ᒨᓯᓯ ᓯᑕᒪᖏᑦ 3
3
ᐂᕉᓂᐅᑉ ᐃᕐᓂᖏᑦ
1ᐅᑯᐊ ᑕᕝᕙ ᑎᑎᕋᕐᑕᐅᓯᒪᔪᑦ ᐂᕉᓂᐅᑉ ᒨᓯᓯᐅᓪᓗ ᐃᓚᖏᑦ ᐊᑕᓂᖅ ᒨᓯᓯᒧᑦ ᐅᖃᕐᑎᓪᓗᒍ ᖃᖅᑲᒥ ᓮᓁᒥ. 2#ᒨᓯᓯ ᓯᑕᒪᖏᑦ 26:60.ᐅᑯᐊ ᑕᕝᕙ ᐂᕉᓂᐅᑉ ᐃᕐᓂᖏᑕ ᐊᑎᖏᑦ: ᓇᑖᑉ, ᐊᖓᔪᒃᓯᕐᐹᖅ, ᐊᐱᕼᐅ, ᐃᓕᓯᕆ, ᐊᒻᒪᓗ ᐃᑕᒫᕐ. 3ᑖᒃᑯᐊ ᑕᕝᕙ ᐂᕉᓂᐅᑉ ᐃᕐᓂᖏᑦ, ᐅᕐᓱᕐᑎᕐᑕᐅᓪᓗᑎᒃ ᑐᓂᕐᕈᓯᕐᑎᑦᓯᔨᓐᖑᓚᐅᕐᑐᑦ, ᐱᔨᑦᓯᕐᑐᒃᓴᐅᓪᓗᑎᒃ ᑐᓂᕐᕈᓯᕐᑎᑦᓯᔨᓐᖑᓚᐅᕐᑐᑦ. 4#ᒨᓯᓯ ᐱᖓᔪᖏᑦ 10:1,2; ᒨᓯᓯ ᓯᑕᒪᖏᑦ 26:61.ᓇᑖᑉ ᐊᐱᕼᐅᓗ ᐊᑕᓂᐅᑉ ᓵᖓᓂ ᑐᖁᓚᐅᕐᐴᒃ ᐊᑕᓂᕐᒧᑦ ᑐᓂᕐᕈᓯᓚᐅᕐᒪᑎᒃ ᐃᑯᐊᓚᔪᒃᓴᒥᒃ ᐱᖁᔭᐅᓯᒪᓇᑎᒃ ᓮᓁᑉ ᐃᓄᖃᖏᑦᑐᖓᓂ; ᑖᒃᑯᐊᒃ ᕿᑐᕐᖓᖃᓚᐅᓐᖏᓚᒃ. ᐃᓕᓯᕆᓕ ᐃᑕᒫᕐᓗ ᑐᓂᕐᕈᓯᕐᑎᑦᓯᔨᐅᓂᕐᒥᒃ ᐱᔨᑦᓯᓚᐅᕐᐳᒃ ᐊᑖᑕᑎᒃ ᐂᕉᓂ ᐃᓚᒋᓪᓗᒍ.
ᓕᕔᑎᑦ ᐱᔨᑦᓯᕐᓂᖓᑦ ᑐᐱᕐᔪᐊᒥ
5ᐊᑕᓂᖅ ᐅᖃᓚᐅᕐᐳᖅ ᒨᓯᓯᒧᑦ, ᐅᖃᕐᓗᓂ, 6“ᓕᕔᑎᑦ ᑭᖑᕚᖏᑦ ᐅᕙᓐᓄᑦ ᖃᓂᒡᓕᑎᒃᑭᑦ, ᕾᑎᓪᓗᒋᓪᓗ ᐂᕉᓂᒧᑦ ᑐᓂᕐᕈᓯᕐᑎᑦᓯᔨᒧᑦ, ᑖᑦᓱᒥᖓ ᐱᔨᑦᓯᖁᓪᓗᒋᑦ. 7ᑖᒃᑯᐊ ᑖᑦᓱᒪ ᐱᔭᕆᐊᖃᕐᑕᖏᓐᓂᒃ ᑲᒪᔨᐅᓂᐊᕐᒪᑕ, ᐃᓄᒋᐊᒃᑐᕐᔪᐊᓪᓗ ᑐᒃᓯᐊᕆᐊᕐᐸᒃᑐᑦ ᐱᔭᕆᐊᖃᕐᑕᓕᒫᖏᓐᓂᒃ ᑲᒪᔨᐅᓂᐊᕐᒪᑕ, ᑐᐱᕐᔪᐊᒥ ᐱᔭᕆᐊᖃᕐᑐᓕᒫᓂᒃ ᐱᓕᕆᔨᐅᓂᐊᕐᐳᑦ. 8ᑐᐱᕐᔪᐊᓪᓗ ᑲᑎᒪᕕᐅᑉ ᐃᓗᓕᓕᒫᖏᓐᓂᒃ ᑲᒪᔨᐅᓂᐊᕐᒪᑕ, ᐃᓴᕆᐊᓕᐅᓪᓗ ᕿᑐᕐᖓᖏᑕ ᐱᔭᕆᐊᖃᕐᑕᓕᒫᖏᓐᓂᒃ, ᐱᓕᕆᐊᖃᕐᓗᑎᒃ ᑐᐱᕐᔪᐊᒥ ᑲᑎᒪᕕᖕᒥ ᐱᔭᕆᐊᖃᕐᑐᓂᒃ ᑕᒤᓐᓂᒃ. 9ᐃᕝᕕᓪᓗ ᓕᕔᑎᑦ ᑐᓂᔭᕆᐊᖃᕐᐸᑎᑦ ᐂᕉᓂᒧᑦ ᐃᕐᓂᖏᓐᓄᓪᓗ; ᑖᒃᑯᐊ ᓱᓇᒥᑦᓯᐊᕐᓗᒋᑦ ᑐᓂᔭᐅᖕᒪᑕ ᑖᑦᓱᒧᖓ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ. 10ᑍᒤᒻᒪᑦ ᑎᓕᓕᑭᑦ ᐂᕉᓂᓗ ᐃᕐᓂᖏᓪᓗ, ᑐᓂᕐᕈᓯᕐᑎᐅᓂᕐᒥᒃ ᐱᔭᒃᓴᖃᕐᓂᐊᕐᒪᑕ; ᑕᒫᓐᖓᑐᐃᓐᓇᕐᓕ ᐱᓗᓂ ᑖᒃᑯᓄᖓ ᖃᒡᓕᔪᖅ ᑐᖁᑕᐅᔭᕆᐊᖃᕐᐳᖅ.”
11ᐊᒻᒪ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, ᐅᖃᕐᓗᓂ, 12#ᒨᓯᓯ ᐂᑉᐸᖏᑦ 13:2.“ᑕᑯᒋᑦ, ᐅᕙᖓ ᓇᖕᒥᓂᖅ ᓕᕔᑎᑦ ᓂᕈᐊᓚᐅᕐᐸᒃᑲ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ ᐃᕐᓂᐊᖑᖅᑳᕐᑐᑦ ᐊᖑᑎᑦ ᐱᓐᖏᖔᕐᓗᒋᑦ, ᐃᒡᓕᐊᕐᒥᑦ ᐊᓂᖅᑳᕐᑐᑦ ᐃᓴᕆᐊᓕᒥᐅᓂᑦ. ᑍᒤᒻᒪᑦ ᓕᕔᑎᑦ ᐱᒋᓂᐊᕐᐸᒃᑲ, 13ᐃᕐᓂᐊᖑᔪᑦ ᓯᕗᓪᓕᕐᐹᒥᒃ ᐱᒋᒐᒃᑭᑦ. ᑍᑦᓱᒪᓂ ᓇᓪᓕᐅᑦᑐᒥ ᐃᕐᓂᐊᖑᖅᑳᕐᑐᑦ ᑐᖁᑎᓚᐅᕋᒃᑭᑦ ᓄᓇᒥ ᐄᑦᔨᑉᑎᒥ, ᐅᕙᓐᓂᒃ ᐃᑦᔪᕐᓁᑎᑉᐳᖓ ᐃᓴᕆᐊᓕᓂ ᐃᕐᓂᐊᖑᖅᑳᕐᑐᓄᑦ, ᐃᓄᖕᓄᓪᓗ ᓂᕐᔪᑎᓄᓪᓗ. ᑖᒃᑯᐊ ᐱᒋᓂᐊᕐᐸᒃᑲ: ᐅᕙᖓ ᐊᑕᓂᐅᒐᒪ.”
ᓕᕔᑎᑦ ᓈᓴᕐᑕᐅᓂᖏᑦ
14ᐊᒻᒪ ᐊᑕᓂᖅ ᐅᖃᓚᐅᕐᐳᖅ ᒨᓯᓯᒧᑦ ᓮᓁᒥ ᐃᓄᖃᔪᐃᑦᑐᒥ, ᐅᖃᕐᓗᓂ, 15“ᓕᕔᑎᑦ ᕿᑐᕐᖓᖏᑦ ᓈᓴᒃᑭᑦ ᐃᓚᒌᑦ ᒪᓕᒡᓗᒋᑦ ᓯᕗᓕᕕᓂᖏᑕ ᐃᓚᒌᖕᓂᒋᑦ ᒪᓕᒡᓗᒋᑦ, ᐊᖑᑎᓕᒫᑦ ᓈᓴᕐᓗᒋᑦ ᐊᑕᐅᓯᕐᒥᒃ ᑕᖅᑭᖃᕐᑐᓂᑦ ᐱᒋᐊᕐᓗᒋᑦ ᐊᖓᔪᒃᓰᓪᓗ.” 16ᑕᕝᕙ ᒨᓯᓯᐅᑉ ᓈᓴᓚᐅᕐᐰᑦ ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ, ᑍᒫᒃ ᐱᖁᔭᐅᓚᐅᕋᒥ. 17ᐅᑯᐊ ᑕᕝᕙ ᓕᕔᑎᑦ ᐃᕐᓂᕆᓚᐅᕐᑕᖏᑕ ᐊᑎᖏᑦ, ᒌᕐᓲᓂ, ᑯᕼᐋᑦ, ᒥᕋᕆᓗ. 18ᐅᑯᐊᓗ ᑕᕝᕙ ᒌᕐᓲᓂᐅᑉ ᐃᕐᓂᖏᑕ ᐊᑎᖏᑦ ᐱᓚᒌᑦ ᒪᓕᒡᓗᒋᑦ: ᓕᑉᓂ, ᓯᒥᐂᓗ. 19ᑯᕼᐋᑎᐅᓪᓗ ᐃᕐᓂᖏᑦ ᐃᓚᒌᑦ ᒪᓕᒡᓗᒋᑦ: ᐊᒪᕌᒻ, ᐃᔾᕼᐊᕆ, ᕼᐃᐸᕋᓐ, ᐊᑦᔧᐅᓕᓗ. 20ᒥᕋᕆᐅᓪᓗ ᐃᕐᓂᖏᑦ ᐃᓚᒌᑦ ᒪᓕᒡᓗᒋᑦ: ᒪᕼᐊᓔ, ᒧᓮᓗ. ᑖᒃᑯᐊ ᑕᕝᕙ ᓕᕔᑎᑦ ᑭᖑᕚᖏᑕ ᓯᕗᓕᕕᓂᖏᑦ.
21ᒌᕐᓲᓂᐅᑉ ᐃᓚᖏᓐᓂᑦ ᐱᔪᑦ ᓕᑉᓁᑎᐅᕗᑦ ᓯᒥᐂᑎᐅᓪᓗᑎᒡᓗ; ᑖᒃᑯᐊ ᑕᕝᕙ ᒌᕐᓲᓂᐅᑉ ᑭᖑᕚᖏᑦ. 22ᓈᓴᕐᑕᐅᓚᐅᕐᐳᑦ ᐊᖑᑎᓕᒫᑦ, ᐊᑕᐅᓯᖕᒥᒃ ᑕᖅᑭᖃᕐᑐᓂᑦ ᐱᒋᐊᕐᓗᒍ ᐊᖓᔪᒃᓰᓪᓗ, ᓈᓴᕐᑕᐅᔪᓪᓗ 7,500ᓂᒃ ᐅᓄᕐᓂᖃᓚᐅᕐᐳᑦ. 23ᐃᓚᒌᑦ ᒌᕐᓲᓁᑎᑦ ᑕᖕᒫᕐᕕᖃᓚᐅᕐᐳᑦ ᑐᐱᕐᔪᐊᑉ ᑲᑎᒪᕕᐅᑉ ᑐᓄᐊᓂ ᓯᕿᓂᐅᑉ ᓂᐱᕕᐊᑕ ᓇᓛᓂ. 24ᓯᕗᓕᕐᑎᐅᓚᐅᕐᑐᖅ ᒌᕐᓲᓂᐅᑉ ᑭᖑᕚᖏᓐᓄᑦ ᐊᑎᖃᓚᐅᕐᐳᖅ ᐃᓔᐊᓴᐱ ᓔᓕᐅᑉ ᐃᕐᓂᖓ. 25ᒌᕐᓲᓂᐅᑉ ᕿᑐᕐᖓᖏᑕ ᐱᔭᒃᓴᖏᑦ ᑐᐱᕐᔪᐊᒥ ᐃᓚᖏᑦ ᐃᒤᑦᑑᓚᐅᕐᐳᑦ, ᑐᐱᕐᔪᐊᖅ, ᐅᓕᖓᓗ, ᑖᓗᑕᕐᔪᐊᕐᓗ ᐃᑎᕐᑕᕐᕕᒃ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓ, 26ᑐᕐᓲᖓᑕᓗ ᐃᑎᕐᑕᕐᕕᖓᑕ ᑖᓗᑕᕐᔪᐊᖓ, ᑐᕐᓲᖕᓂᓗ ᓂᕕᖓᔪᑦ ᑐᐱᕐᔪᐊᑉ ᐊᕙᓗᐊᓂᒃ ᓈᔨᓯᒪᔪᑦ ᑐᓂᕐᕈᓯᕐᕕᐅᓪᓗ ᐊᕙᓗᐊᓂ, ᐃᐱᐅᑕᖏᓪᓗ, ᑖᒃᑯᓄᖓᓗ ᑐᕌᕐᑐᓕᒫᑦ.
27ᑯᕼᐋᑎᐅᑉ ᐃᓚᒌᖏᓐᓂᑦ ᐱᔪᑦ ᐃᓚᒌᑦ ᑍᔭᐅᓚᐅᕐᐳᑦ ᐊᒪᕋᒤᑎᓂᒃ, ᐃᓚᖏᓪᓗ ᐃᔾᕼᐊᕅᑎᓂᒃ, ᐃᓚᖏᓪᓗ ᕼᐃᐸᕋᓁᑎᓂᒃ, ᐃᓚᖏᓪᓗ ᐊᑦᔧᐅᓔᑎᓂᒃ; ᑖᒃᑯᐊ ᑕᕝᕙ ᐃᓚᒌᑦ ᑯᕼᐊᑍᑎᑦ. 28ᑖᒃᑯᓇᓂ ᐊᖑᑎᑦ ᐅᓄᕐᓂᖏᑦ ᒪᓕᒡᓗᒋᑦ, ᐊᑕᐅᓯᕐᒥᒃ ᑕᖅᑭᖃᕐᑐᓂᑦ ᐱᒋᐊᕐᓗᒍ ᐊᖓᔪᒃᓰᓪᓗ, 8,600ᓂᒃ ᐅᓄᕐᓂᖃᓚᐅᕐᐳᑦ ᐃᑦᔪᕐᓁᑦᑐᕕᖕᒥᒃ ᑲᒪᔨᐅᔪᑦ. 29ᑭᖑᕚᖑᖃᑎᒌᑦ ᑯᕼᐋᑎᐅᑉ ᕿᑐᕐᖓᖏᑦ ᑕᖕᒫᕐᕕᖃᓚᐅᕐᐳᑦ ᑐᐱᕐᔪᐊᑉ ᓂᒋᖓᓂ. 30ᓯᕗᓕᕐᑎᐅᔪᖅ ᓯᕗᓕᕕᓂᕐᒥ ᑯᕼᐋᑎᐅᑉ ᑭᖑᕚᖏᓐᓄᑦ ᐃᓔ-ᓴᐸᓇ ᐊᑦᔧᐅᓕᐅᑉ ᐃᕐᓂᖓ. 31ᑖᒃᑯᐊ ᐱᔭᒃᓴᖏᑕ ᐃᓚᖏᑦ ᐃᒃᓯᕐᕕᒃ ᐊᖏᕈᑎᑕᓕᒃ ᑲᒪᒋᓗᒍ, ᐊᒻᒪᓗ ᓵ, ᓇᓂᕈᐊᓪᓗ ᐃᓂᖓ, ᑐᓂᕐᕈᓯᕐᕖᓪᓗ, ᑐᓂᕐᕈᓯᕐᑎᑦᓯᔨᐅᓪᓗ ᐱᓕᕆᑦᔪᑎᖏᓐᓂᒃ ᐃᑦᔪᕐᓁᑦᑐᕕᖕᒦᑎᓪᓗᒍ, ᑕᓗᕐᔪᐊᕐᓗ ᐃᑦᔪᕐᓁᑦᑐᕕᒧᑦ ᑖᓗᑕᖅ, ᐱᔭᒃᓮᓪᓗ ᑕᒪᑐᒧᖓ ᑐᕌᖓᔪᓕᒫᑦ.
32ᐃᓕᓯᕆ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓ ᐊᖓᔪᖅᑳᖑᔭᕆᐊᖃᕐᐳᖅ ᓕᕔᑎᑦ ᓯᕗᓕᕐᑎᖏᓐᓄᑦ, ᐊᖓᔪᖅᑳᖑᓗᓂᓗ ᐃᑦᔪᕐᓁᑦᑐᕕᖕᒥ ᐱᓇᓱᐊᒐᖃᕐᑐᓄᑦ.
33ᐃᓚᒌᓂᑦ ᒪᕼᐊᓔᑎᓂᑦ ᒥᕋᕆᒃᑯᑦ ᐃᓚᒌᑦ ᐱᓯᒪᕗᑦ, ᐃᓚᒌᓪᓗ ᒧᓮᑎᑦ; ᑖᒃᑯᐊ ᒥᕋᐅᕆᒃᑯᑦ ᐃᓚᒌᖏᑦ. 34ᑖᒃᑯᓇᓂ ᐊᖑᑎᑦ ᐅᓄᕐᓂᖏᑦ ᒪᓕᒡᓗᒋᑦ, ᐊᑕᐅᓯᕐᒥᒃ ᑕᖅᑭᖃᕐᑐᓂᑦ ᐱᒋᐊᕐᓗᒍ ᐊᖓᔪᒃᓰᓪᓗ, 6,200ᓂᒃ ᐅᓄᕐᓂᖃᓚᐅᕐᐳᑦ. 35ᓯᕗᓕᕐᑎᐅᔪᖅ ᓯᕗᓕᕕᓂᕐᒥ ᒥᕋᕆᐅᑉ ᑭᖑᕚᖏᓐᓄᑦ ᔪᕅᓕ ᐊᐱᕼᐂᓕᐅᑉ ᐃᕐᓂᖓ. ᑖᒃᑯᐊ ᑕᖕᒫᕐᕕᖃᕆᐊᖃᓚᐅᕐᐳᖅ ᑐᐱᕐᔪᐊᑉ ᐅᐊᖕᓇᖓᓂ. 36ᑎᓕᔭᐅᑦᔪᑎᒋᓯᒪᔭᖏᑦ ᒥᕋᕆᐅᑉ ᕿᑐᕐᖓᖏᑕ ᑐᐱᕐᔪᐊᑉ ᖃᓇᖏᓐᓂᒃ ᑲᒪᔨᐅᓗᑎᒃ, ᓴᐅᓂᖏᓐᓂᒡᓗ, ᓇᑉᐸᖅᑯᑎᖏᓐᓂᒡᓗ, ᖃᓇᓕᕐᕕᖏᓐᓂᒡᓗ, ᐋᖅᑭᒃᓱᐃᑦᔪᑎᖏᓐᓂᒡᓗ, ᐊᓯᖏᓐᓂᒡᓗ ᑖᒃᑯᓄᖓ ᑐᕌᖓᔪᓕᒫᓂᒃ. 37ᑐᕐᓲᖓᑕᓗ ᓇᑉᐸᖅᑯᑎᓕᒫᖏᓐᓂᒃ, ᓇᑉᐸᖅᑯᓯᕐᕕᖏᓐᓂᒡᓗ, ᐸᐅᒍᐊᖏᓐᓂᒡᓗ, ᓄᖃᕈᑎᖏᓐᓂᒡᓗ.
38ᐅᑯᐊᓗ ᑕᖕᒫᕐᓯᒪᔭᕆᐊᖃᕐᐳᑦ ᑐᐱᕐᔪᐊᑉ ᑲᑎᒪᕕᐅᑉ ᓵᖓᓂ ᑲᓇᖕᓇᖓᓂ, ᒨᓯᓯᓗ ᐂᕉᓂᓗ ᐃᕐᓂᖏᓪᓗ, ᐃᑦᔪᕐᓁᑦᑐᕕᖕᒥᒃ ᑲᒪᔨᐅᓗᑎᒃ, ᐃᓴᕆᐊᓕᒥᐅᓪᓗ ᐱᔭᕆᐊᖃᕐᑕᓕᒫᖏᓐᓂᒃ ᐱᓇᓱᐊᕐᓗᑎᒃ; ᑖᒃᑯᓄᖓᓕ ᐃᓚᐅᖏᓪᓗᓂ ᖃᒡᓕᓗᐊᕐᑐᖅ ᑐᖁᑕᒃᓴᐅᕗᖅ. 39ᓕᕔᑎᓪᓕ ᑭᖑᕚᖏᓐᓂ ᒨᓯᓯᐅᑉ ᐂᕉᓂᐅᓪᓗ ᓈᓴᕐᑕᖏᑦ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ, ᐃᓚᒌᑦ ᐊᕕᒃᑐᕐᓯᒪᓂᖏᑎᒍᑦ ᐊᖑᑎᑦ ᐅᓄᕐᓂᖏᑦ ᒪᓕᒡᓗᒋᑦ, ᐊᑕᐅᓯᕐᒥᒃ ᑕᖅᑭᖃᕐᑐᓂᑦ ᐱᒋᐊᕐᓗᒍ ᐊᖓᔪᒃᓰᓪᓗ, 22,000ᓂᒃ ᐅᓄᕐᓂᖃᓚᐅᕐᐳᑦ.
ᓕᕔᑎᑦ ᓂᕈᐊᕐᑕᐅᓂᖏᑦ ᐃᕐᓂᐊᖑᖅᑳᕐᑐᑦ ᐱᔭᐅᓐᖏᖔᕐᓗᑎᒃ
40ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ: “ᓈᓴᒃᑭᑦ ᓯᕗᓪᓕᕐᐹᒥᒃ ᐊᖑᑎᑦ ᐃᕐᓂᐊᖑᖅᑳᕐᓯᒪᔪᓕᒫᑦ ᐃᓴᕆᐊᓕᒥᐅᓂ, ᐊᑕᐅᓯᕐᒥᒃ ᑕᖅᑭᖃᕐᑐᓂᑦ ᐱᒋᐊᕐᓗᒍ ᐊᖓᔪᒃᓰᓪᓗ, ᐊᑎᖏᓪᓗ ᐅᓄᕐᓂᖏᓪᓗ ᒪᓕᒡᓗᒋᑦ. 41ᓕᕔᑎᓪᓕ ᐅᕙᖓ ᐱᑦᔪᑎᒋᓗᖓ ᐱᓕᒃᑭᑦ, ᐅᕙᖓ ᐊᑕᓂᐅᒐᒪ, ᐃᓴᕆᐊᓕᒥᐅᓂ ᐃᕐᓂᐊᖑᖅᑳᕐᑐᓕᒫᑦ ᐱᓐᖏᖔᕐᓗᒋᖅ, ᓕᕔᑎᓪᓗ ᐆᒪᔪᖁᑎᖏᑦ, ᐃᓴᕆᐊᓕᒥᐅᓪᓗ ᐆᒪᔪᖁᑎᖏᓐᓂ ᐃᕐᓂᐊᖑᖅᑳᕐᑐᑦ ᐱᓐᖏᖔᕐᓗᒋᑦ.” 42ᑍᒤᒻᒪᑦ ᒨᓯᓯᐅᑉ ᐃᕐᓂᐊᖑᖅᑳᕐᑐᓕᒫᑦ ᐃᓴᕆᐊᓕᓂ ᓈᓴᕐᐰᑦ, ᐊᑕᓂᐅᑉ ᑍᒫᒃ ᐱᖁᓚᐅᕐᒪᒍ. 43ᐊᑕᐅᓯᕐᒥᒃ ᑕᖅᑭᖃᕐᑐᓂᑦ ᐱᒋᐊᕐᓗᒍ ᐊᖓᔪᒃᓰᓪᓗ, ᑖᒃᑯᐊᓕᒫᑦ ᓈᓴᕐᓗᒋᑦ ᐅᓄᕐᓂᖏᑦ 22,273ᓂᒃ ᐅᓄᕐᓂᖃᓚᐅᕐᐳᑦ.
44ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕆᕗᖅ: 45“ᓕᕔᑎᑦ ᓂᕈᐊᒃᑭᑦ ᐃᓴᕆᐊᓕᒥᐅᓂ ᐃᕐᓂᐊᖑᖅᑳᕐᑐᓕᒫᑦ ᐱᓐᖏᖔᕐᓗᒋᑦ, ᓕᕔᑎᓪᓗ ᐆᒪᔪᖁᑎᖏᑦ ᐱᓗᒋᑦ ᑍᒃᑯᐊ ᐆᒪᔪᖁᑎᖏᑦ ᐱᓐᖏᖔᕐᓗᒋᑦ. ᓕᕔᑎᑦ ᐱᒋᓂᐊᕋᒃᑭᑦ: ᐅᕙᖓ ᐊᑕᓂᐅᒐᒪ. 46ᓂᐅᕕᐊᕆᔭᕆᐊᖃᕐᐸᑎᑦ ᐃᓴᕆᐊᓕᒥᐅᓂ ᐃᕐᓂᐊᖑᖅᑳᕐᑐᑦ 273 ᐅᓄᓗᐊᕈᑎᔪᑦ ᓕᕔᑎᓂᑦ ᐅᓄᕐᓂᕐᓴᐅᑦᔪᑎᖏᑦ, 47ᓄᐊᑦᓯᔭᕆᐊᖃᕐᐳᑎᑦ ᑕᓪᓕᒪᓂᒃ ᓴᑯᔅᓂᒃ ᓯᐅᓪᕕᕆᓂᒃ ᑖᒃᑯᐊ ᐃᓄᐃᑦ ᐊᑐᓂᑦ ᐊᑭᖏᓐᓂᒃ; ᐃᑦᔪᕐᓁᑦᑐᕕᐅᑉ ᑮᓇᐅᔭᖏᑕ ᐅᖁᒤᓐᓂᖏᑦ ᒪᓕᒡᓗᒋᑦ, 48ᑮᓇᐅᔧᑦ ᓯᐅᓪᕕᕇᑦ ᑐᓂᓗᒋᑦ ᐂᕉᓂᒧᑦ ᐃᕐᓂᖏᓐᓄᓪᓗ ᐊᑭᓕᐅᑎᔪᑦ ᐃᕐᓂᐊᖑᖅᑳᕐᑐᑦ ᐅᓄᓗᐊᕈᑎᖏᓐᓄᑦ.” 49ᑕᕝᕙ ᒨᓯᓯᐅᑉ ᑮᓇᐅᔧᑦ ᓂᐅᕕᐅᑕᐅᔪᑦ ᑎᒍᕔᑦ ᐅᓄᓗᐊᕈᑎᔪᓂᑦ ᓕᕔᑎᓂᑦ ᐊᑭᓕᐅᑕᐅᔪᑦ. 50ᐃᓴᕆᐊᓕᒥᐅᑦ ᐃᕐᓂᐊᖑᖅᑳᕐᑐᖁᑎᖏᓐᓂᑦ ᑮᓇᐅᔧᑦ ᐱᓪᓗᒋᑦ, 1,365ᓂᒃ ᓴᑯᔅᓂᒃ ᓯᐅᓪᕕᕆᓂᒃ ᐅᓄᕐᓂᖃᕐᐳᑦ, ᐃᑦᔪᕐᓁᑦᑐᕕᐅᑉ ᑮᓇᐅᔭᑯᑎᖏᑕ ᐋᖅᑭᓯᒪᖁᔭᐅᓂᖏᑦ ᒪᓕᒡᓗᒋᑦ. 51ᒨᓯᓯᐅᓪᓗ ᓂᐅᕕᐅᑕᐅᔪᑦ ᑮᓇᐅᔧᑦ ᑐᓂᕔᑦ ᐂᕉᓂᒧᑦ ᐃᕐᓂᖏᓐᓄᓪᓗ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ, ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᒪᒍ.
Currently Selected:
ᒨᓯᓯ ᓯᑕᒪᖏᑦ 3: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.