ᒨᓯᓯ ᐂᑉᐸᖏᑦ 37
37
ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᓂᒃ ᓴᓇᓂᖓᑦ
ᒨᓯᓯ ᐂᑉᐸᖏᑦ 25:10-22
1ᐱᔭᓕᐅᓪ ᓴᓇᕗᖅ ᐃᒃᓯᕐᕕᖕᒥᒃ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᒃᓴᖓᓂᒃ ᕿᔪᖕᒥᒃ ᑎᓴᒃᑕᒥᒃ#37:1 ᑎᓴᒃᑕᒥᒃ ᐅᕝᕙᓗ ᓯᑎᔪᔭᒥᒃ ᐊᑬᑦᓯᐊᓂᒃ ᐊᑎᓕᖕᓂᒃ, ᑕᑭᓂᖃᕐᓗᒍ 110ᓂᒃ ᓯᓐᑎᒦᑕᓂᒃ, ᓯᓕᖕᓂᖃᕐᓗᒍᓗ 66ᓂᒃ ᓯᓐᑎᒦᑕᓂᒃ, ᐳᕐᑐᓂᖃᕐᓗᒍᓗ 66ᓂᒃ ᓯᓐᑎᒦᑕᓂᒃ. 2ᑖᓐᓇᓗ ᖄᐹᓕᕐᐹᑦ ᒎᓗᓪᓚᕆᖕᒥᒃ, ᐃᓗᐊ ᓯᓚᑖᓗ ᓯᓚᑉᐱᐊᕐᓗᒍᓗ ᒎᓗᒥᒃ, ᓯᓈᓕᐅᕐᓗᒍᓗ ᒎᓗᒥᒃ. 3ᓯᑕᒪᓂᒡᓗ ᒎᓗᓂᒃ ᑎᒍᒥᐊᕐᕕᓕᐅᕐᐹ ᐊᖕᒪᓗᕐᑐᓂᒃ ᓱᓪᓗᓕᖕᓂᒃ ᑖᒃᑯᐊᓗ ᓂᐅᖏᓐᓄᑦ ᐃᓕᓗᒋᑦ, ᒪᕐᕉᒃ ᐃᒡᓗᐊᓃᓪᓗᑎᒃ, ᒪᕐᕉᒡᓗ ᐃᒡᓗᐊᓃᒃᑭᓪᓗᑎᒃ. 4ᑕᑭᔪᑯᑖᖕᓂᒃ ᕿᔫᖕᓂᒃ ᓴᓇᒋᕗᖅ ᑎᓴᒃᑖᖕᓂᒃ ᐊᑬᑦᓯᐊᒥᒃ ᐊᑎᓕᖕᒥᑦ, ᑖᒃᑯᐊᒡᓗ ᓯᓚᑉᐱᐊᕐᐹᒃ ᒎᓗᒥᒃ, 5ᓱᓪᓗᖏᑎᒍᓪᓗ ᑲᐅᑎᓪᓗᒋᒃ ᑍᒫᒃ ᐊᑭᕋᐅᑎᓕᐅᕐᐹ ᐃᒃᓯᕐᕕᐅᑉ ᓴᓂᕌᒍᑦ. 6ᒪᑐᓕᐅᕐᐹᓗ ᓂᑲᒍᓱᖕᓂᐅᑉ ᐃᒃᓯᕙᐅᑕᖓᓂᒃ ᑍᔭᐅᔪᒥᒃ ᒎᓗᐃᓐᓇᐅᓪᓗᒍ, ᑕᑭᓂᖃᕐᓗᒍ 110ᓂᒃ ᓯᓐᑎᒦᑕᓂᒃ, ᓯᓕᖕᓂᖃᕐᓗᒍᓗ 66ᓂᒃ ᓯᓐᑎᒦᑕᓂᒃ. 7ᑖᑦᓱᒪᓗ ᒪᑑᑉ ᖄᖓᒍᑦ ᐃᓱᖏᒃᑎᒃᑯᑦ ᐃᒡᓗᒌᖕᓂᒃ; ᐃᓴᕈᓐᖑᐊᓖᖕᓂᒃ ᓴᓇᒋᕗᖅ ᓯᕈᐲᖕᓂᒃ ᑍᔭᐅᔫᖕᓂᒃ ᒎᓘᖕᓂᒃ ᑲᐅᒐᕐᓗᒋᒃ ᓴᓇᓯᒪᔫᖕᓂᒃ. 8ᑖᒃᑯᐊᒡᓗ ᒪᑑᑉ ᐃᓱᖏᖕᓃᑉᐴᒃ ᐊᑐᓂᑦ, ᑕᕝᕙᓂ ᒪᑐᒥ ᐃᓛᒃᑰᖏᓪᓗᑎᒃ ᒪᑐᖓᑕ ᐃᓚᒋᓪᓗᓂᒋᒃ ᓴᓇᓯᒪᕘᒃ. 9ᑖᒃᑯᐊᒡᓗ ᓯᕈᐲᒻ ᐃᓴᕈᒥᖕᓂᒃ ᐃᓯᕕᖓᑎᑦᓯᕘᒃ, ᑖᓐᓇ ᒪᑐ ᐃᓴᕈᒥᖕᓄᑦ ᖁᓚᖏᐊᕐᓗᒍ, ᑖᒃᑯᐊᒡᓗ ᓯᕈᐲᒻ ᐃᒻᒥᖕᓄᑦ ᓵᓐᖓᐅᑎᓪᓗᑎᒃ ᒪᑑᑉ ᖄᖓᓂ.
ᒎᑎᒧᑦ ᑐᓂᕐᕈᑎᐅᔪᑦ ᓂᐊᖂᔧᑦ ᐃᓂᒃᓴᖓᓂᒃ ᓴᓇᓂᖓᑦ
ᒨᓯᓯ ᐂᑉᐸᖏᑦ 25:23-30
10ᕿᔪᖕᒥᒃ ᑎᓴᒃᑕᒥᒃ ᐊᑬᑦᓯᐊᒥᒃ ᐊᑎᓕᖕᒥᒃ ᓵᓕᐅᕆᕗᖅ, ᑕᑭᓂᖃᕐᓗᒍ 88ᓂᒃ ᓯᓐᑎᒦᑕᓂᒃ, ᓯᓕᖕᓂᖃᕐᓗᒍᓗ 44ᓂᒃ ᓯᓐᑎᒦᑕᓂᒃ, ᐳᕐᑐᓂᖃᕐᓗᒍᓗ 66ᓂᒃ ᓯᓐᑎᒦᑕᓂᒃ. 11ᑖᓐᓇᓗ ᓯᓚᑉᐱᐊᕐᐹ ᒎᓗᓪᓚᕆᖕᒥᒃ, ᓯᓇᕐᔪᓕᐅᕐᐹᓗ ᐊᕙᓕᐊᕈᑕᒃᓴᖓᓂᒃ ᓴᖑᐃᐱᓗᒃᓯᒪᔪᒥᒃ ᒎᓗᒥᒃ. 12ᑖᓐᓇᓗ ᓯᓇᕐᔪᒃᓯᐅᓯᕐᐹ ᐊᕙᑎᓕᒫᖓ ᐊᒡᒊᑦ ᓴᓂᒧᑐᓂᖓᑎᑐᑦ ᓯᓕᒃᑎᒋᔪᒥᒃ, ᓯᓇᕐᔪᖓᓗ ᓯᓚᑉᐱᐊᓕᒃᑲᓐᓂᕐᓗᒍ ᓴᖑᐃᐱᓗᒃᓯᒪᔪᒥᒃ ᒎᓗᒥᒃ. 13ᑕᕝᕙᓂᓗ ᒎᓗᓂᒃ ᐊᖕᒪᓗᕐᑐᓂᒃ ᓱᓪᓗᓕᖕᓂᒃ ᓴᓇᒋᕗᖅ, ᑖᒃᑯᐊᓗ ᐊᖕᒪᓗᕐᑐᑦ ᓱᓪᓗᓖᑦ ᐃᓕᓗᒋᑦ ᓂᐅᖏᒃᑕ ᑎᕆᖅᑯᖏᓐᓄᑦ ᓯᑕᒪᓄᑦ. 14ᓯᓇᕐᔪᐊᑕᓗ ᑭᒡᓕᖓᓃᑦᑐᓂᒃ ᐊᖕᒪᓗᕐᑐᓂᒃ ᓱᓪᓗᓖᖕᓂᒃ ᓴᓇᒋᕗᖅ, ᑕᑭᔪᑯᑖᖕᓄᑦ ᑲᐅᑎᑦᓯᕕᐅᓗᑎᒃ ᐊᑭᕋᐅᓯᕐᕕᒃᓴᐅᖁᓪᓗᒋᑦ ᑖᑦᓱᒧᖓ ᓵᒧᑦ. 15ᑕᑭᔪᑯᑖᖕᓂᒃ ᕿᔪᖕᓂᒃ ᓴᓇᒋᕗᖅ ᑎᓴᒃᑖᖕᓂᒃ ᐊᑬᑦᓯᐊᒥᒃ ᐊᑎᓕᖕᒥᒃ, ᑖᒃᑯᐊᒡᓗ ᓯᓚᑉᐱᐊᕐᓗᒋᒃ ᒎᓗᒥᒃ. 16ᐊᓪᓕᕋᓕᐅᕆᕗᖅ ᒎᓗᐃᓐᓇᕐᓂᒃ ᓵᒦᑦᑐᒃᓴᓂᒃ: ᒥᑭᓐᓂᕐᓴᓂᒡᓗ ᐊᓪᓕᕋᒃᓴᓂᒃ, ᐃᒥᐅᑎᓂᒡᓗ, ᐃᒥᖃᐅᑎᓂᒡᓗ ᐴᒍᑕᓂᒃ, ᐸᐅᕐᖎᓪᓗ ᐃᑦᑎᖏᓐᓄᑦ ᑐᓂᕐᕈᑕᐅᔪᓄᑦ ᐴᒃᓴᓂᒃ ᓴᓇᓚᐅᕆᕗᖅ.
ᓇᓂᕈᐊᑉ ᓇᐸᕕᖓᓂᒃ ᓴᓇᓂᖓᑦ
ᒨᓯᓯ ᐂᑉᐸᖏᑦ 25:31-40
17ᓴᓇᒋᕗᖅ ᓇᓂᕈᐊᑉ ᓇᐸᕕᖓᓂᒃ ᒎᓗᐃᓐᓇᐅᓪᓗᒍ. ᐊᓪᓕᕋᖓᓕ ᓇᐸᔪᖓᓗ ᒎᓘᒋᕗᖅ ᑲᐅᒐᕐᓯᒪᓗᓂᓗ ᓴᓇᓯᒪᕗᖅ; ᓇᓂᕈᐊᖃᕐᕕᖓ, ᑕᑯᒥᓇᕐᓴᐅᑎᖏᓪᓗ ᐱᕈᕐᓯᐊᖑᐊᑦ, ᐱᕈᕐᕕᓐᖑᐊᖏᓪᓗ ᐊᑕᐅᓯᕐᒥᒃ ᐃᓗᐃᑦᑑᓗᑎᒃ ᓴᓇᓯᒪᕗᑦ.
18ᕿᑎᖓᓃᑦᑑᓪᓗ ᓇᓂᕈᐊᖃᕐᕕᐅᑉ ᐊᕙᑎᖏᒃᑎᒍᑦ 6ᓂᒃ ᓇᓂᕈᐊᖃᕐᕕᖃᕐᐳᖅ ᓇᐹᕐᑑᑉ ᐊᕙᓚᖓᔪᖏᑎᑐᑦ, ᕿᑎᖓᓃᑦᑑᑉ ᐃᒡᓗᐊᒍᑦ ᐱᖓᓱᑦ ᓇᓂᕈᐊᖃᕐᕕᐅᓗᑎᒃ ᐃᒡᓗᐊᒍᓪᓗ ᐱᖓᓱᑦ ᓇᓂᕈᐊᖃᕐᕕᐅᒋᓪᓗᑎᒃ. 19ᑖᒃᑯᐊᓗ ᐱᖓᓱᑦ ᓇᓂᕈᐊᖃᕐᕖᑦ ᕿᑎᖓᑕ ᐊᕙᑖᓃᑦᑐᑦ ᐊᑐᓂᑦ 6ᓂᒃ ᓴᓇᓯᒪᕗᑦ ᐊᕙᑎᖏᒃᑎᒃᑯᑦ ᖁᖁᖓᔪᒥᒃ ᖃᖅᑯᐊᒐᑎᑐᑦ ᑍᒤᑦᑐᓂᒃ ᓇᓂᕈᐊᖃᕐᕕᖃᕐᓗᑎᒃ, ᐃᒻᒥᒍᓪᓗ ᐊᑐᓂᑦ ᓇᐸᔪᖏᑦ ᐱᕈᕐᑐᖃᕐᕕᓐᖑᐊᖃᕐᓗᑎᒃ ᐱᕈᕐᑐᖏᓪᓗ ᐅᖃᐅᔭᓐᖑᐊᖃᕐᓗᑎᒃ. 20ᑕᕝᕙᓂᓕ ᓇᓂᕈᐊᖃᕐᕕᐅᑉ ᓇᐸᔪᖓᓂ ᓯᑕᒪᓂᒃ ᐊᕙᒻᒧᑦ ᖁᖁᖓᔪᓂᒃ ᑕᕐᓴᖃᕆᕗᖅ, ᐱᕈᕐᑐᖃᕐᕕᓐᖑᐊᖃᕐᓗᑎᒃ ᐱᕈᕐᑐᖏᓪᓗ ᐅᖃᐅᔭᓐᖑᐊᖃᕐᓗᑎᒃ. 21ᑖᒃᑯᐊᓗ 6 ᓇᓂᕈᐊᖃᕐᕖᑦ ᐊᑐᓂᑦ ᐃᓱᐊᒍᑦ ᓇᓴᓐᖑᐊᖑᔮᕐᑐᒥᒃ ᓇᓂᕈᐊᖃᕐᕕᖃᕐᐳᑦ ᑕᕝᕙᓐᖓᑦ ᓇᓂᕈᐊᖃᕐᕕᐅᔪᒥᑦ ᕿᑎᖓᓃᑦᑐᒥᑦ ᐊᕙᓚᖓᔪᑎᑐᑦ ᑍᒤᓕᖓᓗᑎᒃ. 22ᑖᒃᑯᐊᓕ ᓇᓂᕈᐊᖃᕐᕕᐅᔪᑦ ᓇᓴᓐᖑᐊᖑᔪᑦ ᐊᕙᓚᖓᔪᓐᖑᐊᕆᔭᖏᓪᓗ ᐊᑕᐅᓯᐅᓪᓗᓂ ᐃᓗᐃᑦᑑᕗᑦ, ᑕᒪᓐᓇ ᓇᓂᕈᐊᖃᕐᕕᐅᔪᖅ ᐃᓗᐃᑦᑑᓗᓂ ᐃᓛᕐᑐᕐᓯᒪᖏᓪᓗᓂᓗ ᑲᐅᒐᕐᑕᐅᓯᒪᓪᓗᓂ ᓴᓇᓯᒪᕗᖅ ᒎᓗᐃᓐᓇᐅᓗᓂ. 23ᓇᓂᕈᐊᖃᕐᕕᒃ ᑖᓐᓇ 7ᓂᒃ ᑲᑎᓪᓗᒋᑦ ᓇᓂᕈᐊᖃᕐᕕᖃᕐᓗᒍ ᓴᓇᕚ, ᐃᑯᒪᖏᓐᓄᓪᓗ ᖃᒥᑦᓯᑦᔪᑎᖓ ᐊᓪᓕᕋᖓᓗ ᒎᓗᓪᓚᕆᐅᓪᓗᑎᒃ. 24ᒎᓗᐃᓐᓇᐅᔪᒥᒃ 75ᐸᐅᒥᒃ ᐅᖁᒤᓐᓂᖃᕐᑐᒥᒃ ᓴᓇᕗᖅ ᓇᓂᕈᐊᖃᕐᕕᖕᒥᒃ ᐃᓚᒋᔭᕆᐊᓕᓕᒫᖏᓪᓗ ᐱᖃᓯᐅᑎᑎᓪᓗᒋᑦ.
ᑐᓂᕐᕈᓯᕐᕕᒃ ᐃᑯᐊᓚᑦᓯᓂᕐᒧᑦ ᐃᓯᕐᓗᐊᕐᓂᑎᑦᓯᕕᖕᒥᒃ ᓴᓇᓂᖓᑦ
ᒨᓯᓯ ᐂᑉᐸᖏᑦ 30:1-5
25ᑐᓂᕐᕈᓯᕐᕕᖕᒥᒃ ᓴᓇᒋᕗᖅ ᐃᓯᕐᓗᐊᕐᓂᑎᑦᓯᕕᒃᓴᒥᒃ ᕿᔪᖕᒥᒃ ᓯᑎᔪᒥᑦ ᐊᑬᓯᐊᒥᒃ ᐊᑎᖃᕐᑐᒥᑦ, ᐃᓯᕐᓗᐊᕐᓂᑎᑦᓯᓂᕐᒥᒃ ᐃᑯᐊᓚᑦᓯᕕᒃᓴᐅᖁᓪᓗᒍ. ᓯᒃᑭᑕᓪᓗᐊᖑᕗᕐᓗ, 45ᓂᒃ ᓯᓐᑕᒦᑕᓂᒃ ᑕᑭᓂᖃᕐᓗᓂ 45ᓂᒡᓗ ᓯᓐᑕᒦᑕᓂᒃ ᓯᓕᖕᓂᖃᕐᓗᓂ, ᐳᕐᑐᓂᖃᕐᓗᓂᓗ 90ᓂᒃ ᓯᓐᑕᒦᑕᓂᒃ. ᑎᕆᖅᑯᖏᓪᓗ ᓯᑕᒪᑦ ᐊᑐᓂᑦ ᓇᒡᔪᖑᐊᖃᕐᐳᑦ ᓴᓂᕋᖏᓐᓂ ᐊᑕᑦᓴᐅᑎᒋᔪᓂᒃ ᐃᓕᓯᒪᖏᑦᑐᓂᒃ. 26ᖄᖓᒍᑦ ᓯᓚᑉᐱᐊᕆᕚ, ᓯᓚᑎᓕᒫᖓ ᒎᓗᓪᓚᕆᖕᒥᒃ ᐊᓯᐊᓂᒃ ᐃᓚᓯᒪᖏᑦᑐᒥᒃ, ᖄᖓᓗ ᓴᓂᕋᖏᓪᓗ ᓯᓇᕐᔪᓕᐅᕐᓗᒋᑦ ᒎᓗᒥᒃ. 27ᓯᓇᕐᔪᐊᑕᓗ ᐊᑖᒍᑦ ᒪᕐᕉᖕᓂᒃ ᒎᓘᖕᓂᒃ ᓄᕐᓗᓕᐅᕐᐳᖅ ᐊᒡᔭᕐᑕᐅᕕᒃᓴᖏᓐᓂᒃ, ᐃᒡᓗᐊᓂᓗ ᒪᕐᕉᖕᓂᒃᑕᐅᖅ ᒎᓘᖕᓂᒃ ᓄᕐᓗᓕᐅᕆᓪᓗᒍ, ᐊᑭᕋᐅᑎᒋᔭᐅᔪᓄᑦ ᕿᔪᑯᑖᖕᓄᑦ ᑲᐅᒻᒥᔭᐅᓪᓗᑎᒃ ᐊᒡᔭᕐᑕᐅᕕᒃᓴᐅᖁᓪᓗᒋᑦ. 28ᕿᔪᑯᑖᒡᓗ ᐊᑭᕋᐅᑎᒃᓴᖏᑦ ᓴᓇᒋᕚᒃ ᕿᔪᖕᒥᑦ ᑎᓯᔪᒥᑦ ᐊᑬᓯᐊᒥᒃ ᐊᑎᓕᖕᒥᑦ ᓯᓚᑉᐱᐊᕐᓗᒋᓪᓗ ᒎᓗᒥᒃ.
ᓇᐹᕐᑑᑉ ᐅᕐᓱᖓᑕ ᒥᖑᐊᕈᑎᒃᓴᐅᑉ ᓴᓇᔭᐅᓂᖓ
ᒨᓯᓯ ᐂᑉᐸᖏᑦ 30:22-38
29 #
ᒨᓯᓯ ᐂᑉᐸᖏᑦ 30:22-38. ᐊᒻᒪᑦᑕᐅᖅ ᓴᓇᓚᐅᕆᕗᖅ ᐃᑦᔪᕐᓁᑦᑐᒥᒃ ᒥᖑᐊᕐᓯᒍᑎᒃᓴᒥᒃ ᓇᐹᕐᑑᑉ ᐅᕐᓱᖓᓂᒃ ᑎᐱᑦᓯᐊᕆᒃᑐᒥᒡᓗ ᐃᓯᕐᓗᐊᕐᓂᑎᑕᒃᓴᒥᒃ ᐃᓚᓯᒪᖏᑦᑐᒥᒃ, ᑖᒃᑯᐊ ᑲᑎᓪᓗᓂᒋᑦ ᑎᐱᑦᓯᐊᕆᒃᓴᐅᑎᑎᑐᑦ ᓴᓇᓚᐅᕐᐰᑦ.
Currently Selected:
ᒨᓯᓯ ᐂᑉᐸᖏᑦ 37: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
