ᓘᑲᓯᐅᑉ ᐊᒡᓚᖏᑦ 14

ᔩᓱᓯᐅᑉ ᐋᖅᑭᒃᓯᓂᖓ ᐋᓐᓂᐊᔪᒥᒃ

1ᓴᐸᑎᑦ ᐃᓚᖓᓐᓂ ᔩᓱᓯ ᓂᕆᔭᕐᑐᕐᐳᖅ ᐹᕆᓯᑦ ᓯᕗᓕᕐᑎᖓᑦᑕ ᐃᓚᖓᑦᑕ ᐃᒡᓗᖓᓄᑦ, ᑖᒃᑯᐊ ᖃᐅᔨᓴᑦᓯᐊᕋᓱᒃᐹᑦ. 2ᑕᑯᒋᑦ, ᐊᖑᒻᒥᒃ ᑕᕝᕙᓃᑦᑐᖃᕐᐳᖅ ᓂᐅᒥᒍᑦ ᑕᓕᕐᒥᒍᓪᓗ ᐃᒻᒪᒃᓯᒪᓂᕐᒥᓄᑦ ᐳᕕᑦᑐᒥᒃ, 3ᔩᓱᓯ ᐅᖃᕐᐳᖅ, ᐱᖁᔭᓂᒃ ᐃᓕᓮᔨᓄᑦ ᐹᕆᓯᓄᓪᓗ, “ᐱᖁᔧᑦ ᓴᐸᑎᒥ ᐋᖅᑭᒃᓯᖁᔨᕚ ᐋᖅᑭᒃᓯᖁᔨᓐᖏᓚᓪᓘᓐᓃᑦ?”

4ᑖᒃᑯᐊ ᓂᓪᓕᓐᖏᓚᑦ. ᑕᕝᕙ ᔩᓱᓯᐅᑉ ᐅᐸᒃᓗᒍ ᐊᖑᑦ ᐋᖅᑭᒃᐹ, ᑕᕝᕙᓐᖓᑦ ᐊᓂᖁᓪᓗᒍ. 5#ᒫᑎᐅᓯ 12:11.ᑖᒃᑯᐊ ᐅᖃᐅᑎᕔᑦ, “ᓇᓪᓕᓯ ᐃᕐᓂᖓ ᐆᒪᔪᖁᑎᖓᓘᓐᓃᑦ ᐃᒥᕐᑕᕐᕕᖕᒧᑦ ᑲᑕᒃᐸᑦ, ᑐᐊᕕᕐᓗᓂ ᕿᓗᓯᒐᔭᓐᖏᓛᖅ ᓴᐸᑎᐅᑎᓪᓗᒍ?”

6ᑖᒃᑯᐊ ᑕᒪᑐᒥᖓ ᑭᐅᔪᓐᓇᓐᖏᓚᑦ.

ᒥᑭᒡᓕᑎᕐᓂᕐᒥᒃ ᑐᓐᖓᓱᒃᑎᑦᓯᓂᕐᒥᒡᓗ

7ᔩᓱᓯ ᖃᐅᔨᒐᒥ ᐃᓄᐃᑦ ᐃᓚᖏᑦ ᓂᕆᔭᕐᑐᕐᓯᒪᔪᑦ ᐃᒃᓯᕙᐅᑕᕐᓂ ᐃᓂᑦᓯᐊᕙᐅᓂᕐᐹᓂ ᐃᒃᓯᕙᔪᒪᖕᒪᑕ, ᐊᑦᔨᐅᔪᒥᒃ ᐅᖃᐅᑎᕔᑦ, 8#ᓲᓗᒨᓂ 25:6,7.“ᓂᕆᔭᕐᑐᖁᔭᐅᒍᑦᓯ ᓇᓪᓕᐊᓐᓄᑐᐃᓐᓇᖅ ᑲᑎᑎᑕᐅᕋᑖᕐᑐᓄᑦ, ᐃᓂᑦᓯᐊᕙᐅᓂᕐᐹᓂ ᐃᖏᓐᓂᐊᕋᓯ, ᐃᓕᑦᓯᓐᓂᑦ ᐱᓪᓚᕆᐅᓂᕐᓴᒥᒃ ᓂᕆᔭᕐᑐᕐᑐᖃᑐᐃᓐᓇᕆᐊᖃᕐᒪᑦ, 9ᑖᑦᓱᒪ ᐃᓕᑦᓯᓐᓂᒃ ᓂᕆᔭᕐᑐᖁᔨᔫᑉ ᐅᐸᒡᓗᓂᑎᑦ ᐅᖃᐅᑎᒃᐸᑎᑦ, ‘ᐅᓇ ᐊᒡᕔᕈᒃ,’ ᑕᕝᕙ ᑲᓐᖑᓱᓕᕐᓗᑎᑦ ᐃᓂᑦᓯᐊᕙᐅᓐᖏᓐᓂᕐᓴᒧᑦ ᐃᖏᑦᓴᕆᐊᖃᓕᕋᔭᕐᐳᑎᑦ. 10ᑍᒤᒻᒪᑦ ᓂᕆᔭᕐᑐᖁᔭᐅᒍᕕᑦ, ᐃᓂᑦᓯᐊᕙᐅᖏᓐᓂᕐᓴᒧᑦ ᐃᖏᑦᓴᕐᑐᕆᑦ, ᑖᑦᓱᒪ ᓂᕆᔭᕐᑐᖁᔨᔫᑉ ᐃᓕᑦᓯᓐᓂᒃ ᐅᐸᒡᓗᓂᑎᑦ ᐅᖃᐅᑎᒃᐹᑎᑦ, ‘ᐃᓚᓐᓈᒃ, ᐃᓂᑦᓯᐊᕙᐅᓂᕐᓴᒧᑦ ᐃᖏᑦᓴᕐᑐᕆᑦ’; ᑕᕝᕙ ᑖᒃᑯᓇᓐᖓᑦ ᓂᕆᔭᕐᑐᖃᑎᒋᓯᒪᔭᕐᓂᑦ ᖁᕕᐊᒋᔭᐅᒐᔭᕐᐳᑎᑦ. 11#ᒫᑎᐅᓯ 23:12; ᓘᑲᓯ 18:14.ᐃᒻᒥᖕᓂᒃ ᐊᖏᔪᕈᕐᑎᑦᑐᓕᒫᑦ ᒥᑭᒡᓕᑎᑕᐅᓂᐊᕐᐳᑦ, ᐃᒻᒥᖕᓂᒡᓗ ᒥᑭᒡᓕᑎᕐᑐᑦ ᐊᖏᔪᕈᕐᑎᑕᐅᓂᐊᕐᐳᑦ.”

12ᐊᒻᒪ ᐅᖃᕆᕗᖅ ᓂᕆᔭᕐᑐᖁᔨᓯᒪᔪᒧᑦ, “ᐅᓐᓄᒍᒻᒥᑕᕐᒥᒃ ᓂᕆᕕᒡᔪᐊᕐᑎᑦᓯᓂᕐᒥᒡᓘᓐᓃᑦ ᓂᕆᔭᕐᑐᖁᔨᒍᕕᑦ, ᐃᓚᓐᓇᕆᔭᑎᑦ ᖃᑕᓐᖑᑎᑎᓪᓘᓐᓃᑦ ᐃᓚᒋᔭᑎᓪᓘᓐᓃᑦ ᐃᓅᖃᑎᑎᓪᓘᓐᓃᑦ ᐊᔪᕐᓴᖏᑦᑐᑦ ᓂᕆᔭᕐᑐᖁᓂᐊᕐᓇᒋᑦ, ᑖᒃᑯᓇᓐᖓᑦ ᓂᕆᔭᕐᑐᖁᔭᐅᓛᕐᒥᒐᕕᑦ ᓂᕆᑎᑦᑎᓂᕆᓚᐅᕐᑍᑦ ᐱᓪᓗᒍ. 13ᓂᕆᔭᕐᑐᖁᔨᒍᕕᓪᓕ, ᐊᔪᕐᓴᕐᑐᑦ ᕾᖁᒃᑭᑦ, ᐃᓚᑯᓐᖑᕐᓯᒪᔪᑦ, ᓄᕿᖃᑦᑎᐊᖏᑦᑐᑦ, ᑕᐅᑐᖏᑦᑐᓪᓗ; 14ᑕᕝᕙ ᓮᒻᒪᕐᑎᑕᐅᓂᐊᕐᐳᑎᑦ, ᑖᒃᑯᐊ ᓂᕆᔭᕐᑐᕐᑎᑎᔪᒃᑎᒃᓴᖃᖏᒻᒪᑕ ᐃᓕᖕᓂᒃ. ᐊᑭᓕᕐᑕᐅᔪᒫᕐᐳᑎᓪᓕ ᐃᓗᐊᕐᑐᑦ ᑐᖁᖓᔪᓂᑦ ᒪᑭᕝᕕᐊᓂ.”

ᔩᓱᓯᐅᑉ ᐊᑦᔨᐅᑎᑦᓯᓂᖓ ᓂᕆᕕᒡᔪᐊᕐᑐᓂᒃ

ᒫᑎᐅᓯ 22:1-10

15ᑕᕝᕙᓂ ᓂᕆᖃᑕᐅᔪᑦ ᐃᓚᖓᑦᑕ ᑕᒪᓐᓇ ᑐᓴᕋᒥᐅᒃ, ᔩᓱᓯ ᐅᖃᐅᑎᕚ, “ᓮᒪᕐᑎᑕᐅᓯᒪᔪᒥᒃ ᐃᓅᓯᖃᕐᐳᑦ ᑍᒃᑯᐊ ᓂᕆᖃᑕᐅᔪᒫᕐᑐᑦ ᒎᑎᐅᑉ ᐊᑕᓂᐅᕕᖓᓂ!”

16ᔩᓱᓯᐅᑉ ᐅᖃᐅᑎᕚ, “ᐊᖑᒻᒥᒃ ᓂᕆᕕᒡᔪᐊᕐᑎᑦᓯᔪᖃᓚᐅᕐᐳᖅ, ᐊᒥᓱᓂᒃ ᓂᕆᔭᕐᑐᖁᔨᓪᓗᓂ; 17ᓂᕆᕕᒡᔪᐊᕐᓇᖅ ᓇᓪᓕᐅᑎᖕᒪᑦ ᐱᔨᓂ ᑎᓕᕚ ᓂᕆᔭᕐᑐᖁᔭᒥᓄᑦ ᐅᖃᐅᔨᖁᓪᓗᒍ, ‘ᕾᓕᕆᑦᓯ ᒫᓐᓇ ᓂᕆᓂᐊᕐᑕᓯ ᐊᑐᐃᓐᓇᐅᓕᕐᒪᑕ!’ 18ᑖᒃᑯᐊ ᕾᖁᔭᐅᓯᒪᔪᑦ ᐊᑐᓂᑦ ᐅᐸᖏᑦᔪᑎᒃᓴᕐᓯᐅᓕᕐᐳᑦ. ᓯᕗᓪᓕᕐᐹᖅ ᐅᖃᕆᐊᕐᑐᕐᑐᒧᑦ ᐅᖃᕐᐳᖅ, ‘ᐱᕈᕐᓰᕕᖕᒥᒃ ᓂᐅᕕᕋᒪ, ᒫᓐᓇ ᑕᑯᔭᕐᑐᕆᐊᖃᕋᒃᑯ; ᕾᔪᓐᓇᖏᓐᓇᒪ ᐸᓯᔭᐅᑦᑍᓕᓚᖓ.’ 19ᐊᓯᐊ ᐅᖃᕆᕗᖅ, ‘ᐃᒻᒧᒃᓯᐅᒐᕐᓂᒃ 10ᓂᒃ ᐱᕈᕐᓰᕕᓕᕆᑦᔪᑎᒃᓴᓐᓂᒃ ᓂᐅᕕᕋᒪ, ᑖᒃᑯᐊ ᐆᒃᑐᕆᐊᕐᑐᕐᓂᐊᕋᒃᑭᑦ; ᕾᔪᓐᓇᖏᓐᓇᒪ ᐸᓯᔭᐅᑦᑍᓕᓚᖓ.’ 20ᐊᓯᐊ ᐅᖃᕆᕗᖅ, ‘ᓄᓕᐊᓂᕋᑖᕋᒪ, ᑍᒤᒻᒪᑦ ᕾᔪᓐᓇᓐᖏᓚᖓ.’ 21ᐱᔨ ᐊᖓᔪᖅᑳᒥᓄᑦ ᐅᑎᕐᐳᖅ ᑕᒪᒃᑯᓂᖓ ᐅᖃᕐᕕᒋᓪᓗᓂᐅᒃ. ᐊᖑᑦ ᓂᓐᖓᒃᑐᐊᓘᓪᓗᓂ ᐱᔨᓂ ᐅᖃᐅᑎᕚ, ‘ᑐᐊᕕᕐᓗᑎᑦ ᐊᑐᕆᐊᓄᑦ ᐂᓕᕆᑦ ᐊᖅᑯᑎᓪᓚᕆᖕᓄᓪᓗ ᓄᓇᓕᖕᓂ, ᐅᕗᓐᖓᐅᑎᓪᓗᒋᑦ ᐊᔪᕐᓴᕐᑐᑦ, ᐱᒡᒐᕐᑐᓪᓗ ᑕᐅᑐᖏᑦᑐᓪᓗ, ᑐᓯᐊᑦᑐᓪᓗ.’ 22ᐊᑯᓂᐅᖏᑦᑐᖅ ᐱᔨ ᐅᖃᕆᐊᕐᑐᕆᕗᖅ, ‘ᐊᖓᔪᖅᑳᖅ, ᑍᒫᒃ ᐱᖁᔨᖅᑲᐅᒐᕕᑦ ᐱᔭᕇᕐᐳᖅ, ᓱᓕᓕ ᐃᓂᒃᓴᖃᕐᐳᖅ.’ 23ᐊᖓᔪᖅᑳᖓ ᐅᖃᕐᐳᖅ ᐱᔨᒥᓄᑦ, ‘ᐃᒡᓗᒐᓮᑦ ᓯᓚᑖᓃᑦᑐᓄᑦ ᐊᖅᑯᑎᓄᑦ, ᓄᓇᓕᖕᓄᕆᐊᓄᓪᓗ ᐂᓕᕆᑦ, ᐃᓄᐃᑦ ᕾᖁᓗᒋᑦ ᐃᒡᓗᒐ ᑕᑕᑦᑕᐅᖁᓪᓗᒍ. 24ᐅᖃᐅᑎᕙᒋᑦ, ᑍᒃᑯᐊ ᕾᖁᓚᐅᕐᑕᕋᓗᐊᒃᑲ ᓂᕆᓂᐊᕐᑕᑦᑎᓐᓂᒃ ᐆᒃᓯᓂᐊᓐᖏᓚᓪᓘᓐᓃᑦ.’”

ᔩᓱᓯᒧᑦ ᐃᓕᓐᓂᐊᕐᑎᒋᔭᐅᓂᐅᑉ ᐊᑭᖃᕐᓂᖓ

ᒫᑎᐅᓯ 10:37-38

25ᑍᑦᓱᒪᓂ ᐃᓄᒋᐊᒃᑐᐊᓗᐃᑦ ᔩᓱᓯ ᐃᓚᒋᖕᒪᑦᔪᒃ; ᓵᕝᕕᒋᓪᓗᒋᑦ ᐅᖃᐅᑎᕔᑦ, 26#ᒫᑎᐅᓯ 10:37.“ᓇᓪᓕᐊᑦ ᐅᕙᓐᓄᑦ ᕾᔪᖅ ᐅᖓᓂᕐᓴᐅᒃᐸᑦ ᐊᑖᑕᒥᓂᒃ ᐊᓈᓇᒥᓂᒡᓗ, ᓄᓕᐊᒥᓂᒃ ᕿᑐᕐᖓᒥᓂᒡᓗ, ᖃᑕᓐᖑᑎᒥᓂᒃ ᓇᔭᖕᒥᓂᒡᓗ, ᐊᒡᓛᓪᓗ ᐃᒻᒥᓂᒃ, ᑖᓐᓇ ᐃᓕᓐᓂᐊᕐᑎᒋᔪᓐᓇᓐᖏᓚᕋ. 27#ᒫᑎᐅᓯ 10:38; 16:24; ᒫᑯᓯ 8:34; ᓘᑲᓯ 9:23.ᓴᓐᓂᖓᔪᓕᒃᓴᒥᓂᒃ ᐊᒡᔭᕐᓯᔪᒪᖏᑦᑐᖅ ᒪᓕᒡᓗᖓ, ᑖᓐᓇ ᐃᓕᓐᓂᐊᕐᑎᒋᔪᓐᓇᓐᖏᓚᕋ. 28ᓇᓕᕐᓯ ᐃᒡᓗᓕᐅᕈᒪᒍᓂ ᐳᕐᑐᔪᒥᒃ, ᐃᓱᒪᒃᓴᓯᐅᕈᑎᒋᖅᑳᕋᔭᓐᖏᓛ ᖃᓄᖅ ᐊᑭᑐᑎᒋᓂᐊᕐᒪᖔᑦ, ᑮᓇᐅᔭᑦ ᓈᒻᒪᖕᓂᐊᕋᓗᐊᕐᒪᖔᑕ ᐱᔭᕇᕈᓐᓇᕐᓗᒍ? 29ᑍᒫᒡᓕ ᐱᓚᐅᖏᒃᑯᓂ ᑐᓐᖓᕕᒃᓴᖓ ᐱᔭᕇᕋᓗᐊᕐᓗᒍ, ᐃᒡᓗ ᐳᕐᑐᔪᖅ ᐱᔭᕇᕈᓐᓁᓕᒃᐸᒍ, ᖃᐅᔨᔪᓂᑦ ᒥᑕᐅᑎᒋᔭᐅᓕᕋᔭᕐᐳᖅ. 30ᐅᖃᕐᓗᑎᒃ, ‘ᐅᓇ ᐃᒡᓗᒥᒃ ᐳᕐᑐᔪᒥᒃ ᓴᓇᒋᐊᓚᐅᕐᑑᒐᓗᐊᖅ ᐱᔭᕇᕈᓐᓇᖏᑦᑐᖅ.’ 31ᐅᕝᕙᓘᓐᓃᑦ ᐊᖓᔪᖅᑳᕐᔪᐊᖅ ᐊᖓᔪᖅᑳᕐᔪᐊᕐᒥᒃᑕᐅᖅ ᐊᓯᒥᓂᒃ ᐅᓇᑕᕆᐊᕐᑐᕐᓂᐊᕈᓂ, ᐅᓇᑕᕐᑐᒃᓴᓂᒃ 10,000ᓂᒃ ᐃᓚᖃᕐᓗᓂ, ᐃᓱᒪᒃᓴᕐᓯᐅᕋᔭᓐᖏᓛᖅ? ᐊᑭᕋᖏᑦ ᐅᓇᑕᕐᑐᒃᓮᑦ 20,000ᐅᐸᑕ, ᓵᓚᒋᔪᓐᓇᕐᓂᐊᕋᓗᐊᕐᒪᖔᕐᒥᐅᒃ? 32ᓵᓚᒋᔪᓐᓇᕐᓂᐊᕐᑑᔮᖏᒃᑯᓂᐅᒡᓕ, ᐅᖓᓯᒃᑎᓪᓗᒋᑦ ᓱᓕ ᑎᓕᓯᓕᕋᔭᕐᐳᖅ ᖃᓄᖅ ᐅᓇᑕᖏᑦᔪᑎᒃᓴᒥᖕᓂᒃ ᐊᐱᕆᑎᑦᓯᔭᕐᑐᕐᓗᓂ. 33ᑍᒫᒃᑕᐅᖅ ᑕᕝᕙ, ᓇᓕᕐᓯ ᐱᒋᔭᓕᒫᒥᓂᒃ ᖁᔭᓈᕐᓯᓂᐊᖏᑦᑐᖅ ᐃᓕᓐᓂᐊᕐᑎᒋᔪᓐᓇᓐᖏᓚᕋ.”

ᑕᕆᐅᑉ ᑕᕆᐅᖑᔪᓐᓃᕐᑑᑉ ᐊᑐᕐᑐᒃᓴᐅᖏᓐᓂᖓ

ᒫᑎᐅᓯ 5:13; ᒫᑯᓯ 9:50

34“ᑕᕆᐅᖅ ᐱᐅᔪᐊᓘᕗᖅ; ᑭᓯᐊᓂᓕ ᑕᕆᐅᕐᓱᓐᓂᑦᑐᓐᓃᕐᐸᑦ, ᖃᓄᕐᓕ ᑕᕆᐅᓐᖑᒃᑲᓐᓂᕐᑎᑕᐅᔪᓐᓇᕐᐹ? 35ᑍᒤᑉᐸᑦ ᐊᑐᕐᑐᒃᓴᐅᔪᓐᓃᕐᐳᖅ ᓄᓇᒧᓪᓘᓐᓃᑦ, ᐱᕈᕐᑐᓄᓪᓘᓐᓃᑦ ᐱᕈᕐᓴᐅᑎᒃᓴᒧᑦ; ᐃᒋᑕᒃᓴᑐᐃᓐᓇᐅᓕᕐᐳᖅ. ᑐᓵᔪᓂᒃ ᓯᐅᑎᓕᒃ ᑐᓴᕐᓕ.”

Currently Selected:

ᓘᑲᓯᐅᑉ ᐊᒡᓚᖏᑦ 14: EAIB

Highlight

Copy