ᒨᓯᓯ ᓯᕗᓪᓖᑦ 23
23
ᓵᕋᐅᑉ ᑐᖁᓂᖓ ᐂᑉᕋᕼᐋᒻᓗ ᐃᓗᕕᕐᕕᒃᓴᒥᒃ ᓂᐅᕕᕐᖕᓂᖓ
1ᓵᕋᓗ ᐃᓅᓚᐅᖅᐳᖅ ᐊᕐᕌᒍᓂᒃ 127ᓂᒃ; ᑖᒃᑯᐊ ᑕᕝᕙ ᓵᕋᐅᑉ ᐊᕐᕌᒍᒋᓚᐅᖅᑕᖏᑦ. 2ᓵᕋᓗ ᑐᖁᓚᐅᖅᐳᖅ ᓄᓇᒥ ᑭᕆᐊᑦ-ᐊᕋᐸᒥ (ᑍᔭᐅᔪᖅ ᕼᐃᐸᕋᓐᒥᒃ) ᑬᓇᓂᒥ, ᐂᑉᕋᕼᐋᒻᓗ ᐅᐸᒃᓗᒍ ᕿᒃᓵᒍᑎᒋᕚ ᓵᕋ ᕿᐊᑦᔪᑎᒋᓪᓗᒍ.
3ᐂᑉᕋᕼᐋᒻᓗ ᒪᑭᑉᐳᖅ ᑐᖁᔨᐊᓂ ᕿᒪᒡᓗᒍ, ᕼᐃᑍᑎᓄᐊᖅᐳᖅ, ᐅᖃᑎᓪᓗᒋᓪᓗ, 4#ᐄᑉᕈᐃᓄᑦ 11:9,13; ᐋᐴᓯᑕᓖᑦ 7:16.“ᑕᒫᓂ ᓂᐅᕐᕈᐊᖑᒐᒪ ᓄᓇᖃᖅᑐᑐᖃᐅᓇᖓᓗ ᓄᓇᑦᓯᓐᓂ; ᓂᐅᕕᕈᓐᓇᖅᑎᑕᐅᔪᒪᕗᖓ ᓄᓇᒥᒃ ᐃᓗᕕᕐᕕᒃᓴᒥᒃ, ᐃᓗᕕᖅᓯᔪᓐᓇᖁᓪᓗᖓ ᑐᖁᔨᐊᕆᓯᒪᔭᓐᓂᒃ.”
5ᕼᐃᑍᑎᒥᐅᓪᓗ ᐂᑉᕋᕼᐋᒻ ᑭᐅᕚᑦ, ᐅᖃᐅᑎᓪᓗᒍ, 6“ᐅᕙᑦᑎᓐᓂᒃ ᓈᓚᓚᐅᕆᑦ ᐊᖓᔪᖅᑳᒃ; ᖃᐅᔨᒪᒐᑦᑕ ᐱᔪᓐᓇᕐᖕᓂᖃᒻᒪᕆᒡᓗᑎᑦ ᑕᓯᐅᖅᑎᐅᒐᕕᑦ; ᑐᖁᔨᐊᑦ ᐃᓗᕕᓚᐅᕈᒃ ᐃᓗᕕᕐᕕᑦᑎᓐᓄᑦ ᐱᐅᓂᖅᐹᒧᑦ; ᓇᓪᓕᑐᐃᓐᓇᕗᑦ ᐊᓂᕈᓱᓐᖏᓚᖅ ᐃᓗᕕᕐᕕᒃᓴᒥᓂᒃ ᐃᓕᖕᓄᑦ, ᓇᓪᓕᐊᓪᓘᓐᓃᑦ ᐃᓗᕕᖅᑍᓕᑎᑦᓯᓂᐊᓐᖏᓚᖅ ᑐᖁᔨᐊᕐᖕᓂᒃ.”
7ᐂᑉᕋᕼᐋᒻᓗ ᒪᑭᓪᓗᓂ ᐅᑯᕗᖅ ᕼᐃᑍᑎᓄᑦ, ᑕᒫᓂ ᓄᓇᖃᖅᑐᓄᑦ. 8ᐅᖃᐅᑎᓪᓗᒋᓪᓗ, “ᐃᓗᕕᖅᓯᔪᓐᓇᖅᑎᑦᓯᒍᑦᓯ ᑐᖁᖓᔨᐊᓐᓂᒃ ᑕᑯᓐᓇᕈᓐᓃᕐᖕᓂᐊᕋᒃᑯ, ᐱᖁᔨᔪᓐᓇᖅᑎᓚᐅᖅᓯᐅᒃ ᐃᐸᕋᓐ ᔪᕼᐊᕆᐅᑉ ᐃᕐᖕᓂᖓ. 9ᐅᕙᓐᓄᑦ ᑐᓂᓯᖁᓪᓗᒍ ᒪᒃ-ᐲᓚᒥᒃ ᐊᑎᓕᖕᒥᒃ ᕾᕈᓱᖕᒥᒃ, ᑖᑦᓱᒪ ᐱᒋᖕᒪᒍ; ᐱᕈᖅᓰᕕᖁᑎᖓᑕ ᑭᒡᓕᖓᑕ ᐃᓱᐊᓃᑦᑐᖅ. ᐊᑭᖓ ᐃᓗᐃᑦᑑᓗᓂ ᓂᐅᕕᐊᕆᔭᐅᖁᓚᐅᖅᓯᐅᒃ ᐃᓕᑦᓯ ᑕᑯᓐᓇᖅᑎᓪᓗᓯ ᐃᓗᕕᕐᕕᒃᑖᕆᓂᐊᕋᒃᑯ.”
10ᐃᐳᕋᓐᓗ ᑕᕝᕙᓂ ᐃᒃᓯᕙᖃᑕᐅᓚᐅᖅᐳᖅ ᕼᐃᑍᑎᓄᑦ; ᑕᕝᕙ ᐃᐸᕋᓐ ᑭᐅᓕᖅᐳᖅ ᐂᑉᕋᕼᐋᒻᒧᑦ ᕼᐃᑍᑎᑦ ᑐᓵᑎᓪᓗᒋᑦ, ᑕᒪᕐᖕᒥᒃ ᐃᒃᓯᕙᖃᑕᐅᔪᑦ ᐃᑎᖅᑕᕐᕕᖕᒥ, 11“ᐋᒃᑲ ᐊᖓᔪᖅᑳᒃ, ᓈᓚᓚᐅᓐᖓ; ᑕᒪᓐᓇ ᐱᕈᖅᓰᕕᒃ ᑐᓂᕙᕋ ᐃᓕᖕᓄᑦ ᕾᕈᓱᒡᓗ ᑕᕝᕙᓃᑦᑐᖅ ᐃᓕᖕᓄᑦ ᑐᓂᔪᒪᕙᕋ; ᐅᑯᐊ ᐃᓅᖃᑎᒪ ᑭᖑᕚᖏᑦ ᑕᑯᓐᓇᖅᑎᓪᓗᒋᑦ ᑐᓂᕙᕋ ᐃᓕᖕᓄᑦ; ᑐᖁᔨᐊᑦ ᑕᕝᕙᓂ ᐃᓗᕕᓕᕈᒃ.”
12ᐂᑉᕋᕼᐋᒻᓕ ᐅᑯᕗᖅ ᑕᒫᓂ ᓄᓇᖃᖅᑐᓄᑦ. 13ᐃᐸᕋᓐᒧᓪᓗ ᐅᖃᖅᓗᓂ, ᓄᓇᖃᖅᑐᑦ ᑐᓵᑎᓪᓗᒋᑦ, “ᓈᓚᖕᓂᐊᕈᕕᖓ; ᑕᒪᓐᓇ ᐱᕈᖅᓰᕕᒃ ᐊᑭᓕᕈᒪᕙᕋ; ᐊᑭᓕᐅᑎᒋᔭᒃᑲ ᐃᓚᓕᐅᓚᐅᒃᑭᑦ, ᑐᖁᔨᐊᕋ ᑕᕝᕙᓂ ᐃᓗᕕᕐᖕᓂᐊᕋᒃᑯ.”
14ᐃᐸᕋᓐᓗ ᑭᐅᕗᖅ ᐂᑉᕋᕼᐋᒻᒧᑦ, 15“ᐊᖓᔪᖅᑳᒃ ᓇᓛᓚᐅᓐᖓ, ᓄᓇ ᐊᑭᖃᑐᐃᓐᓇᖅᐳᖅ 400ᓂᒃ ᓯᐅᓪᕕᕆᓂᒃ, ᑕᒪᓐᓇᓕ ᐅᕙᑦᑎᖕᓄᑦ ᐊᒡᕕᐊᕈᑕᐅᓐᖏᓚᖅ, ᑐᖁᔨᐊᑦ ᐃᓕᔭᖅᑐᓕᕈᒃ.” 16ᐂᑉᕋᕼᐋᒻᓗ ᐃᐸᕋᓐ ᐊᖏᖃᑎᒋᒐᒥᐅᒃ; ᐅᖁᒤᓐᓂᖅᓯᐅᑎᒃᑯᑦ ᐋᖅᑭᒃᓱᐃᓕᖅᐳᖅ ᐃᐸᕋᐅᑉ ᐊᑭᒋᖁᓪᓗᒋᑦ ᐅᖃᐅᓯᕆᖅᑲᐅᔭᖏᓐᓂᒃ ᓯᐅᓪᕕᕆᓂᒃ ᕼᐃᑍᑎᒥᐅᑦ ᑕᕝᕙᓃᑦᑐᑦ ᑐᓵᑎᓪᓗᒋᑦ, 400ᓂᒃ ᓯᐅᓪᕕᕆᓂᒃ, ᑍᑦᓱᒪᓂᐅᑎᓪᓗᒍ ᐅᖁᒤᓐᓂᖅᓯᐅᑕᐅᓪᓗᑎᒃ ᓂᐅᕕᖅᑎᑦᓯᕙᒃᑐᓂᑦ ᐊᑐᖅᑕᐅᕙᒃᑐᑦ ᐊᑐᖅᓗᒋᑦ.
17ᑍᒫᒃ ᑕᕝᕙ ᐃᐸᕋᓂᐅᑉ ᓄᓇᖁᑎᒋᓚᐅᖅᑕᖓ ᒪᒃ-ᐲᓚᒥᒃ ᐊᑎᓕᒃ ᒪᒻᕆᐅᑉ ᑕᓕᖅᐱᐊᓃᑦᑐᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ, ᐱᕈᖅᓰᕕᒃ ᕾᕈᓱᒡᓗ ᑕᕝᕙᓃᑦᑐᖅ ᐱᖃᓯᐅᑎᒋᓪᓗᒍ, ᓇᐹᖅᑐᐃᓪᓗ ᑕᒪᕐᖕᒥᒃ ᐱᕈᖅᓰᕕᖕᒦᑦᑐᑦ, ᖃᓂᒋᔭᓕᒫᖓᓗ ᑐᓂᔭᐅᕗᖅ. 18ᐂᑉᕋᕼᐋᒻᒧᑦ ᓇᖕᒥᓂᖅᑖᕆᔭᐅᑎᑕᐅᕗᖅ ᕼᐃᑍᑎᒥᐅᑦ ᖃᐅᔨᑎᓪᓗᒋᑦ, ᐃᒡᓗᒐᓮᑦ ᐃᑎᖅᑕᕐᕕᖓᓄᑦ ᕾᓚᐅᖅᑐᓕᒫᑦ.
19ᑭᖑᓂᖓᒍᑦ, ᐂᑉᕋᕼᐋᒻ ᓄᓕᐊᓂ ᓵᕋ ᑕᕝᕗᖓ ᕾᕈᓱᖕᒧᑦ ᐃᓗᕕᖅᐹ ᐱᕈᖅᓰᕕᖕᒥ ᒪᒃ-ᐲᓚᒥ ᒪᒻᕆᐅᑉ ᓯᕿᓂᐊᑕ ᓇᓛᓃᑦᑐᒥ ᕼᐃᐸᕋᓐᒥ ᑬᓇᓂᐅᑉ ᓄᓇᖓᓃᑦᑐᒥ. 20ᑕᕝᕙ ᐱᕈᖅᓰᕕᒃ ᕾᕈᓱᒡᓗ ᑕᕝᕙᓃᑦᑐᖅ ᑐᓂᔭᐅᓚᐅᖅᐳᖅ ᐂᑉᕋᕼᐋᒻᒧᑦ, ᐃᓗᕕᖅᓯᕕᒃᓴᖅᑖᕆᓪᓗᒍ ᕼᐃᑍᑎᒥᐅᓂᑦ.
Currently Selected:
ᒨᓯᓯ ᓯᕗᓪᓖᑦ 23: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
