ᓘᑲᓯᐅᑉ ᐊᒡᓚᖏᑦ 13
13
ᐱᐅᖏᑦᑐᓕᓂᓯ ᑐᓄᓯᐅᒃ ᑐᓄᖏᒃᑯᓯᐅᒃ ᑐᖁᓂᐊᕐᐳᓯ
1ᑍᑦᓱᒪᓂ ᐃᓄᐃᑦ ᑕᕝᕙᓃᑦᑐᑦ ᐃᓚᖏᑕ ᔩᓱᓯ ᐅᓂᒃᑲᐅᑎᕚᑦ ᒐᓕᓕᐊᒥᐅᓂᒃ ᐰᓛᑑᓯᐅᑉ ᑐᖁᑕᐅᑎᓚᐅᕐᑕᖏᓐᓂᒃ ᑐᓂᕐᕈᓯᕐᑎᓪᓗᒋᑦ ᒎᑎᒧᑦ ᑐᓂᕐᕈᓯᕐᕕᖕᒥ. 2ᔩᓱᓯᐅᑉ ᐅᖃᐅᑎᕔᑦ, “ᑍᒃᑯᐊ ᒐᓕᓕᐊᒥᐅᑦ ᑍᒫᒃ ᑐᖁᑕᐅᒐᒥᒃ ᐱᐅᖏᑦᑐᓕᓂᕐᓴᐅᓇᓱᒋᕕᓯᐅᒃ ᐊᓯᒥᖕᓂᒃ ᒐᓕᓕᐊᒥᐅᖑᖃᑎᒥᖕᓃᑦ? 3ᐅᖃᐅᑎᕙᑦᓯ, ᑍᒤᓐᖏᓚᖅ; ᐃᓕᑦᓯᑦᑕᐅᖅ ᐱᐅᖏᑦᑐᓕᓂᑦᓯᓐᓂᒃ ᑐᓄᑦᓯᓂᐊᓐᖏᒍᑦᓯ, ᑍᒫᒃᑕᐅᖅ ᑐᖁᔪᒫᕆᕗᓯ. 4ᐅᕝᕙᓘᓐᓃᑦ ᑍᒃᑯᐊ ᐃᓄᐃᑦ 18 ᓇᐸᔪᐊᓗᖕᒧᑦ ᓮᓗᐊᒥ ᐅᕐᕈᕕᐅᓚᐅᕐᑐᑦ ᑐᖁᓪᓗᑎᒃ, ᓇᓗᓁᒃᑯᑕᐅᓇᓱᒋᕕᓯᐅᒃ ᑍᒃᑯᐊ ᐱᐅᖏᑦᑐᓕᓂᕐᐹᖑᓇᓱᒋᓪᓗᓯᐅᒃ ᔨᕉᓴᓕᒻᒥ? 5ᐅᖃᐅᑎᕙᑦᓯ, ᑍᒤᓐᖏᓚᖅ; ᐃᓕᑦᓯᑦᑕᐅᖅ ᐱᐅᖏᓐᓂᑦᓯᓐᓂᒃ ᖃᕿᐊᓕᕐᓂᐊᖏᒃᑯᑦᓯ ᑍᒫᒃᑕᐅᖅ ᑐᖁᔪᒫᕆᕗᓯ.”
ᐊᑦᔨᐅᔪᖅ ᓇᐹᕐᑐᖅ ᐸᐅᕐᖓᓕᒃᓴᖅ ᐱᕈᕐᕕᐅᖏᑦᑐᖅ
6ᐆᒥᖓ ᐊᑦᔨᐅᔪᒥᒃ ᐅᖃᐅᑎᕔᑦ: “ᐊᖑᑎᑕᖃᓚᐅᕐᐳᖅ ᐱᕈᕐᓰᕕᖁᑎᒥᓂ ᓇᐹᕐᑐᖁᑎᖃᕐᑐᒥᒃ ᐱᒋᓕᖕᓂᒃ ᐸᐅᕐᖓᓕᒃᓴᒥᒃ; ᐸᐅᕐᖓᓂᒃ ᕿᓂᕆᐊᕐᐳᖅ ᓇᐹᕐᑐᒧᑦ, ᓇᓂᓯᓇᓂ. 7ᐱᕈᕐᓰᕕᓕᕆᔨᖁᑎᒥᓄᑦ ᐅᖃᕐᐳᖅ, ‘ᑕᑯᒋᑦ, ᐊᕐᕌᒍᓂᒃ ᐱᖓᓱᓂᒃ ᑕᑯᔭᕐᑐᖃᑦᑕᕋᓗᐊᕐᐳᖓ ᐅᕗᖓ ᓇᐹᕐᑐᒧᑦ ᐸᐅᕐᖓᕐᓯᐅᕆᐊᕐᓗᖓ ᐱᑕᖃᓚᐅᕐᓯᒪᖏᒻᒪᑦ. ᓇᑲᓕᕈᒃ; ᓱᖕᒪᓄᓇ ᐱᕈᕐᓰᕕᖕᒥ ᐊᒡᕕᐊᕐᐹ?’ 8ᐱᕈᕐᓰᕕᓕᕆᔨᐅᑉ ᑭᐅᕚ, ‘ᐊᖓᔪᖅᑳᒃ ᑍᒤᓕᖓᑲᓚᐅᕐᓕ ᓱᓕ ᑕᒫᓂ ᐊᕐᕌᒍᒥ; ᐊᕙᑖ ᖃᓗᕋᕐᓂᐊᕐᐸᕋ ᐱᕈᕐᓴᐅᑎᒃᓴᖓᓂᒃ ᐆᒪᔪᑦ ᐊᓇᖓᓂᒃ ᐃᓕᓯᕕᒋᓗᒍ. 9ᐊᕐᕌᒍ ᐸᐅᕐᖓᓂᒃ ᐱᕈᕐᕕᐅᒃᐸᑦ ᓈᒻᒪᒃᐳᖅ; ᐱᕈᕐᕕᐅᖏᒻᒥᒃᐸᑦ ᑕᕝᕙ ᓇᑲᑕᐅᑎᒍᓐᓇᓛᕐᐸᑦ.’”
ᔩᓱᓯᐅᑉ ᐋᖅᑭᒃᓯᓂᖓ ᐊᕐᓇᒥᒃ ᐃᓕᖅᑯᓯᕐᓗᒃᑐᒥᒃ ᓴᐸᑎᐅᑎᓪᓗᒍ
10ᓴᐸᑎᒥᒃ ᐊᔪᕆᕐᑐᐃᑎᓪᓗᒍ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂ. 11ᐊᕐᓇᒥᒃ ᑕᕝᕙᓃᑦᑐᖃᓚᐅᕐᐳᖅ ᐊᓂᕐᓂᕐᓗᖕᒧᑦ ᐃᓗᒻᒥᕐᑕᐅᓯᒪᔪᒥᒃ ᑖᑦᓱᒪ ᐋᓐᓂᐊᑎᑉᐹ ᐅᑭᐅᓂᒃ 18ᓂᒃ, ᑖᓐᓇ ᐱᕆᖓᓚᐅᕐᐳᖅ ᐃᓯᕕᑦᑐᓐᓇᕋᓂ. 12ᔩᓱᓯᐅᑉ ᑕᑯᒐᒥᐅᒃ, ᕾᖁᕚ ᐅᖃᐅᑎᓪᓗᒍ, “ᐊᕐᓈᖅ, ᐋᓐᓂᐊᒋᔭᕐᓂᑦ ᐋᖅᑭᒃᑕᐅᕗᑎᑦ.” 13ᐸᑎᒻᒥᖕᒪᒍ, ᑕᕝᕔᓐᓇᖅ ᐊᕐᓇᖅ ᐃᓯᕕᑉᐳᖅ, ᑖᑦᓱᒪ ᒎᑎ ᓂᕐᑐᓕᕐᐹ.
14 #
ᒨᓯᓯ ᐂᑉᐸᖏᑦ 20:9,10; ᒨᓯᓯ ᑕᓪᓕᒪᖏᑦ 5:13,14. ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᑦᑕ ᐊᐅᓚᑦᓯᔨᖓᑦ ᔩᓱᓯᒧᑦ ᓂᓐᖓᒃᐳᖅ ᓴᐸᑎᒥ ᐋᖅᑭᒃᓯᖕᒪᑦ, ᐃᓄᐃᑦ ᐅᖃᐅᑎᕔᑦ, “ᐅᓪᓗᓂᒃ ᐱᖓᓲᔪᕐᑐᓂᒃ ᐱᓇᓱᐊᕐᕕᒃᓴᕐᑕᖃᕐᐳᖅ; ᐅᓪᓗᓂ ᑖᒃᑯᓇᓂ ᕾᒋᑦᓯ ᐋᖅᑭᒃᑕᐅᔭᕐᑐᕐᓗᓯ, ᓴᐸᑎᒥᐅᖏᑦᑐᖅ.”
15ᐊᑕᓂᐅᑉ ᑭᐅᕚ ᐅᖃᕐᓗᓂ, “ᐃᓕᑦᓯ ᑕᒃᑯᕐᒨᕐᑐᓯ! ᐆᒪᔪᖁᑎᑦᓯᓐᓂᒃ ᓯᐅᑎᖅᑯᕐᑐᔪᖁᑎᒥᓂᒡᓘᓐᓃᑦ ᐃᓂᖓᓂᑦ ᐱᑐᐃᑦᔮᕐᓯᕙᒃᐳᓯ ᐃᒥᕐᑎᒋᐊᕐᑐᕐᓗᒍ ᓴᐸᑎᐅᑎᓪᓗᒎ? 16ᐅᓇᓕ ᐊᕐᓇᖅ, ᐂᑉᕋᕼᐋᒻ ᑭᖑᕚᖓ ᓵᑖᓇᓯᐅᑉ ᕿᓚᒃᓱᕐᓯᒪᓚᐅᕐᑕᖓ ᐊᕐᕌᒍᓂᒃ 18ᓂᒃ, ᑖᓐᓇ ᕿᓚᕈᑦᔮᕐᑕᐅᔭᕆᐊᖃᓐᖏᓛᖅ ᓴᐸᑎᒥ?” 17ᑍᒫᒃ ᐅᖃᕐᒪᑦ, ᐊᑭᕋᕐᑐᕋᓱᐊᕐᑐᓕᒫᑦ ᑲᓐᖑᓱᓕᕐᐳᑦ; ᐃᓄᓕᒫᑦ ᖁᕕᐊᓱᒃᑐᐊᓘᓕᕐᓗᑎᒃ, ᔩᓱᓯᐅᑉ ᑲᒪᓇᕐᑎᑕᓕᒫᖏᑦ ᐱᑦᔪᑎᒋᓪᓗᒋᑦ.
ᐊᑦᔨᐅᔪᖅ ᐱᕈᕐᓯᐊᒃᓴᑦ ᒥᑭᓐᓂᕐᐹᖓᑦ ᒪᓯᑕᕐᑦ
ᒫᑎᐅᓯ 13:31-32; ᒫᑯᓯ 4:30-32
18ᑍᒤᒻᒪᑦ ᔩᓱᓯ ᐅᖃᕐᐳᖅ, “ᓱᓇᒥᒃ ᒎᑎᐅᑉ ᐊᑕᓂᐅᕕᖓ ᐊᑦᔨᖃᕐᐹ? ᓱᓇᒧᑦ ᐊᑦᔨᐅᑎᑦᓱᓐᓇᕐᐸᕋ? 19ᐃᒤᑦᑑᔮᕐᐳᖅ, ᐱᕈᕐᓯᐊᒃᓴᖅ ᒥᑭᓐᓂᕐᐹᖅ ᒪᓯᑕᕐᑦ ᐊᖑᑎᐅᑉ ᐱᕈᕐᓯᐊᒃᓴᖅ ᒥᑭᔪᑯᓗᒃ ᐱᒐᒥᐅᒃ ᐱᕈᕐᓰᕕᖕᒥᓄᑦ ᑲᓐᖓᕐᓲᑎᒋᕚ; ᑖᓐᓇ ᐱᕈᓕᕐᐳᖅ ᓇᐹᕐᑐᓐᖑᕐᓗᓂ, ᑎᖕᒥᐊᑦ ᑕᕝᕙᓂ ᐊᕙᓚᖓᔪᖏᓐᓂ ᐃᕙᕕᖃᕈᓐᓇᕐᓯᓪᓗᑎᒃ.”
ᐊᑦᔨᐅᔪᖅ ᐳᕙᓪᓚᖅᑯᑦ
ᒫᑎᐅᓯ 13:33
20ᓱᓕ ᔩᓱᓯ ᐅᖃᕆᕗᖅ, “ᓱᓇᒧᓪᓕ ᒎᑎᐅᑉ ᐊᑕᓂᐅᕕᖓ ᐊᑦᔨᐅᑎᑦᓱᓐᓇᕆᕙᕌ? 21ᐃᒤᑦᑑᔮᕐᐳᖅ, ᐳᕙᓪᓚᖅᑯᑦ,#13:21 ᐳᑦᔪᕐᓯᐅᑎᒃ ᐊᕐᓇᐅᑉ ᐳᕙᓪᓚᖅᑯᑦ ᐃᓚᓕᐅᑎᕚ ᓂᐊᖂᔭᒃᓴᖕᒧᑦ ᐊᖏᔪᒧᑦ, ᓂᐊᖂᔭᒃᓴᓕᒫᖅ ᑖᓐᓇ ᐳᕙᓪᓚᕐᑎᑉᐹ.”
ᐃᑎᕐᕕᒃ ᓂᕈᑭᑦᑐᖅ
ᒫᑎᐅᓯ 7:13-14,21-23
22ᔩᓱᓯ ᓄᓇᓕᒃᑎᒍᑦ ᐃᒡᓗᒐᓴᒃᑎᒍᓪᓗ ᐊᖅᑯᓵᕐᐳᖅ, ᐃᓄᐃᑦ ᐊᔪᕆᕐᑐᕐᓗᒋᑦ ᔨᕉᓴᓕᒻᒧᐊᕐᐸᓪᓕᐊᓪᓗᓂ. 23ᐃᓄᐃᑦ ᐃᓚᖓᑦᑕ ᐅᖃᐅᑎᕚ, “ᐊᑕᓃᖅ ᐃᓄᐃᑦ ᐅᓄᖏᑦᑐᑦ ᐱᐅᓕᔭᐅᔪᒫᕐᐹᑦ?”
ᔩᓱᓯᐅᑉ ᐅᖃᐅᑎᕔᑦ, 24“ᐊᒃᓱᕈᕆᑦᓯ ᐃᑎᕐᕕᑭᑦᑐᒃᑯᑦ ᐃᑎᕋᓱᐊᕐᓗᓯ; ᐊᒥᓱᑦ ᐃᑎᕋᓱᐊᕐᓂᐊᕐᒪᑕ ᐃᑎᕈᓐᓇᕐᓂᐊᕋᑎᒡᓗ. 25ᐃᒡᓘᑉ ᐃᓄᐊᑕ ᒪᑭᓪᓗᓂ ᒪᑐ ᒪᑐᒃᐸᒍ; ᐃᓕᑦᓯ ᑕᕝᕙ ᓯᓚᑖᓂ ᓇᖏᓕᕈᒫᕐᐳᓯ ᑎᒡᓗᒃᑐᕐᓗᓯ, ᐅᖃᕈᒫᕐᐳᓯ, ‘ᐊᑕᓃᖅ, ᒪᑐᐃᕈᑎᑎᒍᑦ,’ ᑖᑦᓱᒪ ᑭᐅᔪᒫᕐᐹᓯ, ‘ᓇᑭᓐᖔᕐᒪᖔᑦᓯ ᖃᐅᔨᒪᓐᖏᓚᑦᓯ.’ 26ᑕᕝᕙ ᑭᐅᔪᒫᕐᐳᓯ, ‘ᓂᕆᖃᑎᒋᓚᐅᕐᐸᑦᑎᒋᑦ ᐃᒥᖃᑎᒋᓪᓗᑎᓪᓗ, ᐊᔪᕆᕐᑐᐃᓚᐅᕐᐳᑎᑦ ᓄᓇᑦᑎᓐᓂ.’ 27#ᐃᓐᖏᕈᑦ 6:8.ᑖᓐᓇ ᑭᐅᔪᒫᕆᕗᖅ, ‘ᓇᑭᓐᖔᕐᒪᖔᑦᓯ ᖃᐅᔨᒪᓐᖏᓚᑦᓯ; ᑕᒫᓃᓐᖏᓚᐅᕆᑦᓯ, ᐱᐅᖏᑦᑐᓕᔪᐊᓘᔪᓯ!’ 28#ᒫᑎᐅᓯ 22:13; 25:30.#ᒫᑎᐅᓯ 8:11,12.ᑕᕝᕙᓂ ᕿᐊᔪᒫᕐᐳᓯ ᐊᒡᓕᕈᓚᕐᓗᓯᓗ, ᐂᑉᕋᕼᐋᒻ ᐂᓴᑭᓗ ᔧᑯᓗ ᓇᓚᐅᑦᑍᔫᓚᐅᕐᑐᓪᓗ ᐊᑕᓂᐅᕕᖓᓃᑦᑐᑦ ᑕᑯᒍᑦᓯᐅᒃ ᐃᓕᑦᓯ ᐊᓂᑎᑕᐅᓗᓯ. 29ᐃᓄᐃᑦ ᑎᑭᑦᓱᒫᕐᐳᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ, ᓯᕿᓂᐅᓪᓗ ᓂᐱᕕᐊᑕ ᓇᓛᓂᑦ, ᐅᓐᓄᐊᓪᓗ ᓇᓛᓂᑦ, ᐅᓪᓘᓪᓗ ᓇᓛᓂᑦ, ᑖᒃᑯᐊ ᐃᒃᓯᕙᖃᑕᐅᔪᒫᕐᐳᑦ ᓂᕆᕕᖕᒥ ᒎᑎᐅᑉ ᐊᑕᓂᐅᕕᖓᓂ. 30#ᒫᑎᐅᓯ 19:30; 20:16; ᒫᑯᓯ 10:31.ᑕᑯᒋᑦ, ᑭᖑᓪᓕᐅᔪᑦ ᓯᕗᓪᓕᐅᔪᒫᕐᐳᑦ, ᓯᕗᓪᓖᓪᓗ ᑭᖑᓪᓕᐅᔪᒫᕐᓗᑎᒃ.”
ᔩᓱᓯᐅᑉ ᓇᒡᓕᒍᓱᖕᓂᖓ ᔨᕉᓴᓕᒻᒥᒃ
ᒫᑎᐅᓯ 23:37-39
31ᑍᑦᓱᒪᓂ ᐃᑲᕐᕋᒥ ᐹᕆᓯᑦ ᔩᓱᓯᒧᐊᕐᐳᑦ ᐅᖃᐅᑎᓪᓗᒍ, “ᑕᒫᓐᖓᑦ ᐊᐅᓪᓚᕆᑦ, ᐃᕉᑕᓯᐅᑉ ᑐᖁᑦᓱᒪᖕᒪᑎᑦ.”
32ᔩᓱᓯᐅᑉ ᐅᖃᐅᑎᕔᑦ, “ᑎᕆᒐᓂᐊᖅ ᑍᓐᓇ ᐅᖃᐅᑎᔭᕐᑐᕐᓯᐅᒃ, ‘ᑕᑯᒋᑦ, ᐅᓪᓗᒥ ᐊᓂᕐᓂᕐᓗᖕᓂᒃ ᐊᓂᑎᑦᓯᕗᖓ ᐋᖅᑭᒃᓯᓪᓗᖓᓗ, ᖃᐅᒃᐸᑦ ᓱᓕ, ᐅᓪᓗᐃᓪᓗ ᐱᖓᔪᐊᓐᓂ ᐱᔭᕇᓂᐊᕐᐳᖓ. 33ᓱᓕᓕ ᒫᓐᓇ ᐃᖏᕐᕋᔭᕆᐊᖃᕐᐳᖓ ᐅᓪᓗᒥ ᖃᐅᒃᐸᓪᓗ ᐅᖓᓕᐊᒍᓗ; ᓈᒻᒪᖏᒻᒪᑦ ᓇᓚᐅᑦᑍᔪᖅ ᑐᖁᑕᐅᔭᕆᐊᒃᓴᖅ ᔨᕉᓴᓕᐅᑉ ᐊᓯᐊᓂ.’
34“ᔨᕉᓴᓕᒻ, ᔨᕉᓴᓕᒻ, ᓇᓚᐅᑦᑍᔪᓂᒃ ᑐᖁᑦᓯᔪᑎᑦ ᐅᔭᖅᑲᓄᑦ ᒥᓪᓗᕐᑐᑎᑦ ᓇᓚᐅᑦᑍᔪᓂᒃ! ᐅᓄᕐᑐᐃᕐᓱᕐᓗᖓ ᐃᓄᒋᔭᑎᑦ ᐃᕿᑦᓱᒪᑲᑦᑕᓚᐅᕋᓗᐊᕐᐸᒃᑲ ᓲᕐᓗ ᐊᕿᒡᒋᐅᔭᐅᑉ ᕿᑐᕐᖓᓂ ᐃᓴᕈᕐᒥ ᐊᑖᓄᑦ ᑲᑎᑎᑕᖏᑎᑐᑦ, ᑍᒤᑕᐅᔪᒪᓚᐅᓐᖏᓚᓯᓕ! 35#ᐃᓐᖏᕈᑦ 118:26.ᑕᑯᒋᑦ, ᐃᒡᓗᓯ ᕿᒪᒃᑕᐅᔪᒫᓕᕐᐳᖅ. ᐅᖃᐅᑎᕙᑦᓯ, ᑕᑯᓂᐊᕈᓐᓃᕐᐸᑦᓯᖓ ᐅᖃᓚᐅᖅᑳᕐᑎᓐᓇᓯ, ‘ᒎᑎᐅᑉ ᓮᒻᒪᕐᓕᐅᒃ ᐊᑕᓂᐅᑉ ᐊᑎᖓᓂ ᑎᑭᑦᑐᖅ!’”
Currently Selected:
ᓘᑲᓯᐅᑉ ᐊᒡᓚᖏᑦ 13: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
