ᒨᓯᓯ ᓯᑕᒪᖏᑦ 2
2
ᑭᖑᕚᖑᖃᑎᒌᑦ ᓯᕗᓕᕐᑎᓪᓗ ᐅᓇᑕᕐᑐᓴᐅᖃᑎᒌᑦ
1ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ, ᐅᖃᕐᓗᓂ, 2“ᐃᓴᕆᐊᓕᒥᐅᑦ ᐃᓂᒋᔭᒥᖕᓂ ᑕᖕᒫᕐᓯᒪᔭᕆᐊᖃᕐᐳᑦ, ᑭᖑᕚᖑᖃᑎᒌᑦ ᓇᓗᓁᒃᑯᑕᖓᑕ ᖃᓂᒋᔭᖓᓂ; ᑐᐱᕐᔫᑉ ᑲᑎᒪᕕᐅᑉ ᐅᖓᓯᒋᔭᖓᓂ, ᑐᐱᕐᒧᑦ ᓵᓐᖓᓪᓗᑎᒃ. 3ᓯᕿᓂᐅᑉ ᓄᐃᕕᐊᑕ ᓇᓛᓂ, ᔫᑕᐅᑉ ᑭᖑᕚᖏᑦ ᐅᓇᑕᕐᑐᒃᓴᖁᑎᑎᒃ ᐃᓂᖏᑦ ᒪᓕᒡᓗᒋᑦ; ᓈᓲᓂ ᐊᒥᓇᑕᐱᐅᑉ ᐃᕐᓂᖓ ᔫᑕᐅᑉ ᑭᖑᕚᖏᓐᓂ ᐊᖓᔪᖅᑳᖑᔪᒃᓴᐅᕗᖅ. 4ᐅᓇᑕᕐᑐᒃᓴᖁᑎᖏᓪᓗ 74,600ᓂᒃ ᐅᓄᕐᓂᖃᕐᐳᑦ.
5“ᑖᒃᑯᐊ ᖃᓂᒋᔭᖓᓂ ᑕᖕᒫᕐᕕᖃᕆᐊᖃᕐᐳᑦ ᐃᓴᑳᕆᐅᑉ ᑭᖑᕚᖏᑦ, ᓂᑖᓂᐅᓪ ᔪᐊᕆᐅᑉ ᐃᕐᓂᖓ ᐃᓴᑳᕆᐅᑉ ᑭᖑᕚᖏᓐᓂ ᐊᖓᔪᖅᑳᖑᔪᒃᓴᐅᕗᖅ. 6ᐅᓇᑕᕐᑐᒃᓴᖁᑎᖏᓪᓗ 54,400ᓂᒃ ᐅᓄᕐᓂᖃᕐᐳᑦ.
7“ᑖᒃᑯᐊ ᑲᓂᒋᔭᖓᓂ ᓯᐳᓗᓂᐅᑉ ᑭᖑᕚᖏᑦ, ᐃᓔᐊᑉᓗ ᕼᐃᓘᓂᐅᑉ ᐃᕐᓂᖓ ᓯᐳᓘᓂᐅᑉ ᑭᖑᕚᖏᓐᓄᑦ ᐊᖓᔪᖅᑳᖑᔭᕆᐊᖃᕐᐳᖅ. 8ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 57,400ᓂᒃ ᐅᓄᕐᓂᖃᕐᐳᑦ. 9ᓈᓴᕐᑕᐅᔪᓕᒫᑦ ᐅᓇᑕᕐᑐᒃᓴᐅᖃᑎᒌᑦ ᒪᓕᒡᓗᒋᑦ ᔫᑕᐅᑉ ᑭᖑᕚᖏᑕ ᑕᖕᒫᕐᓯᒪᕕᖓᑦᑕ ᑲᑎᓐᖓᔭᖏᑦ, 186,400ᐅᓚᐅᕐᐳ. ᐸᕐᓇᓕᕌᖓᑕᓗ ᑖᒃᑯᐊ ᓯᕗᓪᓕᕐᐸᐅᓗᑎᒃ ᐸᕐᓇᒋᐊᖃᕐᐳᑦ.
10“ᓯᕿᓂᐅᑉ ᓇᓛᓂ ᑕᖕᒫᓯᒪᕕᖃᕐᒥᓗᓂ ᐅᓇᑕᕐᑐᒃᓴᓂᒃ ᕉᐱᓂᐅᑉ ᑭᖑᕚᖏᓐᓂᑦ ᐅᓇᑕᕐᑐᒃᓴᐅᖃᑎᒌᓂᒃ, ᕉᐱᓂᐅᑉ ᑭᖑᕚᖏᓐᓄᑦ ᓯᕗᓕᕐᑎᐅᓗᓂ ᐃᓕᓱᕆ ᓯᑎᐅᕆᐅᑉ ᐃᕐᓂᖓ. 11ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 46,500ᓂᒃ ᐅᓄᕐᓂᖃᓚᐅᕐᐳᑦ.
12“ᑖᒃᑯᐊ ᖃᓂᒋᔭᖓᓂ ᓯᒥᐅᓂᐅᑉ ᑭᖑᕚᖏᑦ ᑕᖕᒫᕐᕕᖃᕐᓗᑎᒃ, ᓯᕗᓕᕐᑎᐅᓗᓂᓗ ᓯᒥᐅᓂᐅᑉ ᑭᖑᕚᖏᓐᓄᖅ ᓯᓘᒥᐅᓕ ᔪᕆᓴᑍᑉ ᐃᕐᓂᖓ. 13ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 59,300ᓂᒃ ᐅᓄᕐᓂᖃᕐᐳᑦ.
14“ᑕᖕᒫᕐᓯᒪᖃᑎᖃᕐᓗᑎᒃ, ᒑᑎᐅᑉ ᑭᖑᕚᖏᓐᓂᒃ, ᓯᕗᓕᕐᑎᐅᓗᓂᓗ ᒑᑎᐅᑉ ᑭᖑᕚᖏᓐᓄᖅ ᐃᓔᐊᓴᐱ ᕆᐅᓕᐅᑉ ᐃᕐᓂᖓ. 15ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 45,650ᓂᒃ ᐅᓄᕐᓂᖃᕐᐳᑦ. 16ᓈᓴᕐᑕᐅᔪᓕᒫᑦ ᐅᓇᑕᕐᑐᒃᓴᐅᖃᑎᒌᑦ ᒪᓕᒡᓗᒋᑦ ᕉᐱᓂᐅᑉ ᑭᖑᕚᖏᑕ ᑕᖕᒫᕐᓯᒪᕕᖓᑦᑕ ᑲᑎᓐᖓᔭᖏᑦ, 151,450ᐅᓚᐅᕐᐳᑦ. ᐸᕐᓇᓕᕌᖓᑕᓗ ᑖᒃᑯᐊ ᓯᕗᓪᓕᕐᐹᑦ ᑭᖑᓂᑦᓯᐊᖓᓂ ᐸᕐᓇᒋᐊᖃᕐᐳᑦ.
17“ᑐᐱᕐᔪᐊᕐᓕ ᑲᑎᒪᕕᒃ ᓕᕔᑎᓪᓗ ᐊᑯᓪᓕᕐᐸᐅᓗᑎᒃ ᑕᖕᒫᕐᓯᒪᕝᕕᖕᒥᖕᓂᑦ ᐃᖏᕐᕋᖃᑦᑕᕐᓂᐊᕐᐳᑦ ᐃᓂᒋᔭᒥᓃᓪᓗᑎᒃ ᑍᒫᒃ ᑕᖕᒫᕐᐸᒃᓗᑎᒃ, ᐊᑐᓂᑦ ᐃᓂᒋᔭᕆᐊᖃᕐᑕᒥᖕᓃᓪᓗᑎᒃ.
18“ᓯᕿᓂᐅᑉ ᓂᐱᕕᐊᑕ ᓇᓛᓃ ᑕᖕᒫᕐᓯᒪᕕᖃᕐᒥᓗᓂ ᐅᓇᑕᕐᑐᒃᓴᓂᒃ ᐃᕗᕅᒥᐅᑉ ᑭᖑᕚᖏᓐᓂᑦ ᐅᓇᑕᕐᑐᒃᓴᐅᖃᑎᒌᓂᒃ, ᐃᕗᕅᒥᐅᑉ ᑭᖑᕚᖏᓐᓄᑦ ᓯᕗᓕᕐᑎᐅᓗᓂ ᐃᓔᓴᒪ ᐊᒥᕼᐆᑎᐅᑉ ᐃᕐᓂᖓ. 19ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 40,500ᓂᒃ ᐅᓄᕐᓂᖃᕐᐳᑦ.
20“ᑖᒃᑯᐊ ᖃᓂᒋᔭᖓᓂ ᒫᓇᓯᐅᑉ ᑭᖑᕚᖏᑦ ᑕᖕᒫᕐᕕᖃᕐᓗᑎᒃ, ᓯᕗᓕᕐᑎᐅᓗᓂᓗ ᒫᓇᓯᐅᑉ ᑭᖑᕚᖏᓐᓄᖅ ᒐᒤᓕ ᐱᑕᔪᕆᐅᑉ ᐃᕐᓂᖓ. 21ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 32,200ᓂᒃ ᐅᓄᕐᓂᖃᕐᐳᑦ.
22“ᑖᒃᑯᐊ ᖃᓂᒋᔭᖓᓂ ᐱᓐᔭᒥᓂᐅᑉ ᑭᖑᕚᖏᑦ ᑕᖕᒫᕐᕕᖃᕐᓗᑎᒃ, ᓯᕗᓕᕐᑎᐅᓗᓂᓗ ᐱᓐᔭᒥᓂᐅᑉ ᑭᖑᕚᖏᓐᓄᖅ ᐊᐱᑖᓂ ᒋᑎᐅᓂᐅᑉ ᐃᕐᓂᖓ. 23ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 35,400ᓂᒃ ᐅᓄᕐᓂᖃᕐᐳᑦ. 24ᓈᓴᕐᑕᐅᔪᓕᒫᑦ ᐅᓇᑕᕐᑐᒃᓴᐅᖃᑎᒌᑦ ᒪᓕᒡᓗᒋᑦ ᐃᕗᕅᒥᐅᑉ ᑭᖑᕚᖏᑕ ᑕᖕᒫᕐᓯᒪᕕᖓᑦᑕ ᑲᑎᓐᖓᔭᖏᑦ, 108,100ᐅᓚᐅᕐᐳᑦ. ᐸᕐᓇᓕᕌᖓᑕᓗ ᑖᒃᑯᐊ ᐱᖓᔪᒋᔭᐅᓗᑎᒃ ᐸᕐᓇᒋᐊᖃᕐᐳᑦ.
25“ᓯᕿᓂᐅᑉ ᑕᕐᕋᖓᑕ ᓇᓛᓃ ᑕᖕᒫᓯᒪᕕᖃᕐᒥᓗᓂ ᐅᓇᑕᕐᑐᒃᓴᓂᒃ ᑖᓐ ᑭᖑᕚᖏᓐᓂᑦ ᐅᓇᑕᕐᑐᒃᓴᐅᖃᑎᒌᓂᒃ, ᑖᓐ ᑭᖑᕚᖏᓐᓄᑦ ᓯᕗᓕᕐᑎᐅᓗᓂ ᐊᕼᐂᓱᕆ ᐊᒥᓴᑍᑉ ᐃᕐᓂᖓ. 26ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 62,700ᓂᒃ ᐅᓄᕐᓂᖃᕐᐳᑦ.
27“ᑖᒃᑯᐊ ᖃᓂᒋᔭᖓᓂ ᐋᓱᕆᐅᑉ ᑭᖑᕚᖏᑦ ᑕᖕᒫᕐᕕᖃᕐᓗᑎᒃ, ᓯᕗᓕᕐᑎᐅᓗᓂᓗ ᐋᓱᕆᐅᑉ ᑭᖑᕚᖏᓐᓄᖅ ᐸᒊᓕ ᐆᑯᕌᓂᐅᑉ ᐃᕐᓂᖓ. 28ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 41,500ᓂᒃ ᐅᓄᕐᓂᖃᕐᐳᑦ.
29“ᑖᒃᑯᐊ ᖃᓂᒋᔭᖓᓂ ᓈᑉᑕᓕᐅᑉ ᑭᖑᕚᖏᑦ ᑕᖕᒫᕐᕕᖃᕐᓗᑎᒃ, ᓯᕗᓕᕐᑎᐅᓗᓂᓗ ᓈᑉᑕᓕᐅᑉ ᑭᖑᕚᖏᓐᓄᑦ ᐊᕼᐂᕋ ᐃᓈᓂᐅᑉ ᐃᕐᓂᖓ. 30ᐅᓇᑕᕐᑐᒃᓴᖁᑎᖏᑕᓗ ᓈᓴᕐᑕᐅᓂᖓᒍᑦ 53,400ᓂᒃ ᐅᓄᕐᓂᖃᕐᐳᑦ. 31ᓈᓴᕐᑕᐅᔪᓕᒫᑦ ᐅᓇᑕᕐᑐᒃᓴᐅᖃᑎᒌᑦ ᒪᓕᒡᓗᒋᑦ ᑖᓐ ᑭᖑᕚᖏᑕ ᑕᖕᒫᕐᓯᒪᕕᖓᑦᑕ ᑲᑎᓐᖓᔭᖏᑦ, 157,600ᐅᓚᐅᕐᐳᑦ. ᐸᕐᓇᓕᕌᖓᑕᓗ ᑖᒃᑯᐊ ᑭᖑᓪᓕᕐᐹᖑᓗᑎᒃ ᐸᕐᓇᒋᐊᖃᕐᐳᑦ.”
32ᑖᒃᑯᐊ ᑕᕝᕙ ᐃᓴᕆᐊᓕᒥᐅᑦ, ᓈᓴᕐᑕᐅᓚᐅᕐᑐᑦ ᐃᓚᒌᑦ ᒪᓕᒡᓗᒋᑦ. ᑕᖕᒫᕐᓯᒪᕕᖕᒦᑦᑐᓕᒫᑦ, ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ, 603,550ᓂᒃ ᑲᑎᓪᓗᒋᑦ ᐅᓄᕐᓂᖃᓚᐅᕐᐳᑦ. 33ᓕᕔᑎᓪᓕ ᓈᓴᖃᓯᐅᑎᔭᐅᓚᐅᓐᖏᓚᑦ ᐃᓴᕆᐊᓕᓄᑦ, ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ.
34ᑍᒫᒃ ᑕᕝᕙ ᐃᓴᕆᐊᓕᐅᑉ ᕿᑐᕐᖓᖏᑦ ᐱᓚᐅᕐᐳᑦ ᐊᑕᓂᐅᑉ ᒨᓯᓯᒥᒃ ᐱᖁᔨᓂᖓ ᒪᓕᒡᓗᒍ; ᑕᖕᒫᕐᕕᖃᓚᐅᕐᐳᓪᓗ ᐃᓂᒋᔭᕆᐊᖃᕐᑕᒥᖕᓂ ᑍᒫᒃᓗ ᐸᕐᓇᓕᕌᖓᒥᒃ ᐱᕙᓚᐅᕐᐳᑦ, ᐃᓚᒌᑦ ᒪᓕᒡᓗᒋᑦ, ᓯᕗᓕᕕᓂᕐᒥᓗ ᐃᓚᖃᕐᓂᖏᑦ ᒪᓕᒡᓗᒋᑦ.
Currently Selected:
ᒨᓯᓯ ᓯᑕᒪᖏᑦ 2: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
