16ᒎᑎᐅᓪᓗ ᓇᖕᒥᓂᖅ ᑖᒃᑯᐊᒃ ᓴᓇᓚᐅᕐᐰᒃ ᓇᖕᒥᓂᕐᓗ ᑎᑎᕋᕐᕕᒋᓪᓗᓂᒋᑦ ᐱᖁᔭᓂᒃ.
17ᔮᓱᐊᓗ ᑐᓵᓕᕋᒥ ᐃᓄᖕᓂᒃ ᓂᐱᖅᑯᕐᑐᓪᓗᑎᒃ ᕾᒐᓛᕐᑐᓂᒃ ᒨᓯᓯᒧᑦ ᐅᖃᕐᐳᖅ, “ᓂᐱᕐᔪᐊᖃᓕᕐᐳᖅ ᑕᖕᒫᕐᓯᒪᕕᖕᒥ ᐅᓇᑕᕐᑐᑦ ᓂᐱᖏᑎᑐᑦ.”
18ᒨᓯᓯᓕ ᐅᖃᕐᐳᖅ, “ᐅᓇᑕᕐᓂᕐᒥ ᓵᓚᖃᕐᑐᑎᑐᑦ ᓂᐱᖃᓐᖏᓚᑦ ᐅᕝᕙᓗ ᓵᓚᐅᔪᑎᑐᑦ ᓂᐱᖃᕐᒥᓇᑎᒃ; ᐃᓐᖏᕐᕙᓗᒃᑐᓂᒡᓕ ᑐᓵᔪᖓ.”
19ᒨᓯᓯᓕ ᑕᖕᒫᕐᓯᒪᕕᖕᒧᑦ ᖃᒡᓕᒐᒥ ᑕᑯᓕᕐᐳᖅ ᓄᕐᕋᓐᖑᐊᒥᒃ ᐃᓄᖕᓂᒡᓗ ᑖᓂᓯᕐᑐᓂᒃ, ᐃᓗᐃᓪᓕᓂᕐᒧᑦ ᓂᓐᖓᒃᑐᐊᓘᕗᖅ. ᑕᒫᓂᓗ ᖃᖅᑲᐅᑉ ᑭᒡᓕᖓᓂ, ᑎᒍᒥᐊᕐᑖᖕᓂ ᐅᔭᕌᒃ ᓂᓐᖓᖕᓂᕐᒧᑦ ᒥᓗᕆᐅᑎᕚᒃ ᓯᖁᒥᓪᓗᒋᒡᓗ. 20ᓄᕐᕋᓐᖑᐊᕐᓗ ᓴᓇᔭᐅᓯᒪᔪᖅ ᑎᒍᕚ, ᐃᑯᒪᒧᓪᓗ ᐊᐅᒃᑎᑉᐹ, ᓯᖃᓪᓕᑦᓯᐊᕐᓗᒍᓗ ᐳᔪᕋᕐᑎᑐᑦ ᑍᒤᓕᕐᑎᑉᐹ, ᐃᒥᕐᒥᒡᓗ ᐃᓚᓪᓗᓂᐅᒃ. ᐃᓴᕆᐊᓕᒥᐅᑦ ᑕᒪᑐᒥᖓ ᐃᒥᕐᑎᑉᐰᑦ. 21ᒨᓯᓯᓗ ᐅᖃᕐᐳᖅ ᐂᕉᓂᒧᑦ, “ᐃᓄᒋᐊᒃᑐᕐᔪᐊᓂᑦ ᖃᓄᐃᓕᐅᕐᑕᐅᓐᓂᕋᕕᑦ, ᑍᒫᒃ ᐱᐅᖏᑦᑐᐊᓗᖕᒥᒃ ᐊᔪᕐᑐᓕᑎᑦᓯᓚᐅᕐᐲᑦ?”
22ᐂᕉᓂᐅᑉ ᑭᐅᕚ, “ᓂᓐᖓᐅᑎᑦᑍᓕᓐᖓ; ᐅᑯᐊ ᐃᓄᒐᓴᒡᔪᐊᑦ ᖃᐅᔨᒪᔭᑎᑦ ᐱᐅᖏᑦᑐᒥᒃ ᑲᔪᖏᕐᑐᐊᓘᓂᖏᑦ. 23ᑖᒃᑯᓄᖓ ᐅᖃᐅᑦᔭᐅᓚᐅᕋᒪ, ‘ᐃᓐᓇ ᒨᓯᓯ ᓇᓗᓇᕐᓯᖕᒪᑦ ᖃᓄᐃᓕᖓᓕᕐᒪᖔᑦ ᐄᑦᔨᑉᑎᒥᑦ ᐊᐅᓪᓚᕈᑦᔨᓚᐅᕐᑐᖅ ᐅᕙᑦᑎᓐᓂᒃ, ᒎᑎᓕᐅᓚᐅᕆᑦ ᐅᕙᑦᑎᓐᓂᒃ ᑕᓯᐅᕐᓯᓂᐊᕐᑐᒥᒃ.’ 24ᐅᖃᐅᑎᓚᐅᕐᐸᒃᑲᓕ, ‘ᓇᓪᓕᐊᑦ ᒎᓗᖁᑎᖃᕐᑐᖅ ᐲᔧᓚᐅᕐᓕ’; ᑕᕝᕙ ᑐᓂᔭᐅᓚᐅᕐᐳᖓ ᑖᒃᑯᓇᓐᖓᑦ, ᐃᑯᒪᒧᐊᕐᓗᒋᓪᓕ ᐊᐅᒃᑎᓚᐅᕐᐸᒃᑲ, ᑕᕝᕙᓐᖓᓪᓗ ᑕᕝᕙ ᓄᕐᕋᓐᖑᐊᒥᒃ ᓴᖅᑭᑦᑐᖃᓕᓚᐅᕐᐳᖅ.”
25ᒨᓯᓯᓕ ᖃᐅᔨᒐᒥ ᐂᕉᓂᐅᑉ ᐃᓄᖕᓂᒃ ᑕᓯᐅᕐᓯᓯᒪᓂᖓᓂᒃ ᑐᑮᕈᑎᓂᕐᒧᑦ ᐃᒻᒥᖕᓂᒡᓗ ᓯᓔᕐᕆᓯᒪᓂᖏᓐᓂᒃ ᑲᓐᖑᓲᑎᒃᓴᐅᓕᕐᓗᑎᒡᓗ ᐊᑭᕋᕐᑐᕐᑎᖏᑕ ᓯᕗᕌᓂ. 26ᑕᕝᕙ ᒨᓯᓯ ᑕᖕᒫᕐᓯᒪᕕᐅᑉ ᐃᑎᕐᑕᕐᕕᖓᓂ ᓂᑯᕕᑉᐳᖅ ᕾᒐᓛᓕᕐᓗᓂᓗ, “ᐊᑕᓂᕐᒥᒃ ᒪᓕᒍᒪᔪᑦ ᒪᐅᖓ ᐅᕙᓐᓄᑦ ᕾᓚᐅᕐᓕᑦ!” ᑕᕝᕙ ᓕᕔᑎᓕᒫᑦ ᑕᒪᐅᓐᖓᕐᐳᑦ ᒨᓯᓯᐅᑉ ᐊᕙᑖᓄᑦ, 27ᐅᖃᐅᑎᕔᓪᓗ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ ᐅᖃᕐᐳᖅ, ‘ᐃᓕᑦᓯ ᐊᑐᓂᑦ ᓴᕕᒡᔪᐊᒥᒃ ᑎᒍᓯᔪᒃᓴᐅᕗᓯ, ᑕᖕᒫᕐᓯᒪᕕᐅᑉ ᐹᖓᓂᑦ ᐱᒋᐊᕐᓗᓯ ᐃᓱᐊᓄᑦ ᑎᑭᓪᓗᓯ ᑐᖁᕅᖁᓪᓗᓯ ᖃᑕᓐᖑᑎᑦᓯᓐᓂᒃ, ᐃᓚᓐᓇᕆᔭᑦᓯᓐᓂᒡᓗ, ᐃᓅᖃᑎᑦᓯᓐᓂᒡᓗ.’” 28ᓕᕔᑎᓪᓗ ᒨᓯᓯᒧᑦ ᐱᖁᔭᐅᓂᕐᒥᓂᒃ ᓈᓚᒃᐳᑦ, ᑐᖁᑦᓯᓪᓗᑎᒡᓗ ᐃᓄᖕᓂᒃ 3,000 ᖃᓂᒋᔮᓂ ᑕᕝᕙᓂ ᐅᓪᓗᒥ. 29ᒨᓯᓯᓗ ᐅᖃᕐᐳᖅ ᓕᕔᑎᓄᑦ, “ᐅᓪᓗᒥ ᐃᓕᑦᓯᓐᓂᒃ ᐃᑦᔪᕐᓁᓕᕐᑎᑉᐳᓯ ᐱᑎᑕᐅᓪᓗᓯᓗ ᑐᓂᕐᕈᓯᕐᑎᑦᓯᔨᐅᓂᕐᒥᒃ ᐊᑕᓂᕐᒧᑦ ᑕᒪᓐᓇ ᐱᔨᑦᓯᕈᑕᐅᖁᓪᓗᒍ ᐃᓕᑦᓯᓐᓄᑦ ᑐᖁᑦᓯᓚᐅᕐᓂᑦᓯᓐᓄᑦ ᐃᕐᓂᑦᓯᓐᓂᒃ ᖃᑕᓐᖑᑎᑦᓯᓐᓂᒡᓗ, ᑍᒤᒻᒪᑦ ᐊᑕᓂᐅᑉ ᑐᓂᓯᕕᒋᕚᓯ ᓇᖕᒥᓂᖅ ᓮᒻᒪᕐᑎᑦᓯᓂᕐᒥᓂᒃ.”
30ᖃᐅᑎᓪᓗᒍ ᒨᓯᓯ ᐃᓄᖕᓄᑦ ᐅᖃᓕᕐᐳᖅ, “ᐊᔪᕐᑐᓕᓚᐅᕐᐳᓯ ᐊᖏᔪᕐᔪᐊᒥᒃ ᐊᔪᕐᑐᓕᓂᕐᒥᒃ. ᒫᓐᓇᓕ ᖃᖅᑲᒧᑦ ᒪᔪᕋᕐᓂᐊᕐᐳᖓ ᐊᑕᓂᕐᒧᑦ; ᖃᐅᔨᔭᕐᑐᕋᓱᐊᕐᓗᖓ ᐃᓱᒪᒋᔪᓐᓁᕐᑕᐅᔪᓐᓇᕐᒪᖔᑦᓯ ᐊᔪᕐᑐᓕᓂᑦᓯᓐᓂᑦ.” 31ᒨᓯᓯᓗ ᖃᖅᑲᒧᑦ ᐅᑎᕋᒥ ᐊᑕᓂᕐᒧᑦ ᐅᖃᕐᐳᖅ, “ᐅᑯᐊ ᐃᓄᐃᑦ ᐊᔪᕐᑐᓕᓯᒪᕗᑦ ᐊᖏᔪᕐᔪᐊᒥᒃ ᐊᔪᕐᑐᓕᓂᕐᒥᒃ. ᒎᑎᓕᐅᕐᓯᒪᖕᒪᑕ ᒎᓗᒥᑦ ᓴᓇᓯᒪᔭᒥᖕᓂᒃ ᑐᒃᓯᐊᕐᕕᒋᓯᒪᓕᕐᓗᓂᑦᔪᒡᓗ. 32#ᐃᓐᖏᕈᑦ 69:28; ᑕᑯᑎ 3:5.ᒫᓐᓇ ᐃᓱᒪᒋᔪᓐᓁᕐᕕᒋᓚᐅᒃᑭᑦ ᐊᔪᕐᑐᓕᓂᖏᓐᓂᑦ; ᐃᓱᒪᒋᔪᓐᓁᕐᕕᒋᓂᐊᖏᒃᑯᕕᒋᑦ ᐊᔪᕐᑐᓕᓂᖏᓐᓂᑦ, ᑕᕝᕙ ᐊᑎᕋ ᐲᕐᑕᐅᔪᒃᓴᐅᕗᖅ ᑎᑎᕋᕐᓯᒪᔭᕐᓂᑦ ᐃᓄᖁᑎᕕᑦ ᐊᑎᒃᑯᕕᖏᓐᓂᑦ.”
33ᐊᑕᓂᐅᓪᓕ ᒨᓯᓯ ᑭᐅᕚ, “ᐅᕙᓐᓄᑦ ᑭᓯᐊᓂ ᐊᔪᕐᑐᓕᓯᒪᔪᑦ ᐊᑎᖏᑦ ᐲᔭᕐᓂᐊᕐᐸᒃᑲ ᐊᑎᒃᑯᕕᖁᑎᓐᓂᑦ. 34ᒫᓐᓇᓕ ᐅᑎᓕᕆᑦ, ᐃᓄᐃᓪᓗ ᑕᓯᐅᕆᐊᕐᑐᓕᒃᑭᑦ ᑕᕝᕗᖓ ᐃᓕᖕᓄᑦ ᐅᖃᐅᑎᒋᓯᒪᔭᓐᓄᑦ. ᑕᑯᒋᓪᓗ ᐂᖏᓕᖁᑎᒐ ᓯᕗᓂᑦᓯᓐᓄᑦ ᑎᓕᓂᐊᕐᐸᕋ, ᑭᓯᐊᓂᓕ ᖃᖓᑐᐃᓐᓇᖅ ᓱᒋᐊᕐᓯᕕᒃᓴᕋ ᓇᓪᓕᐅᑎᒃᐸᑦ ᐃᓄᐃᑦ ᑖᒃᑯᐊ ᓱᒋᐊᕈᒫᕐᐸᒃᑲ ᐊᔪᕐᑐᓕᓯᒪᓂᖏᑦ ᒪᓕᒡᓗᒋᑦ.”
35ᐊᑕᓂᕐᓕ ᐃᓄᖕᓄᑦ ᑎᑭᑎᑦᓯᓕᕐᐳᖅ ᖃᓂᒪᓇᕐᑐᒥᒃ, ᐂᕉᓂᒥᒃ ᓴᓇᑎᑦᓯᓚᐅᕐᓂᖏᑦ ᓄᕐᕋᓐᖑᐊᒥᒃ ᒎᓗᒥᒃ ᐱᑦᔪᑎᒋᓪᓗᒋᑦ.
Currently Selected:
ᒨᓯᓯ ᐂᑉᐸᖏᑦ 32: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
