ᒨᓯᓯ ᐂᑉᐸᖏᑦ 38
38
ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕐᕕᒃᓴᒥᒃ ᓴᓇᓂᖓᑦ
ᒨᓯᓯ ᐂᑉᐸᖏᑦ 27:1-8
1ᑐᓂᕐᕈᓯᕐᕕᒃᓴᓕᐅᓚᐅᕆᕗᖅ ᐃᑯᐊᓚᑦᓯᕕᒃᓴᒥᒃ, ᕿᔪᖕᒥᒃ ᑎᓴᒃᑕᒥᒃ#38:1 ᑎᓴᒃᑕᒥᒃ ᐅᕝᕙᓗ ᓯᑎᔪᔭᒥᒃ ᐊᑬᑦᓯᐊᒥᒃ ᐊᑎᓕᖕᒥᒃ. ᑖᓐᓇᓗ ᓯᒃᑭᑕᓪᓗᐊᖑᓪᓗᓂ#38:1 ᓯᒃᑭᑕᓪᓗᐊᖅ ᐅᕝᕙᓗ ᑭᒃᐹᕆᓪᓗᐊᕐᑐᖅ ᑕᑭᓂᖃᕐᓗᓂ 2.2ᓂᒃ ᒦᑕᓂᒃ ᓯᓕᖕᓂᖃᕐᓗᓂᓗ 2.2ᓂᒃ ᒦᑕᓂᒃ, ᐳᕐᑐᓂᖃᕐᓗᓂᓗ 1.3ᓂᒃ ᒦᑕᓂᒃ. 2ᑎᕆᖅᑯᖏᑕᓗ ᖄᖏᑎᒍᑦ ᓯᑕᒪᑎᒍᑦ ᓇᒡᔪᓐᖑᐊᓕᐅᕆᕚ, ᑖᒃᑯᐊᓕ ᑐᓂᕐᕈᓯᕐᕕᐅᑉ ᐃᓚᒋᕔᑦ ᐃᓕᐅᕋᕐᓯᒪᖏᓪᓗᑎᒃ. ᑖᓐᓇᓗ ᓯᓚᑉᐱᐊᕐᐹ ᐊᑕᖏᕐᓗᒍ ᑲᓐᓄᔭᒥᒃ. 3ᑐᓂᕐᕈᓯᕐᕕᖕᒧᑦ ᐊᓪᓕᕋᒃᓴᓕᐅᕆᕗᖅ ᑐᓐᓄᕕᓃᑦ ᐊᕐᔭᓕᓂᖏᓐᓄᑦ ᐊᓪᓕᕋᒃᓴᒥᒃ: ᑖᒃᑯᓄᖓᓗ ᖃᓗᓯᑦᔪᑎᒃᓴᒥᒃ ᓴᓇᒋᕗᖅ, ᐴᒍᑕᓂᒡᓗ, ᓂᒃᓯᒐᐅᑎᓂᒡᓗ, ᐃᑯᒪᓂᒡᓗ ᐊᒡᔭᕐᓯᑦᔪᑎᒃᓴᓂᒃ; ᑕᒪᒃᑯᐊᓗ ᑲᓐᓄᔭᐅᕗᑦ. 4ᑐᓂᕐᕈᓯᕐᕕᐅᑦᑕᐅᖅ ᕿᔪᖏᑦᑕ ᐃᓂᒃᓴᖓᓂᒃ ᓄᓗᐊᓐᖑᐊᓕᕆᓯᒪᔪᒥᒃ ᓴᓇᒋᕗᖅ ᑲᓐᓄᔭᒥᒃ ᑖᓐᓇᓗ ᕿᔪᒃᑯᕕᒃ ᓄᓗᐊᓐᖑᐊᓕᐊᕆᓯᒪᔪᖅ ᑐᓂᕐᕈᓯᕐᕕᐅᑉ ᖁᓛᑕ ᐊᑖᓃᑉᐳᖅ. 5ᑎᕆᖅᑯᖏᑎᒍᓪᓗ ᓯᑕᒪᓂᒃ ᓂᒃᓯᒡᕕᓕᐅᕐᐹ ᓄᕐᓗᓂᒃ ᑖᑦᓱᒪ ᑐᓂᕐᕈᓯᕐᕕᐅᑉ ᐃᓗᖔᖓᓃᓪᓗᓂ ᖁᓛᑕᓗ ᓇᑎᖓᑕᓗ ᐊᑯᓐᓂᖓᓂ ᐃᓂᖃᕐᑐᒥᒃ. 6ᕿᔪᑯᑖᖕᓂᒡᓗ ᓴᓇᒋᕗᖅ ᐊᑭᕋᐅᑎᒃᓵᖕᓂᒃ ᑐᓂᕐᕈᓯᕐᕕᖕᒥᒃ ᑎᓴᒃᑕᓂᒃ ᐊᑬᑦᓯᐊᒥᑦ ᐊᑎᓕᖕᒥᒃ, ᑖᒃᑯᐊᒡᓗ ᓯᓚᑉᐱᐊᕐᐰᑦ ᑲᓐᓄᔭᒥᒃ, 7ᐊᑭᕋᐅᑎᖏᒡᓗ ᑐᓂᕐᕈᓯᕐᕕᐅᑉ ᓄᕐᓗᖏᑎᒍᑦ ᑲᐅᑎᓯᒪᕘᒃ. ᑖᓐᓇᓗ ᑐᓂᕐᕈᓯᕐᕕᒃ ᓴᓇᓯᒪᕗᖅ ᓵᑦᑐᔮᓂᑦ ᐃᓗᐊ ᐃᓗᓕᖃᖏᓪᓗᒍ ᓴᓇᕙᑦ.
ᐴᒍᑕᕐᒥᒃ ᑲᓐᓄᔭᒥᒃ ᓴᓇᓂᖓᑦ
ᒨᓯᓯ ᐂᑉᐸᖏᑦ 30:18
8 #
ᒨᓯᓯ ᐂᑉᐸᖏᑦ 30:18. ᐴᒍᑕᕐᒥᒃ ᑲᓐᓄᔭᒥᒃ ᓴᓇᒋᕗᖅ ᑲᓐᓄᔭᒥᒡᓗ ᐊᓪᓕᕋᖃᕐᓗᒍ ᐊᕐᓁᑦ ᑕᕐᕋᕐᑑᑎᖏᓐᓂᑦ ᓴᓇᓚᐅᕐᐳᖅ ᐊᑕᓂᐅᑉ ᓇᔪᒐᖓᑕ ᑐᐱᐅᑉ ᐃᑎᕐᑕᕐᕕᖓᓂ ᐱᓇᓱᐊᕐᑎᐅᔫᑉ ᐱᖁᑎᕕᓂᖓᓂᒃ.
ᑐᐱᐅᑉ ᐊᑕᓂᐅᑉ ᓇᔪᒐᖓᑕ ᓱᓇᑐᐃᓐᓇᒃᓴᖏᑕ ᓴᓇᔭᐅᓂᖏᑦ
ᒨᓯᓯ ᐂᑉᐸᖏᑦ 27:9-19
9ᑐᐱᕐᒥ ᐊᑕᓂᐅᑉ ᐃᓂᒃᓴᕆᓂᐊᕐᑕᖓᓂ ᐃᒡᓗᐊᕈᓯᓕᐅᓚᐅᕆᕗᖅ ᑲᓪᓗᓈᕐᑕᑦᓯᐊᕙᖕᓂᒃ ᓵᑦᑐᓂᒃ ᑖᓗᑕᖃᕐᓗᒍ. ᑐᐱᕐᒥ ᓯᕿᓂᐅᑉ ᓇᓛᓃᑦᑐᒃᑯᑦ ᐋᖅᑮᕗᖅ ᑖᓗᑕᕐᒥᒃ ᓴᓂᒧᑐᓂᖃᕐᑎᓪᓗᒍ 44ᓂᒃ ᒦᑕᓂᒃ, 10ᓇᐸᔪᖃᕐᓗᓂᓗ 20ᓂᒃ ᑖᒃᑯᐊᓗ ᑐᓐᖓᕕᖃᕐᐳᑦ 20ᓂᒃ ᐊᑐᓂᑦ ᑲᓐᓄᔭᐅᓪᓗᑎᒃ, ᓇᐸᔪᖏᓪᓕ ᓂᒃᓯᖃᕐᐳᑦ ᓯᐅᓪᕕᕆᓂᒃ ᓂᒃᓯᒡᕕᖏᓪᓗ ᐃᑳᖓᔪᑦ ᓯᐅᓪᕕᕆᐅᒋᓪᓗᑎᒃ. 11ᑍᒫᑦᓮᓐᓇᕐᑕᐅᖅ ᑐᐱᐅᑉ ᐅᓐᓄᐊᓪᓗᐊᖓᑕ ᓇᓛᓃᓐᓂᕐᓴᖅ ᑖᓗᑕᖅ ᐃᒡᓗᐊᓃᑦᑐᑎᑐᑦ ᐋᖅᑭᒃᓯᒪᒋᕗᖅ; ᓇᐸᔪᖃᕐᓗᓂ 20ᓂᒃ ᑐᓐᖓᕕᖃᕐᓗᑎᒡᓗ 20ᓂᒃ ᐊᑐᓂᑦ ᑲᓐᓄᔭᐅᓗᑎᒃ, ᓇᐸᔪᖏᓪᓕ ᓂᒃᓯᖃᕐᐳᑦ ᓯᐅᓪᕕᕆᓂᒃ ᓂᒃᓯᒡᕕᖏᓪᓗ ᐃᑳᖓᔪᑦ ᓯᐅᓪᕕᕆᐅᒋᓪᓗᑎᒃ. 12ᓯᕿᓂᐅᓪᓕ ᓂᐱᕕᐊᑕ ᓇᓛᓃᑦᑐᖅ ᑖᓗᑕᖅ ᓴᓂᒧᑐᓂᖃᕐᐳᖅ 22ᓂᒃ ᒦᑕᓂᒃ, ᓇᐸᔪᖃᕐᓗᓂᓗ 10ᓂᒃ ᑐᓐᖓᕕᖃᕐᓗᑎᒡᓗ ᐊᑐᓂᑦ 10ᓂᒃ. 13ᓯᕿᓂᐅᓪᓕ ᓄᐃᕕᐊᑕ ᓇᓛᓃᑦᑐᖅ, ᐃᒡᓗᐊᕈᓯᐅᑉ ᐃᑎᕐᑕᕐᕕᒃᓴᖓ, ᓴᓂᒧᑐᓂᖃᕐᐳᖅ 22ᓂᒃ ᒦᑕᓂᒃ. 14ᐃᑎᕐᑕᕐᕕᖓᓕ ᑖᓗᑕᖃᕐᐳᖅ ᐊᕙᒻᒧᑦ ᒪᑐᐃᕐᑕᕐᑐᒥᒃ ᐃᒡᓗᐊ ᓴᓂᒧᑦ ᓯᓕᖕᓂᖃᕐᓗᓂ 6.6ᓂᒃ ᒦᑕᓂᒃ, ᑖᒃᑯᐊᓗ ᓇᐸᔪᖃᕐᐳᑦ ᐱᖓᓱᓂᒃ ᐊᑐᓂᓪᓗ ᑐᓐᖓᕕᖃᕐᓗᑎᒃ ᐱᖓᓱᓂᒃ. 15ᐃᒡᓗᐊᑦᑕᐅᖅ ᑍᒫᓪᓗᐊᖅ ᐊᖏᓂᖃᕆᕗᖅ ᓯᓕᖕᓂᖃᕐᓗᓂ 6.6ᓂᒃ ᒦᑕᓂᒃ, ᓇᐸᔪᖃᕐᓗᑎᒡᓗ ᐱᖓᓱᓂᒃ; ᐊᑐᓂᓪᓗ ᑐᓐᖓᕕᖃᕐᓗᑎᒃ ᐱᖓᓱᓂᒃ. 16ᐊᕙᑎᓕᒫᖓᓂᓕ ᑖᓗᑕᖏᑦ ᓴᓇᓯᒪᓚᐅᕐᐳᑦ ᖃᓪᓗᓈᕐᑕᑦᓯᐊᕙᖕᒥᑦ ᓵᑦᑐᒥᑦ. 17ᓇᐸᔪᓕᒫᖏᓪᓗ ᐃᑦᔪᕐᓁᑦᑐᕕᖕᒦᑦᑐᑦ ᑲᓱᕐᓯᒪᐅᑎᕗᑦ ᐃᑳᖓᔪᖃᕐᓗᑎᒃ ᓯᐅᓪᕕᕆᓂᒃ, ᓂᒃᓯᖏᓪᓗ ᓯᐅᓪᕕᕆᐅᖕᒥᓗᑎᒃ ᓇᐸᔪᖏᓪᓗ ᑐᓐᖓᕕᖃᕐᓗᑎᒃ ᑲᓐᓄᔭᓂᒃ. 18ᐃᑎᕐᑕᕐᕕᓪᓚᕆᖓᓕ ᑖᓗᑕᖃᕐᐳᖅ ᖃᓪᓗᓈᕐᑕᑦᓯᐊᕙᖕᒥᒃ ᓵᑦᑐᒥᒃ ᑐᖑᔪᕐᑐᖃᕐᓗᓂ, ᐊᐅᐸᓪᓚᕆᒃᑐᖃᕐᓗᓂᓗ, ᐊᐅᐸᕐᑐᖃᕐᓗᓂᓗ ᓄᕕᕐᓵᒃᓴᔭᐅᓪᓗᓂ, ᑖᒃᑯᐊᓗ ᑕᕐᓯᕐᓱᕐᓯᒪᓪᓗᑎᒃ ᒥᕐᓱᕐᓯᒪᔪᓂᒃ. ᑐᑭᒧᓪᓕ ᑕᑭᓂᖃᕐᐳᖅ 9ᓂᒃ ᒦᑕᓂᒃ, ᐳᕐᑐᓂᖃᕐᓗᓂᓗ 2ᒦᑕᓂᒃ, ᑕᒪᒃᑯᐊ ᑖᓗᑍᑦ ᐊᖏᓂᕆᔭᖏᑎᑐᑦ. 19ᑕᒪᒃᑯᐊᓗ ᓇᐸᑦᔪᑎᖃᕐᐳᑦ ᓯᑕᒪᓂᒃ ᓇᐸᔪᓂᒃ ᑐᓐᖓᕕᖃᕐᓗᑎᒡᓗ ᑲᓐᓄᔭᓂᒃ. ᓂᒃᓯᖏᓪᓗ, ᖄᖓᓃᑦᑐᓪᓗ ᐅᓕᒋᔭᖏᑦ, ᓇᐸᔪᕆᔭᖏᓪᓗ ᓴᓇᓯᒪᓚᐅᕐᐳᑦ ᓯᐅᓪᕕᕆᒥᑦ. 20ᑐᐱᐅᓪᓕ ᓄᖃᕐᑑᑎᖏᑕ ᐸᐅᒍᐊᖏᑦ ᐊᕙᓗᖏᑕᓗ ᓄᖃᕐᑐᕐᕕᖏᑦ ᑲᓐᓄᔭᐅᕗᑦ.
ᓴᕕᕋᔧᑦ ᐊᑐᕐᑕᐅᓚᐅᕐᑐᑦ ᐊᑕᓂᐅᑉ ᓇᔪᒐᖓᓄᑦ ᑐᐱᕐᒧᑦ
21ᒪᑯᐊ ᑕᕝᕙ ᐊᑐᕐᑕᐅᓚᐅᕐᑐᑦ ᓴᕕᕋᔧᑦ ᑐᐱᓕᐅᕐᑐᓄᑦ ᐊᑕᓂᐅᑉ ᓇᔪᒐᕆᔭᖓᓄᑦ, ᑕᕝᕙᓂ ᑖᒃᑯᐊᒃ ᐅᔭᕌᒃ ᐱᖁᔭᓂᒃ ᖁᓕᓂᒃ ᑎᑎᕋᕐᕕᐅᓯᒪᔪᑦ ᐃᓂᒃᓴᖃᕐᕕᒋᔭᖓᓂ. ᑕᒪᒃᑯᐊᓗ ᓇᓗᓁᕐᓯᒪᕗᑦ ᒨᓯᓯᐅᑉ ᐊᑐᒐᒃᓴᐅᓂᕋᓚᐅᕐᑕᖏᓐᓂᒃ ᒪᓕᒃᓯᒪᓪᓗᑎᒃ ᓕᕔᑎᒃᑯᓐᓂᑦ ᓴᓇᔭᐅᓚᐅᕐᑐᑦ ᐊᐅᓚᑦᓯᔨᖃᕐᑎᓪᓗᒋᑦ ᐃᑕᒫᕐᒥᒃ ᐂᕉᓂᐅᑉ ᐃᕐᓂᖓᓂᒃ.
22ᐱᔭᓕᐅᓪᓕ, ᐅᕆᐅᑉ ᐃᕐᓂᖓ ᕼᐅᕆᐅᑉ ᐃᕐᖑᑕᖓ, ᔫᑕᐅᑉ ᑭᖑᕚᖏᓐᓂᑦ ᐱᓯᒪᔪᖅ, ᑕᒤᓐᓂᒃ ᓴᓇᓚᐅᕐᐳᖅ ᐊᑕᓂᐅᑉ ᓴᓇᔭᐅᖁᓚᐅᕐᑕᖏᓐᓂᒃ ᒨᓯᓯᒃᑯᑦ. 23ᐃᑲᔪᕐᑎᖓᓗ, ᐅᕼᐅᓕᐊᑉ ᐊᕼᐃᓴᒪᑭᐅᑉ ᐃᕐᓂᖓ, ᑖᓐ ᑭᖑᕚᖏᓐᓂᑦ ᐱᓯᒪᔪᖅ, ᑖᓐᓇ ᓴᓇᓐᖑᐊᕐᑎᐅᓚᐅᕐᐳᖅ, ᐃᒤᓕᖓᓂᒃᓴᖏᓐᓂᒡᓗ ᐋᖅᑭᒃᓱᐃᔨᐅᓪᓗᓂ, ᓄᕕᕐᓴᕐᑎᐅᓪᓗᓂᓗ ᖃᓪᓗᓈᕐᑕᑦᓯᐊᓂᒃ ᑐᖑᔪᕐᑐᓕᖕᓂᒃ, ᐊᐅᐸᓪᓚᕆᒃᑐᓂᒡᓗ, ᐊᐅᐸᕐᑐᓂᒡᓗ ᓄᕕᕐᓵᒃᓴᓂᒃ.
24ᒎᓗᓕᒫᑦᓯᐊᑦ ᑲᑎᑦᓱᒋᑦ ᐊᑕᓂᕐᒧᑦ ᑐᓂᔭᐅᓚᐅᕐᑐᑦ ᑐᐱᕐᒧᑦ ᐃᑦᔪᕐᓁᑦᑐᒧᑦ ᐊᑐᕐᑐᒃᓴᐅᖁᓪᓗᒋᑦ ᐅᖁᒤᓐᓂᖃᓚᐅᕐᐳᑦ 1,000ᓂᒃ ᑭᓗᒍᕌᓂᒃ, ᐅᖁᒤᓐᓂᕐᓯᐅᑎᑦ ᐊᑐᕐᑕᐅᒐᔪᒃᐸᒃᑐᑦ ᒪᓕᒡᓗᒋᑦ. 25#ᒨᓯᓯ ᐂᑉᐸᖏᑦ 30:11-16.ᓯᐅᓪᕕᕇᓪᓗ ᓄᓇᓕᓕᒫᑦ ᐃᓄᖏᓐᓄᑦ ᓈᓴᕐᑕᐅᓯᒪᔪᓄᑦ ᑐᓂᔭᐅᓯᒪᔪᑦ ᐅᖁᒤᓐᓂᖃᓚᐅᕐᐳᑦ 3,430ᓂᒃ ᑭᓗᒍᕌᓂᒃ, ᐅᖁᒤᓐᓂᕐᓯᐅᑎᑦ ᐊᑐᕐᑕᐅᒐᔪᒃᐸᒃᑐᑦ ᒪᓕᒡᓗᒋᑦ. 26#ᒫᑎᐅᓯ 17:24.ᑖᒃᑯᐊ ᐃᓄᐃᑦ ᐅᓄᕐᓂᖏᑦ ᐊᑐᓂᑦ ᓈᓴᕐᑕᐅᓯᒪᔪᑦ ᐊᑦᔨᒌᒥᒃ ᐊᑭᓖᑎᑕᐅᔪᑦ ᒪᓕᒡᓗᒋᑦ ᑍᒫᒃ ᐊᑐᓂᑦ ᐊᑭᓕᐅᑎᒋᔭᐅᖁᔭᐅᔪᒥᒃ ᒪᓕᒡᓗᑎᒃ ᐊᑭᓖᓚᐅᕐᒪᑕ, ᐅᖁᒤᓐᓂᕐᓯᐅᑎᑦ ᐊᑐᕐᑕᐅᒐᔪᒃᐸᒃᑐᑦ ᒪᓕᒡᓗᒋᑦ. ᐊᖑᑎᑦ ᐊᕐᕌᒍᓖᑦ 20ᓂᒃ ᐱᒋᐊᕐᓗᒋᑦ ᐅᖓᑖᓄᑦ ᐊᕐᕌᒍᓖᑦ ᑎᑭᓪᓗᒋᑦ ᓈᓴᕐᑕᐅᓯᒪᔪᑦ ᐅᓄᕐᓂᖃᓚᐅᕐᐳᑦ 603,550ᓂᒃ. 27ᓯᐅᓪᕕᕇᓪᓕ, ᐅᖁᒤᓐᓂᖃᓚᐅᕐᐳᑦ 3,400ᓂᒃ ᑭᓗᒍᕌᓂᒃ 100ᓄᑦ ᑐᓐᖓᕕᒃᓴᓄᑦ ᐊᑐᕐᑕᐅᓚᐅᕐᑐᑦ ᑐᐱᕐᒧᑦ ᐃᑦᔪᕐᓁᑦᑐᒧᑦ ᑖᓗᑕᕆᔭᖏᓐᓄᓪᓗ, ᑐᓐᖓᕕᒡᓗ ᐊᑕᐅᓯᖅ ᐊᑐᓂᑦ ᐅᖁᒤᓐᓂᖃᕐᐳᖅ 34ᓂᒃ ᑭᓗᒍᕌᓂᒃ. 28ᐊᒥᐊᒃᑯᒋᔭᖏᓪᓗ ᓯᐅᓪᕕᕇᑦ 30ᓂᒃ ᑭᓗᒍᕌᓂᒃ ᐅᖁᒤᓐᓂᓖᑦ ᐸᔧᓕᐅᓪ ᓴᓇᓚᐅᕆᕔᑦ ᕿᕋᑦᑕᖅᑯᑎᒃᓴᐅᓪᓗᑎᒃ, ᓇᐸᔪᓄᓪᓗ ᓂᕕᓐᖓᕕᐅᔪᓄᑦ ᓂᒃᓯᒋᔭᐅᓪᓗᑎᒃ, ᐅᓕᒋᔭᐅᔫᓪᓗ ᖃᓕᐊᕈᑕᖓᑕ ᐋᖅᑭᒃᓯᒪᐅᑎᒋᓪᓗᓂᒋᑦ. 29ᑲᓐᓄᔧᓪᓕ ᐊᑕᓂᕐᒧᑦ ᑐᓂᕐᕈᑎᒋᔭᐅᓚᐅᕐᑐᑦ ᐅᖁᒤᓐᓂᖃᕐᐳᑦ 2,425ᓂᒃ ᑭᓗᒍᕌᓂᒃ. 30ᑕᒪᒃᑯᓄᖓᓗ ᑐᐱᐅᑉ ᐃᑎᕐᑕᕐᕕᖓᑕ ᑐᓐᖓᕕᒃᓴᖏᓐᓂᒃ ᓴᓇᓚᐅᕐᐳᖅ ᐊᑕᓂᐅᑉ ᓇᔪᒐᒃᓴᖓᓄᑦ, ᑐᓂᕐᕈᓯᕐᕕᒡᓗ ᑲᓐᓄᔭᖅ ᓴᒡᕙᓯᒡᕕᒋᔭᖏᓪᓗ ᑲᓐᓄᔭᐅᒋᓪᓗᑎᒃ, ᑐᓂᕐᕈᓯᕐᕕᐅᓪᓗ ᓱᓇᑐᐃᓐᓇᒃᓴᓕᒫᖏᓐᓄᑦ ᐊᑐᓚᐅᕆᕔᑦ. 31ᐊᒻᒪᑦᑕᐅᖅ ᐊᕙᓗᓕᒫᖏᑕ ᓇᐸᔪᖏᓐᓄᑦ ᑐᓐᖓᕖᑦ; ᐊᕙᓗᖏᑕᓗ ᐃᑎᕐᑕᕐᕕᖏᓐᓄᑦ, ᑐᐱᐅᓪᓗ ᓄᖃᕐᑑᑎᖏᑕ ᐸᐅᒍᐊᒃᓴᖏᓐᓄᑦ ᑐᐱᐅᓪᓗ ᐊᕙᓗᓕᒫᖏᑕ ᓄᖃᕐᑑᓯᕐᕕᓕᒫᖏᓐᓄᑦ ᐊᑐᕐᑕᐅᓚᐅᕐᐳᑦ.
Currently Selected:
ᒨᓯᓯ ᐂᑉᐸᖏᑦ 38: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
