ᒨᓯᓯ ᓯᕗᓪᓖᑦ 30
30
1ᕅᒋᓕᓕ ᕿᑐᕐᖓᖅᑖᖅᓚᐅᓐᒋᓚᖅ ᔧᑯᒥᑦ, ᑭᖑᓂᖓᒍᓪᓗ ᐊᖓᔪᓂ ᓯᒡᒐᑎᓕᖅᐹ ᔧᑯᒧᓪᓗ ᐅᖃᖅᓗᓂ, “ᕿᑐᕐᖓᖅᑖᖅᑎᓚᐅᓐᖓ, ᕿᑐᕐᖓᖅᑖᖏᒃᑯᒪ ᑐᖁᑐᐃᓐᓇᖔᕈᒪᓕᖅᐳᖓ.”
2ᔧᑯᓗ ᓂᓐᖓᒃᐳᖅ ᕅᒋᓕᒧᑦ ᐅᖃᖅᓗᓂᓗ, “ᒎᑎᐅᑉ ᐃᓂᖓᓃᑉᐳᖔ? ᑖᑦᓱᒪ ᑭᓯᒥ ᕿᑐᕐᖓᖅᑖᖅᑎᑦᓯᒪᓐᖏᓛᑎᑦ?”
3ᕅᒋᓕᓗ ᐅᖃᖅᐳᖅ, “ᐅᓇ ᐱᔨᒐ ᐱᓪᕼᐊ; ᑐᑎᓚᐅᕈᒃ, ᐅᕙᓐᓂᒃ ᕿᑐᕐᖓᖅᑖᖅᑎᑦᓯᔪᓐᓇᖁᓪᓗᒍ, ᑕᕝᕙ ᕿᑐᕐᖓᖅᑖᕐᖕᓂᐊᖅᐳᖓ ᑖᑦᓱᒨᓇ.” 4ᑍᒤᒻᒪᑦ ᐱᔨᓂ ᐱᓪᕼᐊ ᑐᓂᕚ ᐅᐃᒥᓄᑦ ᓄᓕᐊᕆᔭᐅᖁᓪᓗᒍ; ᔧᑰᓪᓗ ᐃᓐᓇᖓᖃᑎᒋᕚ. 5ᐱᓪᕼᐊᓗ ᓯᖎᓕᖅᐳᖅ ᔧᑯᒥᑦ ᐃᕐᖕᓂᖅᑖᖅᓗᓂᓗ. 6ᕅᒋᓕᓗ ᐅᖃᖅᐳᖅ, “ᒎᑎᐅᑉ ᓈᒻᒪᒋᔭᓐᓂᒃ ᐱᓂᐊᕐᕕᒋᕚᖓ; ᑐᒃᓯᐊᕐᖕᓂᓐᓂᒡᓗ ᑐᓴᖅᓯᒪᕚᖓ ᐃᕐᖕᓂᖅᑖᖅᑎᓪᓗᓂᖓᓗ”; ᑍᒤᒻᒪᑦ ᐊᑦᓯᖅᐹ ᑖᓐᒥᒃ. 7ᕅᒋᓕᐅᓪᓗ ᐱᔨᖓ ᐱᓪᕼᐊ ᓯᖎᓕᒃᑲᓐᓂᖅᐳᖅ ᔧᑯᒥᑦ ᐃᕐᖕᓂᖅᑖᒃᑲᓐᓂᖅᓗᓂᓗ, 8ᕅᒋᓕᓗ ᐅᖃᖅᐳᖅ, “ᐊᒃᓱᕈᒻᒪᕆᒃᓗᖓ ᐊᖓᔪᓐᓂᒃ ᐅᓇᑕᕆᐊᖃᓚᐅᕋᒪ, ᒫᓐᓇᓕ ᓵᓚᖃᖅᐳᖓ”; ᑍᒤᒻᒪᑦ ᐊᑦᓯᖅᐹ ᓈᑉᑕᓕᒥᒃ.
9ᓕᐊᓕ ᖃᐅᔨᓕᕋᒥ ᕿᑐᕐᖓᖅᑖᒃᑲᓐᓂᕈᓐᓃᕐᖕᓂᕐᖕᒥᓂᒃ, ᐱᔨᓂ ᔨᐅᓪᐸ ᑐᓂᕚ ᔧᑯᒧᑦ ᓄᓕᐊᕆᔭᐅᖁᓪᓗᒍ. 10ᑕᕝᕙ ᓕᐊᑉ ᐱᔨᖓ ᔨᐅᓪᐸ ᐃᕐᖕᓂᖅᑖᖅᐳᖅ ᔧᑯᒥᑦ. 11ᓕᐊᓗ ᐅᖃᖅᐳᖅ, “ᐅᐱᓐᓇᖅᑐᒥᒃ ᐱᕗᖓ”; ᑍᒤᒻᒪᑦ ᐊᑦᓯᖅᐹ ᒑᑎᒥᒃ. 12ᓕᐊᓪᓗ ᐱᔨᖓ ᔨᐅᓪᐸ ᐃᕐᖕᓂᖅᑖᒃᑲᓐᓂᖅᐳᖅ ᔧᑯᒥᑦ, 13ᓕᐊᓗ ᐅᖃᖅᐳᖅ, “ᐊᒃᓱᒻᒪᕆᐊᓗᒃ ᖁᕕᐊᓱᒃᐳᖓ! ᒫᓐᓇᒥᑦ ᐊᕐᖕᓇᓂᑦ ᑍᔭᐅᕙᖕᓂᐊᓕᖅᐳᖓ ᖁᕕᐊᓱᒃᑐᒥᒃ”; ᑍᒤᒻᒪᑦ ᐊᑦᓯᖅᐹ ᐋᓱᕆᒥᒃ.
14ᓂᐊᖂᔭᒃᓴᓂᒡᓕ ᑲᑎᖅᓱᐃᑎᓪᓗᒋᑦ ᕉᐱᓂ ᐱᕈᖅᓰᕕᖕᒧᐊᕋᒥ ᓇᓂᓯᕗᖅ ᒫᓐᑐᕅᒃᓯᒥᒃ#30:14 ᒫᓐᑐᕅᒃᓯ ᑕᒪᒃᑯᐊ ᐱᕈᖅᑐᕕᓃᑦ ᐃᓱᒪᒋᔭᐅᔪᑦ ᕿᑐᕐᖓᖅᑖᕐᖕᓇᖅᑑᓇᓱᒋᔭᐅᓪᓗᑎᒃ ᑍᒤᒻᒪᑦ ᐊᑐᖅᑕᐅᕙᓚᐅᖅᐳᑦ ᕿᑐᕐᖓᖅᑖᕈᒪᔪᓄᑦ ᑖᑦᓱᒪᓗ ᐊᓈᓇᒥᓄᐊᕈᑎᕚ ᓕᐊᒧᑦ. ᕅᒋᓕᓗ ᓕᐊᒧᑦ ᐅᖃᖅᐳᖅ, “ᑕᕝᕙᓐᖓᑦ ᐃᕐᖕᓂᖅᐱᑦ ᓇᓂᔭᖓᑕ ᐃᓚᖓᓐᓂᒃ ᕾᑦᓯᓚᐅᕆᑦ ᒫᓐᑐᕅᒃᓯᒥᒃ.”
15ᓕᐊᑉ ᑭᐅᕚ, “ᐅᐃᓐᓂᒃ ᐊᖅᓵᖅᓯᒪᒐᕕᖓ ᑕᒪᓐᓇᓕ ᓈᒻᒪᓐᖏᓛᖅ? ᒫᓐᓇᓕ ᐃᕐᖕᓂᕐᖕᒪ ᒫᓐᑐᕅᒃᓯ ᓇᓂᔭᖓ ᐊᖅᓵᓯᑦᔪᑎᒋᓇᓱᐊᓕᕆᕙᑦ.”
ᕅᒋᓕᓗ ᐅᖃᖅᐳᖅ, “ᐃᕐᖕᓂᖅᐱᑦ ᓇᓂᔭᖓ ᒫᓐᑐᕅᒃᓯ ᐅᕙᓐᓄᐊᕐᖕᓂᐊᕈᕕᐅᒃ, ᐅᓐᓄᒃ ᔧᑯ ᓯᓂᖃᑎᒋᔪᓐᓇᕐᖕᓂᐊᖅᐸᑦ.”
16ᔧᑯᓕ ᐅᓐᓄᒃᑎᓪᓗᒍ ᑎᑭᓕᕐᖕᒪᑦ ᐱᕈᖅᓰᕕᖕᒥᓐᖔᖅᓗᓂ, ᓕᐊᑉ ᐸᕐᕆᐊᖅᐹ ᐅᖃᐅᑎᓪᓗᒍᓗ, “ᐅᓐᓄᒃ ᓯᓂᖃᑎᒋᓂᐊᕋᒃᑭᑦ, ᐊᑭᓕᐅᑎᖃᖅᑲᐅᒐᒪ ᐃᕐᖕᓂᕐᖕᒪ ᓇᓂᔭᕕᓂᖓᓂᒃ ᒫᓐᑐᕅᒃᓯᒥᒃ.” ᑍᒤᒻᒪᑦ ᑕᒪᑐᒪᓂ ᐅᓐᓄᒥ ᔧᑰᑉ ᐃᓐᓇᖓᖃᑎᒋᕚ.
17ᒎᑎᐅᓪᓗ ᓕᐊᑉ ᑐᒃᓯᐊᕐᖕᓂᖓ ᑭᐅᕚ, ᓯᖎᓕᖅᓗᓂᓗ ᔧᑯᒥᓪᓗ ᐃᕐᖕᓂᖅᑖᖅᐳᖅ ᑕᓪᓕᒪᖓᓐᓂᒃ. 18ᓕᐊᓗ ᐅᖃᖅᐳᖅ, “ᒎᑎᐅᑉ ᐊᑭᓕᖅᓯᒪᕚᖓ, ᐊᕐᖕᓇᖅ ᐱᔨᒐ ᑐᓂᓯᒪᓚᐅᕋᒃᑯ ᐅᐃᓐᓄᑦ”; ᑍᒤᒻᒪᑦ ᐃᕐᖕᓂᓂ ᐊᑦᓯᖅᐹ ᐃᓴᑳᕆᒥᒃ. 19ᓕᐊᓗ ᑭᖑᓂᖓᒍᑦ ᓱᓕ ᓯᖎᓕᒃᑲᓐᓂᖅᐳᖅ ᔧᑯᒥᑦ ᐃᕐᖕᓂᖅᑖᒃᑲᓐᓂᖅᐳᕐᓗ ᐱᖓᓲᔪᖅᑐᒋᓕᖅᑕᖓᓂᒃ. 20ᓕᐊᓗ ᐅᖃᖅᐳᖅ, “ᒎᑎᐅᑉ ᑐᓂᕐᕈᑎᑦᓯᐊᕚᓗᖕᒥᒃ ᑐᓂᓯᕕᒋᕚᖓ; ᒫᓐᓇᓕ ᐅᐃᒪ ᐃᓚᓕᐅᕐᖕᓂᐊᓕᖅᐹᖓ, ᐃᕐᖕᓂᖅᑖᖅᑎᓯᒪᓕᕋᒃᑯ ᐱᖓᓲᔪᖅᑐᓂᒃ”; ᑍᒤᒻᒪᑦ ᐃᕐᖕᓂᓂ ᐊᑦᓯᖅᐹ ᓯᐳᓗᓂᒥᒃ. 21ᑭᖑᓂᖓᒍᑦ ᐸᓂᒃᑖᖅᐳᖅ, ᑖᓐᓇᓗ ᐊᑦᓯᖅᐹ ᑍᓇᒥᒃ.
22ᒎᑎᐅᓪᓗ ᕅᒋᓕ ᐃᖅᑲᐅᒪᒐᒥᐅᒃ; ᑐᒃᓯᐊᕐᖕᓂᖓ ᑭᐅᓪᓗᒍ ᕿᑐᕐᖓᖅᑖᕈᓐᓇᖅᓯᑎᑉᐹ. 23ᕅᒋᓕᓗ ᓯᖎᓕᖅᐳᖅ ᐃᕐᖕᓂᖅᑖᖅᓗᓂᓗ, ᐅᖃᖅᐳᕐᓗ, “ᒎᑎᐅᑉ ᑲᓐᖑᓲᑎᒃᓴᕋ ᐲᖅᐹ ᐃᕐᖕᓂᖅᑖᖅᑎᒻᒪᖓ. 24ᐊᑕᓂᐅᑉ ᐃᕐᖕᓂᖅᑖᖅᑎᒃᑲᓐᓂᕐᖕᓂᐊᖅᐹᖓ”; ᑍᒤᒻᒪᑦ ᐊᑦᓯᖅᐹ ᔫᓯᐱᒥᒃ.
ᔧᑰᑉ ᐊᖏᖅᑕᐅᓇᓱᖕᓂᖓ ᓔᐸᓂᒧᑦ
25ᕅᒋᓕᐅᑉ ᔫᓯᐱᒥᒃ ᕿᑐᕐᖓᖅᑖᕐᖕᓂᖓᑕ ᑭᖑᓂᖓᓂ, ᔧᑯ ᐅᖃᓕᖅᐳᖅ ᓔᐸᓂᒧᑦ, “ᐊᐅᓪᓚᕈᓐᓇᖅᑎᓚᐅᓐᖓ, ᓇᖕᒥᓂᖅ ᐊᖏᕐᕋᓐᓄᑦ ᓄᓇᓐᓄᓪᓗ ᐅᑎᕐᖕᓂᐊᕋᒪ. 26ᓄᓕᐊᒃᑲ ᐅᕙᓐᓄᑦ ᑐᓂᓚᐅᒃᑭᑦ ᕿᑐᕐᖓᒃᑲᓗ ᑖᒃᑯᐊ ᐃᓕᖕᓄᑦ ᐱᓇᓱᐊᖅᑎᐅᓂᒃᑯᑦ ᐊᑭᓕᖅᑕᐅᑦᔪᑎᒋᓯᒪᒐᒃᑭᑦ, ᐊᐅᓪᓚᖅᑎᓪᓗᖓᓗ; ᖃᐅᔨᒪᒐᕕᑦ ᖃᓄᖅ ᐱᔨᑦᓯᑦᓯᐊᖅᓯᒪᓂᓐᓂᒃ ᐃᓕᖕᓄᑦ.”
27ᓔᐸᓂᐅᓪᓗ ᐅᖃᐅᑎᕚ, “ᐃᒫᒃ ᐅᖃᓚᐅᖅᓚᖓ: ᖃᐅᔨᓯᒪᕗᖓ ᓇᓗᓇᖅᑐᒃᑯᑦ ᐃᒫᒃ ᐊᑕᓂᐅᑉ ᓮᒻᒪᖅᑎᓯᒪᖕᒪᖓ ᐃᕝᕕᑦ ᐱᑦᔪᑎᒋᓪᓗᑎᑦ. 28ᐊᑭᓕᖅᑕᐅᑦᔪᑎᒋᔪᒪᔭᕐᖕᓂᒃ ᐅᖃᓚᐅᕆᑦ, ᑕᕝᕙ ᑐᓂᓂᐊᖅᐸᒋᑦ.”
29ᔧᑰᑉ ᐅᖃᐅᑎᕚ, “ᐃᕝᕕᑦ ᓇᖕᒥᓂᖅ ᖃᐅᔨᒪᕗᑎᑦ ᐃᓕᖕᓂᒃ ᐱᔨᑦᓯᓚᐅᕋᒪ ᖃᓄᕐᓗ ᐆᒪᔪᖁᑎᖕᓂᒃ ᑲᒪᑦᓯᐊᓚᐅᕐᖕᓂᓐᓂᒃ. 30ᐅᓄᖏᑦᑐᓂᒃ ᐱᖃᓚᐅᖅᐳᑎᑦ ᑎᑭᓚᐅᖅᑎᓐᓇᖓ, ᒫᓐᓇᓕ ᐅᓄᖅᑐᕐᔪᐊᕌᓗᓐᖑᖅᓯᒪᕗᑦ; ᖃᓄᑐᐃᓐᓇᕐᓗ ᐱᓕᕆᑐᐊᕌᖓᒪ ᐊᑕᓂᐅᑉ ᓮᒻᒪᖅᑎᓯᒪᕚᑎᑦ. ᒫᓐᓇᓕ ᓇᖕᒥᓂᖅ ᐱᓇᓱᐊᕈᒪᔭᓐᓄᑦ ᐱᓕᕆᕙᓪᓕᐊᔪᒃᓴᐅᓕᖅᐳᖓ ᐃᓚᒃᑲ ᐱᓪᓗᒋᑦ?”
31ᓔᐸᓂᐅᑉ ᐊᐱᕆᕚ, “ᓱᓇᒥᒃ ᑐᓂᓯᕕᒋᔪᓐᓇᖅᐱᒌᑦ?”
ᔧᑰᑉ ᑭᐅᕚ, “ᓱᓇᒥᒃ ᑐᓂᓯᕕᒋᔭᕆᐊᖃᓐᖏᓚᕐᖕᒪ; ᐱᔪᒪᔭᕋᓕ ᒪᓕᖕᓂᐊᕈᕕᐅᒃ, ᓱᓕ ᐆᒪᔪᖁᑎᑎᑦ ᓂᕆᑎᑦᓱᒪᕙᒃᑲ ᑲᒪᒋᑦᓯᐊᖅᓗᒋᓪᓗ: 32ᐅᓪᓗᒥ ᓰᐱᖁᑎᓕᒫᑎᑦ ᕿᒥᕐᕈᐊᓚᐅᖅᓚᒃᑲ, ᐲᔭᖅᓗᒋᓪᓗ ᑕᒪᕐᖕᒥᒃ ᑕᖅᓴᒐᓛᖃᖅᑐᑦ ᐅᑭᓕᕆᐊᓪᓗ ᓰᐲᑦ ᓰᐱᐅᓪᓗ ᓄᕐᕋᖏᑦ ᕿᕐᖕᓃᑦ, ᒎᑦᓰᓪᓗ ᐅᑭᓕᕆᐊᑦ ᑕᖅᓴᒐᓛᖃᖅᑐᓪᓗ; ᑕᒪᒃᑯᐊ ᑕᕝᕙ ᐊᑭᓕᖅᑕᐅᑦᔪᑎᒋᔪᒪᔭᑐᐊᒃᑲ. 33ᓯᕗᓂᑦᑎᓐᓂ ᑕᒪᓐᓇ ᖃᐅᔨᒐᔭᖅᐸᑦ ᓱᓕᑦᓯᐊᖅᓗᖓ ᐱᓕᕆᓐᓂᕐᖕᒪᖔᕐᖕᒪ, ᑕᒪᒃᑯᐊᓗ ᐊᑭᓕᖅᑕᐅᑦᔪᑎᒋᔭᒃᑲ ᕿᒥᕐᕈᐊᓕᕈᕕᒋᑦ, ᒎᑦᓯᖁᑎᖃᕈᒪ ᑕᖅᓴᒐᓛᖃᖏᑦᑐᒥᒃ ᐅᕝᕙᓗ ᐅᑭᓕᕆᐊᖏᑦᑐᒥᒃ ᐅᕝᕙᓘᓐᓃᑦ ᓰᐱᒥᒃ ᓇᓪᓕᐊᓐᓂᑐᐃᓐᓇᖅ ᕿᕐᖕᓂᐅᖏᑦᑐᒥᒃ, ᑕᕝᕙ ᖃᐅᔨᒐᔭᖅᐳᑎᑦ ᑎᒡᓕᒐᕕᓂᐅᓂᖓᓂᒃ.”
34ᓔᐸᓂᐅᑉ ᑭᐅᕚ, “ᐊᖏᖃᑎᒋᕙᒋᑦ, ᑍᒤᓕᐅᕐᖕᓂᐊᓕᖅᐳᒍᑦ ᑕᒪᑐᒥᖓ ᐅᖃᐅᓯᕆᔭᕐᖕᓂᒃ.” 35ᑕᕝᕙᓐᖓᑦ ᐅᓪᓗᒥᑦ ᐱᒋᐊᖅᓗᓂ ᓔᐸᓂᐅᑉ ᒎᑦᓰᑦ ᐊᖑᓴᓪᓗᐃᑦ ᐊᕕᑎᑉᐰᑦ ᑕᖅᓴᓖᑦ ᐅᑭᓕᕆᐊᖑᔪᓪᓗ ᐊᕐᖕᓇᓪᓗᐃᓪᓗ ᑕᒪᕐᖕᒥᒃ ᑕᖅᓴᒐᓛᒃᑐᑦ ᐅᑭᓕᕆᐊᓪᓗ ᖃᐅᓪᓗᖅᑕᖃᖅᑐᓪᓗ; ᓰᐲᑦᑕᐅᖅ ᓄᕐᕋᖏᑦ ᕿᕐᖕᓃᑦ ᐊᕝᕗᑎᑎᒃᑭᕔᑦ, ᐃᕐᖕᓂᓂᓗ ᑖᒃᑯᓄᖓ ᐰᖅᓯᔨᓐᖑᖅᑎᓪᓗᒋᑦ, 36ᑕᕝᕙᓐᖓᓪᓗ ᐊᐅᓪᓚᖅᐳᖅ ᔧᑯᒥᑦ ᕿᒪᕉᑎᓇᓱᐊᖅᓗᓂ ᐃᖏᕐᕋᓪᓗᓂ ᐅᓪᓗᓂᒃ ᐱᖓᓱᓂᒃ; ᔧᑰᓪᓗ ᓔᐸᓂᐅᑉ ᓰᐱᖁᑎᖏᑕ ᐊᒥᐊᒃᑯᖏᑦ ᒥᐊᓂᕆᕔᑦ.
37ᔧᑯᓗ ᓇᐹᖅᑑᑉ ᐊᑎᖃᖅᑑᑉ ᐹᑉᓚᓂᒃ ᐊᕙᓚᖓᔪᖏᓐᓂᒃ ᐆᒻᒪᐅᑦᓯᐊᖅᑐᓂᒃ ᐱᕗᖅ, ᐋᓪᒧᓂᒡᓗ, ᐊᒻᒪ ᓇᐹᖅᑐᑐᐃᓐᓁᑦ ᐊᕙᓚᖓᔪᖏᓐᓂᒃ; ᑖᒃᑯᐊᓗ ᖄᖏᑦ ᐲᖅᓯᕕᒋᕔᑦ ᖃᐅᓪᓗᖅᑕᐅᓂᖃᓕᖁᓪᓗᒋᑦ. 38ᐃᓕᕔᓪᓗ ᐆᒪᔪᖁᑎᖏᑕ ᐃᒥᕐᕕᖏᑕ ᓵᖏᓐᓄᑦ, ᑕᕝᕗᓐᖓᖅᐰᑦ, ᐆᒪᔪᖁᑎᖏᑦ ᑕᕝᕙᓂ ᐃᒥᕐᕕᒥᖕᓂ ᓄᓕᐊᖃᑦᑕᕐᖕᒪᑕ. 39ᑖᒃᑯᐊᓗ ᒎᑦᓰᑦ ᓄᓕᐊᓕᕌᖓᒥᒃ ᐃᒥᖅᑕᕐᕕᐅᑉ ᓵᖓᓂ, ᕿᑐᕐᖓᖅᑖᖃᑦᑕᖅᐳᑦ ᖃᐅᓪᓗᖅᑕᐅᓂᖃᖅᑐᓂᒃ, ᑕᖅᓴᒐᓛᒃᑐᓂᒡᓗ, ᐅᑭᓕᕆᐊᖑᔪᓂᒡᓗ.
40ᔧᑰᓪᓗ ᓄᕐᕅᑦ ᓇᖕᒥᓂᖅ ᐃᓂᖃᖅᑎᑉᐰᑦ, ᐆᒪᔪᐃᓪᓗ ᑮᓇᖏᑦ ᓵᓐᖓᑎᓪᓗᒋᑦ ᓰᐱᓄᑦ ᑕᖅᓴᖃᖅᑐᓄᑦ ᕿᕐᖕᓂᕐᖕᓄᓪᓗ ᓔᐸᓂᐅᑉ ᐆᒪᔪᖁᑎᖏᓐᓄᑦ; ᓇᖕᒥᓂᖅ ᐆᒪᔪᖁᑎᓂ ᑲᑎᒪᔭᐅᑎᓐᖏᓔᑦ, ᐃᓚᓕᐅᑎᓇᒋᓪᓗ ᓔᐸᓂᐅᑉ ᐆᒪᔪᖁᑎᖏᓐᓄᑦ.
41ᐆᒪᔪᐃᓪᓗ ᖃᓄᐃᖏᑦᓯᐊᖅᑐᑦ ᓄᓕᐊᓕᕌᖓᑕ, ᔧᑰᑉ ᑖᒃᑯᐊ ᓇᐹᖅᑐᕕᓂᕐᖕᓂᒃ ᐃᒥᕐᕕᖏᓐᓂ ᐃᓕᓯᒪᔪᓂᒃ ᑕᑯᓐᓇᖅᑎᖃᑦᑕᖅᐰᑦ, ᓇᐹᖅᑐᕕᓃᑦ ᐊᑯᓐᓂᖏᓐᓂ ᓄᓕᐊᖁᓪᓗᒋᑦ. 42ᐆᒪᔪᐃᓪᓕ ᓴᓐᖏᔫᖏᓐᓂᖅᓴᐅᔪᑦ ᓇᐹᖅᑐᕕᓂᕐᖕᓂᒃ ᐃᓕᓯᕕᒋᕙᖕᓇᒋᑦ; ᑍᒫᒡᓗ ᑕᕝᕙ ᓔᐸᓂ ᐆᒪᔪᖁᑎᖃᓕᓚᐅᖅᐳᖅ ᓴᓐᖏᔫᑕᐅᖏᓐᓂᖅᓴᓂᒃ, ᔧᑯᓕ ᐆᒪᔪᖁᑎᖃᓕᓚᐅᖅᐳᖅ ᖃᓄᐃᕈᔪᖏᑦᓯᐊᖅᑐᓂᒃ ᓴᓐᖏᔫᑦᓯᐊᖅᑐᓂᒡᓗ. 43ᑍᒤᓕᐅᖅᓗᓂᓗ ᔧᑯ ᐊᔪᖅᓴᖏᑦᑐᐊᓘᓕᓚᐅᖅᐳᖅ, ᐆᒪᔪᖁᑎᖃᓕᓚᐅᖅᐳᖅ ᐅᓄᖅᑐᓂᒃ, ᐱᔨᖃᓕᖅᓗᓂᒡᓗ ᐊᖑᑎᓂᒃ ᐊᕐᖕᓇᓂᒡᓗ, ᑳᒥᓕᖁᑎᖃᖅᓗᓂᒡᓗ,#30:43 ᑳᒥᓕᒃ ᐅᕝᕙᓗ ᐱᑯᓕᒃ ᕿᒻᒥᕐᔪᐊᕆᔭᐅᕙᒃᑐᑦ ᐃᓄᖃᖏᑦᑐᒥ ᕿᑎᒥᒍᑦ ᐱᑯᓖᑦ ᓯᐅᑎᖅᑯᖅᑐᔪᖁᑎᖃᖅᓗᓂᒡᓗ.
Currently Selected:
ᒨᓯᓯ ᓯᕗᓪᓖᑦ 30: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
