ᒨᓯᓯ ᐂᑉᐸᖏᑦ 39
39
ᑐᓂᕐᕈᓯᕐᑎᑦᓯᔩᑦ ᐊᓐᓄᕌᕆᔭᕆᐊᖃᕐᑕᖏᑕ ᓴᓇᔭᐅᓂᖏᑦ
ᒨᓯᓯ ᐂᑉᐸᖏᑦ 28:1-14
1ᐊᓐᓄᕌᓕᐅᕐᑐᓪᓗ ᐃᑦᔪᕐᓁᑦᑐᒃᓴᓂᒃ ᐊᓐᓄᕌᓕᐅᓚᐅᕐᐳᑦ ᑐᖑᔪᕐᑐᒥᒡᓗ ᐊᐅᐸᓪᓚᕆᒃᑐᒥᒡᓗ, ᓄᕕᕐᓵᒃᓴᒥᒡᓗ ᐊᐅᐸᕐᑐᒥᒃ ᑐᓂᕐᕈᓯᕐᑎᑦᓯᔨᓄᑦ ᐊᑐᕐᑕᐅᖃᑦᑕᕐᑐᒃᓴᓂᒃ ᐃᑦᔪᕐᓁᑦᑐᕕᖕᒥ ᐱᓇᓱᐊᕆᐊᓕᑐᐊᕈᑎᒃ. ᐂᕉᓂ ᐊᓐᓄᕌᓕᐅᕐᑕᐅᓚᐅᕐᐳᖅ ᑐᓂᕐᕈᓯᕐᑎᑦᓯᔨᓯᐅᑎᓂᒃ ᐊᓐᓄᕌᓂᒃ, ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ.
2ᓴᒡᕕᖕᒥᐅᑕᒥᒃ ᐊᓐᓄᕌᓕᐅᕐᐳᑦ ᑍᔭᐅᔪᒥᒃ ᐃᐹᑦᒥᒃ ᖃᓪᓗᓈᕐᑕᑦᓯᐊᕙᖕᒥᒃ; ᑐᖑᔪᕐᑐᒥᒃ, ᐊᐅᐸᓪᓚᕆᒃᑐᒥᒃ, ᓄᕕᕐᓵᒃᓴᒥᒡᓗ ᐊᐅᐸᕐᑐᒥᒃ; ᒎᓗᒥᒡᓗ ᐃᕙᓗᖃᕐᓗᓂ. 3ᒎᓗᓗ ᓵᑦᑐᔮᖅ ᑲᐅᒐᕐᑕᐅᓪᓗᓂ ᖁᐱᐅᕋᕐᑕᐅᕗᖅ ᐃᕙᓗᒃᓴᓕᐊᕆᔭᐅᓪᓗᓂ ᓴᓇᑦᔪᑕᐅᖁᓪᓗᒍ ᖃᓪᓗᓈᕐᑕᒥᒃ ᓵᑦᑐᒥᒃ ᑕᕐᓴᖃᕐᓗᓂ ᑐᖑᔪᕐᑐᒥᒃ, ᐊᐅᐸᓪᓚᕆᒃᑐᒥ, ᐊᐅᐸᕐᑐᒥᒡᓗ ᓄᕕᕐᓵᒃᓴᒥᒃ. 4ᓴᓇᔭᐅᕗᕐᓗ ᓴᒡᕕᖕᒥᐅᑕᒃᓴᖅ ᑐᐃᖓᒍᑦ ᐅᔭᑦᓯᐅᑕᐅᔭᖃᕐᓗᓂ ᐃᒡᓗᒃᑐᑦ ᑭᐊᑎᒥᐅᑕᐅᓪᓗᓂ ᑍᔭᐅᔪᖅ ᐃᐹᑦᒥᒃ ᓴᓂᕌᒍᓪᓗ ᕿᓚᒡᕕᖃᕐᓗᓂ, ᐊᐅᓚᑲᑕᑦᔧᒃᑯᑎᒃᓴᖓᓂᒃ. 5ᑕᒪᑐᒪᓗ ᖃᓪᓗᓈᕐᑕᐅᑉ ᐃᓚᖓᓂᒃ ᓄᕕᕐᓴᑦᑎᐊᕐᓯᒪᔪᒥᒃ ᑕᑦᓯᕈᑎᒃᓴᓕᐅᕐᐳᑦ, ᑕᒪᒃᑯᐊᓗ ᑕᕝᕗᖓ ᓴᒡᕕᖕᒥᐅᑕᒧᑦ ᐃᐹᑦᒧᑦ ᐃᓚᒋᓕᐅᑎᓯᒪᕗᑦ ᐊᑕᐅᓯᐅᓕᖅᑲᖓᓗᓂ ᐊᓐᓄᕌᕆᔭᐅᖁᓪᓗᒍ, ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ. 6ᐅᔭᕋᖕᓂᒃ ᐱᐅᔪᐊᓗᖕᓂᒃ ᓴᓇᒋᕗᑦ ᑖᒃᑯᐊᓗ ᒎᓗᓂᒃ ᐊᒃᑐᐊᓂᖏᑦ ᓇᖓᕐᑎᕐᓯᒪᓪᓗᑎᒃ; ᑖᒃᑯᐊᓗ ᓴᓇᓐᖑᐊᑦᓯᐊᕐᓯᒪᓪᓗᑎᒃ ᐃᓴᕆᐊᓕᐅᑉ ᐃᕐᓂᖏᑕ ᐊᑎᖏᑦ 12 ᑕᕝᕘᓇ ᐅᔭᕋᒃᑯᑦ ᑎᑎᕋᕐᑕᐅᓯᒪᕗᑦ. 7ᓴᒡᕕᖕᒥᐅᑕᕐᓗ ᐅᔭᑦᓯᐅᑕᐅᔭᖓᖕᓄᑦ ᐃᓚᓕᐅᑎᓯᒪᕗᖅ ᓴᒡᕕᖕᒥᐅᑕᕐᒧᑦ ᐃᐹᑦᑎᒥᒃ ᐊᑎᓕᖕᒧᑦ ᐃᓴᕆᐊᓕᐅᑉ ᑭᖑᕚᖏᓐᓂᒃ 12ᓂᒃ ᐃᖅᑲᐅᒪᑦᔪᑎᒃᓴᐅᖁᓪᓗᒍ, ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ.
ᑐᓂᕐᕈᓯᕐᑎᑦᓯᔩᑦ ᓴᒡᕕᖕᒥᐅᑕᒃᓴᖏᑕ ᓴᓇᔭᐅᓂᖏᑦ
ᒨᓯᓯ ᐂᑉᐸᖏᑦ 28:15-30
8ᓴᒡᕕᖕᒥᐅᑕᓕᐅᕆᕗᖅ ᓴᓇᓯᒪᑦᓯᐊᕐᑐᒥᒃ ᑭᐊᑎᒃᓴᐅᔪᑎᑐᑦ ᓴᓇᓯᒪᓪᓗᓂ ᐃᐹᑦᑎᒥᒃ ᐊᑎᓕᒃᑎᑐᑦ ᓴᓇᔭᐅᓯᒪᓪᓗᓂ ᒎᓗᒥᑦ, ᑐᖑᔪᕐᑐᒥᓪᓗ ᐊᐅᐸᓪᓚᕆᒃᑐᒥᓪᓗ ᓄᕕᕐᓵᒃᓴᒥᓪᓗ ᐊᐅᐸᕐᑐᒥᑦ, ᖃᓪᓗᓈᕐᑕᑦᓯᐊᒥᒡᓗ ᓵᑦᑐᒥᑦ ᓴᓇᓯᒪᓗᓂ ᑍᒫᒃ ᓴᓇᓯᒪᕗᖅ. 9ᑖᓐᓇᓗ ᓯᒃᑭᑕᓪᓗᐊᖑᕗᖅ; ᑕᐱᑕᕇᖑᓪᓗᓂ, ᑕᑭᓂᖃᕐᐳᖅ ᑐᑭᒧᑦ ᐊᒡᒊᑦ ᐃᓵᒡᓗᒋᑦ ᑕᑭᓂᖏᑎᑐᑦ ᓴᓂᒧᑐᓂᖃᕐᐳᕐᓗ ᑍᒫᑦᓮᓐᓇᖅ. 10ᑕᕝᕙᓂᓗ ᓴᒡᕕᖕᒥᐅᑕᕐᒥ ᓯᑕᒪᐅᓕᖅᑲᖓᔪᓂᒃ ᑐᑭᓕᕇᓂᒃ ᐅᔭᕋᖕᓂᒃ ᐱᐅᓂᕐᐹᓂᒃ ᐃᓂᒃᓴᓕᐅᕐᓯᒪᕗᑦ; ᓯᕗᓪᓕᕐᐹᒥ ᑐᑭᓕᕇᓂ ᐃᓕᓯᒪᔪᖃᕐᐳᖅ ᐅᔭᕋᖕᓂᒃ ᐃᒤᑦᑐᓂᒃ ᕉᐱᒥᒃ, ᑑᕐᐸᑦᔨᒥᒃ, ᒑᕐᓂᑎᒥᒡᓗ; 11ᐂᑉᐸᖓᓂ ᑐᑭᓕᕇᓂ ᐃᓕᓯᒪᔪᖃᕆᕗᖅ ᐃᒤᑦᑐᓂᒃ ᐃᒪᕈᓪᒥᒃ, ᓴᐰᕆᒥᒃ, ᑍᒪᓐᒥᒡᓗ; 12ᐱᖓᔪᖓᓐᓂᓕ ᑐᑭᓕᕇᓂ ᐃᓕᓯᒪᔪᖃᕆᕗᖅ ᐃᒤᑦᑐᓂᒃ ᑑᑯᐃᓯᒥᒃ, ᐊᒡᒍᐃᑦᒥᒃ, ᐊᒥᓮᑎᒥᒡᓗ; 13ᓯᑕᒪᖓᓐᓂ ᑐᑭᓕᕇᓂ ᐃᓕᓯᒪᔪᖃᕆᕗᖅ ᐃᒤᑦᑐᓂᒃ ᐅᔭᕋᖕᓂᒃ ᐊᑭᑐᔪᓂᒃ ᐱᕅᐅᓪᒥᒃ, ᑳᕐᓃᓕᐊᓐᒥᒃ, ᔮᔅᐱᕆᒥᒡᓗ. ᑕᒪᒃᑯᐊᓗ ᐃᓕᓯᒪᕗᑦ ᒎᓗᓂᒃ ᑐᓐᖓᕕᖃᕐᓗᑎᒃ. 14ᑖᒃᑯᐊᓗ ᐅᔭᕅᑦ 12ᐃᑦ ᐊᑐᓂᑦ ᔧᑰᑉ ᐃᕐᓂᖏᑕ ᐊᑎᖏᓐᓂᒃ ᐊᑎᓕᐅᕐᕕᒋᓯᒪᕗᑦ, ᐃᓴᕆᐊᓕᒥᐅᑦ ᑭᖑᕚᕇᖕᓂᖏᓐᓂᒃ ᐃᖅᑲᐅᒪᑦᔪᑎᒃᓴᐅᖁᓪᓗᒋᑦ. 15ᑖᓐᓇᓗ ᓴᒡᕕᖕᒥᐅᑕᖅ ᒎᓗᓂᒃ ᐃᓚᓯᒪᖏᑦᑐᓂᒃ ᐊᕐᓵᕐᑑᔭᖃᕐᐳᖅ, ᐊᒃᓱᓈᑎᑐᑦ ᕿᐱᓯᒪᔪᓂᒃ. 16ᓴᒡᕕᖕᒥᐅᑕᕐᓗ ᖁᓕᖔᖓᒍᑦ ᓂᕕᖓᑦᔪᑎᓕᐅᕐᓯᒪᕗᖅ ᒎᓘᖕᓂᒃ ᓄᕐᓗᓖᖕᓂᒃ#39:16 ᓄᕐᓗᓖᖕᓂᒃ ᐅᕝᕙᓗ ᐳᑐᓖᖕᓂᒃ ᒪᕐᕉᖕᓂᒃ, ᐊᑐᓂᑦ ᖁᓛᓃᑦᑑᑉ ᑎᕆᖅᑯᖏᑎᒍᒃ. 17ᑕᕝᕗᖓᓗ ᓄᕐᓗᓖᖕᓄᑦ ᒪᕐᕉᖕᓄᑦ ᐊᕐᓵᕐᑑᔮᖕᓂᒃ#39:17 ᐊᕐᓵᕐᑑᔭᖅ ᐅᕝᕙᓗ ᕿᓚᐅᕐᖑᔭᖅ ᐃᓕᓯᒪᔪᖃᕐᐳᖅ ᓂᕕᖓᑦᔪᑎᒃᓴᖏᓐᓂᒃ; 18ᓂᕕᖓᑦᔪᑎᖏᒃᑕᓕ ᐃᓱᖏᒃ ᒎᓗᒥᒃ ᑐᓐᖓᕕᓕᖕᒧᑦ ᐊᑦᓱᖏᕐᓯᒪᕘᒃ ᐊᑐᓂᑦ, ᑖᑦᓱᒪᓗ ᑭᐊᑎᐅᑉ ᐃᐹᑎᒥᒃ ᐊᑎᓕᐅᑉ ᑐᐃᖏᖕᓄᑦ ᓯᕗᕌᓃᑦᑑᖕᓄᑦ ᐊᑦᓱᖏᕐᓯᒪᕘᒃ. 19ᓄᕐᓗᓖᖕᓂᒃ#39:19 ᓄᕐᓗᓖᖕᓂᒃ ᐅᕝᕙᓗ ᐳᑐᓖᖕᓂᒃ ᒪᕐᕉᖕᓂᒃ ᒎᓘᖕᓂᒃ ᓴᓇᒋᕗᑦ ᑖᑦᓱᒪ ᓴᒡᕕᖕᒥᐅᑕᐅᑉ ᐊᑖᓄᑦ ᐃᓗᖔᖓᓄᑦ ᐃᓕᓯᒪᓂᐊᕐᑑᖕᓂᒃ, ᑕᕝᕗᖓ ᑭᐊᑎᒧᑦ ᐃᐹᑦᒥᒃ ᐊᑎᓕᖕᒧᑦ ᐊᑦᑐᖏᕐᓯᒪᑦᔪᑎᐅᓂᐊᕐᑐᒥᒃ. 20ᓱᓕᓕ ᒪᕐᕉᖕᓂᒃ ᓄᕐᓗᓖᖕᓂᒃ ᒎᓘᖕᓂᒃ ᓴᓇᒋᕗᑦ ᑖᑦᓱᒪᓗ ᓴᒡᕕᖕᒥᐅᑕᐅᑉ ᐊᑖᓄᑦ ᐃᓕᕚᑦ ᑕᕝᕗᖓ ᑭᐊᑎᒧᑦ ᐃᐹᑦᒧᑦ ᐊᑦᓱᖏᕐᓯᒪᐅᑎᐅᖁᓪᓗᒋᒃ, ᖁᓛᓃᑦᑑᑉ ᐅᔭᑦᓯᐅᑎᖏᒃᑕ ᐃᓚᒋᓪᓗᓂᒋᒃ ᑕᕝᕗᖓ ᑭᐅᑎᐅᑉ ᐃᐹᑎᐅᑉ ᐅᔭᑦᓯᐅᑎᖏᖕᓄᑦ ᐃᓚᓕᐅᑎᓯᒪᓪᓗᒋᒃ ᓴᓇᓯᒪᑦᓯᐊᕐᓗᑎᒃ. 21ᓴᒡᕕᖕᒥᐅᑕᖅ ᓄᕐᓗᖏᑎᒍᑦ ᕿᓚᒃᓯᒪᕗᖅ ᑭᐊᑎᐅᑉ ᐃᐹᑎᐅᑉ ᓄᕐᓗᖏᓐᓄᑦ ᑐᖑᔪᕐᑐᒥᒃ ᕿᓚᕈᑎᖃᕐᓗᑎᒃ, ᑖᓐᓇ ᓴᒡᕕᖕᒥᐅᑕᖅ ᑭᐊᑎᒥᑦ ᐃᐹᑎᒥᒃ ᐊᑎᓕᖕᒥᑦ ᐲᖁᓇᒍ; ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ.
ᑐᓂᕐᕈᓯᕐᑎᑦᓯᔩᑦ ᐊᓐᓄᕌᕆᔭᕆᐊᖃᕐᒥᔭᖏᑕ ᐃᓚᖏᓐᓂᒃ ᓴᓇᓂᖏᑦ
ᒨᓯᓯ ᐂᑉᐸᖏᑦ 28:31-43
22ᐅᕕᓂᕈᖅ ᑭᐊᑎᐅᑉ ᐃᐹᑎᐅᑉ ᐃᓗᐊᓃᑦᑐᖅ ᓴᓇᓯᒪᕗᖅ ᓄᕕᕐᓵᒃᓴᒥᑦ ᑐᖑᔪᕐᑍᓐᓇᕐᒥᑦ. 23ᑖᓐᓇᓕ ᐊᖕᒪᕐᓯᒪᕗᖅ ᓂᐊᖂᑉ ᓄᐃᕕᒃᓴᖓᓂᒃ, ᑕᒪᓐᓇᓗ ᐊᖕᒪᔪᖓᑕ ᑭᒡᓕᖓ ᑕᐱᖅᑯᐊᕇᒡᓗᓂ ᐋᖅᑭᒃᓯᒪᕗᖅ ᐊᓕᔭᑦᑑᖁᓇᒍ. 24ᑖᑦᓱᒪ ᓄᐃᔭᒐᐅᑉ ᐊᑖᒍᑦ ᐸᐅᕐᖓᓐᖑᐊᓕᐅᕐᓯᒪᕗᖅ ᐹᒻᒥᕐᒍᓁᑎᒥᒃ ᑍᔭᐅᔪᑎᑐᑦ ᐃᒤᑦᑐᓂᒃ ᑕᕐᓴᖃᕐᓗᒍ ᑐᖑᔪᕐᑐᓂᒃ ᐊᐅᐸᓪᓚᕆᒃᑐᓂᒃ ᓄᕕᕐᓵᒃᓴᓂᒡᓗ ᐊᐅᐸᕐᑐᓂᒃ ᖃᓪᓗᓈᕐᑕᑦᓯᐊᕙᖕᓂᒃ. 25ᑕᒪᒃᑯᐊᓗ ᐊᑯᓐᓂᖏᑎᒍᑦ ᒎᓗᓂᒃ ᓯᕙᓂᐅᑎᑯᓗᓕᐅᕐᐳᑦ, ᑕᒪᒃᑯᐊ ᓯᕙᓂᐅᑎᑯᓗᐃᑦ ᒎᓗᐃᑦ ᐸᒻᒥᕐᒍᓁᑎᓐᖑᐊᓪᓗ ᑕᕐᓴᓕᐊᕆᓯᒪᔪᑦ ᑖᑦᓱᒪ ᓄᐃᔭᒐᐅᑉ ᑭᒡᓕᓕᒫᖓᓃᐳᑦ; 26ᑕᒪᒃᑯᐊ ᓯᕙᓂᐅᑎᑯᓗᐃᑦ ᒎᓗᐃᑦ ᐸᒻᒥᕐᒍᓁᑎᓐᖑᐊᓪᓗ ᑕᕐᓴᓕᐊᕆᓯᒪᔪᑦ ᑖᑦᓱᒪ ᓄᐃᔭᒐᐅᑉ ᑭᒡᓕᓕᒫᖓᓃᐳᑦ ᐊᑐᒐᒃᓴᐅᖁᓪᓗᒍ ᐱᓇᓱᐊᕆᐊᕐᑐᕐᑐᓄᑦ; ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ.
27ᐅᕕᓂᕈᕐᒥᒃᑕᐅᖅ ᓴᓇᒋᕗᑦ ᐂᕉᓂᒧᑦ ᐃᕐᓂᖏᓐᓄᓪᓗ ᐱᒋᔭᐅᓂᐊᕐᑐᓂᒃ. 28ᓂᐊᑯᕐᒧᑦ ᐃᒻᒧᑎᒥᒃ ᓇᓴᐅᔮᕐᑐᒥᒃ ᓴᓇᒋᕗᑦ, ᓇᓴᕐᒥᒡᓗ, ᖃᓪᓗᓈᕐᑕᓂᒡᓗ ᓵᑦᑐᓂᒃ ᖃᕐᓕᒃᓴᖏᓐᓂᒃ. 29ᑕᑦᓯᕈᑎᒃᓴᖏᓪᓗ ᖃᓪᓗᓈᕐᑕᑦᓯᐊᕔᑦ ᓵᑦᑐᑦ ᓴᓇᓯᒪᕗᑦ ᑐᖑᔪᕐᑐᒥᒃ ᐊᐅᐸᓪᓚᕆᒃᑐᒥᓪᓗ ᐊᐅᐸᕐᑐᓂᒡᓗ ᓄᕕᕐᓵᒃᓴᓂᑦ, ᑕᕐᓯᕐᑐᕐᓯᒪᓗᓂ ᐱᐅᓴᕐᓯᒪᕗᖅ ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ. 30ᖃᐅᕐᒥᐅᑕᒃᓴᒥᒃ ᑕᑯᒥᓇᕐᑐᒥᒃ ᓴᓇᒋᕗᑦ, ᐃᑦᔪᕐᓁᑦᑐᒥᒃ ᓇᓗᓁᒃᑯᑕᐅᔪᒃᓴᒥᒃ ᑐᓂᓯᒪᓂᕐᒧᑦ, ᒎᓗᒥᒃ ᐊᓯᐊᓂᒃ ᐃᓚᖃᖏᑦᑐᒥᒃ, ᑕᕝᕘᓇᓗ ᑎᑎᕋᕐᕕᒋᓯᒪᓪᓗᒍ “ᐊᑕᓂᕐᒧᑦ ᑐᓂᔭᐅᓯᒪᔪᖅ.” 31ᓂᐊᑯᕐᒧᑦ ᐃᒻᒧᑎ ᓇᓴᐅᔮᕐᑑᑉ ᓯᕗᕌᓃᑦᑐᒧᑦ ᐃᓕᕚᑦ ᑐᖑᔪᕐᑐᒥᒃ ᕿᓚᕈᑎᖃᕐᑎᓪᓗᒍ ᓂᐊᖂᑉ ᓯᕗᕌᓃᖁᓪᓗᒍ, ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ.
ᓱᓇᑐᐃᓐᓇᒃᓮᑦ ᓴᓇᔭᐅᔭᕆᐊᓖᑦ ᐱᔭᕇᕐᑕᐅᓂᖏᑦ
ᒨᓯᓯ ᐂᑉᐸᖏᑦ 35:10-19
32ᑕᒪᕐᒥᑦᓯᐊᖅ ᓴᓇᔭᐅᔭᕆᐊᓖᑦ ᓴᓇᔭᐅᓪᓗᑎᒃ ᐱᔭᕇᕐᑕᐅᑍᓐᓇᕐᐳᑦ ᑐᐱᐅᑉ ᐃᓗᐊᓃᑦᑐᒃᓴᑦ. ᐃᓴᕆᐊᓕᒥᐅᑦ ᑕᒤᓐᓂᒃ ᓴᓇᓚᐅᕐᐳᑦ ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ. 33ᑐᐱᕐᓗ ᒨᓯᓯᒧᑦ ᐋᑉᐹᑦ ᓱᓇᑐᐃᓐᓇᒃᓴᓕᒫᖏᓪᓗ, ᓂᒃᓯᖏᓪᓗ, ᓯᓇᕐᔪᒃᓯᐅᑎᖏᓪᓗ, ᐃᑳᖓᔪᖏᓪᓗ, ᓇᐸᔪᖏᓪᓗ, ᓇᐸᔪᖏᑕᓗ ᑐᓐᖓᕕᒃᓴᖏᑦ; 34ᑐᐱᐅᓪᓗ ᓯᓚᑉᐱᐊᒃᓴᖓ ᓰᐱᐅᑉ ᐊᖑᓴᓪᓗᖓᑕ ᐊᒥᖓ ᕿᑐᒻᒪᒃᓴᕐᓯᒪᔪᖅ ᐊᐅᐸᕐᑐᖅ; ᓯᓚᑉᐱᐊᒃᓴᕐᓗ ᓱᓕ ᐊᒥᖅ ᕿᑐᒻᒪᒃᓴᕐᓯᒪᔪᖅ; ᑖᓗᑕᒃᓮᓪᓗ; 35ᐊᖏᖃᑎᒌᖕᓂᐅᓪᓗ ᐃᒃᓯᕐᕕᖁᑎᒃᓴᖓ ᐅᔭᕌᖕᓂᒃ ᑎᑎᕋᕐᕕᒋᓯᒪᔫᖕᓂᒃ ᐃᓗᓕᓕᒃ, ᓇᐸᔪᒃᓴᖏᓪᓗ, ᒪᑐᒃᓴᖓᓗ; 36ᓵᓗ, ᓂᐅᒃᓴᖏᓪᓗ, ᓱᓇᑐᐃᓐᓇᒃᓴᓕᒫᖏᓪᓗ, ᓂᐊᑰᔭᓪᓗ ᑐᓂᔭᐅᔪᒃᓴᑦ ᒎᑎᒧᑦ; 37ᓇᓂᕈᐊᓪᓗ ᑐᓐᖓᕕᒃᓴᖏᑦ ᒎᓗᐃᓐᓁᑦ, ᖃᐅᒻᒪᖅᑯᑎᒃᓮᓪᓗ, ᓱᓇᑐᐃᓐᓇᒃᓴᓕᒫᖏᓪᓗ ᑕᒪᕐᒥᒃ; ᓇᓂᕈᐊᒃᓮᓪᓗ, ᓇᓂᕈᐊᓪᓗ ᐅᕐᓱᒃᓴᖏᑦ; 38ᑐᓂᕐᕈᓯᕐᕕᒃᓴᖅ ᒎᓗ; ᓇᐹᕐᑑᓪᓗ ᐅᕐᓱᖏᑦ ᒥᖑᐊᕐᓯᒍᑎᒃᓮᑦ; ᑎᐱᑦᓯᐊᕆᒃᑐᓪᓗ ᐃᓯᕐᓗᐊᕐᓂᑎᑦᓯᒍᑎᒃᓮᑦ; ᐃᑎᕐᑕᕐᕕᖓᑕᓗ ᑖᓗᑕᒃᓴᖓ, ᑐᐱᐅᓪᓗ ᒪᑐᒃᓴᖓ; 39ᑐᓂᕐᕈᓯᕐᕕᒃᓗ ᑲᓐᓄᔭᖅ ᐃᑯᐊᓚᑦᓯᕕᒃᓴᖏᓪᓗ ᐃᑳᖓᔪᑦ ᑲᓐᓄᔭᐃᑦ, ᓂᐅᒃᓴᖏᓪᓗ, ᐊᓯᖏᓪᓗ ᓱᓇᑐᐃᓐᓇᒃᓴᓕᒫᖏᑦ, ᐴᒍᑕᕐᓗ ᐅᐊᓴᕐᕕᒃᓴᖅ ᐊᓪᓕᕋᒃᓴᖓᓗ; 40ᑐᐱᐅᓪᓗ ᓯᓚᓪᓕᐅᔭᖓᑕ ᐊᕙᓗᒃᓴᖏᑦ ᓇᐸᔪᒃᓴᖏᑦ ᑐᓐᖓᕕᒃᓴᖏᓪᓗ; ᑐᐱᐅᓪᓗ ᓯᓚᓪᓕᐅᔭᖓᑕ ᐃᑎᕐᑕᕐᕕᖓᑕ ᑖᓗᑕᒃᓴᖏᑦ ᑐᐱᐅᓪᓗ ᓄᖃᕐᑑᑎᖏᑕ ᐸᐅᒍᐊᒃᓴᖏᑦ ᓄᖃᕐᑑᑎᒃᓴᖏᓪᓗ; ᑐᐱᐅᓪᓗ ᓯᓚᓪᓕᐅᔭᖓᑕ ᓄᖃᕐᑑᑎᖏᑕ ᐸᐅᒍᐊᒃᓴᖏᑦ ᓄᖃᕐᑑᑎᒃᓴᖏᓪᓗ; 41ᑐᓂᕐᕈᓯᕐᑎᑦᓯᔩᓪᓗ ᐊᓐᓄᕌᒃᓴᖏᑦ ᐃᑦᔪᕐᓁᑦᑐᑦ ᑐᓂᕐᕈᓯᕐᑎᑦᓯᔨᐅᑉ ᐊᑐᖃᑦᑕᕆᐊᓕᖏᑦ ᐱᓇᓱᐊᕐᓂᐊᓕᕅᒍᑎᒃ ᐃᑦᔪᕐᓁᑦᑐᕕᖕᒥ, ᐂᕉᓂᐅᓪᓗ ᐃᕐᓂᖏᑕᓗ ᐊᓐᓄᕌᒃᓴᖏᑦ ᐃᑦᔪᕐᓁᑦᑐᑦ ᑐᓂᕐᕈᓯᕐᑎᑦᓯᔨᓯᐅᑎᒃᓮᑦ. 42ᐃᓴᕆᐊᓕᒥᐅᓪᓗ ᓴᓇᓚᐅᕐᐳᑦ ᑕᒤᓐᓂᒃ ᓴᓇᔭᐅᔭᕆᐊᓕᖕᓂᒃ ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ. 43ᒨᓯᓯᐅᓪᓗ ᑕᒪᕐᒥᒃ ᖃᐅᔨᓴᕐᐰᑦ ᑕᑯᓪᓗᒋᓪᓗ ᑍᒫᑦᓯᐊᖅ ᓴᓇᔭᐅᓯᒪᖕᒪᑕ ᐊᑕᓂᐅᑉ ᐱᖁᔨᓂᕆᓚᐅᕐᑕᖓᑐᑦ. ᑍᒤᒻᒪᑦ ᑕᕝᕙ ᒨᓯᓯᐅᑉ ᓮᒻᒪᕐᑎᑉᐰᑦ.
Currently Selected:
ᒨᓯᓯ ᐂᑉᐸᖏᑦ 39: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
