ᒨᓯᓯ ᓯᕗᓪᓖᑦ 29
29
ᔧᑰᑉ ᑎᑭᓐᓂᖓ ᓔᐸᓂᐅᑉ ᐊᖏᕐᕋᖓᓄᑦ
1ᔧᑯᓗ ᐅᐸᒃᑕᒥᓄᑦ ᐂᓕᕆᕗᖅ, ᑎᑭᓪᓗᓂᓗ ᐃᓄᖕᓄᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᓄᑦ. 2ᕿᓂᕋᒥᓗ, ᓇᑎᕐᖕᓇᒥ ᐃᒥᖅᑕᕐᕕᖕᒥᒃ, ᓰᐱᓂᒡᓗ ᐊᕚᑖᓂ ᐊᖁᐱᔪᖃᖅᐳᖅ ᐱᖓᓲᓕᖅᑲᖓᔪᓂᒃ; ᑕᕝᕙᓐᖓᓪᓗ ᓰᐲᑦ ᐃᒥᖅᑕᕐᕕᖕᒥᑦ ᐃᒥᖅᑎᑕᐅᕙᒃᐳᑦ, ᐅᔭᕋᖕᒥᒡᓗ ᐊᖏᔪᒥᒃ ᖄᖓᒍᑦ ᒪᑐᓯᒪᓪᓗᓂ. 3ᓰᐲᓪᓗ ᑲᑎᑕᐅᔭᕌᖓᑕ ᑕᕝᕗᖓ, ᓰᐱᓕᕆᔨᓂᑦ ᒪᑐᐊ ᐊᒃᓴᑲᖅᑎᑕᐅᕙᒃᓱᓂ ᐃᒥᖅᑕᕐᕕᐅᑉ ᐹᖓᓂᑦ, ᓰᐱᖁᑎᑎᒃ ᐃᒥᖅᑎᑉᐸᒃᓗᒋᑦ, ᐱᔭᕇᕌᖓᒥᒃ ᐅᔭᕌᓗᒃ ᐅᑎᖅᑎᑉᐸᒃᑭᓪᓗᒍ ᐹᖓᓄᑦ.
4ᔧᑰᓪᓗ ᐊᐱᕆᓕᖅᐰᑦ, “ᖃᑕᓐᖑᑎᒃᑲ ᓇᑭᓐᖔᖅᓯᒪᕕᓰ?”
ᑖᒃᑯᐊ ᑭᐅᕗᑦ, “ᕼᐊᕋᓐᒥᓐᖔᖅᓯᒪᕗᒍᑦ.”
5ᑕᕝᕙ ᐊᐱᕆᒃᑲᓐᓂᖅᐰᑦ, “ᖃᐅᔨᒪᕕᓯᐅᒃ ᓔᐸᓂ ᓇᕼᐅᕆᐅᑉ ᐃᕐᖕᓂᖓ?”
ᑖᒃᑯᐊ ᑭᐅᕙᑦ, “ᑍᓐᓇ ᖃᐅᔨᒪᔭᕗᑦ.”
6ᐊᐱᕆᒋᕔᑦ, “ᖃᓄᐃᖏᒃᑲᓗᐊᖅᐹ?”
ᑖᒃᑯᐊ ᑭᐅᕚᑦ, “ᖃᓄᐃᖏᑦᑐᖅ; ᑕᑯᓕᕈᒃ ᑕᕝᕙ ᐸᓂᖓ ᕅᒋᓕ ᕾᓕᖅᐳᖅ ᓰᐱᖁᑎᖏᓐᓂᒃ ᓇᒃᓴᖅᓗᓂ.”
7ᔧᑯ ᐅᖃᖅᐳᖅ, “ᑕᒃᑰᒃ ᓱᓕ ᐅᓪᓗᑐᖃᐅᓂᐊᕐᖕᒪᑦ, ᓰᐱᓂᒡᓗ ᑲᑎᑎᕕᒃᓴᖅ ᓈᒻᒪᒃᓯᖏᓪᓗᓂ; ᓱᖕᒪᑦ ᐃᒥᖅᑎᓚᐅᖅᓗᒋᑦ ᓂᕆᕕᒋᕙᒃᑕᖏᓐᓄᑦ ᐊᐅᓪᓚᕈᑎᒃᑲᓐᓂᓐᖏᓚᓯᐅᒃ?”
8ᑖᒃᑯᐊ ᑭᐅᕚᑦ, “ᑍᒤᑦᑐᓐᓇᖏᑦᑐᒍᑦ ᓰᐱᓕᒫᑦ ᑕᒪᐅᓐᖓᓚᐅᖅᑳᖏᓐᓂᖏᓐᓂ, ᐅᔭᕋᒡᓗ ᐃᒥᖅᑕᕐᕕᐅᑉ ᒪᑐᐊ ᐹᖓᓂᑦ ᓴᓂᕐᕙᒃᑕᐅᒃᐸᑦ ᑭᓯᐊᓂ ᐃᒥᖅᑎᑦᓯᔪᓐᓇᕐᖕᓂᐊᖅᐳᒍᑦ ᓰᐱᓂᒃ.”
9ᔧᑯᓕ ᓱᓕ ᐅᖃᖃᑎᖃᖅᑎᓪᓗᒍ ᑖᒃᑯᓂᖓ, ᕅᒋᓕ ᑎᑭᐅᑎᕗᖅ ᐊᑖᑕᒥ ᓰᐱᖁᑎᖏᓐᓂᒃ ᓇᒃᓴᖅᓗᓂ; ᑲᒪᒋᒐᒥᒋᑦ. 10ᔧᑰᓪᓗ ᕅᒋᓕ ᑕᑯᒐᒥᐅᑉ ᓔᐸᓂᐅᑉ ᓰᐱᖁᑎᖏᓐᓂᒃ ᑲᒪᒋᔭᓕᒃ, ᐃᒥᖅᑕᕐᕕᖕᒧᐊᖅᐳᖅ ᐅᔭᕌᓗᒡᓗ ᒪᑐᒋᔭᖓ ᐊᒃᓴᑲᖅᑎᓪᓗᒍ ᔧᑰᑉ ᐊᓈᓇᖓᑕ ᐊᓂᖓᑕ ᓔᐸᓂᐅᑉ ᓰᐱᖁᑎᖏᑦ ᐃᒥᖅᑎᑉᐰᑦ. 11ᔧᑰᓪᓗ ᕅᒋᓕ ᑯᓂᒃᓗᓂᐅᒃ ᓂᐱᖃᖅᓗᓂ ᕿᐊᓯᕗᖅ. 12ᔧᑰᓪᓗ ᐅᖃᐅᑎᕚ, “ᐊᑖᑕᕕᑦ ᐃᓚᒋᕚᖓ, ᕇᐱᑲᐅᑉ ᐃᕐᖕᓂᖓ.”
ᕅᒋᓕᓗ ᐅᓪᓚᒃᓯᕗᖅ ᐊᑖᑕᓂ ᐅᖃᐅᑎᔭᖅᑐᖅᓗᒍ. 13ᓔᐸᓂᓗ ᐅᔪᕈᒥᓂᒃ ᔧᑯᒥᒃ ᑐᓴᕋᒥ ᐅᓪᓚᒃᓗᓂ ᐸᕐᕆᐊᖅᐹ ᐃᕿᓪᓗᒍᓗ ᑯᓂᒃᐹ, ᐊᖏᕐᕋᒥᓄᐊᖃᑎᒋᓪᓗᒍᓗ. ᔧᑰᓪᓗ ᓔᐸᓂ ᐅᓂᒃᑳᕐᕕᒋᕚ ᖃᓄᐃᓐᓂᕆᓚᐅᖅᑕᓕᒫᒥᓂ. 14ᓔᐸᓂᓗ ᐅᖃᖅᐳᖅ, “ᓱᓕᔪᒥᒃ ᐅᕕᓂᖃᑎᒋᕙᒋᑦ ᐊᐅᖃᑎᒋᓪᓗᑎᓪᓗ,” ᔧᑯᓗ ᑕᖅᑭᓕᒫᒥᒃ ᑕᕝᕙᓃᓚᐅᖅᐳᖅ.
ᔧᑰᑉ ᐱᔨᑦᓯᕐᖕᓂᖓ ᓔᐸᓂᒥᒃ ᕅᒋᓕ ᓕᐊᓗ ᐱᓪᓗᒋᒃ
15ᓔᐸᓂ ᔧᑯᒧᑦ ᐅᖃᖅᐳᖅ, “ᐃᓚᒋᒐᒃᑭᑦ ᐅᕙᓐᓄᑦ ᐊᑭᖃᖏᓪᓗᒍ ᓴᓇᔭᕆᐊᖃᓐᖏᓚᑎᑦ ᐃᓚᒌᖕᓂᕗᒃ ᐱᓪᓗᒍ, ᖃᓄᖅ ᐊᖏᑎᒋᔪᒥᒃ ᐊᑭᓕᖅᑕᐅᖃᑦᑕᕈᒪᕖᑦ?” 16ᓔᐸᓂᓕ ᐸᓂᖃᓚᐅᖅᐳᖅ ᒪᕐᕉᖕᓂᒃ; ᐊᖓᔪᒃᓯᖅ ᓕᐊᒥᒃ ᐊᑎᖃᖅᐳᖅ ᓄᑲᖅᓯᕐᓗ ᕅᒋᓕᒥᒃ ᐊᑎᖃᖅᓗᓂ. 17ᓕᐊᓪᓕ ᐃᔨᖏᒃ ᐱᖁᓐᓂᖅᑑᓚᐅᖅᐴᒃ, ᕅᒋᓕᓕ ᐃᓂᖁᓇᖅᑑᓚᐅᖅᐳᖅ ᑎᒥᑦᓯᐊᕆᒃᓗᓂᓗ.
18ᔧᑰᓪᓗ ᕅᒋᓕ ᓇᒡᓕᒋᓚᐅᖅᐹ; ᐅᖃᓗᓂᓗ, “ᐱᔨᑦᓯᕐᖕᓂᐊᖅᐸᒋᑦ ᐊᕐᕌᒍᓂᒃ 7ᓂᒃ ᓄᓕᐊᖅᑖᖅᑎᓐᓂᐊᕈᕕᖓ ᕅᒋᓕᒥᒃ.”
19ᓔᐸᓂᐅᑉ ᑭᐅᕚ, “ᓈᒻᒪᖕᓂᖅᓴᐅᕗᖅ ᐃᓕᖕᓄᑦ ᑐᓂᒍᒃᑯ ᐊᓯᖕᓄᑦ ᐊᖑᒻᒧᑦ ᑐᓂᒐᔭᕈᒃᑯ; ᓇᔪᕐᖕᓂᐊᓕᖅᐸᕐᖕᒪ.” 20ᑕᕝᕙ ᔧᑯ ᐊᕐᕌᒍᓂᒃ 7ᓂᒃ ᐱᔨᑦᓯᓚᐅᖅᐳᖅ ᕅᒋᓕᒥᒃ ᐱᔪᒪᓪᓗᓂ, ᐅᓪᓗᐃᓪᓗ ᐅᓄᖏᑦᑐᑯᓗᒃᑎᑐᑦ ᐃᓱᒪᒋᓚᐅᖅᐰᑦ ᕅᒋᓕ ᓇᒡᓕᒋᒐᒥᐅᒃ.
21ᑕᕝᕙ ᔧᑯ ᓔᐸᓂᒧᑦ ᐅᖃᖅᐳᖅ, “ᓄᓕᐊᒃᓴᕋ ᐅᕙᓐᓄᑦ ᑐᓂᓕᕈᒃ ᐃᓐᓇᖓᖃᑎᒋᓂᐊᓕᕋᒃᑯ, ᐱᓇᓱᐊᕆᐊᖃᖅᑕᒃᑲ ᐅᖃᖅᓯᒪᔭᑎᑦ ᓈᖕᒪᑕ.” 22ᐊᓱᐃᓛᒃ ᓔᐸᓂᐅᑉ ᐊᖑᑎᓕᒫᑦ ᓇᔪᒐᕐᖕᒥᓃᑦᑐᑦ ᑲᑎᖁᕔᑦ, ᓂᕆᕕᒡᔪᐊᓕᐅᖅᓗᓂᓗ. 23ᐅᓐᓄᒃᑎᓪᓗᒍᓕ ᐸᓂᓂ ᓕᐊ ᔧᑯᒧᓐᖓᐅᑎᕚ, ᔧᑰᓪᓗ ᓕᐊ ᐃᓐᓇᖓᖃᑎᒋᕚ. 24ᓔᐸᓂᐅᑉ ᐱᔨᑲᑖᓂ ᐊᕐᖕᓇᖅ ᔨᐅᓪᐸ ᐸᓂᖕᒥᓄᑦ ᓕᐊᒧᑦ ᑐᓂᕙ ᐱᔨᑲᑖᖑᖁᓪᓗᒍ. 25ᐅᓪᓛᓐᖑᖅᑎᓪᓗᒍ ᑕᑯᒋᑦ, ᔧᑯ ᖃᐅᔨᓕᖅᐳᖅ ᓕᐊᖑᖕᒪᑦ; ᔧᑯᓗ ᓔᐸᓂᒧᑦ ᐅᖃᖅᐳᖅ, “ᓱᖕᒪᑦ ᑍᒤᓕᐅᖅᐱᖔ? ᐱᔨᑦᓯᓚᐅᓐᖏᓚᒌᑦ ᕅᒋᓕᒥᒃ ᐱᔪᒪᓪᓗᖓ? ᓱᖕᒪᑦ ᐅᐃᕕᕆᕕᖔ?”
26ᓔᐸᓂᐅᑉ ᑭᐅᕚ, “ᓄᓇᑦᑎᓐᓂ ᐱᐅᓯᕆᖏᓐᓇᑦᑎᒍ, ᓄᑲᖅᓯᕐᖕᒥᒃ ᐅᐃᓂᒃᑎᑦᓯᖅᑳᕈᓐᓇᖏᓐᓇᑦᑕ ᐊᖓᔪᒃᓯᖅ ᐅᐃᓂᓚᐅᖏᓐᓂᖓᓂ. 27ᑲᑎᑎᑕᐅᓵᖅᑑᒃ ᐱᐅᓯᖓᓂᒃ ᐱᓇᓱᐊᕈᓯᖅ ᐊᓂᒍᖅᓯᐊᕆᓕᕈᒃ, ᐊᓂᒍᖅᓯᒪᓕᖅᐸᑦ ᕅᒋᓕ ᑐᓂᔪᒫᖅᐸᕋ ᐃᓕᖕᓄᑦ ᐱᔨᑦᓯᒃᑲᓐᓂᕇᕈᕕᖓ ᓱᓕ ᐊᕐᕌᒍᓂᒃ 7ᓂᒃ.”
28ᔧᑯᓗ ᑍᒤᓕᐅᓚᐅᖅᐳᖅ, ᐱᓇᓱᐊᕈᓯᖅ ᐊᓂᒍᕐᖕᒪᑦ; ᓔᐸᓂᐅᑉ ᐸᓂᓂ ᕅᒋᓕ ᓄᓕᐊᖅᑖᖑᑎᑉᐹ ᔧᑯᒧᑦ. 29ᓔᐸᓂᐅᓪᓗ ᐱᔨᑲᑖᓂ ᐊᕐᖕᓇᖅ ᐱᓪᕼᐊ ᑐᓂᕚ ᕅᒋᓕᒧᑦ ᐱᔨᑲᑖᕆᔭᐅᖁᓪᓗᒍ. 30ᔧᑰᓪᓗ ᕅᒋᓕ ᐃᓐᓇᖓᖃᑎᒋᒋᕚ, ᓇᒡᓕᒋᓂᖅᓴᕆᕚᓗ ᓕᐊᒥᑦ, ᑭᖑᓂᖓᒍᓪᓗ ᐊᕐᕌᒍᓂᒃ 7ᓂᒃ ᓱᓕ ᐱᔨᑦᓯᓕᓚᐅᕆᕗᖅ ᓔᐸᓂᒥᒃ.
ᔧᑰᑉ ᕿᑐᕐᖓᖅᑖᕆᓯᒪᔭᖏᑦ
31ᐊᑕᓂᕐᓕ ᖃᐅᔨᒪᒐᒥ ᓕᐊᑉ ᓇᒡᓕᒋᔭᐅᖏᓐᓂᖅᓴᐅᓂᖓᓂᒃ, ᕿᑐᕐᖓᖅᑖᕈᓐᓇᖅᑎᓚᐅᖅᐹ; ᕅᒋᓕᓕ ᕿᑐᕐᖏᓱᐃᑦᑑᓚᐅᖅᐳᖅ. 32ᓕᐊᓗ ᓯᖎᓕᖅᐳᖅ ᐃᕐᖕᓂᖅᑖᖅᓗᓂᓗ, ᐊᑦᓯᖅᐹᓗ ᕉᐱᓂᒥᒃ; ᐅᖃᕋᒥ, “ᐊᑕᓂᐅᑉ ᐃᓱᒫᓗᖕᓂᓐᓂᒃ ᑕᑯᓐᓇᖅᐹᖓ, ᑕᕝᕙ ᐅᐃᒪ ᓇᒡᓕᒋᓂᐊᓕᖅᐹᖓ.” 33ᑭᖑᓂᖓᒍᓪᓗ ᓱᓕ ᓯᖎᓕᒃᑲᓐᓂᕆᕗᖅ ᐃᕐᖕᓂᖅᑖᖅᓗᓂᓗ, ᐅᖃᖅᐳᕐᓗ, “ᐊᑕᓂᐅᑉ ᓱᓕ ᑖᑦᓱᒥᖓ ᐃᕐᖕᓂᖅᑖᖅᑎᑉᐹᖓ, ᑐᓴᐅᒪᓕᕋᒥ ᓇᒡᓕᒋᔭᐅᖏᓐᓂᓐᓂᒃ”; ᑍᒤᒻᒪᑦ ᐊᑦᓯᖅᐹ ᓯᒥᐅᓂᒥᒃ. 34ᓱᓕ ᓯᖎᓕᒃᑲᓐᓂᕆᕗᖅ ᐃᕐᖕᓂᖅᑖᖅᓗᓂᓗ, ᐅᖃᖅᐳᕐᓗ, “ᒫᓐᓇ ᐅᐃᒪ ᖃᒡᓕᒃᑲᓐᓂᕐᖕᓂᐊᓕᖅᐹᖓ, ᐃᕐᖕᓂᖅᑖᖅᓯᒪᓂᕋ ᐱᖓᓱᓂᒃ ᐱᑦᔪᑎᒋᓗᒍ”; ᑍᒤᒻᒪᑦ ᐊᑦᓯᖅᐹ ᓕᕔᒥᒃ. 35ᐊᒻᒪ ᑭᖑᓂᖓᒍᑦ ᓯᖎᓕᒃᑲᓐᓂᕆᕗᖅ ᐃᕐᖕᓂᖅᑖᒃᑲᓐᓂᖅᓗᓂᓗ, ᐅᖃᖅᐳᕐᓗ, “ᑕᒪᑐᒪᓂ ᐊᑕᓂᖅ ᓂᖅᑐᕐᖕᓂᐊᓕᖅᐸᕋ”; ᑍᒤᒻᒪᑦ ᐊᑦᓯᖅᐹ ᔫᑕᒥᒃ; ᑭᖑᓂᖓᒍᓪᓗ ᕿᑐᕐᖓᖅᑖᒃᑲᓐᓂᕈᓐᓃᖅᐳᖅ.
Currently Selected:
ᒨᓯᓯ ᓯᕗᓪᓖᑦ 29: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
